Pakico Ta Asina Dificil pa Pidi Despensa?

NA JULI di aña 2000, e Cuerpo Legislativo di Estado California na Merca a pasa un lei cu ta libra hende di e persecucion legal ora nan mustra compasion na un persona cu a sufri lesion den un accidente den cua nan tawata envolvi. Pakico a bini cu e lei? Autoridadnan a ripara cu ora un accidente causa lesion of daño, hopi bes hende ta basila pa pidi despensa pasobra nan tin miedo cu corte ta interpreta esaki como un forma di admiti culpabilidad. Di otro banda, esnan cu ta haya cu nan merece un disculpa mesora por sinti nan ofendi, y un accidente chikito por bira un disputa grandi.

Claro cu bo no tin nodi pidi despensa pa un accidente cu no ta bo falta. Y tin biaha ta sabi pa bo paga tino kico bo ta papia. Un dicho bieu ta bisa: “Ora tin hopi papiamento, pica no ta falta, ma esun cu frena su lipnan ta sabi.” (Proverbionan 10:19; 27:12) Toch bo por mustra cortesia y para cla pa duna un man.

Pero no ta asina cu hopi hende a stop di pidi despensa asta ora cu e caso no tin nada di aber cu corte? Na cas kisas un  esposa ta lamenta: ‘Pa nada di mundo mi casa no ta pidi despensa.’ Na trabou podise un forman ta keha: ‘Mi trahadonan no ta admiti nan foutnan, y masha poco bes nan ta disculpa nan mes.’ Kisas un meneer di scol ta bisa: ‘Muchanan no ta getrain pa pidi despensa.’

Podise un persona ta duda pa pidi despensa pasobra e tin miedo di ser rechasa. E idea cu otro hende no ta worry cu ne ta molesti’e, y pesei e no ta bisa realmente kico e ta sinti. Por sosode asta cu e persona cu a sinti su mes ofendi ta evita esun cu a ofend’e totalmente. Door di esei ta bira masha dificil pa nan haci bon cu otro.

Falta di interes den otro su sintimento por ta un otro motibo pakico algun hende ta duda pa pidi despensa. Kisas nan por rasona: ‘Si mi pidi despensa, esei lo no kita e fayo cu mi a comete.’ Otronan ta duda pa pidi despensa pasobra nan tin miedo di e posibel consecuencianan. Nan ta puntra nan mes: ‘Nan lo por tene mi responsabel y pone mi paga daño y perhuicio?’ Sinembargo, e obstaculo di mas grandi pa hende admiti nan fayo ta orguyo. Un persona cu ta mucho orguyoso pa bisa “sorry” ta bisando realmente: ‘Mi n’ kier keda na berguensa door di admiti mi fayo. Esei lo suak mi posicion.’

Sea cual sea e motibo, hopi hende tin problema pa bisa “despensa mi.” Pero ta realmente necesario pa pidi despensa? Kico ta e beneficionan di un disculpa?

[Plachi na pagina 3]

“Muchanan no ta getrain pa pidi despensa”

[Plachi na pagina 3]

“Pa nada di mundo mi casa no ta pidi despensa”

[Plachi na pagina 3]

“Mi trahadonan no ta admiti nan foutnan”