No Laga di Reuni

Bijbel ta bisa: “No laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.” (Hebreonan 10:25) Claramente, adoradonan berdadero mester reuni na un luga di adoracion pa nan “considera con pa stimula otro pa stima y haci bon obra.”—Hebreonan 10:24.

ORA apostel Pablo a skirbi e palabranan aki den prome siglo di nos era, tawatin un tempel impresionante na Herusalem, cu e Hudiunan tawata uza como un luga di adoracion. Nan tawatin sinagoga tambe. Hesus a “siña e hendenan den sinagoga y den tempel, caminda tur e Hudiunan [tawata] reuni.”—Huan 18:20.

Ki sorto di luga pa reuni Pablo tawatin na mente ora el a curasha e cristiannan pa reuni y anima otro? E tempel di Herusalem por sirbi di un manera of otro como ehempel pa e edificionan religioso grandi cu cristiandad a traha? Na ki tempo hende cu a considera nan mes cristian a cuminsa uza e tipo di edificionan religioso grandi ei?

‘Un Cas na Dios Su Nomber’

E prome instruccion pa traha un luga pa adora Dios ta den e buki biblico di Exodo. Yehova Dios a manda su pueblo escohi, e Israelitanan, pa nan  traha “e tabernakel”, of “e tent di reunion.” Mester a warda e arca di pacto y varios articulo sagrado den dje. Ora nan a caba di traha e tabernakel na aña 1512 prome cu nos era, e gloria di Yehova “a yena e tabernakel.” Pa mas cu cuater siglo e tent portatil ei a sirbi como un elemento central den Dios su areglo pa hende por acerc’e. (Exodo, capitulo 25 pa 27; 40:33-38) Den Bijbel e tent aki sa ser yama tambe “e tempel di SEÑOR” y “e cas di SEÑOR.”—1 Samuel 1:9, 24.

Mas despues, tempo David tawata Rei na Herusalem, el a expresa un deseo fuerte pa traha un cas permanente pa e gloria di Yehova. Pero debi cu David tawata un homber di guera, Yehova a bis’e: “Abo lo no traha un cas na mi nomber.” Na su luga Dios a scohe Salomon, yiu di David, pa traha e tempel. (1 Cronicanan 22:6-10) Salomon a inougura e tempel na aña 1026 prome cu nos era, despues di un periodo di construccion di shete aña y mei. Yehova a mustra cu e edificio aki tawatin su aprobacion, door di bisa: “Mi a consagra e cas aki cu bo a traha door di pone mi nomber ayanan pa semper, y mi wowo y mi curason lo ta einan continuamente.” (1 Reinan 9:3) Tanten cu e Israelitanan a keda fiel, Yehova lo a trata e cas ei cu aprobacion. Pero si nan a hala for di loke ta corecto, Yehova lo a kita su aprobacion for di riba e luga, y ‘e cas lo a bira un monton di ruina.’—1 Reinan 9:4-9; 2 Cronicanan 7:16, 19, 20.

Cu tempo e Israelitanan a bandona adoracion berdadero toch. (2 Reinan 21:1-5) “Pesei [Yehova] a lanta rei di e Caldeonan contra nan, kendenan . . . a kima e cas di Dios, y a basha e muraya di Herusalem abou, a pega tur su edificionan fortifica na candela, y a destrui tur su articulonan di balor. Y esnan cu a scapa for di spada, el a hiba preso na Babilonia; y nan tawata sirbido di dje y di su yiu hombernan.” Segun Bijbel esaki a tuma luga na aña 607 prome cu nos era.—2 Cronicanan 36:15-21; Yeremias 52:12-14.

Manera profeta Isaias a profetisa, Dios a lanta Rei Ciro di Persia pa libra e Hudiunan for di man di e Babilonionan. (Isaias 45:1) Despues di un exilio cu a dura 70 aña, nan a bolbe Herusalem na aña 537 prome cu nos era, pa nan por a reconstrui e tempel. (Esdras 1:1-6; 2:1, 2; Yeremias 29:10) Despues di algun retraso den construccion, finalmente nan a caba di reconstrui e tempel na aña 515, y adoracion puro di Dios tawata restaura. Apesar cu e no tawata mes glorioso cu e tempel di Salomon, e edificio aki a keda casi 600 aña riba pia. Pero e tempel aki tambe a cai den mal estado debi cu e Israelitanan a neglisha adoracion di Yehova. Tempo cu Hesucristo a aparece riba tera, e tempel tawata pasando den un proceso di restauracion riba encargo di Rei Herodes. Kico tawata spera e tempel aki?

“Lo No Keda Ni un Piedra Riba Otro”

Papiando di e tempel na Herusalem, Hesus a bisa su disipelnan: “Akinan lo no keda ni un piedra riba otro, cu lo no wordo basha abou.” (Mateo 24:1, 2) Manera el a bisa, e luga cu pa siglonan hende a reconoce como centro di adoracion di Dios a ser destrui na aña 70 di nos era door di soldanan Romano cu a bini pa para e lantamento di e Hudiunan. * E tempel  ei no a ser reconstrui nunca mas. Den siglo 7 nan a lanta e santuario islamico conoci como Koepel di e Baranca, y te awe e ta para na e mesun luga caminda antes e tempel di e Hudiunan tawata.

Ki areglo tawatin pa e siguidonan di Hesus por adora? E cristiannan cu tawata Hudiu lo a sigui adora Dios na e tempel cu tawata serca di ser destrui? Y kico di cristiannan cu no tawata Hudiu? Unda nan mester a adora Dios? E edificionan religioso di cristiandad lo mester a bini na luga di e tempel? Un combersacion cu Hesus tawatin cu un mohe Samaritano ta yuda nos compronde e asunto aki.

Pa siglonan largo, Samaritanonan a adora Dios na un tempel grandi cu tawatin riba Sero Gerizim na Samaria. E mohe Samaritano a bisa Hesus: “Nos tatanan tawata adora riba e sero aki; y boso ta bisa cu ta na Herusalem e luga ta, caminda hende mester adora.” Hesus a contest’e: “Mohe, kere mi, e ora lo yega cu ni riba e sero aki, ni na Herusalem boso lo no adora e Tata.” Hende lo no tin mester di un tempel traha cu man mas pa adora Yehova, pasobra, manera Hesus a splica: “Dios ta Spirito, y esnan cu ta ador’e mester adora den spirito y berdad.” (Huan 4:20, 21, 24) Mas despues apostel Pablo a bisa e hendenan di Atenas: “E Dios cu a traha mundo y tur cos cu tin den dje, siendo Señor di shelo y di tera, no ta biba den tempel traha cu man.”—Echonan 17:24.

Claramente, e edificionan religioso di cristiandad no tin nada di aber cu e sistema di tempel cu a existi prome cu e era cristian. Y cristiannan di prome siglo no tawatin ningun motibo pa traha e tipo di luganan ei. Pero despues cu e apostelnan a muri, e congregacion cristian a cuminsa desvia for di siñansanan berdadero, manera a ser profetisa. (Echonan 20:29, 30) Hopi aña prome cu Emperador Romano Constantino supuestamente a comberti bira cristian na aña 313 di nos era, hendenan cu a considera nan mes cristian a cuminsa hala for di e siñansanan di Hesus.

Constantino a yuda mescla “cristianismo” cu religion Romano pagano. The Encyclopædia Britannica ta bisa: “Constantino mes a manda traha tres enorme basilica na Roma: di San Pedro, di San Paolo Fuori le Mura, y di San Giovanni in Laterano. E . . . a bini cu e plattegrond na forma di crus cu a bira e modelo standard di misanan na Europa Occidental durante henter Edad Medio.” Ainda nan ta considera e basilica di San Pedro na Roma, awor reconstrui, como e centro di Iglesia Catolico Romano.

Historiado Will Durant ta bisa: “Iglesia a adopta algun custumber y metodo di adoracion cu tawata comun den Roma precristian [pagano].” Un di nan ta e forma di basilica.” Di siglo 10 te siglo 15, masha hopi misa y catedral a ser construi, y hopi atencion a ser duna na nan forma. Ta den e tempo ei nan a traha hopi di e edificionan di cristiandad cu awendia ta ser considera monumento.

Ta tur hende ta ricibi refrescamento spiritual y animacion den misa? Francisco, di Brazil ta bisa: “Den mi bista, misa a para bira e simbolo di tur loke ta laf y fastioso den religion. Misa tawata un ceremonia sin nificacion ni variacion cu no tawata yena mi berdadero  necesidadnan. Tawata un alivio ora e caba.” Sinembargo, Bijbel ta manda adoradonan berdadero pa reuni hunto. Ki areglo pa reuni nan mester sigui?

“E Iglesia na Nan Cas”

Nos por haya sa cua ta e manera corecto pa cristiannan reuni, ora nos mira con creyentenan di prome siglo tawata bini hunto. Bijbel ta indica cu generalmente nan tawata reuni na cas di hende. Por ehempel, apostel Pablo a skirbi: “Saluda Priscila y Akila, mi compañeronan di trabou den Cristo Hesus. . . . Saluda tambe e iglesia na nan cas.” (Romanonan 16:3, 5; Colosensenan 4:15; Filemon 2) E palabra Griego ek·kle·sía traduci aki como “iglesia” ta referi na un grupo di hende reuni pa un proposito, y no na un edificio. (Echonan 8:1; 13:1) Cristiannan berdadero no tin mester di edificio religioso luhoso pa nan adora aden.

Con e prome congregacionnan cristian a tene nan reunionnan? Disipel Santiago a referi na un reunion cristian uzando un forma di e palabra Griego sy·na·go·gé. (Santiago 2:2) E palabra Griego aki ta nifica “trecemento hunto”, y den Bijbel e ta ser uza como sinonimo di e palabra ek·kle·sia. Pero cu tempo e palabra “sinagoga” (cu na Papiamento a bira “sinagoga”) a cuminsa nifica e luga caminda e reunion tawata tuma luga. E prome cristiannan Hudiu tawata sa bon kico tawata tuma luga na un sinagoga. *

Hudiunan tawata reuni na e tempel na Herusalem pa nan fiestanan anual. E sinagoganan tawata sirbi pa reunionnan local pa siña tocante Yehova y su Lei. Aparentemente, na sinagoga nan tawatin custumber di haci oracion, lesa for di e Scritura, y tambe duna splicacion di e Scritura y animacion of conseho. Ora Pablo y su compañeronan a bai un sinagoga na Antiokia, “e oficialnan di sinagoga a manda yama nan, bisando: ‘Rumannan, si boso tin un palabra di exhortacion [of, animacion] pa e pueblo, papia numa.’” (Echonan 13:15) Ora e prome cristiannan Hudiu a reuni na cas di hende, sin duda nan a sigui e mesun custumber ei. Nan reunionnan lo  mester a yuda hende conoce e Scritura miho, y edifica nan spiritualidad.

Congregacionnan pa Duna Animacion

Mescos cu e prome cristiannan, Testigonan di Yehova awe ta bini hunto na luganan di adoracion simpel, pa nan siña di Bijbel y disfruta di compañerismo sano. Pa hopi aña nan a reuni den cas di hende so, y ainda nan ta haci asina na hopi caminda. Pero awor e cantidad di congregacion a bira mas cu 90.000, y e luganan principal caminda nan ta reuni yama Salon di Reino. E edificionan aki no ta mucho luhoso ni nan no tin aparencia di misa. Nan ta luganan practico y simpel caminda congregacionnan di 100 pa 200 hende por reuni pa nan reunionnan semanal afin di scucha y siña for di e Palabra di Dios.

Mayoria congregacion di Testigonan di Yehova ta reuni tres biaha pa siman. Un di e reunionnan ta un discurso publico riba un topico di interes actual. Despues nan ta analisa un tema biblico of un profecia, uzando E Toren di Vigilancia. Un otro reunion ta un scol diseña pa entrena e studiantenan pa presenta e mensahe di Bijbel. Despues tin un reunion dedica specialmente na duna sugerencia practico pa e sirbishi di predicacion cristian. Un biaha pa siman Testigonan ta reuni tambe pa un studio di Bijbel den grupo mas chikito na cas di hende. Tur e reunionnan aki ta habri pa publico. Nunca no ta pasa colect.

Francisco, cu nos a menciona mas prome, ta haya cu e reunionnan na Salon di Reino a yud’e masha hopi. E ta conta: “E prome Salon cu mi a bishita tawata un edificio comodo den centro di ciudad, y mi a sali cu un bon impresion. Esnan presente tawata amabel, y mi por a sinti e amor cu tawatin den nan. Mi tawata pura pa bolbe. De echo, for di e dia ei mi no a falta ni un reunion. E reunionnan cristian aki ta anima mi, y nan ta yena mi necesidad spiritual. Asta ora mi ta sinti mi desanima pa un motibo of otro, mi ta bai Salon di Reino cu e confiansa cu ora mi bai cas bek lo mi ta anima.”

Na reunionnan cristian di Testigonan di Yehova lo bo haya chens di siña di Bijbel, trata cu hende cu ta anima bo, y duna Dios alabansa. Nos ta invita bo cordialmente pa asisti na e Salon di Reino mas serca di bo cas. Lo bo no repenti di hacie.

[Nota]

[Plachi na paginanan 4, 5]

E tabernakel, y despues e tempelnan, a sirbi como excelente centronan di adoracion di Yehova

[Plachi na pagina 6]

Basilica di San Pedro na Roma

[Plachi na pagina 7]

E prome cristiannan tawata reuni na cas di hende

 [Plachi na pagina 8, 9]

Testigonan di Yehova ta tene reunion cristian na cas di hende y na Salon di Reino