Sostenedonan di Adoracion Berdadero—Antes y Awor

BO TA corda nomber di un homber cu a yora pa motibo di e stad Herusalem di pasado? Kisas bo ta bisa ‘Hesus’, y ta berdad, pasobra Hesus a yora pa motibo di e stad. (Lucas 19:28, 41) Sinembargo, siglonan prome cu Hesus a cana riba tera, un otro fiel sirbido di Dios tambe a yora pa motibo di Herusalem. Esei tawata Nehemias.—Nehemias 1:3, 4.

Kico a haci Nehemias asina tristo cu el a yora pa motibo di Herusalem? Kico el a haci pa e beneficio di e stad y su habitantenan? Y kico nos por siña for di su ehempel? Pa contesta e preguntanan ei, laga nos repasa algun suseso di su tempo.

Un Homber di Sintimento y Accion

Nehemias tawata nombra como gobernado di Herusalem, pero prome cu esei, e tawata un oficial di rango halto den e palacio Perso den e stad di Susa. Toch, su bida confortabel no a mengua su interes den e bienestar di su rumannan Hudiu cu tawata leu aya na Herusalem. De echo, prome cos cu el a haci ora un delegacion di Hudiu for di Herusalem a bishita Susa tawata di ‘puntra nan pa e Hudiunan, esnan cu a scapa y cu a sobrevivi e cautiverio, y pa Herusalem.’ (Nehemias 1:2)  Ora e bishitantenan a responde cu e hendenan di Herusalem tawata “den gran afliccion” y cu e muraya di e stad tawata “basha abou”, Nehemias “a cai sinta y a yora, y a tene rou pa hopi dia.” Despues di esei el a expresa su sintimentonan di tristesa den un oracion sinsero na Yehova. (Nehemias 1:3-11) Dicon Nehemias tawata asina tristo? Esei ta pasobra Herusalem tawata e centro di adoracion di Yehova riba tera, y el a ser neglisha. (1 Reinan 11:36) Ademas, e mal estado di e stad tawata un refleho di e mal condicion spiritual di su habitantenan.—Nehemias 1:6, 7.

Nehemias su interes den Herusalem y su compasion pa e Hudiunan cu tawata biba einan a impuls’e pa haci su mes disponibel pa sirbi nan. Asina cu e rei di Persia a duna Nehemias un tempo liber di su encargonan, el a cuminsa plania su biahe largo pa Herusalem. (Nehemias 2:5, 6) E kier a duna su tempo, energia y habilidadnan pa apoya e trabounan di reparacion necesario. Djis un par di dia despues cu el a yega, e tawatin un plan prepara pa drecha henter e muraya di Herusalem.—Nehemias 2:11-18.

Nehemias a dividi e inmenso trabou di drecha e muraya entre e hopi famianan. Nan tur a yuda otro. * Cada un di e mas cu 40 diferente gruponan a haya e tarea di drecha un “seccion.” Kico tawata e resultado? Cu asina tanto trahado—incluso mayornan compaña pa nan yiunan—dunando di nan tempo y energia, un tarea inmenso cu a parce imposibel a bira posibel. (Nehemias 3:11, 12, 19, 20) Den dos luna di hopi trabou, henter e muraya a keda drecha! Nehemias a skirbi cu asta esnan cu a bai contra e trabou di reparacion a haya nan obliga ta reconoce cu “e trabou aki a wordo cumpli cu e yudansa di nos Dios.”—Nehemias 6:15, 16.

Un Ehempel pa Nos Corda

No ta cu su tempo y capasidad di organisa cosnan so Nehemias a contribui. Tambe el a uza su recursonan material pa sostene adoracion berdadero. El a uza su mes placa pa cumpra su rumannan Hudiu bek for di sclabitud. El a fia otro hende placa sin cobra interes. E nunca a “pone carga” riba e Hudiunan door di exigi un compensacion como gobernado, aunke e tawatin derecho riba dje. Mas bien, semper su cas tawata habri pa alimenta “shenticincuenta Hudiu y oficial, fuera di esnan cu a bin serca nos for di e nacionnan cu tawata rond di nos.” Tur dia el a percura “un buei, seis carne di e mihonan cu tin” y tambe “parhanan” pa su invitadonan. Ademas, cada dies dia el a duna nan “tur sorto di biña na abundancia”—tur riba su propio gasto.—Nehemias 5:8, 10, 14-18.

Ki un ehempel sobresaliente di generosidad Nehemias a pone pa tur sirbido di Dios di e tempo ei y awor! E balente sirbido di Dios aki a uza su recursonan material di un manera liberal y boluntario pa sostene e trahadonan pa asina promove e adoracion berdadero. Cu rason e por a pidi Yehova: “Corda di mi, o mi Dios, pa bon, segun tur loke mi a haci pa e pueblo aki.” (Nehemias 5:19) Yehova sigur lo haci net esei.—Hebreonan 6:10.

Awe Hopi Ta Sigui e Ehempel di Nehemias

Ta masha alentador pa mira con Yehova su pueblo djawe ta manifesta e mesun sintimento tierno, deseo di traha y un spirito di sacrificio propio na fabor di adoracion berdadero. Ora nos tende cu nos compañeronan di fe ta pasa dificultad, nos ta sinti nos profundamente precupa pa nan bienestar. (Romanonan 12:15) Mescos cu Nehemias, como sosten pa nos rumannan den fe cu ta aflihi nos ta acudi na Yehova den oracion y pidie: “Laga bo horea ta atento na e oracion di bo sirbido y na e oracion di bo sirbidonan, kende nan delicia ta pa tin temor di bo nomber.”—Nehemias 1:11; Colosensenan 4:2.

Sinembargo, nos interes den e bienestar spiritual y fisico di nos rumannan cristian y den e adelanto di adoracion berdadero no tin di aber cu nos sintimentonan so. E ta move nos na  accion tambe. Amor ta impulsa e personanan kende nan sircunstancianan ta permiti nan, pa bandona e relativo comodidad di nan casnan, y casi mescos cu Nehemias, muda bai otro luga pa duna yudansa na esnan cu ta den necesidad. E boluntarionan ei no ta laga e condicionnan di bida menos confortabel den algun parti di mundo stroba nan. Nan ta apoya adoracion berdadero den luganan asina, sirbiendo lado a lado cu nan rumannan cristian. E spirito di sacrificio propio cu nan ta manifesta ta berdaderamente elogiabel.

Haciendo Nos Parti Banda di Cas Mes

Ta di comprende cu mayoria di nos lo no por muda bai un otro sitio. Nos ta apoya adoracion berdadero den nos mes comunidad. Esaki ta loke e buki di Nehemias ta ilustra tambe. Tuma nota di e detaye cu Nehemias ta agrega tocante algun di e famianan fiel cu a participa den e trabounan di reparacion. El a skirbi: “Jedaya, yiu homber di Harumaf, a haci reparacion enfrente di su cas . . . Benjamin y Hasub a haci reparacion dilanti di nan cas. Despues di nan Azarias, yiu homber di Maaseya, yiu homber di Ananias, a haci reparacion banda di su cas.” (Nehemias 3:10, 23, 28-30) E hombernan ei hunto cu nan famianan a contribui grandemente na e avance di adoracion berdadero door di participa den e trabounan di reparacion banda di nan cas.

 Awe, hopi di nos ta sostene adoracion berdadero den nos mes comunidad den varios manera. Nos ta participa den proyectonan di construccion di Salon di Reino, esfuersonan pa trece alivio den tempo di desaster, y mas importante, e obra di predica e Reino. Ademas, sea cu nos por participa personalmente den construccion of trabounan di alivio of no, nos tur tin un deseo sinsero pa sostene adoracion berdadero cu nos recursonan material, mescos cu Nehemias a haci generosamente den su tempo.—Mira e cuadro “Caracteristicanan di Dunamento Boluntario.”

Tin biaha por parce casi imposibel pa haya e fondonan necesario pa financia nos creciente trabounan di imprimi literatura, di duna ausilio y numeroso otro servicionan efectua rond mundo. Sinembargo, corda cu e tarea di drecha e inmenso muraya di Herusalem tambe a parce imposibel pa realisa. (Nehemias 4:10) Toch, door cu ta hopi famia boluntario a yuda haci e trabou, nan a complet’e. Awe ta mescos. Si cada un di nos sigui duna nos aporte na e obra, lo ta posibel pa sigui haya e hopi recursonan necesario pa realisa nos actividadnan rond mundo.

E cuadro “Maneranan Cu Algun Hende Ta Scohe pa Duna” ta mustra varios manera den cua nos por sostene e obra di Reino financieramente. Aña pasa, hopi sirbido di Dios a duna e sosten ei, y e Cuerpo Gobernante di Testigonan  di Yehova lo kier probecha di e oportunidad aki pa expresa nan profundo gradicimento na tur esnan kende nan curason a impulsa nan pa participa den e donacionnan boluntario aki. Mas importante ainda, nos ta gradici Yehova pa su bendicion rico riba e esfuersonan cu su pueblo ta haci di henter curason pa promove adoracion berdadero rond mundo. Si, ora nos reflexiona riba con e man di Yehova a guia nos den transcurso di añanan, nos ta sinti nos impulsa pa resona e palabranan di Nehemias, kende a bisa cu gratitud: “E man di mi Dios tawata bon riba mi.”—Nehemias 2:18.

[Nota]

[Cuadro/Plachi na pagina 28, 29]

Maneranan Cu Algun Hende Ta Scohe pa Duna

CONTRIBUCION PA E OBRA MUNDIAL

Hopi hende ta aparta, of presupuesta, un montante cu nan ta pone den e cahanan di contribucion marca: “Contribucion pa e Obra Mundial—Mateo 24:14.”

Tur luna congregacionnan ta manda e montantenan aki sea pa e sede mundial di Testigonan di Yehova of na e sucursal local. Tambe por manda donacion boluntario di placa directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of na e oficina di sucursal cu ta sirbi bo pais. Tambe por haci donacion di hoya of otro cos di balor. Un carta breve cu ta declara cu esakinan ta un regalo incondicional mester compaña e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, si e dunado hay’e den un necesidad personal, lo debolbe e donacion na dje. Pa mas informacion, por fabor, tuma contacto cu e Treasurer’s Office na e adres menciona ariba.

DONACION PLANIA

Ademas di regalo incondicional di placa y donacion condicional di placa, tin otro metodonan di duna na beneficio di e sirbishi di Reino rond mundo. Esakinan ta inclui:

Seguro: Por nombra Sosiedad Watch Tower como beneficiario di un polisa di seguro di bida of un plan di pension.

Cuenta di Banco: Por duna Sosiedad Watch Tower derecho di uza cuenta di banco, time deposit of cuenta di pension personal, of derecho di cobra nan despues di morto di nan doño, na harmonia cu rekisitonan bancario local.

Accion y Bono: Por haci donacion di accion y bono na Sosiedad Watch Tower como un regalo incondicional.

Propiedad: Por haci donacion na Sosiedad Watch Tower di propiedad cu por ser bendi, sea como regalo incondicional of bou di e condicion cu e dunado por sigui biba den dje te na su morto. Tuma contacto cu e oficina di sucursal di bo pais prome cu traha e acta pa traspasa cualkier propiedad.

Testament y Trust: Por nombra Sosiedad Watch Tower como heredero di propiedad of placa via un testament legal, of por nombra Sosiedad Watch Tower como beneficiario di un areglo di trust. Un trust cu ta beneficia un organisacion religioso por duna cierto bentahanan di belasting.

Sucursal mester ser informa, y mester ricibi un copia di tur documento relevante di cualkier un di e areglonan aki. Si bo ta interesa den un di e areglonan aki di donacion plania, bo mester tuma contacto cu Sosiedad, via carta of telefon, na e adres indica akibou, of na e oficina di Testigonan di Yehova cu ta sirbi bo pais.

Sosiedad Watch Tower

P.O. Box 4708 Seroe Loraweg 142A

Curaçao, N.A.

Telefon: (599-9) 461-7528

[Cuadro na pagina 30]

Caracteristicanan di Dunamento Boluntario

Den su cartanan na e Corintionan, apostel Pablo a menciona tres caracteristica importante den dunamento boluntario. (1) Ora Pablo a skirbi tocante colectamento di placa, el a duna e instruccion: “Riba e prome dia di siman laga cada un di boso pone algo un banda.” (1 Corintionan 16:2a) Pues, mester plania delanta con y di ki manera ta duna, y mester haci esei sistematicamente. (2) Tambe Pablo a skirbi cu cada persona mester duna ‘segun su forsa.’ (1 Corintionan 16:2b, Beibel na papiamentu koriente) Cu otro palabra, un persona cu kier duna boluntariamente mester haci esei proporcionalmente, segun su recursonan ta permiti. Asta ora un cristian ta gana tiki, Yehova ta duna hopi balor na e tiki cu lo e por contribui cu ne. (Lucas 21:1-4) (3) Pablo a skirbi mas aleu: “Laga cada un haci manera el a propone den su curason; no contra su gusto of obliga; pasobra Dios ta stima esun cu ta duna cu alegria.” (2 Corintionan 9:7) Cristiannan sinsero ta duna di curason—cu alegria.

[Plachi na pagina 26]

Nehemias tawata un homber di sintimento y accion

[Plachi na pagina 30]

Contribucionnan boluntario ta sostene e trabounan di imprimi literatura, di duna ausilio, construccion di Salon di Reino y otro servicionan rond mundo