Pregunta di Lector

Nos mester cumpli cu tur voto cu nos haci na Dios?

Segun Bijbel, un voto ta un promesa solem of serio haci na Dios, den cua bo ta primintie di haci algo, duna un ofrenda, cuminsa cu un actividad special, of abstene di cierto cosnan cu riba nan mes no ta contra lei. Bijbel ta contene relatonan di voto cu a wordo haci cu cierto condicion, den e sentido cu e persona ta priminti di haci algo basta Dios haci loke e persona ta pidi prome. Por ehempel, Ana, mama di profeta Samuel, “a haci un huramento [of voto] y a bisa: ‘O SEÑOR di ehersitonan, si . . . bo . . . no lubida riba bo sirbiente, ma duna bo sirbiente un yiu homber, e ora ei lo mi dun’e na SEÑOR tur e dianan di su bida, y nunca nabaha lo no pasa riba su cabes.’” (1 Samuel 1:11) Tambe Bijbel ta bisa cu voto ta algo cu hende ta haci boluntariamente. Te con leu nos tin cu cumpli cu votonan haci na Dios?

Rei Salomon di Israel di antiguedad a bisa: “Ora bo haci un promesa na Dios, no tarda pa cumpli cu ne.” E ta agrega: “Cumpli cu loke bo ta priminti! Ta miho bo no priminti, cu priminti y keda sin cumpli.” (Eclesiastes 5:4, 5) E Lei cu Yehova a duna na e pueblo di Israel mediante Moises ta bisa: “Ora bo haci un promesa na SEÑOR bo Dios, no tarda pa cumpli cu ne, pasobra esaki lo ta pica den bo, y siguramente SEÑOR bo Dios lo exigi esaki for di bo.” (Deuteronomio 23:21) Ta claro anto cu un voto na Yehova ta un asunto serio. E persona cu ta haci un voto mester hacie cu e motibo corecto, y e no mester tin duda cu lo e por cumpli cu loke el a priminti den su voto. Si e no por, ta miho e no haci e voto. Pero una bes un persona a haci un voto, e mester cumpli cu ne, sin importa kico e ta?

Kico si un persona a priminti di haci algo, y despues e ta haya sa cu esaki ta contra e boluntad di Dios? Supone cu el a haci un voto cu di un of otro manera ta conecta inmoralidad cu adoracion berdadero? (Deuteronomio 23:⁠18) Obviamente e persona ei no ta obliga pa cumpli cu e voto ei. Ademas, e Lei di Moises a permiti un tata of esposo anula un voto cu sea su yiu mohe of esposa a haci.—Numbernan 30:3-15.

Tuma tambe como ehempel e caso di un persona cu den un voto na Dios a priminti cu lo e keda soltero, pero cu awor ta hay’e den un dilema. Su voto a pon’e den un situacion cu e ta sinti cu den su esfuerso pa cumpli cu e voto aki casi e ta viola Dios su normanan relaciona cu moralidad. Toch e mester sigui bringa pa cumpli cu su voto? Lo no ta miho pa e no cumpli cu su voto y asina proteha su mes pa e no bira culpabel di inmoralidad, y mas bien roga Dios pa su misericordia y pordon? Den un caso asina ta e so por dicidi. Ningun otro hende no por tuma e desision ei p’e.

Kico si un persona haci un voto y despues e ta realisa cu e tawata mucho impulsivo? E mester haci esfuerso pa cumpli cu su voto toch? No tawata facil pa Jefte cumpli cu su voto cu el a haci na Dios, pero toch el a percura pa cumpli cu ne. (Huesnan 11:30-40) Ora un persona keda sin cumpli cu su voto na Dios, esei por pone Dios “rabia” y destrui tur loke e persona ei a logra. (Eclesiastes 5:6) Si nos trata e asunto di cumpli cu  un voto como algo di poco importancia nos por perde Dios su aprobacion.

Hesus a bisa: “Laga bo ‘si’ ta ‘si’, of bo ‘no’ ta ‘no’; y tur loke ta mas cu esei ta for di e malbado.” (Mateo 5:37) Un cristian mester ta interesa no solamente pa cumpli cu su votonan na Dios, sino tambe pa tur loke e bisa ta digno di confiansa, tanto pa Dios como pa hende. Pero kico si e hay’e den un dilema pa motibo cu el a drenta un acuerdo cu un persona cu na prome instante a parce bon, pero cu ora el a pensa mas miho ta parce un acto di bobedad? E no mester mira e asunto como algo di poco importancia. Pero despues di un combersacion sinsero, kisas e otro persona cu ken e tawatin e acuerdo por dicidi di absolv’e di su obligacion.—Salmo 15:4; Proverbionan 6:2, 3.

Kico mester ta nos interes principal relaciona cu voto y tur otro cos? Laga nos semper haci esfuerso pa nos keda cu un bon relacion cu Yehova Dios.

[Plachi na pagina 30, 31]

Ana no a basila pa cumpli cu su voto

[Plachi na pagina 30, 31]

Aunke tawata dificil pa Jefte cumpli cu su voto, el a hacie