Disfruta di un Studio Personal di e Palabra di Dios

“Lo mi medita riba tur bo obranan, y keda pensa riba bo echonan.”—SALMO 77:12.

1, 2. (a) Pakico nos tin cu aparta tempo pa medita? (b) Kico e palabranan “medita” y “reflexiona” ta nifica?

COMO disipel di Hesucristo, nos mester ta profundamente interesa den nos relacion cu Dios y e motibonan pakico nos ta sirbie. Pero awendia mayoria hende ta asina druk cu nan no ta sobra tempo pa medita. Coremento tras di cos material, gastamento di placa y buscamento pa loco di placer tin nan completamente ocupa. Con nos por evita tur e banidad ei? Mescos cu nos ta dedica cierto tempo tur dia na e actividadnan esencial, manera come y drumi, asina tambe tur dia nos tin cu aparta tempo pa medita riba Yehova su obranan y su trato cu hende.—Deuteronomio 8:3; Mateo 4:4.

² Abo sa para un rato pa medita? Kico kiermen medita? E palabra ei ta ser defini como concentra riba un cos of reflexiona riba algo. Y e palabra “reflexiona” ta nifica pensa den tur trankilidad riba un cos na un manera serio y profundo. Kico esaki ta nifica pa nos?

3. Kico un persona tin cu haci pa e por progresa den sentido spiritual?

³ Na prome luga, esei mester pone nos corda riba loke apostel Pablo a skirbi su compañero Timoteo: “Te ora mi bin, ocupa bo mes cu lesamento di Scritura, exhortacion y siñamento. . . . [“Reflexiona riba”, NW] e cosnan aki; sea dedica na nan, pa bo progreso por ta bisto pa tur hende.” Si, Timoteo por a bai dilanti. Pablo su palabranan a mustra cu pa un persona progresa, e tin cu reflexiona riba asuntonan spiritual. Awe ta mescos. Pa nos por tin e satisfaccion di haci progreso spiritual, nos tambe tin cu “reflexiona riba” e cosnan cu tin di aber cu e Palabra di Dios y “dedica” nos na nan.—1 Timoteo 4:13-15.

4. Kico ta e cosnan cu lo por yuda bo medita riba e Palabra di Yehova regularmente?

⁴ Ta bo rutina personal y esun di bo famia ta determina ki ora ta mas adecua pa bo medita. Hopi hende ta medita riba un texto di Bijbel mainta tempran ora nan ta lesa e foyeto Eksaminando e Skritura Diariamente. Por cierto, mas o menos 20.000 boluntario den casnan di Betel rond mundo ta cuminsa nan dia cu un consideracion di 15 minuut di e texto di Bijbel pa e dia ei. Aunke ta solamente un par di miembro di e famia di Betel ta duna un comentario verbal tur mainta, e resto ta reflexiona riba loke ta ser bisa y lesa. Otro Testigonan ta medita riba e Palabra di Yehova ora nan ta riba caminda pa trabou. Nan ta scucha cassette di Bijbel y di e revistanan Toren di Vigilancia y Spierta! cu ta disponibel den algun idioma. Hopi ama di cas ta scucha cassette ora nan ta haci trabou di cas. En realidad, nan ta imitando e salmista Asaf, kende a skirbi: “Lo mi corda e echonan di SEÑOR; siguramente lo  mi corda bo maraviyanan di prome aya. Lo mi medita riba tur bo obranan, y keda pensa riba bo echonan.”—Salmo 77:11, 12.

Actitud Corecto Ta Duna Resultado Positivo

5. Pakico studio personal mester ta importante pa nos?

⁵ Den nos era moderno di television, video y computer, mayoria hende no ta gusta lesa masha mas. Esei sigur no mester ta e caso cu Testigonan di Yehova. Al fin y al cabo, lesamento di Bijbel ta manera un liña cu ta conecta nos cu Yehova. Miles di aña pasa, Hosue a sigui Moises como lider di Israel. Pa Hosue por a haya e bendicion di Yehova, e mes tawatin cu lesa e Palabra di Dios. (Hosue 1:8; Salmo 1:1, 2) Awe, esei ta un rekisito pa nos tambe. Pero door cu algun ruman no tin mucho scol, kisas nan no por lesa bon of nan ta haya esei laf. Pues kico por yuda duna nos mas smak pa lesa y studia e Palabra di Dios? Nos por haya e contesta den e palabranan di Rei Salomon registra na Proverbionan 2:1-6. Por fabor habri bo Bijbel y lesa e versiculonan aki. Despues nos lo considera nan hunto.

6. Ki actitud nos mester tin pa cu e conocemento di Dios?

⁶ Pa cuminsa, nos ta haya e exhortacion aki: “Mi yiu, si bo kier ricibi mi palabranan y warda mi mandamentonan den bo, haci bo horea atento na sabiduria, y inclina bo curason na comprondemento.” (Proverbionan 2:1, 2) Kico nos ta siña for di e palabranan aki? Cu cada un di nos tin e responsabilidad di studia e Palabra di Dios. Tuma nota di e condicion “si bo kier ricibi mi palabranan.” E palabra “si” ta masha clave den e caso aki pasobra mayoria hende no ta presta atencion na e Palabra di Dios. Pa nos haya goso den studia e Palabra di Dios, nos mester ta dispuesto pa ricibi e dichonan di Yehova y trata nan manera un tesoro cu nos no kier perde. Hamas nos mester permiti nos rutina di tur dia pone nos bira asina ocupa, of distrai nos asina tanto cu nos ta cuminsa perde interes den e Palabra di Dios, of asta cuminsa duda den dje.—Romanonan 3:3, 4.

7. Pakico nos mester ta presente na reunionnan cristian ki ora cu ta posibel y presta atencion na nan?

⁷ Nos realmente ta “atento” y ta scucha cu atencion ora e Palabra di Dios ta ser splica na nos reunionnan cristian? (Efesionan 4:20, 21) Nos ta ‘inclina nos curason’ pa nos por haya comprondemento of discernimento? Podise e orado no ta esun di mas experencia, pero mientras e ta uza e Palabra di Dios, e merece nos sumo atencion. Claro cu pa nos por presta atencion na Yehova su sabiduria, nos mester ta presente na reunionnan cristian, ki ora cu ta posibel. (Proverbionan 18:1) Imagina bo con decepciona cualkier persona lo a sinti nan mes si nan a perde e reunion den e sala ariba den Herusalem na Pentecoste di aña 33 di nos era! Aunke nos reunionnan no ta mes sensacional cu esun ei, ta splicacion di Bijbel—nos buki di guia principal—ta ser duna einan. Pues, tur reunion por ta un bendicion pa nos si nos presta atencion y sigui e lesamento di texto den nos mes Bijbel.—Echonan 2:1-4; Hebreonan 10:24, 25.

8, 9. (a) Kico studio personal ta exigi di nos? (b) Kico ta e balor di oro compara cu comprondemento di e Palabra di Dios?

⁸ E siguiente palabranan di e rei sabi ta: “Si bo sclama pa discernimento, halsa bo bos pa comprondemento . . .” (Proverbionan 2:3) Ki actitud of spirito e palabranan ei ta indica cu nos mester tin? Wel, esei ta un deseo sinsero pa compronde e Palabra di Yehova! Nan ta encera cu nos mester ta dispuesto pa studia cu e meta pa haya discernimento, saca afo kico ta e boluntad di Yehova. Claro cu esaki ta exigi esfuerso, y esei ta hiba nos na e siguiente palabranan y ilustracion di Salomon.—Efesionan 5:15-17.

⁹ E ta sigui: “Si bo busc’e [comprondemento] manera plata, y rondi’e manera tesoro scondi . . .” (Proverbionan 2:4) Esaki ta pone nos pensa riba e gran esfuersonan cu hende a haci atrabes di siglonan pa haya e asina yama metalnan precioso plata y oro. Hende a mata otro pa oro. Otronan a pasa henter nan bida en busca di  dje. Pero kico oro ta bal realmente? Si bo ta perdi den un desierto y muriendo di sed, kico lo bo prefera: un bara di oro of un glas di awa? Toch, mira cu ki afan hende a busca oro cu su balor artificial y cu ta fluctua constantemente! * Pues anto, nos mester busca sabiduria, discernimento y comprondemento di Dios y di su boluntad cu mucho mas fervor! Pero kico nos ta gana cu e buskeda ei?—Salmo 19:7-10; Proverbionan 3:13-18.

10. Kico nos por haya si nos ta studia e Palabra di Dios?

¹⁰ E splicacion di Salomon ta continua: “E ora ei lo bo discerni e temor di SEÑOR, y descubri e conocemento di Dios.” (Proverbionan 2:5) Ki un pensamento asombroso: nos como hende pecaminoso por haya “e conocemento di Dios”, Yehova, e Señor Soberano di universo! (Salmo 73:28, NW; Echonan 4:24) Pa siglonan largo e filosofonan y e asina yama sabinan di mundo a purba compronde e misterionan di bida y di e universo. Sinembargo, nan no a logra haya “e conocemento di Dios.” Dicon? Aunke e tawata disponibel pa miles di aña den e Palabra di Dios, Bijbel, nan ta rechas’e pasobra segun nan e ta demasiado simpel. Nan no ta acept’e ni comprond’e.—1 Corintionan 1:18-21.

11. Kico ta algun beneficio di studio personal?

¹¹ Aki Salomon ta resalta un otro motibo: “SEÑOR ta duna sabiduria; for di su boca ta sali conocemento y comprondemento.” (Proverbionan 2:6) Yehova ta duna sabiduria, conocemento y comprondemento libremente y generosamente na ken cu ta dispuesto pa busca esakinan. Definitivamente, nos tin tur motibo pa mira e importancia di studio personal di e Palabra di Dios, asta si esei ta rekeri esfuerso, disiplina y sacrificio. Por lo menos cada un di nos tin nos Bijbel y no tin nodi copi’e na man, manera algun hende a haci den pasado!—Deuteronomio 17:18, 19.

Pa Cana na un Manera Digno di Yehova

12. Kico mester ta nos motivacion pa busca e conocemento di Dios?

¹² Kico mester ta nos motivacion pa haci  studio personal? Pa laga parce cu nos ta miho cu otro hende? Pa mustra cu nos sa mas cu otro hende? Pa bira, na moda di papia, un enciclopedia di Bijbel riba pia? No. Nos meta ta pa bira cristiannan riba pia; cristiannan cu ta predica y pone na practica, semper cla pa yuda otro hende, cu e actitud refrescante di Cristo. (Mateo 11:28-30) Apostel Pablo a spierta: “Conocemento ta haci arogante, ma amor ta edifica.” (1 Corintionan 8:1) Pesei, nos mester tin e actitud humilde cu Moises tawatin ora el a bisa Yehova: “Laga mi conoce bo camindanan, pa mi conoce Bo, pa mi haya gracia den bo bista.” (Exodo 33:13) Si, nos mester desea di haya conocemento pa agrada Dios, no pa impresiona hende. Nos kier ta un humilde y digno sirbido di Dios. Con nos por logra e meta ei?

13. Kico ta necesario pa un persona bira un digno sirbido di Dios?

¹³ Pablo a conseha Timoteo tocante con pa agrada Dios. El a bis’e: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti [“maneha”, NW] e palabra di berdad na un manera corecto.” (2 Timoteo 2:15) E expresion “maneha . . . na un manera corecto” ta bini di un verbo Griego di dos palabra cu originalmente a nifica “cu ta corta stret”, of ‘corta stret.’ (Kingdom Interlinear) Algun experto ta bisa cu esaki ta pone bo pensa riba un sastre cu ta corta un tela riba un patronchi, of un cunukero cu ta ploeg y traha canal recht den un tereno, etcetera. Sea cual sea e caso, e resultado final mester ta stret, sin desviacion. E punto ta cu pa Timoteo por tawata un digno sirbido di Dios, aproba den su bista, e tawatin cu ‘haci tur su esfuerso’ pa ta sigur cu su siñansa y su conducta tawata na harmonia cu e palabra di e berdad.—1 Timoteo 4:16.

14. Ki influencia nos studio personal mester tin riba loke nos ta bisa y haci?

¹⁴ Pablo a splica e mesun punto ora el a anima su compañeronan cristian na Colosas “pa [nan] cana na un manera digno di Señor, pa agrad’e den tur sentido”, door di ‘duna fruta den tur bon obra y crece den e conocemento di Dios.’ (Colosensenan 1:10) Aki Pablo ta relaciona ser digno di Yehova cu ‘duna fruta den tur bon obra’ y tambe ‘crece den e conocemento di Dios.’ Cu otro palabra, loke ta conta pa Yehova no ta solamente cuanto balor nos ta duna na conocemento sino tambe cuanto nos ta pega na e Palabra di Dios den loke nos ta bisa y haci. (Romanonan 2:21, 22) Esaki ta nifica cu nos studio personal mester influencia nos manera di pensa y nos conducta si nos kier agrada Dios.

15. Con nos por proteha y controla nos mente y pensamentonan?

¹⁵ Awe, Satanas ta busca tur manera pa caba cu nos spiritualidad door di instiga un lucha cu tin di aber cu nos mente. (Romanonan 7:14-25) Pesei, nos tin cu proteha y controla nos mente y pensamentonan pa por demostra cu nos ta digno di nos Dios, Yehova. E arma cu nos tin ta “e conocemento di Dios”, cu ta capas pa ‘hiba tur pensamento den cautiverio, pa haci nan obedecido na Cristo.” Esaki ta mas motibo ainda pa nos presta atencion na studia Bijbel tur dia, door cu nos kier elimina pensamento egoista y carnal for di nos mente.—2 Corintionan 10:5.

 Yudansa pa Compronde Cosnan

16. Con nos por beneficia nos mes ora Yehova ta siña nos?

¹⁶ E siñansa di Yehova ta trece beneficio spiritual y fisico. E no ta un estudio religioso laf, sin balor practico. Por ehempel, nos ta lesa: “Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana.” (Isaias 48:17) Con Yehova ta guia nos den su caminda cu ta laga nos prospera? Na prome luga nos tin su Palabra inspira, Scritura Santo. Esaki ta nos buki di instruccion basico, na cua nos ta referi constantemente. Pesei ta bon pa sigui e orado na reunionnan cristian den nos Bijbel. Bo por mira e resultadonan beneficioso di esei den e relato di e eunuco di Etiopia, registra na Echonan capitulo 8.

17. Kico a sosode den e caso di e eunuco di Etiopia, y kico esaki ta ilustra?

¹⁷ E eunuco di Etiopia tawata un persona cu a comberti na hudaismo. E tawata kere sinseramente den Dios, y el a studia e Scritura. Ora e tawata biaha den su garoshi, e tawata lesa un texto di Isaias ora Felipe a core banda di dje y puntr’e: “Bo ta compronde loke bo ta lesa?” Kico e eunuco a contest’e: “‘Con mi por compronde, si un hende no guia mi?’ Y el a invita Felipe pa subi bin sinta banda di dje.” Despues Felipe, dirigi pa spirito santo, a yuda e eunuco compronde e profecia di Isaias. (Echonan 8:27-35) Kico esaki ta ilustra? Cu riba nos mes nos no por compronde Bijbel. Mediante su spirito, Yehova ta uza e esclabo fiel y prudente pa yuda nos compronde su Palabra na e tempo apropiado. Con esaki ta tuma luga?—Mateo 24:45-47; Lucas 12:42.

18. Con e esclabo fiel y prudente ta yuda nos?

¹⁸ Aunke Hesus a bisa cu e esclabo ta “fiel y prudente”, ningun ora so e no a duna di conoce cu e miembronan no por faya. E grupo aki di rumannan fiel y ungi ta consisti keto bai di cristiannan imperfecto. Maske nan tin bon intencion, nan por faya mescos cu algun di nan a yega di faya den prome siglo. (Echonan 10:9-15; Galationan 2:8, 11-14) Sinembargo, nan motibo ta puro, y Yehova ta uzando nan pa duna nos yudansa pa studia Bijbel y pa edifica nos fe den e Palabra di Dios y su promesanan. E herment basico pa nos studio personal cu e esclabo a duna nos ta e Traduccion di Mundo Nobo di e Santo Scritura. Aworaki e ta disponibel, sea completo of en parti, den 42 idioma, y ya a imprimi 114 miyon ehemplar den varios edicion. Con nos por haci bon uzo di dje den nos studio personal?—2 Timoteo 3:14-17.

19. Cua ta algun caracteristica di e Traduccion di Mundo Nobo—Cu Referencia cu por yuda nos den nos studio personal?

¹⁹ Tuma por ehempel e Traduccion di Mundo Nobo di e Santo Scritura—Cu Referencia. E tin columna di referencianan den margen, nota na pia di pagina, un mini concordancia den forma di “Index di Palabra Biblico” y “Index di  Palabra den Nota na Pia di Pagina” y un Apendix amplio cu ta contene 43 topico, den cua tin mapa y cuadro. Tambe tin e “Introduccion” cu su splicacion di e hopi fuentenan cu a ser uza pa e traduccion unico aki di Bijbel. Si e ta disponibel den un idioma cu bo por compronde, haci tur bo esfuerso pa conoce e caracteristicanan aki y haci uzo di nan. Bijbel ta e punto di salida di nos programa di studio, y den e Traduccion di Mundo Nobo, nos tin un version cu ta enfatisa corectamente e nomber dibino y mescos tambe e gobernacion di e Reino di Dios.—Salmo 149:1-9; Daniel 2:44; Mateo 6:9, 10.

20. Ki preguntanan tocante studio personal nos tin cu contesta awor?

²⁰ Awor, nos por puntra nos mes: ‘Ki yudansa mas nos mester pa compronde Bijbel? Di unda nos por saca tempo pa nos studio personal? Con nos por haci nos studio mas eficas? Ki influencia nos studio mester tin riba otro hende?’ E siguiente articulo lo considera e aspectonan vital aki di nos progreso como cristian.

[Nota]

Bo Ta Corda?

• Kico e palabranan “medita” y “reflexiona” kiermen?

• Ki actitud nos mester tin pa cu studiamento di e Palabra di Dios?

• Kico mester ta nos motivacion pa haci studio personal?

• Ki yudansa pa compronde Bijbel nos tin?

[Preguntanan di Estudio]

[Plachi na pagina 15]

Miembronan di e famia di Betel ta haya fortalesa spiritual ora nan ta cuminsa tur dia cu consideracion di un texto di Bijbel

[Plachi na pagina 15]

Nos por probecha di tempo balioso door di scucha cassette di Bijbel ora nos ta bai di un luga pa otro

[Plachi na pagina 16]

Hende a traha duro y pa hopi tempo pa nan haya oro. Cuanto esfuerso abo ta haci pa studia e Palabra di Dios?

[Reconocemento]

Pa cortesia di California State Parks, 2002

[Plachi na pagina 17]

Bijbel ta un tesoro cu por hiba na bida eterno