Sigui Sirbi Scouder cu Scouder

“Lo mi duna pueblonan e cambio pa un idioma puro, pa nan tur por invoca e nomber di Yehova, pa nan sirbie scouder cu scouder.”—SOFONIAS 3:9, NW.

1. Kico ta sosodiendo como cumplimento di Sofonias 3:9?

ROND di 6.000 idioma ta ser papia na mundo actualmente. Y ademas di nan tin varios dialecto, esta, variante regional di un idioma. Pero apesar cu hende ta papia un cantidad di idioma diferente, di Arabir te Zulu, toch Dios a haci un cos hopi remarcabel. El a haci posibel pa hende rond mundo siña y papia e unico idioma puro. Esaki ta sosode como cumplimento di un promesa cu Dios a haci via profeta Sofonias: “Lo mi [Yehova Dios] duna pueblonan e cambio pa un idioma puro [literalmente, “un lip limpi”], pa nan tur por invoca e nomber di Yehova, pa nan sirbie scouder cu scouder.”—Sofonias 3:9, NW.

2. Kico ta e “idioma puro”, y kico el a haci posibel?

² E “idioma puro” ta e berdad di Dios cu nos por haya den su Palabra, Bijbel. E ta encera principalmente e berdad tocante e Reino di Dios, cu lo santifica Yehova su nomber, confirma Yehova su derecho di goberna como Soberano, y trece bendicion pa humanidad. (Mateo 6:9, 10) E idioma puro ta e unico idioma spiritualmente limpi na mundo, y hende di tur nacion y tur rasa ta papi’e. E ta permiti nan sirbi Yehova “scouder cu scouder.” Asina nan ta sirbie uni, of manera Beibel Santu ta bisa, “den un acuerdo.”

No Por Tin Distincion di Persona

3. Kico ta permiti nos sirbi Yehova den harmonia?

³ Como cristiannan nos ta gradicido pa e manera cu cristiannan di tur lenga ta coopera cu otro. Maske nos ta predica e bon nobo di e Reino di Dios den hopi diferente idioma humano, nos ta sirbi Dios den harmonia. (Salmo 133:1) Esaki ta posibel debi cu, sin importa unda na mundo nos ta biba, nos ta papia un solo idioma puro na alabansa di Yehova.

4. Pakico no mag tin distincion di persona den e pueblo di Dios?

⁴ No mag existi distincion di persona den e pueblo di Dios. Apostel Pedro a mustra esei bon cla ora el a predica na cas di Cornelio, un oficial di ehersito pagano, na aña 36 di nos era. Pedro a sintie impulsa pa bisa: “Di berdad mi ta compronde awor cu Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” (Echonan 10:​34, 35) Esei ta berdad, y pesei den e congregacion cristian no por tin distincion di persona, ni grupito di hende cu ta forma kliek y asocia nan cu nan so, ni faboritismo.

5. Dicon ta malo pa forma kliek den congregacion?

⁵ Un studiante di universidad a conta lo siguiente di un bishita cu el a haci na un Salon di Reino: “Normalmente, e iglesianan ta haya nan miembronan for di un cierto rasa of grupo etnico. . . . Tur e Testigonan di Yehova tawata sinta hunto, no den kliek apart.” Pero algun miembro di e congregacion na antiguo Corinto tawata causando division. Door di trece desunion nan a traha contra obramento di Dios su spirito santo, pasobra loke e spirito ta promove mas bien ta unidad y pas. (Galationan 5:22) Si nos cuminsa forma kliek den congregacion, nos lo ta trahando contra e guia di e spirito. Pesei, laga nos tene na mente loke apostel Pablo a bisa e Corintionan: “Mi ta exhorta boso, rumannan, pa medio di e nomber di nos Señor Hesucristo, pa boso tur  papia e mesun cos, y pa no tin division entre boso, ma pa boso ta perfectamente uni den e mesun mente y den e mesun opinion.” (1 Corintionan 1:10) Den su carta pa e Efesionan tambe Pablo a enfatisa unidad.—Efesionan 4:1-6, 16.

6, 7. Ki conseho Santiago a duna tocante faboritismo, y kico loke el a bisa ta encera?

⁶ Semper cristiannan tawatin e deber di trata otro sin distincion di persona. (Romanonan 2:11) Debi cu algun miembro di e congregacion den prome siglo tawata faborece hende cu placa, disipel Santiago a skirbi nan: “Mi rumannan, no laga boso fe den nos glorioso Señor Hesucristo ta cu un actitud di distincion di persona. Pasobra si un hende drenta den boso asamblea bon bisti y cu renchi di oro na dede, y ta drenta tambe un hende pober bisti cu paña sushi, y boso ta paga atencion special na esun cu ta bon bisti y ta bisa: ‘Abo sinta akinan na un bon luga’, y boso ta bisa e hende pober: ‘Abo bai para ayanan, of bai sinta banda di e banki pa mi pianan’, boso no a haci distincion entre boso mes, y a bira huesnan cu mal pensamento?”—Santiago 2:1-4.

⁷ Si un hende rico cu no ta creyente a bai un reunion cristian cu renchi di oro y bon bisti, anto un hende no creyente pober den paña sushi tambe a bai, esun rico tawata ricibi trato special. E tawata haya “un bon luga” pa sinta, anto esun pober mester a keda para of sinta abou na suela na pia di un hende. Pero Dios a percura e sacrificio di rescate di Hesus sin haci distincion di persona, pa tanto rico como pober. (Job 34:19; 2 Corintionan 5:14) Pues, si nos kier agrada Yehova y sirbie scouder cu scouder, nos no mag mustra faboritismo ni ‘labia hende pa saca probecho.’—Hudas 4, 16.

No Murmura

8. Kico a sosode debi cu e Israelitanan a murmura?

⁸ Pa nos mantene nos unidad y keda cu Dios su aprobacion, nos tin cu cumpli cu e siguiente conseho di Pablo: “Haci tur cos sin murmura.” (Filipensenan 2:​14, 15) E Israelitanan infiel cu a sali liber for di sclabitud na Egipto a murmura contra Moises cu Aron, y pues contra Yehova Dios mes. Debi na esei tur homber di 20 aña pariba, cu excepcion di fiel Hosue cu Caleb y e Levitanan, a keda sin drenta e Tera Priminti. Nan a muri durante e 40 añanan cu Israel a pasa den desierto. (Numbernan 14:2, 3, 26-30; 1 Corintionan 10:10) Esta un prijs halto nan a paga pa nan murmuramento!

9. Kico Miriam a pasa aden debi cu el a murmura?

⁹ Esei ta mustra kico por pasa cu henter un nacion cu ta murmura. Kico di hende individual cu ta murmura? Wel, Moises su ruman mohe Miriam, hunto cu su ruman homber Aron, a murmura bisando: “Ta pa medio di Moises so SEÑOR a papia anto? E no a papia pa medio di nos tambe?” Y e relato ta agrega: “SEÑOR a tende esaki.” (Numbernan 12:1, 2) Cu ki resultado? Dios a humiya Miriam, cu parce tawata esun cu a cuminsa e kehamento. Kico Dios a haci cu ne? El a castig’e cu lepra di manera cu Miriam tawata obliga di keda pafo di e campamento pa shete dia largo, te ora el a bira limpi di e lepra.—Numbernan 12:9-15.

10, 11. Si no controla e tendencia di murmura, kico e por hiba na dje? Duna un ehempel.

¹⁰ Murmura ta nifica mas cu djis keha tocante algo robes. Hende cu ta murmura continuamente  ta duna mucho importancia na nan propio sintimentonan of nan propio posicion, y nan ta hala atencion na nan mes en bes di na Dios. Si no controla e tendencia aki, e por trece desunion entre rumannan spiritual y stroba nan esfuerso pa sirbi Yehova scouder cu scouder. Esei ta asina pasobra semper murmuradonan ta cana papia tocante nan kehonan, sin duda sperando pa otronan bai di acuerdo cu nan.

¹¹ Por ehempel, kisas un hende ta critica con un anciano ta duna su partinan of cumpli cu su asignacionnan den congregacion. Si nos scucha e kehado, nos lo por cuminsa pensa mescos cu ne. Kisas nunca prome e cosnan cu e anciano ta haci no a yega di molestia nos te na momento cu e murmurado a planta e simiña di malcontento den nos mente. Cu tempo, nada cu e anciano haci lo no ta bon mas den nos bista, y nos tambe lo por cuminsa keha di dje. E sorto di conducta aki no ta pas den un congregacion di Yehova su pueblo.

12. Ki efecto murmuramento por tin riba nos relacion cu Dios?

¹² Si nos murmura contra hombernan cu tin e deber di cuida e tou di Dios, cu tempo nos por cuminsa insulta nan of papia malo di nan. Si nos murmura contra nan, calumnia nan of pidi malo pa nan, esei por perhudica nos relacion cu Yehova. (Exodo 22:28) Hende cu ta insulta y no ta repenti lo no hereda e Reino di Dios. (1 Corintionan 5:11; 6:​10, NW) Disipel Hudas a skirbi tocante murmuradonan cu tawata ‘rechasa autoridad, y blasfema mahestadnan’, esta, hombernan cu responsabilidad den congregacion. (Hudas 8) E murmuradonan ei no tawatin Dios su aprobacion, y ta sabi di nos parti pa keda leu for di nan manera malbado di actua.

13. Dicon no semper ta robes pa keha?

¹³ Ta berdad cu Dios no ta contra tur tipo di keho. E no a keda sin scucha e grito di keho contra Sodoma y Gomora, sino cu el a destrui e stadnan malbado ei. (Genesis 18:20, 21; 19:​24, 25) Na Herusalem, poco despues di Pentecoste di aña 33 di nos era, “a surgi un reclamo di parti di e Hudiunan Griego contra e Hebreonan, pasobra nan tawata salta nan biudanan den partimento di e cuminda di tur dia.” Pesei “e diesdosnan” a corigi e situacion door di nombra “shete homber di bon reputacion” pa encarga nan cu e tarea necesario di parti cuminda. (Echonan 6:1-6) Ancianonan den nos tempo no mester ‘sera nan horea’ pa kehonan cu tin base. (Proverbionan 21:13) Y en bes di critica nan compañeronan di adoracion, ancianonan mester anima nan y edifica nan.—1 Corintionan 8:1.

14. Cua cualidad ta hopi importante pa yuda nos keda sin murmura?

¹⁴ Nos tur mester wak pa nos no murmura, pasobra un actitud di keha ta malo pa bo spiritualidad. Un actitud asina lo tin un mal efecto riba nos unidad. Mas bien, semper permiti spirito santo produci amor den nos. (Galationan 5:22) Si nos cumpli cu e ‘lei real di amor’, esei lo yuda nos keda sirbi Yehova scouder cu scouder.—Santiago 2:8; 1 Corintionan 13:4-8; 1 Pedro 4:8.

Cuidou cu Calumnia

15. Con lo bo splica e diferencia entre redo y calumnia?

¹⁵ Nos mester paga tino kico nos ta bisa, pasobra murmuramento por hiba na redo cu por perhudica hende. Redo ta encera papia riba hende, sea cos bon of malo. Pero calumnia ta nifica lansa mentira cu intencion di daña reputacion di un hende. Calumnia ta un cos malbado, un pica. Pesei Dios a bisa e Israelitanan: “No cana calumnia meimei di bo pueblo.”—Levitico 19:16.

16. Kico Pablo a bisa tocante cierto hacidonan di redo, y ki efecto su conseho mester tin riba nos?

¹⁶ Debi cu redo por hiba na calumnia, Pablo a scual cierto hacidonan di redo. Despues di haci mencion di biudanan cu a bini na remarca pa haya yudansa di congregacion, el a papia di algun otro biuda cu a “siña cana  pornada, y no solamente cana pornada, ma tambe nan ta siña haci redo y mete den asunto di otro hende, papiando cosnan cu no ta cumbini.” (1 Timoteo 5:11-15) Si un hende mohe cristian mira cu e tin e debilidad di papia cos cu por hiba na calumnia, ta bon pa e scucha Pablo su conseho y sea “digno, no calumniado.” (1 Timoteo 3:11) Claro cu hombernan cristian tambe tin cu paga tino pa nan no haci redo cu por perhudica hende.—Proverbionan 10:19.

Stop di Husga!

17, 18. (a) Kico Hesus a bisa tocante husga nos rumannan? (b) Con nos por aplica loke Hesus a bisa tocante husgamento?

¹⁷ Asta si nos no ta calumnia ningun hende, kisas nos mester haci un esfuerso pa no husga hende tampoco. Hesus a condena e actitud ei, door di bisa: “No husga, pa boso no wordo husga. Pasobra di e mesun manera cu boso husga, boso lo wordo husga; y cu e mesun midi cu boso midi, lo wordo midi pa boso tambe. Y pakico bo ta wak e stof den wowo di bo ruman, ma no ta ripara e balki cu tin den bo mes wowo? Of con bo por bisa bo ruman: ‘Laga mi saca e stof for di bo wowo’, y mira, e balki no ta den bo mes wowo? Abo, hipocrita, saca prome e balki for di bo mes wowo, y e ora ei lo bo mira bon cla pa saca e stof for di wowo di bo ruman.”—Mateo 7:​1-5.

¹⁸ Nos no por pretende di kier saca un simpel “stof” for di wowo di un ruman pa yud’e, si tin un “balki”, na moda di papia, ta stroba nos di husga corectamente. De echo, si nos ta compronde bon con misericordioso Dios ta, nos lo no tin e tendencia di husga nos rumannan spiritual. Con nos por kere cu nos por compronde nan mes bon cu nos Tata celestial? Pesei no ta nada straño cu Hesus a spierta nos pa ‘no husga, pa nos no wordo husga’! Si nos realisa francamente con imperfecto nos ta, esei lo mester pone nos evita di husga di un manera cu Dios lo considera inhusto.

Debil Pero Honorabel

19. Con nos mester mira nos compañeronan creyente?

¹⁹ Si nos ta determina pa sirbi Dios scouder cu scouder cu nos compañeronan creyente, nos lo haci mas cu djis evita di husga nan. Nos  lo tuma iniciativa pa honra nan tambe. (Romanonan 12:10) De echo, nos lo busca nan interes y no di nos mes, y nos lo tin goso haciendo trabou humilde na nan beneficio. (Huan 13:12-17; 1 Corintionan 10:24) Con nos por keda cu un actitud excelente asina? Door di tene na mente cu tur creyente ta precioso pa Yehova, y cu nos tin mester di otro, mescos cu cada parti di un hende su curpa ta depende di e otronan.—1 Corintionan 12:14-27.

20, 21. Kico e palabranan na 2 Timoteo 2:20 y 21 mester nifica pa nos?

²⁰ Ta berdad cu cristiannan ta pochi di klei debil, confia cu e glorioso tesoro di e bon nobo. (2 Corintionan 4:7) Si nos kier efectua e trabou sagrado aki pa gloria di Yehova, nos tin cu keda cu un posicion honorabel dilanti di e y su Yiu. Ta solamente si nos keda puro den sentido moral y spiritual nos por sigui ta pochinan honorabel pa Dios uza. Pablo a skirbi: “Den un cas grandi no tin solamente articulonan di oro y di plata, ma tambe articulonan di palo y di tera, y algun pa honor y algun pa deshonor. Pesei, si un hende purifica su mes di e cosnan aki, e lo ta un instrumento pa honor, santifica, util pa e maestro, prepara pa tur bon obra.”—2 Timoteo 2:20, 21.

²¹ Hende cu no ta actua na harmonia cu loke Dios ta manda ta ‘articulo pa deshonor.’ Pero si nos cana di acuerdo cu e boluntad di Dios, nos lo ta ‘instrumento pa honor, santifica, esta, aparta pa sirbishi di Yehova y prepara pa tur bon obra.’ Pues, nos lo por puntra nos mes: ‘Mi ta un “instrumento pa onor”? Mi tin un bon influencia riba mi compañeronan creyente? Mi ta un miembro di e congregacion cu ta traha scouder cu scouder cu otro adoradonan?’

Sigui Sirbi Scouder cu Scouder

22. Cu kico nos por compara e congregacion cristian?

²² E congregacion cristian ta manera un famia. Ora tur miembro di un famia ta adora Yehova, ta reina un ambiente placentero di amor caminda tur hende ta cla pa yuda. Maske den un famia tin varios hende cu diferente personalidad, tur tin un luga honorabel den e famia. Den congregacion ta mescos. Maske nos tur ta diferente, y imperfecto, Dios a hala nos tur serca dje pa medio di Cristo. (Huan 6:44; 14:6) Yehova y Hesus ta stima nos, y mescos cu den un famia uni, nos tin cu mustra amor na otro.—1 Huan 4:7-11.

23. Kico nos mester keda corda, y kico nos mester keda determina pa haci?

²³ Ademas, e congregacion, of famia, cristian ta un luga caminda nos tin derecho di spera lealtad. Apostel Pablo a skirbi: “Mi ta desea pa den tur luga e hombernan ocupa nan mes cu oracion, hisando mannan leal, liber di rabia y debate.” (1 Timoteo 2:8, NW) Asina Pablo a mustra cu tin un conexion entre lealtad y hacimento di oracion na “tur luga” cu cristiannan ta reuni. Ta hombernan leal so mester representa e congregacion den oracion publico. Claro cu Dios ta spera pa nos tur ta leal na dje y na otro. (Eclesiastes 12:13, 14) Pesei, laga nos ta determina pa traha hunto den harmonia, mescos cu e diferente partinan di curpa humano. Laga nos sirbi uni tambe como parti di Yehova su famia di adoradonan. Mas cu tur cos, laga nos keda corda cu nos tin mester di otro, y cu nos lo disfruta di Dios su aprobacion y su bendicion si nos sigui sirbi Yehova scouder cu scouder.

Con Lo Bo Contesta?

• Kico ta permiti Yehova su pueblo ­sirbie scouder cu scouder?

• Dicon cristiannan ta percura di no haci distincion di persona?

• Dicon lo bo bisa cu murmuramento ta malo?

• Dicon nos mester honra nos compañeronan creyente?

[Study Questions]

 [Plachi na pagina 15]

Pedro a compronde cu “Dios no ta haci distincion di persona”

[Plachi na pagina 16]

Bo sa dicon Dios a humiya Miriam?

[Plachi na pagina 18]

Cristiannan leal ta sirbi Yehova gososamente scouder cu scouder