Nos Tin Mester di Luga pa Adora Dios?

‘Eentrada y e cayanan rond di e basilica tawata yen yen di miles di peregrino den trahe colorido di diferente parti di e pais, gruponan di indjan tocando tambu y baliando e supuesto bailenan di nan antepasadonan prome cu e era Spaño, y fielnan bayendo e santuario riba rudia, avansando cu hopi esfuerso y dolor door di e multitud.’

ASINA e corant El Economista a describi un multitud enorme cu tawatin na december di 2001. Mas o menos tres miyon hende a bishita e basilica na Ciudad di Mexico pa mustra nan fe den Birgen di Guadalupe. Otro edificionan religioso, manera e Basilica di San Pedro na Roma, tambe ta hala un gran cantidad di bishitante.

Edifisionan religioso tin un luga special den curason di hopi hende cu tin e deseo di adora Dios. Maria, di Brazil, ta bisa: “Pa mi, misa tawata un luga caminda mi por ta mas serca di Dios, un luga santo. Mi tawata kere cu door di bai misa bo ta limpia bo alma, y cu ta un pica pa keda sin bai misa y confesa tur diadomingo.” Consuelo, di Mexico, ta conta: “Misa tawata lanta un gran emocion den mi. E tawata un luga hopi special pa mi. Ora mi tawata den misa, mi tawata sinti cu ta den shelo mi ta.”

Maske tin hende ta haya edificionan manera misa hopi importante, otronan ta duda cu luganan asina ta necesario pa adora Dios. Peter Sibert, un pasto catolico na Inglatera, a comenta riba e echo cu tiki hende ta bai misa, y a bisa: “[Hende] ta scohe djis e pidanan di religion cu nan ta gusta. Hopi hende di edad ta catolico y ta practica nan fe, pero hende mas jong no ta sinti e mesun compromiso ei.” The Daily Telegraph di Londen, a comenta lo siguiente den su edicion di 20 di november 1998: “For di 1979, mas o menos 1.500 misa a sera na Inglatera,  mientras cu apenas 495 misa nobo a habri y 150 a ser reconstrui.”

Na 1997 e corant Süddeutsche Zeitung di Munich, Alemania, a informa: “Ta cohe misa haci luga di cine y apartamento: Creyentenan no ta bai misa mas. Ta uza luga di adoracion pa otro cos. . . . Loke ya a bira un tradicion na Hulanda y Inglatera a cuminsa sosode na Alemania tambe.” Tambe e corant a bisa: “Por lo menos 30 of 40 benta espectacular di misa a tuma luga na Alemania durante e ultimo añanan.”

Di berdad ta necesario pa uza edificio religioso pa adora Dios? Tin algo den Bijbel cu ta duna nos base pa traha basilica y misa luhoso. Ki sorto di edificio hende a yega di uza pa adora e Dios bibo y berdadero? E edificionan aki por yuda nos compronde si acaso nos tin mester di luga pa adora Dios, y tambe kico nos lo mester haci den luganan asina?