“Bini Serca Mi, . . . y Lo Mi Refresca Boso”

“Pastorea e Tou di Dios”

“Semper boso ta dispuesto pa scucha nos y anima nos cu palabranan di Bijbel.”—Pamela.

“Danki pa tur loke boso ta haci pa nos tur. Boso ta yuda nos bon.”—Robert.

PAMELA y Robert a sinti nan motiva pa skirbi e palabranan di aprecio ei pa e ancianonan cristian den nan respectivo congregacionnan. Otro sirbidonan di Dios rond mundo tambe ta masha gradicido pa e apoyo y cuido cu nan ta ricibi for di esnan cu ta “pastorea e tou di Dios.” (1 Pedro 5:2) Si, e pueblo di Yehova ta masha gradicido pa e tantisimo cosnan cu e ancianonan ta haci pa nan y pa e manera cu nan ta haci esakinan.

“Abunda den Trabou”

Ancianonan cristian tin hopi responsabilidad. (Lucas 12:48) Nan ta prepara partinan pa e reunionnan di congregacion y ta participa den e trabou publico di predica e bon nobo di e Reino di Dios. Tambe nan tin e tarea di pastorea nan compañeronan di fe. E ancianonan ta dedica tempo na e rumannan cu tin mester di atencion special—esnan di edad y otronan—sin neglisha e bienestar spiritual y material di nan propio famia. (Job 29:12-15; 1 Timoteo 3:4, 5; 5:8) Algun anciano ta yuda den construccion di Salonnan di Reino. Otronan ta sirbi den Comite di Contacto cu Hospital of nan ta miembro di e Grupo di Bishita Pashent Testigo cu ta malo den hospital. Tambe tin hopi anciano ta haci trabou boluntario na asamblea y congreso. Si, ancianonan ta ‘abunda den e trabou di Señor.’ (1 Corintionan 15:58) Pues, no ta nada straño cu e rumannan cu ta bou di cuido di e ancianonan aki cu ta traha duro, ta aprecia nan masha!—1 Tesalonicensenan 5:12, 13.

Ancianonan cu ta bishita nan rumannan cristian regularmente na cas of otro caminda pa fortalece nan spiritualmente ta un fuente di animacion. “Mi ta kere cu si no tawata pa e apoyo y animacion amoroso di e ancianonan, lo mi no ta sirbiendo Yehova como un minister di tempo completo awe.” Eseinan ta palabranan di Thomas, kende a lanta sin un tata na cas. Hopi hoben cu a lanta den un famia cu un solo mayor ta reconoce cu e atencion cu nan a ricibi di e ancianonan a yuda nan desaroya un relacion personal cu Dios.

Rumannan di edad den e congregacion tambe ta aprecia bishita di pastoreo masha. Despues cu un pareha misionero di ochenta y pico aña di edad a haya bishita di dos anciano, nan a skirbi: “Nos kier expresa nos aprecio pa boso bishita. Tawata un placer  pa ricibi boso. Despues cu boso a bai nos a bolbe lesa e textonan cu boso a considera hunto cu nos. Nunca mas nos lo lubida boso palabranan di animacion.” Un biuda di 70 aña di edad a skirbi e ancianonan lo siguiente: “Mi a haci oracion pidi Yehova yudansa y El a manda boso dos na mi cas. Boso bishita tawata un bendicion di Yehova!” Bo a haya un bishita resientemente di bo ancianonan di congregacion? Sin duda nos tur ta aprecia e esfuerso cu nan ta haci pa pastorea e tou cu nan tin cu cuida!

Wardadonan Cu Ta Imita Dios y Cristo

Yehova ta un Wardador amoroso. (Salmo 23:1-4; Yeremias 31:10; 1 Pedro 2:25) Hesucristo tambe ta un excelente Wardador cu ta percura pa nos necesidadnan spiritual. Realmente, Bijbel ta yam’e “bon wardador”, “gran wardador” y “wardador principal.” (Huan 10:11; Hebreonan 13:20; 1 Pedro 5:4) Con Hesus a trata e personanan cu kier a bira su disipel? El a duna nan un invitacion caloroso: “Bini serca mi, boso tur cu ta cansa y carga, y lo mi refresca boso.”—Mateo 11:28, NW.

Asina tambe ancianonan awe ta haci esfuerso pa nan ta un fuente di refrescamento y proteccion pa e tou. E hombernan ei “ta manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isaias 32:2) E hombernan bondadoso ei cu ta duna tal proteccion ta trece refrescamento, nan ta merece respet di e tou, y ta ricibi e aprobacion di Dios.—Filipensenan 2:29; 1 Timoteo 5:17.

Apoyo Balioso di Nan Casa

E pueblo di Dios ta masha gradicido pa e ancianonan cristian y tambe pa e apoyo amoroso cu e hombernan aki ta ricibi di nan casa. Pa e señoranan aki por apoya nan casa hopi bes nan tin cu haci sacrificio. Tin bes nan so tin cu keda cas pasobra nan casa a bai atende un asunto di congregacion of pastorea rumannan. Tin bes nan tin cu pospone cosnan personal cu nan a plania cuidadosamente, pasobra a surgi problema den e congregacion. “Asina mes”, segun Michelle, “ora mi mira con druk mi casa ta cu preparacion pa e reunionnan of cu su trabou di pastoreo, mi ta recorda mi mes cu ta pa Yehova e ta traha y mi ta purba di yud’e mas tanto posibel.”

Cheryl, kende tambe ta casa cu un anciano, a declara: “Mi sa cu e rumannan den congregacion tin mester di e ancianonan pa papia cu ne, y mi kier pa nan sinti cu nan por acerca mi casa ki ora cu nan tin mester di dje.” Mohenan cu ta apoya nan casa manera Michelle cu Cheryl ta dispuesto pa haci sacrificio pa nan casa por cuida Dios su carnenan. Rumannan ta aprecia esposa di e ancianonan pa e echo cu nan ta dispuesto pa apoya nan casa.

Sinembargo maske con druk un anciano por ta, e no mester neglisha e necesidad spiritual ni otro necesidadnan di su esposa y yiunan. Un anciano casa mester ta un homber “sin reproche, cu ta esposo di un esposa, cu tin yiu cu ta kere, cu no ta wordo acusa di libertinahe of rebeldia.” (Tito 1:6) E tin cu percura pa su famia na e manera deboto cu Bijbel ta describi pa superintendentenan cristian.—1 Timoteo 3:1-7.

Un esposa cu ta apoya un anciano druk tin un balor inmenso! Esei ta loke ancianonan casa y atento ta pensa. Esei ta cuadra precis cu loke Bijbel ta bisa: “Esun cu haya un [“bon”, NW] esposa ta haya algo bon.” (Proverbionan 18:22) E ancianonan ei ta mustra aprecio sinsero pa nan esposa cu echo y palabra. Ademas di haci oracion sinsero y studia dushi hunto, e parehanan cristian aki ta aparta tempo pa disfruta di un caminata canto di beach, subi sero y keiro den un parke. Si, ancianonan ta sinti un goso ora nan ta cuida nan casa cu amor.—1 Pedro 3:7.

Ancianonan cu ta pastorea e tou di Dios na un manera inegoista ta un fuente di refrescamento spiritual pa e pueblo di Yehova. Nan ta berdadero “donnan na hende”, un bendicion pa e congregacion.—Efesionan 4:8, 11-13.