Con Nos Por Laga Nos Dianan Conta den Bista di Yehova?

“Ayera entre salimento y bahamento di solo, a perde dos ora di oro, cada un tawatin 60 minuut di djamanta. No tin recompensa pa esun cu por haya nan pasobra nan a bai perdi pa semper!”—Lydia H. Sigourney, un escritor Mericano (1791-1865).

A PARCE cu nos bida ta cortico y cu e dianan ta pasa masha lihe. Salmista David a medita riba con cortico bida ta, y esaki a motiv’e pa pidi den oracion: “SEÑOR, laga mi sa mi fin y cuanto mi dianan ta; laga mi sa con pasahero mi ta. Ata, bo a haci mi dianan manera un span di man, y mi edad ta manera nada den bo bista.” David kier a biba di un manera cu ta agrada Dios, tanto cu palabra como cu accion. Mustrando cu e ta depende riba Dios el a bisa: “Mi speransa ta den bo.” (Salmo 39:4, 5, 7) Yehova a scuch’e. Y di berdad el a evalua David su actividadnan y a recompens’e di acuerdo cu esei.

Ta masha facil pa nos keda ocupa tur momento di dia y atrapa den un bida cu ta pasa lihe y cu ta yen di actividad. Esaki por haci nos ansha, specialmente ora nos tin hopi cos di haci y ta parce cu nos no tin suficiente tempo. Nos ta interesa mescos cu David pa hiba un estilo di bida cu Dios ta aproba? No tin duda, Yehova ta mira nos y E ta examina nos cada un cuidadosamente. Job un homber cu a teme Dios a reconoce rond di 3.600 aña pasa cu Yehova a mira su camindanan y a conta tur su pasonan. Job a haci e pregunta retorico: “Ora cu e yama mi pa duna cuenta, kico lo mi contest’e?” (Job 31:4-6, 14) Pa nos dianan por conta den bista di Dios, nos tin cu pone prioridadnan spiritual, obedece su mandamentonan y uza nos tempo na un manera sabi. Laga nos wak e asuntonan aki un tiki mas djacerca.

Haci Asuntonan Spiritual Nos Interes Principal

E Scritura inspira corectamente ta urgi nos pa pone prioridadnan spiritual ora e ta bisa: “Distingui loke ta importante di berdad.” Kico ta e cosnan importante aki? E contesta tin di aber cu “mas y mas conocemento y bon comprondemento.” (Filipensenan 1:​9, 10, Beibel na papiamentu koriente) Pa nos por gana conocemento di e proposito di Yehova, nos tin cu uza nos tempo bon. Sinembargo, si nos haci asuntonan spiritual nos interes primario, esei sigur lo duna nos un bida yen di recompensa y satisfaccion.

Apostel Pablo ta recorda nos pa sigui “purba discerni loke ta agrada Señor.” Pa nos por discerni nos tin cu examina nos propio motivacion- y deseonan di curason. E apostel ta sigui: “Busca pa conoce boluntad di Señor.” (Efesionan 5:10, 17 BPK) Awor, kico ta agrada Yehova of ta aceptabel p’e? Un proverbio biblico ta contesta: “E principio di sabiduria ta: Adkiri sabiduria; y riba tur cos, adkiri comprondemento; hals’e, y e lo halsa bo.” (Proverbionan 4:7, 8) Yehova ta keda contento cu hende cu ta adkiri y eherce sabiduria dibino. (Proverbionan  23:15) Loke ta haci e clase di sabiduria aki bunita ta e echo cu ningun hende no por kit’e for di nos ni destru’e. En realidad, e ta bira un proteccion contra ‘e caminda di maldad, y for di e hendenan cu ta papia cosnan perverso.’—Proverbionan 2:10-15.

Pesei anto, ta masha sabi pa nos resisti cualkier tendencia di adopta un actitud di indeferencia pa cu cosnan spiritual! Nos mester cultiva aprecio pa e dichonan di Yehova y un temor saludabel p’e. (Proverbionan 23:17, 18) Maske nos por haya un disposicion mental asina na cualkier tempo den bida, ta miho pa establece e patronchi corecto aki y imprimi principionan di Bijbel den nos personalidad durante nos hubentud. E Rei sabi Salomon a bisa: “Corda tambe riba bo Creador den e dianan di bo hubentud.”—Eclesiastes 12:1.

E manera mas intimo pa cultiva un aprecio pa Yehova ta door di haci oracion na dje tur dia. David a reconoce e importancia di confia den Yehova, pasobra el a roga: “Tende mi oracion, o SEÑOR, y scucha mi sclamacion; no keda keto pa mi lagrimanan.” (Salmo 39:12) Nos relacion cu Yehova ta asina intimo cu de bes en cuando e ta asta pone nos yora? Si, mas nos papia cu Yehova tocante nos asuntonan intimo di curason y medita riba su Palabra, mas E ta hala serca nos.—Santiago 4:8.

Siña Obedece

Moises tawata un otro homber di fe cu a reconoce cu nos mester depende riba Dios. Mescos cu David, Moises por a mira cu bida ta yen di problema. Pesei el a pidi Dios mustr’e ‘con pa conta su dianan, pa e por presenta na Yehova un curason yen di sabiduria.’ (Salmo 90:10-12) Nos por haya un curason yen di sabiduria solamente si nos ta siña Yehova su lei- y principionan y aplica nan den nos bida. Moises tawata sa esaki y pesei el a haci esfuerso pa inculca e berdad vital ei den e nacion di Israel door di ripiti Dios su lei- y reglamentonan pa nan, prome cu nan a tuma posicion di e Tera Priminti. Tur rei humano cu Yehova lo a scohe despues pa goberna riba Israel mester a skirbi pa su mes un copia di e lei y les’e tur e dianan di su bida. Dicon? Pa asina e siña teme Dios. Esaki lo a mustra si e rei tawata obediente of no y lo a evit’e di halsa su mes riba su rumannan. Tambe e lesamento aki lo a yuda prolonga su dianan riba e trono. (Deuteronomio 17:18-20) Yehova a ripiti e promesa aki ora el a bisa Salomon, yiu di David: “Si bo cana den mi camindanan y warda mi statuutnan y mandamentonan, manera bo tata David a cana, e ora ei lo mi prolonga bo dianan.”—1 Reinan 3:10-14.

E asunto di obediencia ta algo serio pa Dios. Yehova lo ripara sigur si nos ta minimisa cierto aspecto di su rekisito- y mandamentonan y ta considera nan como cosnan di menos importancia. (Proverbionan 15:3) E echo cu nos sa esaki mester motiva nos pa sigui mustra gran aprecio pa Yehova su guia y siguie, maske esei no ta facil tur ora. Satanas ta haci tur loke e por pa “stroba nos” di obedece e lei- y mandamentonan di Dios.—1 Tesalonicensenan 2:18.

Ta masha importante pa nos cumpli cu e conseho biblico pa reuni hunto pa adora Dios y asocia cu otro. (Deuteronomio 31:12, 13; Hebreonan 10:24, 25) Pesei, nos tin cu puntra nos mes: ‘Mi tin e determinacion y perseverancia necesario pa haci loke realmente ta bale la pena?’ Si nos ta neglisha nos asociacion y instruccion na e reunionnan cristian pa por logra siguridad economico, esei lo suak nos relacion cu Yehova. Apostel Pablo a skirbi: “Laga boso caracter ta liber di amor pa placa y sea contento  cu loke boso tin; pasobra [Yehova] mes a bisa: ‘Nunca lo Mi no bandona bo, y nunca lo Mi no laga bo desampara.’” (Hebreonan 13:5) Door di obedece Yehova su mandamentonan boluntariamente, nos ta mustra cu nos tin confiansa absoluto cu lo E percura pa nos.

Hesus a siña obediencia y el a beneficia for di esaki. Nos tambe por. (Hebreonan 5:8) Mas nos cultiva e cualidad di obediencia, mas lihe nos ta cla pa obedece, asta den cosnan chikito. Ta cierto cu debi na nos integridad, por sosode cu otro hende ta trata nos di un manera desagradabel y cruel. Esei por sosode specialmente na trabou, na scol y den un cas caminda no ta tur hende tin e mesun religion. Sinembargo, nos ta haya consuelo for di e declaracion haci na e Israelitanan, esta, cu si nan ‘a stima Yehova door di obedece su bos y door di tene duro na dje; esei lo tawata nan bida y largura di nan dianan.’ (Deuteronomio 30:20) E promesa aki ta conta pa nos tambe.

Uza Tempo na un Manera Sabi

Otro cos cu lo laga nos dianan conta den bista di Yehova ta si nos ta uza nos tempo na un manera sabi. Tempo no ta manera placa, bo no por spar e, bo tin cu uz’e of e ta bai perdi. Cada ora cu pasa a bai pa semper. Door cu semper nos tin mas cos di haci cu nos por cumpli cu ne, nos ta uzando nos tempo pa logra nos metanan den bida? E meta principal den bida di tur cristian mester ta pa nan participa regularmente den e trabou di predica e Reino y haci disipel.—Mateo 24:14; 28:19, 20.

Ta solamente si nos ta conciente ki balor nos tempo tin, nos por uz’e bon. Corectamente Efesionan 5:16 ta anima nos pa ‘haci bon uzo di nos tempo’, y esaki ta nifica stop di dedica tempo na cosnan di menos importancia. E ta ­nifica baha man na cosnan cu ta tuma  hopi tempo di bo. Si nos ta pasa hopi tempo ta wak television, surf riba Internet, lesa informacionnan inutil of ta core demasiado tras di recreo y dibirticion, nos por keda agota. Ademas, si nos ta acumula demasiado cos material, esaki por tuma e tempo cu nos tin mester pa adkiri un curason yen di sabiduria.

Personanan cu ta boga pa bon maneho di tempo, ta bisa: “Ta imposibel pa bo haci bon uzo di bo tempo si bo no pone metanan spesifico y cla.” Nan ta sugeri cinco criterio pa pone meta: e mester ta spesifico, sistematico, alcansabel, realistico y mara na un tempo.

Un meta cu ta bale la pena ta esun pa mehora nos lesamento di Bijbel. E prome paso ta di pone un meta spesifico: lesa Bijbel completo. E siguiente paso ta pa haci nos meta sistematico. Door di esei, nos por midi nos progreso. Metanan cu nos pone mester anima nos pa haci esfuerso y progresa. Tambe nan mester ta alcansabel y realistico. Pa logra tur esaki nos mester tene cuenta cu nos habilidadnan personal, conocemento practico y e tempo cu nos tin na nos disposicion. Algun hende tin mester di mas tempo pa alcansa nan meta. Al final nos tin cu fiha un fecha pa alcansa e meta. Ora bo pone un fecha pa logra algo, esei lo motiva bo mas pa traha pa logr’e.

Tur miembro di e famia di Betel cu ta sirbi na e sede mundial di Testigonan di Yehova of na un di su sucursalnan rond mundo, tin un meta spesifico pa lesa Bijbel completo durante nan prome aña na Betel. Nan ta ­realisa cu un lesamento beneficioso di Bijbel ta yuda nan crece spiritualmente y cultiva un relacion mas intimo cu Yehova, kende ta siña nan beneficia nan mes. (Isaias 48:17) Nos tambe por pone e meta pa lesa Bijbel riba un base regular?

Beneficionan Ora Nos Dianan Ta Conta

Si nos ta duna atencion primario na asuntonan spiritual, esaki lo resulta den bendicionnan incontabel. Na prome luga, e ta yuda nos disfruta mas ainda di e satisfaccion cu nos ta logra den bida y di e echo cu nos bida tin un proposito. Comunicacion regular cu Yehova via oracion sinsero ta hala nos mas serca dje. E echo so cu nos ta haci oracion ta mustra cu nos tin confiansa den dje. Door di lesa Bijbel tur dia y tambe e publicacionnan basa riba Bijbel cu e “e esclabo fiel y prudente” ta percura, nos ta demostra cu nos ta dispuesto pa scucha Dios ora E ta papia cu nos. (Mateo 24:45-47) Esaki ta yuda nos adkiri un curason yen di sabiduria pa asina nos por tuma desisionnan corecto den bida.—Salmo 1:1-3.

Pa nos ta un placer pa obedece Yehova su mandamentonan, pasobra nan no ta pisa. (1 Huan 5:3) Segun cu nos ta laga cada dia conta den bista di Yehova, nos ta fortalece nos relacion cu ne. Tambe nos ta bira un berdadero apoyo spiritual pa nos compañeronan cristian. E echonan ei ta haci Yehova Dios contento. (Proverbionan 27:11) Y no tin un recompensa mas grandi cu disfruta di Yehova su aprobacion awor y pa semper!

[Plachi na pagina 21]

Cristiannan ta tuma asuntonan spiritual na serio

[Plachi na pagina 22]

Bo ta uza bo tempo na un manera sabi?

[Plachi na pagina 23]

Segun cu nos ta laga cada dia conta den Yehova su bista, nos ta fortalece nos relacion cu ne