Informe di Proclamadonan di Reino

Salon di Reino Ta Habri pa Tur Hende

ORA Hesucristo tawata train su disipelnan pa e ministerio publico, el a anima nan pa ‘proclama for di riba dak di cas.’ (Mateo 10:27) Si, nan mester a realisa nan ministerio cristian abiertamente, den pleno bista di publico. Den cuadro di e conseho aki, e actividad di Testigonan di Yehova tambe ta tuma luga den un forma publico. Esaki riba su mes a permiti e Testigonan vence oposicion y haya un bon nomber.

Aunke e reunionnan di congregacion di Testigonan di Yehova ta habri pa publico, prehuicio ta pone cu algun hende ta duda pa drenta un Salon di Reino. Esaki ta e caso na Finlandia. Otronan ta simplemente un poco timido pa drenta un luga nobo. Ora caba di construi un Salon di Reino nobo of renoba uno existente, e rumannan sa tene un open house. Nan ta haci un esfuerso special pa invita biciñanan pa bishita e Salon di Reino y pa sera conoci cu e actividad di Testigonan di Yehova.

Den un area, e Testigonan a haci areglo pa pone un campaña di revista riba e mesun dia cu nan a tene un open house na nan Salon di Reino nobo. Dos Testigo a topa un homber di edad cu a bisa cu e ta gusta lesa e revistanan Toren di Vigilancia y Spierta! E rumannan a inform’e tocante e open house y a ofrece pa hib’e Salon di Reino. E homber a acepta cu mucho gusto pa bai cu nan. Despues cu su esposa a tende e combersacion, el a grita: “Mi tambe ta bai!”

Despues cu e homber a drenta e Salon di Reino, el a wak rond y a bisa: “Esaki ta leu for di colo preto. Esta un bunita colo cla! Nan a bisa mi cu e Salon di Reino ta preto!” E pareha a keda un rato y a pidi algun literatura cu tawata riba bali.

Un congregacion kier a anuncia den corant local tocante un open house na ocasion di e dedicacion di nan Salon di Reino. Ora e hefe di redaccion a haya sa di e evenemento, el a sugeri pa laga skirbi un articulo riba e topico. E rumannan a bai di acuerdo, y poco tempo despues a sali un articulo hopi faborabel di mita pagina den corant cu a cubri e evenemento y describi e actividadnan di e congregacion local di Testigonan di Yehova.

Despues cu e articulo a ser publica, un Testigo di edad avansa a topa un biciña cu a bis’e: “Den e corant djawe tin un bunita articulo tocante Testigonan di Yehova!” E ruman mohe por a duna un testimonio y despues laga e señora cu e foyeto Testigonan di Yehova den Siglo Binti.

Ademas di clarifica algun concepto robes tocante Testigonan di Yehova, e areglonan ei en conexion cu open house y programa di dedicacion na Salon di Reino nobo a stimula e publicadonan pa invita mas hende na e reunionnan. Si, den hopi pais, incluso Finlandia, hende a haya sa cu Salon di Reino di Testigonan di Yehova ta habri pa tur hende.