Pregunta di Lector

Ta malo pa hunga placa ora ta trata di sumanan chikito so?

E Palabra di Dios no ta papia spesificamente di wega di placa, pero si e ta duna suficiente detaye pa mustra cu tur wega di placa ta bai contra principionan biblico. * Por ehempel, casi tur hende ta reconoce cu wega di placa ta haci hende haragan golos. E echo ei so caba ta un punto importante pa cristiannan pasobra Bijbel ta bisa cu hende cu ta “golos pa placa” lo no hereda e Reino di Dios. Tambe e ta mustra cu golosidad ta un forma di idolatria.—1 Corintionan 6:9, 10; Colosensenan 3:5.

Tambe wega di placa ta stimula egoismo y un spirito competitivo insaludabel, un deseo fuerte pa gana. Apostel Pablo a spierta contra e cosnan ei ora el a skirbi: “Laga nos no bira egoista, instigando competencia un cu otro, envidiando otro.” (Galationan 5:26, NW) Ademas, wega di placa ta stimula algun hende pa sten riba suerte, y nan ta bai tras di supersticion. Hende cu ta gamble ta desaroya tur tipo di supersticion cu e speransa di por haya suerte. Nan ta pone nos corda e Israelitanan infiel cu tawata “pone mesa pa [e dios di] Fortuna, y cu [tawata] yena copa cu biña mescla pa [e dios di] Destino.”—Isaias 65:11.

Kisas algun hende ta rasona cu si nan ta hunga carta mes pa sumanan chikito serca un conoci of bon amigo, esaki ta djis un dibirticion inocente. Podise un hende cu ta hunga pa sumanan chikito no ta mira su mes como haragan, egoista, competido of supersticioso. Pero ki efecto su gamblemento por tin riba esnan cu e ta gamble cu ne? Hopi hende cu a bira adicto na wega di placa a cuminsa door di pusta sumanan chikito ‘djis pa pret.’ (Lucas 16:10) Un dibirticion cu a parce inocente a bira un problema hopi serio den nan caso.

Esei ta specialmente e caso ora ta trata di mucha. Hopi mucha a sinti e sensacion di gamble y gana un suma chikito y despues nan a ser tenta pa bai pa sumanan mas grandi. (1 Timoteo 6:10) Un estudio di hopi aña cu e Comision di Arizona pa Adiccion na Wega di Placa a publica na Merca ta confirma cu hopi adicto na wega di placa a cuminsa hunga for di jong. Nan tawata “pusta montantenan chikito riba evenementonan deportivo of wega di carta cu amigo of famia.” Un otro raport ta bisa cu “mucha ta cuminsa hunga placa na cas. Por lo general nan ta cuminsa cu wega di carta cu famia y amigo.” E raport ta agrega cu “trinta porshento di mucha cu ta gamble a cuminsa haci esei prome cu nan a cumpli diesun aña.” Hopi teenager cu ta gamble ta financia nan adiccion cu crimen of inmoralidad, segun e estudio E Pakico Tin Demasiado Wega di Placa—Malesa y Problema di Esnan Cu Ta Gamble. Ki un consecuencia tragico pa algo cu na principio a parce masha inofensivo!

Siendo cu nos ta biba den un mundo cu tin asina tanto trampa y tentacion caba, pakico expone nos mes innecesariamente na uno mas? (Proverbionan 27:12) Wega di placa—cu of sin e yiunan presente, pa sumanan chikito of grandi—ta pone nos bienestar spiritual na peliger y pesei nos tin cu evit’e. Ta mas consehabel pa cristiannan cu ta gusta hunga carta of otro weganan pa dibirticion djis tene scor riba papel of hunga e wega djis pa pasa un rato contento sin tene scor mes. Cristiannan sabi cu tin nan bienestar spiritual na pecho y tambe esun di nan amigo y famia ta evita e practica di hunga placa. Nan no ta gamble ni pa sumanan chikito.

[Nota]