Storia di Bida

Nos A Keda na Nos Asignacion

SEGUN E RELATO DI HERMANN BRUDER

Ta un cos a keda mi: sirbi cinco aña den e Legion Stranhero Frances of bai un prizon Maroki. Laga mi splica con bin mi a haya mi den e apuro aki.

MI A nace na Oppenau, Alemania, na 1911, apenas tres aña prome cu Prome Guera Mundial a cuminsa. Mi mayornan, Joseph y Frida Bruder, a haya 17 yiu. Ami tawata e di 13 yiu.

Un di e prome cosnan cu mi ta corda ta con mi a wak un trupa militar ta marcha den e caya principal di nos pueblo natal. E zonido ritmico di e drumband a trek mi y mi a cana tras di e musiconan bai te na e stacion di trein pa mira Papa y otro hombernan na uniform militar subi trein. Ora e trein a cuminsa move, algun di e hende mohenan cu a keda atras a cuminsa yora. Un par di dia despues, nos pasto a duna un sermon largo den misa y menciona nomber di cuater homber cu a muri defendiendo nan patria. “Awor nan ta den shelo”, el a splica. Un señora para banda di mi a cai flou.

Papa a haya keintura di tifus tempo e tawata den e liña di bataya Ruso. El a yega cas sumamente debil y casi mesora nan a mand’e e hospital local. E pasto a recomenda mi: “Bai na e kapel banda di santana y resa 50 Nos Tata y 50 Ave Maria. E ora ei bo tata lo bira bon.” Mi a sigui su conseho, pero e dia siguiente Papa a muri. Asta pa un hobensito, guera tawata un experencia masha doloroso.

 Con Mi A Haya e Berdad

Tawata masha dificil pa haya trabou na Alemania entre e dos gueranan. Pero despues cu mi a caba scol na 1928, mi a logra haya un trabou como hardinero na Basel, Suisa.

Mescos cu Papa, mi tawata un bon catolico. Mi meta tawata pa mi sirbi como monnik capuchino na India. Ora mi ruman homber Richard, cu pa e tempo ei tawata un Testigo di Yehova, a tende di mi plannan, el a biaha bin Suisa specialmente pa purba descurasha mi. El a spierta mi contra e peliger di confia den hende, specialmente pastonan, y a anima mi pa lesa Bijbel y confia den dje so. Apesar di mi dudanan, mi a busca un Testament Nobo y a cuminsa les’e. Pocopoco pero sigur mi a bin realisa cu mi creencianan no tawata cuadra cu siñansanan di Bijbel.

Un diadomingo na 1933 cu mi tawata na cas di Richard na Alemania, el a introduci mi na un pareha casa cu tawata Testigo di Yehova. Ora nan a haya sa cu mi ta lesa Bijbel, nan a duna mi un ehemplar di un foyeto titula E Crisis. * Tawata casi meianochi ora cu porfin mi a pone e foyeto ei un banda. Mi tawata combenci cu mi a haya e berdad!

Testigonan di Yehova na Basel a duna mi dos volumen di Estudio den e Scritura* hunto cu dos revista y otro buki. Loke mi a lesa a impresiona mi y pesei mi a tuma contacto cu e pasto local y pidie kita mi nomber for di e lista di miembronan di iglesia. E pasto a rabia pisa y a spierta mi cu mi tawata den peliger di perde mi fe. Pero esei sigur no tawata e caso. Mas bien, pa prome bes den mi bida, mi a cuminsa cultiva e fe berdadero.

E rumannan na Basel tawata plania pa crusa frontera y bai predica na Francia e weekend ei. Un di e rumannan a splica mi bondadosamente cu nan no a invita mi pasobra ta caba mi a caba di cuminsa asocia cu e congregacion. Mi no a laga esei desanima mi. Mi a expresa mi deseo firme di cuminsa predica. Despues cu e ruman a consulta cu un otro anciano, el a duna mi un teritorio na Suisa. Diadomingo mainta tempran, mi a subi mi bais bai un pueblo chikito pega cu Basel, cu 4 buki, 28 revista y 20 foyeto den mi tas di sirbishi. Mayoria di e habitantenan tawata den misa ora mi a yega. Asina mes, pa 11 or, mi tas di sirbishi tawata full bashi.

Ora mi a bisa e rumannan cu mi kier batisa, nan a papia serio cu mi y haci mi preguntanan penetrante tocante e berdad. Nan celo y lealtad na Yehova y su organisacion a impresiona mi. Como cu tawata winter, un ruman a batisa mi den un badkuip na cas di un anciano. Mi ta corda cla e goso indescribibel y e forsa interno hopi grandi cu mi a sinti. Esei tawata na 1934.

Trabou na Hacienda di Reino

Na 1936, mi a tende cu Testigonan di Yehova a cumpra un pida tereno na Suisa. Mi a ofrece mi servicionan como hardinero. Mi a keda hopi contento ora nan a invita mi bin traha na e Hacienda di Reino na Steffisburg, rond di 30 kilometer for di Bern. Ki ora cu tawata posibel mi tawata yuda otronan tambe na e hacienda cu nan trabounan. Betel a siña mi e importancia di cultiva un spirito di cooperacion.

 Un punto sobresaliente di mi añanan na Betel tawata Ruman Rutherford su bishita na e hacienda na 1936. Ora el a mira e tamaño di nos tomatinan y con productivo e plantacionnan tawata, el a smile y expresa su satisfaccion. E tawata un ruman hopi stima!

Un dia, despues cu mi tawatin apenas tres aña ta traha na e cunucu, a bini un carta for di e sede mundial di Testigonan di Yehova na Merca cu a ser lesa na desayuno. E carta a enfatisa e urgencia di e trabou di predica y a extende un invitacion na ken cu a desea di sirbi den estranheria como pionero. Sin duda ningun momento, mi a ofrece mi mes como boluntario. Mi asignacion a yega na mei 1939: Brazil!

E tempo ei mi tawata asisti na e reunionnan na e Congregacion Thun, banda di Hacienda di Reino. Riba diadomingo, nos tawata bai predica como grupo den e seronan di Alpen, un biahe cu riba bais tawata tuma dos ora for di Thun. Margaritha Steiner tambe tawata den e grupo. Diripiente un idea a bini na mi mente: Hesus no a manda su disipelnan dos dos? Ora mi a djis menciona na Margaritha cu nan ta bai manda mi Brazil, e tambe a expresa su deseo pa sirbi caminda e necesidad tawata mas grandi. Nos a casa dia 31 di juli 1939.

Di Transito na un Luga Inespera

Nos a nabega for di Le Havre, Francia, na fin di augustus 1939, rumbo pa Santos, Brazil. Tur e dobel cabinanan tawata ocupa caba, di manera cu nos tawatin cu biaha den cabinanan separa. Durante e biahe, a drenta informe cu Gran Bretania hunto cu Francia a declara guera contra Alemania. Un grupo di 30 pasahero Aleman a reacciona door di cuminsa canta e himno nacional Aleman. Esaki a irita e capitan asina tanto cu el a cambia di curso y bai mara na Safi, Maruecos. E pasaheronan cu tawatin documento di biahe Aleman a haya cinco minuut pa baha. Nos tambe tawata aden.

Polisnan a tene nos un dia na warda y despues a preta nos den un bus bieu tur fototo y hiba nos na un prizon na Marrakech, rond di 140 kilometer mas aleu. E dianan cu a sigui tawata hopi duro. Nos celnan tawata yen yen y scur. E toilet cu tur hende mester a uza—un buraco den flur—tawata constantemente verstop. Nan a duna cada un di nos un paña di saco sushi pa drumi ariba, y anochi, djaca tawata cou na nos batat’i pia. Dos bes pa dia nos tawata haya poco cuminda den un bleki tur frustia.

Un oficial di ehersito a splica mi cu mi por a haya mi libertad si mi a bai di acuerdo pa sirbi cinco aña den e Legion Stranhero Frances. Door cu mi a nenga el a manda sera mi 24 ora den cashot, un luga manera un buraco preto preto. Mi a pasa mayoria di e tempo ei, haciendo oracion.

Despues di ocho dia, e autoridadnan di prizon a laga mi topa Margaritha atrobe. E tawata masha flaco mes y tawata yora sin por stop. Mi a haci mi best pa anim’e. Nan a interoga nos y despues manda nos cu trein pa Casablanca, caminda nan a laga Margaritha liber. Ami mes nan a manda na un campamento di prizon na Port Lyautey (awor Kenitra), rond di 180 kilometer leu. E consul Suiso a conseha Margaritha pa bai Suisa bek. Pero Margaritha tawata fiel na mi y el a nenga di bai sin mi. Durante e dos lunanan cu mi a keda na Port Lyautey, e tawata biaha bin for di Casablanca tur dia pa bishita mi y trece cuminda pa mi.

Un aña anterior Testigonan di Yehova a saca un buki titula Kreuzzug gegen das Christentum (Crusada Contra Cristianismo) pa hala atencion publico na e echo cu e Testigonan no tin nada di aber cu e regimen Nazi. Tempo cu mi tawata den e campamento di prizon, e oficina di sucursal di Testigonan di Yehova na Bern a skirbi e autoridadnan Frances un carta y a manda e buki ei hunto cu ne. Cu esei e rumannan kier a mustra cu nos no tawata nazista. Margaritha tambe a haci un trabou elogiabel door di bishita autoridadnan di gobierno pa purba combence nan di nos inocencia. Finalmente, na fin di 1939, nan a duna nos permit pa bandona Maruecos.

 Ta te despues cu nos a cohe rumbo pa Brazil atrobe nos a bin haya sa cu submarinonan Aleman tawata ataca barconan riba ruta atlantico y cu nos tawata un blanco principal. Aunke nos barco Jamaique tawata un barco di carga, tawatin arma monta parti dilanti y patras di e boto. Durante dia, e capitan tawata nabega zigzag y tawata lansa bala cu explosivo continuamente. Anochi nos tawata paga tur lus pa evita cu e Alemannan ta haya nos. Ki un alivio nos a sinti ora cu finalmente nos a alcansa e haf di Santos, Brazil, dia 6 di februari 1940, mas cu cinco luna despues cu nos a sali Europa!

Bek den Prizon

Nos prome asignacion pa predica tawata Montenegro, un pueblo den e estado sur di Brazil cu yama Rio Grande do Sul. Evidentemente autoridadnan di iglesia tawata bon na haltura di nos yegada. Despues cu nos tawatin apenas dos ora ta predica, polis a aresta nos y confisca nos coleccion di disco cu ta contene sermon di Bijbel, tur nos literatura y asta nos tasnan traha di cuero di camel cu nos a cumpra na Maruecos. Na warda di polis tawatin un pasto local y un pasto Aleman ta warda nos. Nan tambe a scucha ora e hefe di polis tawata toca un di e discursonan di Ruman Rutherford riba nos tocadisco, cu tambe e polis a confisca. Ruman Rutherford si tawata papia palabra cla! Ora el a yega na un parti cu a menciona Vaticano, e pasto a bira cora cora y lanta bai mesora.

Riba peticion di e obispo di Santa Maria, polisnan a hiba nos Pôrto Alegre, e stad capital. Nan a laga Margaritha bai basta lihe y el a bai busca yudansa di e consul di Suisa. E consul a sugeri Margaritha pa bai Suisa bek. Un bes mas el a nenga di bandona mi. Semper Margaritha tawata un compañera masha leal. Trinta dia despues nan a interoga mi y laga mi bai. E polis a duna nos un opcion: bandona e estado den dies dia of “carga e consecuencianan.” Riba sugerencia di e sede na Brooklyn, nos a bai Rio de Janeiro.

“Lesa e Carchi Aki Por Fabor”

Apesar di e comienso desfaborabel aki den e teritorio Brasileño, nos tawata masha contento! Al fin y al cabo, nos tawata na bida, un  biaha mas nos tasnan tawata yen di literatura, y nos por a predica den henter e teritorio di Rio de Janeiro. Pero con nos por a predica cu e tiki Portugues cu nos tawata sa? Pa medio di un carchi di testimonio. E prome palabranan Portugues cu nos a siña pronuncia den e trabou di predica tawata “Por favor, leia este cartão” (“Lesa e carchi aki por fabor”). Y e carchi a duna nos hopi exito! Den un luna so, nos a reparti mas cu 1.000 buki. Hopi hende cu a acepta nos literatura a acepta e berdad despues. Pa ta franco, nos publicacionnan a duna un testimonio mucho mas eficas cu hamas nos mes lo por a duna. Esaki a graba den mi e importancia di laga hende interesa haya nos publicacionnan.

E tempo ei Rio de Janeiro tawata e capital di Brazil, y specialmente den oficinanan di gobierno nan a ricibi nos mensahe bon. Mi tawatin e privilegio di duna testimonio personalmente na e minister di finanza y e minister di defensa. Na e ocasionnan aki, mi a mira evidencia cla di e manera cu Yehova su spirito ta actua.

Na un ocasion cu nos tawata predica riba un plenchi den centro di Rio, mi a drenta e Palacio di Husticia. Di un manera of otro mi a haya mi mes den un sala rondona pa hombernan bisti na preto, meimei di loke a parce un ceremonia di entiero. Mi a acerca un homber cu tawatin un aspecto impresionante y entreg’e mi carchi di testimonio. Luga, no tawata un entiero. En realidad mi a interumpi un caso di corte y mi tawata papiando cu e hues. Hariendo, el a haci seña na e bewakernan pa nan keda trankil. El a acepta na un manera amical un ehemplar di e buki Yiunan * y a duna un contribucion. Ora mi tawata sali un di e bewakernan a mustra mi un aviso grandi riba porta: Proibida a entrada de pessoas estranhas (Prohibi pa Personanan No Autorisa).

Un otro tereno productivo tawata e haf. Na un ocasion mi a topa un nabegante cu a tuma algun publicacion prome cu el a bolbe pa lama. Despues mi a top’e na un asamblea. Henter su famia a acepta e berdad, y e mes a progresa bastante. Esei a haci nos masha contento.

Sinembargo, no ta tur cos a cana sin problema. Nos visa di seis luna a caduca, y nos a core risico di wordo deporta. Despues cu nos a skirbi e sede tocante nos situacion, nos a ricibi un carta amoroso di Ruman Rutherford den cua el a anima nos pa persevera y a duna sugerencia kico pa haci. Nos deseo tawata pa keda Brazil y cu yudansa di un abogado, finalmente nos a obtene un visa permanente na 1945.

Un Asignacion di Hopi Aña

Sinembargo, prome cu esei, Jonathan, nos yiu, a nace na 1941, Ruth na 1943 y Esther na 1945. Pa por a percura pa nos famia creciente, mi tawatin cu busca trabou. Margaritha a sigui den e actividad di predica tempo completo te ora nos di tres yiu a nace.

For di principio, nos a traha hunto como famia den e trabou di predica riba plenchi di e stad, den stacion di trein, riba caya y den areanan comercial. Diasabra anochi nos tawata reparti Toren di Vigilancia y Spierta! hunto  como famia, y e ocasionnan aki a duna nos hopi goso.

Na cas, tur dia cada yiu tawatin cierto trabou di haci. Jonathan tawatin e tarea di limpia stoof y cushina. E mucha mohenan tawata limpia frishider, bari cura y limpia nos sapatonan. Esaki a yuda nan siña organisa nan asuntonan y tuma iniciativa. Awe, nos yiunan ta traha duro pa percura pa nan cas y nan pertenencianan, y esei ta haci ami cu Margaritha masha contento.

Tambe nos a siña nos yiunan comporta nan mes bon na reunion. Prome cu reunion cuminsa, nan tawata bebe un glas di awa y bai baño. Durante reunion, Jonathan tawata sinta na mi man robes, Ruth na mi man drechi, despues Margaritha y na man drechi di Margaritha, Ester. Esaki a yuda nan concentra y tuma alimento spiritual na un edad jong.

Yehova a bendiciona nos esfuersonan. Ainda tur nos yiunan ta sirbi Yehova fielmente y ta participa gososamente den e trabou di predica. Actualmente Jonathan ta sirbi como anciano den Congregacion Novo Méier, Rio de Janeiro.

Pa 1970, ya tur nos yiunan a casa y bandona cas, pesei ami cu Margaritha a dicidi di muda bai sirbi caminda e necesidad tawata mas grandi. E prome luga cu nos a bai tawata Poços de Caldas, den e estado Minas Gerais, cu e tempo ei tawatin un grupo chikito di 19 publicado di Reino. Mi a sinti mi masha tristo ora mi a mira nan luga di reunion pa prome bes—un cuarto den kelder sin bentana y den hopi mal estado. Mesora nos a cuminsa busca un Salon di Reino mas adecua y pronto nos a haya un bunita edificio na un hopi bon sitio. Esei a haci un gran diferencia! Cuater aña y mei despues, e cantidad di publicado a aumenta te na 155 persona. Na 1989 nos a muda bai Araruama, na Rio de Janeiro, caminda nos a sirbi pa nuebe aña. Durante e tempo aki nos a mira dos congregacion nobo lanta.

Recompensa pa A Keda na Nos Asignacion

Na 1998, problema di salu y e deseo pa ta serca nos yiunan a pone cu nos a muda bai São Gonçalo, Rio de Janeiro. Ainda mi ta sirbi ei como anciano di congregacion. Nos ta haci nos best pa participa regularmente den e obra di predica. Margaritha ta gusta duna testimonio na hende na un supermarket banda di cas, y e congregacion tawatin e bondad di aparta algun teritorio banda di nos cas pa nos. Door di esei ta mas facil pa predica segun nos salu ta permiti.

Aworaki ami cu Margaritha tin mas cu 60 aña caba ta sirbiendo Yehova. Nos a mira personalmente cu “ni principadonan, ni cosnan presente, ni cosnan futuro, ni podernan, ni haltura, ni profundidad, ni ningun otro cos crea, lo por separa nos for di e amor di Dios cu ta den Cristo Hesus nos Señor.” (Romanonan 8:38, 39) Y tawata un gran placer di por tawata testigo di e recohemento di e “otro carnenan”, cu tin e maravioso speransa di bida eterno riba un tera perfecto, rondona pa Dios su bunita creacionnan! (Huan 10:16) Ora nos a yega na 1940, Rio de Janeiro tawatin apenas un congregacion cu 28 publicado. Awe tin mas cu 250 congregacion y hopi mas cu 20.000 publicado di Reino.

Tawatin ocasion cu nos por a bai bek Europa serca nos famianan. Pero nos asignacion for di Yehova ta aki na Brazil. Ki contento nos ta cu nos a keda na nos asignacion!

[Nota]

[Plachi na pagina 21]

Na Hacienda di Reino, Steffisburg, Suisa, na cabamento di añanan ’30 (Ami ta te na man robes)

[Plachi na pagina 23]

Djis prome cu nos a casa, 1939

[Plachi na pagina 23]

Casablanca den añanan ’40

[Plachi na pagina 23]

Predicando como famia

[Plachi na pagina 24]

Participando regularmente den e ministerio awe