Duna Te Ora Bo No Por Mas?

“YAMA mi pidido di limosna numa; esei no ta molestia mi. Ami ta pidi limosna pa Hesus.” E palabranan indicativo ei di un pasto protestant ta mustra riba e controversia cu ta drei rond di buscamento di fondo pa religion. Ta parce cu sin hopi sosten financiero religion organisa no por sobrevivi. Mester paga salario, construi y mantene tempel, y financia campañanan di evangelisacion. Con ta haci yega na e fondonan necesario?

Pa hopi iglesia, e contesta ta diesmo. * Segun e evangelista Norman Robertson, “Dios ta uza e areglo di diesmo pa financia Su reino aki riba tera. Ta su sistema di yega na fondo pa e Evangelio por ser predica.” Robertson no tin ripara pa recorda su siguidonan riba nan responsabilidad di duna. E ta bisa enfaticamente: ‘Bo no ta duna diesmo djis pasobra bo por duna. E ta mas bien un acto di obediencia. Esun cu no ta duna diesmo ta viola e mandamentonan di Dios. Ta mescos cu keda cu cen cu no ta di bo.’—Diesmo: Dios Su Plan Financiero.

Probablemente bo ta di acuerdo cu un cristian mester duna; esei ta parti di su adoracion. Pero bo no ta haya e pidimento di placa asina constante algo precupante y asta ofensivo? E teologo Brasileño Inácio Strieder ta acusa iglesia di ta recori na pidimento di diesmo pa “resolve nan problemanan como organisacion” y ta yama e practicanan ei “ilegitimo, ofensivo y un desviacion teologico.” E resultado ta, segun su observacion, cu “hende desemplea, biuda, habitante di bario margina y esnan cu no por pensa logico ta yega na e conclusion cu Dios a bira lomba pa nan y cu nan ta obliga pa duna asina tanto placa na ‘e predicado’ cu nan mes famia ta keda desampara.”

Kisas bo ta puntra: ‘E iglesianan cu ta obliga nan miembronan pa duna diesmo ta aplicando e Scritura corectamente? Of por tin religion cu ta uza Dios pa spanta nan miembronan, djis pa ranca placa for di nan? Dios ta echt spera pa nos duna te ora nos no por mas?’

[Nota]