Cristiannan Tin Mester di Otro

“Nos ta miembro di otro.”—EFESIONAN 4:25.

1. Kico un enciclopedia ta bisa tocante curpa humano?

CURPA di hende ta un creacion maravioso! The World Book Encyclopedia ta bisa: “Tin hende ta bisa cu curpa humano ta un mashin—e mashin mas maravioso cu a yega di ser traha. Claro cu curpa di hende no ta un mashin. Pero den hopi sentido e ta comparabel cu un mashin si. Por ehempel, nos curpa ta consisti di hopi diferente parti, mescos cu un mashin. Y mescos cu den caso di un mashin, cada parti di nos curpa tin su mes funcion spesifico. Pero tanto serca nos curpa como un mashin, tur e partinan ta traha hunto di manera cu e ta funciona sin problema.”

2. Den ki sentido curpa humano y e congregacion cristian ta parce otro?

² Si, curpa humano ta consisti di diferente parti, of miembro, y cada un di nan ta yuda cu algo necesario. No tin ni un solo ader, musculo ni otro parti di curpa cu no tin su proposito. Den e congregacion cristian tambe cada miembro por aporta di un manera of otro na e salu y bunitesa spiritual di e congregacion. (1 Corintionan 12:14-26) Ningun di su miembronan no mester sintie superior cu e otronan, pero di otro banda, ningun no mester sinti tampoco cu e no ta importante.—Romanonan 12:3.

3. Con Efesionan 4:25 ta mustra cu cristiannan tin mester di otro?

³ Mescos cu ta e caso cu e diferente miembronan di un curpa humano, cristiannan tambe tin mester di otro. Apostel Pablo a bisa su rumannan den fe ungi cu spirito: “Poniendo mentira un banda, cada un di boso papia berdad cu su prohimo, pasobra nos ta miembro di otro.” (Efesionan 4:25) Como cu e miembronan di Israel spiritual, “e curpa di Cristo”, ta miembronan “di otro”, nan ta papia berdad cu otro y coopera cu otro den tur sentido. Si, cada un di nan ta pertenece na tur otro. (Efesionan 4:11-13) Y e cristiannan cu tin speransa di keda biba riba tera tambe ta felismente uni cu nan, papiando berdad y cooperando cu otro.

4. Con nos por yuda esnan nobo?

 ⁴ Tur aña, miyones di cristian cu ta spera di biba den un paradijs riba tera ta batisa. Otro miembronan di e congregacion ta keda masha contento pa yuda nan “sigui dilanti pa yega na madures.” (Hebreonan 6:1-3) Por yuda nan na diferente manera. Nos por contesta nan preguntanan tocante Bijbel of duna nan yudansa practico den predicacion. Tambe nos por yuda e nobonan door di participa regularmente na reunionnan cristian, y asina pone un excelente ehempel pa nan. Den tempo dificil tambe nos por yuda nan door di duna nan animacion of kisas consuelo. (1 Tesalonicensenan 5:14, 15) Nos mester busca manera pa yuda otronan keda “cana den e berdad.” (3 Huan 4) Sea cu nos ta hoben of di edad, sea cu nos a caba di cuminsa cana den e berdad of nos tin hopi aña ta hacie, nos por duna un aporte na e bienestar spiritual di nos compañeronan creyente, pasobra di berdad nan tin mester di nos.

Nan A Yuda Caminda Tawatin Necesidad

5. Con Akila cu Priscila tawata un yudansa pa Pablo?

⁵ Parehanan cristian casa tambe tin e satisfaccion di yuda nan compañeronan creyente. Akila y Priscila, por ehempel, a yuda Pablo. Nan a ricibie den nan cas, nan a traha hunto como trahado di tent, y nan a yud’e fortalece e congregacion nobo na Corinto. (Echonan 18:1-4) Asta nan a pone nan bida na peliger pa Pablo, aunke nos no sa con. Nan tawata biba na Roma ora Pablo a bisa e cristiannan di e stad ei: “Saluda Priscila y Akila, mi compañeronan di trabou den Cristo Hesus, kendenan a risca nan bida pa mi, na kendenan no solamente ami ta duna gradicimento, ma tambe tur e iglesianan di e paganonan.” (Romanonan 16:3, 4) Mescos cu Akila y Priscila, algun cristian den tempo moderno ta fortalece congregacionnan y yuda nan compañeronan di adoracion na diferente manera. Tin bes nan ta asta risca nan bida pa no hinca otro sirbidonan di Dios den peliger di maltrato of morto na man di persiguido.

6. Ki yudansa Apolos a ricibi?

⁶ Akila cu Priscila a yuda Apolos tambe, un cristian cu bon habilidad di papia cu tawata siña e hendenan na Efeso tocante Hesucristo. E tempo ei, e unico bautismo cu Apolos a conoce tawata e bautismo cu Huan tawata haci como simbolo di repentimento pa picanan cometi contra e pacto di Lei. Akila cu Priscila a mira cu Apolos tawatin mester di yudansa, y nan “a splic’e e caminda di Dios na un manera mas exacto.” Casi sigur nan a splic’e cu pa bo batisa como cristian bo mester bai bou di awa y ricibi spirito santo. Apolos a compronde bon. Despues, na Acaya, “e tawata di gran ayudo pa esnan cu a kere pa medio di gracia; pasobra e tawata refuta e Hudiunan fuertemente den publico, mustrando pa medio di e Scrituranan cu Hesus tawata e Cristo.” (Echonan 18:24-28) Hopi bes comentario di nos compañeronan di adoracion por yuda nos compronde e Palabra di Dios miho. Den e aspecto aki tambe nos tin mester di otro.

Duna Yudansa Material

7. Con e Filipensenan a reacciona ora nan compañeronan cristian tawatin mester di yudansa material?

⁷ Miembronan di e congregacion cristian na Filipos a stima Pablo hopi, y tempo e tawata na Tesalonica nan a manda cierto cosnan di necesidad  p’e. (Filipensenan 4:15, 16) Ora e rumannan na Herusalem tawatin mester di yudansa material, e cristiannan na Filipos a demostra cu nan kier a duna asta mas di loke nan tawata por. Pablo tawatin asina tanto aprecio pa e actitud excelente cu su rumannan Filipense tawatin, cu el a uza nan como un ehempel pa otro creyentenan.—2 Corintionan 8:1-6.

8. Ki actitud Epafrodito a demostra?

⁸ Tempo Pablo tawata preso, e Filipensenan a haci mas cu djis manda regalo material. Nan a despacha Epafrodito tambe como nan representante. “[Epafrodito] a hera muri pa e obra di Cristo, riscando su bida pa completa loke boso tawata falta den boso sirbishi na mi.” (Filipensenan 2:25-30; 4:18) Bijbel no ta bisa si Epafrodito tawata un anciano of un sirbido ministerial. Sinembargo, e tawata un cristian cla pa yuda y dispuesto pa haci sacrificio propio, y Pablo tawatin hopi mester di dje. Tin hende manera Epafrodito den bo congregacion?

Nan Tawata “un Encurashamento”

9. Ki ehempel Aristarco ta pa nos?

⁹ Tur congregacion tin gran aprecio pa rumannan amoroso manera Akila, Priscila y Epafrodito. Kisas algun di nos compañeronan di adoracion ta manera Aristarco, un otro cristian di prome siglo. E y algun otro cristian tawata “un encurashamento” pa Pablo. Kisas nan a dun’e consuelo of yudansa den maneranan practico. (Colosensenan 4:10, 11) Aristarco a yuda Pablo, mustrando asina cu e tawata un berdadero amigo den tempo di necesidad. E tawata e sorto di persona menciona na Proverbionan 17:17: “Un amigo ta stima tur ora bai, y un ruman ta naci pa tempo di adversidad.” Acaso nos tur no mester ta “un encurashamento” pa nos rumannan cristian? Y ora rumannan ta enfrentando dificultad, mas ainda nos mester duna nan un man.

10. Ki ehempel Pedro ta pa ancianonan cristian?

¹⁰ Specialmente ancianonan cristian mester ta un encurashamento pa nan rumannan spiritual. Cristo a bisa apostel Pedro: “Fortalece bo rumannan.” (Lucas 22:32) Pedro tawata capas pa haci esei debi cu e tawata fuerte y firme manera piedra, principalmente despues cu Hesus a resusita. Ancianonan, boso tambe mester purba tur manera pa haci mescos, cu un spirito dispuesto y suave, pasobra boso compañeronan creyente tin mester di boso.—Echonan 20:28-30; 1 Pedro 5:2, 3.

11. Kico nos por siña for di e bon actitud di Timoteo?

¹¹ Timoteo, Pablo su compañero di biahe, tawata un anciano cu tawatin interes profundo den otro cristiannan. Apesar cu e tawatin problema cu su salu, Timoteo a demostra un fe firme, y el a ‘sirbi [“manera catibo”, NW] hunto cu Pablo, den e trabou di evangelio.’ Pesei e apostel por a bisa e Filipensenan: “Mi no tin ni un otro hende di e mesun spirito cu lo precupa sinseramente pa boso bienestar.” (Filipensenan 2:20, 22; 1 Timoteo 5:23; 2 Timoteo 1:5) Si nos demostra un actitud manera di Timoteo, nos por ta un bendicion pa otro adoradonan di Yehova. Ta berdad cu nos tin nos propio debilidadnan humano y pruebanan pa lucha cu ne. Pero nos tambe por mustra fe firme y interes amoroso den nos rumannan spiritual. De echo, nos mester hacie. Semper corda cu nan tin mester di nos.

Hende Mohe cu Interes den Otro Hende

12. Kico e ehempel di Dorcas por siña nos?

¹² Un hende mohe cu a mustra interes den otro hende tawata Dorcas. Ora el a muri, e disipelnan a manda yama Pedro y a hib’e na un camber ariba. Ei “tur e biudanan a bin para banda di dje ta yora, y tawata mustra tur e tunicanan y bistinan cu Dorcas a traha tempo cu e tawata serca nan.” Dorcas a ser lanta bek na bida, y sin duda el a sigui “abunda den echonan di caridad y bon obra.” Den e congregacion cristian di awe tambe tin hende mohe manera Dorcas cu kisas ta cose paña of haci otro obranan amoroso pa hende den necesidad. Claro cu e manera principal cu nan ta haci bon obra ta door di traha pa interesnan di e  Reino y participa den e trabou di haci disipel.—Echonan 9:36-42; Mateo 6:33; 28:19, 20.

13. Con Lidia a mustra interes den compañeronan cristian?

¹³ Lidia tawata un hende mohe cu a teme Dios, y e tawatin interes den hende. El a nace na Tiatira y tawata biba na Filipos ora Pablo a predica na e stad ei na aña 50 di nos era. Probablemente Lidia a comberti bira Hudiu, pero parce cu no tawatin hopi Hudiu na Filipos, y no tawatin sinagoga. E y otro hende mohenan deboto tawata hunto banda di un riu pa adora ora e apostel a proclama e bon nobo na nan. E relato ta bisa: “Señor a habri [Lidia] su curason pa paga atencion na e cosnan cu Pablo tawata bisa. Y ora cu e y e hendenan di su cas a wordo batisa, el a roga nos, bisando: ‘Si boso a husga cu mi ta fiel na Señor, bin mi cas y keda serca mi.’ Y el a combence nos.” (Echonan 16:12-15) Debi na Lidia su deseo di haci bon pa hende el a logra combence Pablo y su compañeronan pa keda na su cas. Awe tambe nos ta aprecia masha ora cristiannan bondadoso y amoroso mustra hospitalidad manera Lidia!—Romanonan 12:13; 1 Pedro 4:9.

Hobennan, Nos Tin Mester di Boso Tambe

14. Con Hesucristo a trata mucha?

¹⁴ E congregacion cristian a cuminsa cu e Yiu di Dios, Hesucristo. E tawata bondadoso y cariñoso. Hende a sinti nan mes bon den su presencia debi cu e tawatin amor y compasion. Ora cu na un ocasion algun di nan a cuminsa trece nan yiunan chikito serca Hesus, su disipelnan a purba manda nan bai. Pero Hesus a bisa: “Laga e muchanan bin serca mi; no stroba nan, pasobra e reino di Dios ta pertenece na esnan manera esakinan. Di berdad mi ta bisa boso, esun cu no ricibi e reino di Dios manera un mucha lo no drenta den dje.” (Marco 10:13-15) Si nos kier ricibi e bendicionnan cu e Reino lo trece, nos mester ta mes humilde y cla pa ricibi instruccion cu un mucha chikito. Hesus a mustra e amor cu e tin pa mucha door di tuma nan den su brasa y bendiciona nan. (Marco 10:16) Con ta para cu hobennan di nos tempo? Boso por keda sigur cu e congregacion ta stima boso, y cu e tin mester di boso.

15. Kico Lucas 2:40-52 ta siña nos tocante e bida di Hesus, y ki ehempel el a pone pa hobennan?

¹⁵ Tempo cu Hesus tawata jong ainda, el a demostra cu e tawata stima Dios y e Scritura. Cu 12 aña di edad el a biaha di su pueblo Nazaret pa Herusalem hunto cu su mayornan Hose cu  Maria pa celebra Pasco Hudiu. Bolbiendo cas e mayornan di Hesus a ripara cu Hesus no tawata den e grupo cu tawata biahando hunto. Finalmente nan a bin hay’e sinta den un pasiyo di e tempel, scuchando e maestronan Hudiu y haciendo nan pregunta. Hesus a keda straño cu Hose cu Maria no tawata sa unda pa hay’e. El a puntra nan: “Boso no tawata sa cu mi mester tawata den e cas di mi Tata?” El a bolbe cas cu su mayornan, a keda obedece nan, y a sigui crece fisicamente y den sabiduria. (Lucas 2:40-52) Esta un bon ehempel Hesus a pone pa nos hobennan! Nan tambe mester obedece nan mayornan y mustra interes pa siña tocante asuntonan spiritual.—Deuteronomio 5:16; Efesionan 6:1-3.

16. (a) Kico algun mucha a grita ora Hesus tawata dunando testimonio den e tempel? (b) Ki privilegio hobennan cristian tin awendia?

¹⁶ Como hoben, kisas bo ta duna testimonio di Yehova na scol y di cas pa cas hunto cu bo mayornan. (Isaias 43:10-12; Echonan 20:20, 21) Ora Hesus tawata dunando testimonio y curando hende na e tempel poco prome cu el a muri, algun mucha a grita: “Hosana [“Salba, nos ta roga”, NW] na e Yiu di David.” E sacerdotenan principal y e escribanan a rabia ora nan a tende esaki. Nan a bin protesta serca dje, bisando: “Bo ta tende kico esakinan ta bisa?” Hesus a responde nan: “Si; boso no a lesa nunca: ‘For di boca di mucha chikito y di yiunan na pecho bo a prepara alabansa pa bo mes’?” (Mateo 21:15-17) Boso, hobennan den congregacion, tin e mesun privilegio cu e muchanan ei, esta, di alaba Dios y su Yiu. Nos kier tin boso, y nos tin mester di boso tambe pa traha hunto cu nos como proclamado di e Reino.

Den Tempo di Calamidad

17, 18. (a) Pakico Pablo a organisa e colecta pa e cristiannan na Hudea? (b) Ki efecto e donacionnan boluntario pa e creyentenan di Hudea tawatin riba cristiannan Hudiu y no Hudiu?

¹⁷ Den cualkier sircunstancia cu nos por ta, amor ta impulsa nos pa yuda compañeronan cristian den necesidad. (Huan 13:34, 35; Santiago 2:14-17) Ta e amor cu Pablo tawatin pa su rumannan na Hudea a motiv’e pa organisa e colecta pa nan entre e congregacionnan di Acaya, Galacia, Macedonia y e districto di Asia. Kisas ta e persecucion, lantamento di pueblo y e hamber cu e disipelnan na Herusalem a pasa aden ta loke a ocasiona e “sufrimento”, “tribulacionnan” y “confiscacion di [nan] propiedad” cu Pablo a papia di dje. (Hebreonan 10:32-34; Echonan 11:27–12:1) Cu esei na mente el a supervisa un fondo pa cristiannan pober na Hudea.—1 Corintionan 16:1-3; 2 Corintionan 8:1-4, 13-15; 9:1, 2, 7.

¹⁸ E donacionnan boluntario pa e santonan na Hudea a demostra cu tawatin un laso di hermandad entre adoradonan Hudiu y no Hudiu di Yehova. Ademas e contribucionnan ei tawata un manera cu e cristiannan no Hudiu por a mustra gratitud na nan compañeronan Hudiu pa tur e iluminacion spiritual cu nan a ricibi for di nan. Pues, e cristiannan no a comparti cu otro den sentido material so, sino spiritualmente tambe. (Romanonan 15:26, 27) Awe tambe contribucionnan pa creyentenan den necesidad ta boluntario y motiva door di amor. (Marco 12:28-31) Nos tin mester di otro den e sentido aki tambe, pa por tin igualdad; pa ‘esun cu poco no falta nada.’—2 Corintionan 8:15.

19, 20. Duna un ehempel cu ta mustra con Yehova su pueblo ta duna yudansa ora di desaster.

¹⁹ Ya cu nos ta conciente cu cristiannan tin  mester di otro, nos ta cla pa yuda nos rumannan den fe. Por ehempel, considera kico a pasa ora temblor pisa y avalancha di lodo a asota El Salvador na comienso di aña 2001. Un informe a bisa: “Rumannan di tur parti di El Salvador a organisa accionnan di ausilio. Gruponan di ruman for di Guatemala, Merca y Canada a bin duna nos un man. . . . Den poco tempo nan a traha mas cu 500 cas y 3 bunita Salon di Reino. E trabou duro, cooperacion y sacrificio propio di e rumannan aki a resulta den un gran testimonio.”

²⁰ Un informe di Sur Africa a bisa: “E inundacionnan teribel cu a destrui partinan grandi di Mozambique a afecta hopi di nos rumannan cristian tambe. E sucursal na Mozambique a percura pa mayoria di nan necesidadnan, pero nan a pidi nos manda paña uza den bon estado pa rumannan den necesidad. Nos a reuni suficiente paña pa manda un container di 40 pia [12 meter] yen di paña pa nos rumannan na Mozambique.” Si, den e maneranan aki tambe nos tin mester di otro.

21. Kico nos lo trata den e siguiente articulo?

²¹ Manera nos a bisa caba, tur parti di un hende su curpa ta importante. Mescos ta conta pa e congregacion cristian. Tur su miembronan tin mester di otro. Y nan mester sigui sirbi den union tambe. E siguiente articulo lo trata algun factor cu ta haci esaki posibel.

Con Lo Bo Contesta?

• Ki paresido tin entre curpa humano y e congregacion cristian?

• Con e prome cristiannan a reacciona ora nan compañeronan creyente tawatin mester di yudansa?

• Cua ta algun ehempel for di e Scritura cu ta mustra cu cristiannan tin mester di otro, y cu nan ta yuda otro?

[Preguntanan di Estudio]

[Plachi na pagina 10]

Akila cu Priscila tawatin interes den hende

[Plachi na pagina 12]

Yehova su adoradonan ta yuda otro, y tambe otro hende, den tempo di calamidad