E Dunamento Cu Si Ta Trece Goso

GENIVAL, cu ta biba den un bario margina den nortost di Brazil, tawata sostene su casa y yiunan cu e salario miserabel cu e tawata gana como agente di siguridad di un hospital. Aunke no tawata facil pa Genival, el a duna su diesmo religiosamente. “Algun biaha mi famia a pasa hamber”, e ta corda pasando man riba su bariga, “pero mi kier a duna Dios lo miho, maske ki sacrificio esei a encera.”

Despues cu Genival a perde trabou, el a sigui paga su diesmo. Su pasto a recomend’e pa e pone Dios na prueba door di haci un donacion grandi. E pasto a garantis’e cu Dios sigur sigur lo drama su bendicion riba dje. Di manera cu Genival a dicidi cu lo e bende su cas y entrega e placa di benta na iglesia.

No ta Genival so ta duna cu e sinseridad ei. Hopi hende cu ta biba den pobresa extremo ta entrega nan diesmo religiosamente pasobra nan iglesianan ta siña nan cu esei ta un rekisito di Bijbel. Esei ta berdad?

Dunamento di Diesmo y e Lei

E mandamento pa duna diesmo tawata parti di e Lei cu Yehova Dios a duna e 12 tribunan di Israel di antiguedad mas cu 3.500 aña pasa. E Lei ei a decreta cu e Hudiunan mester a entrega na e tribu di Levi un decimo parti di e cultivo di tera y palo di fruta y un decimo parti di e aumento di e tounan di bestia. Di e manera ei nan lo a sostene e servicionan cu e Levitanan tawata rindi na e tabernakel.—Levitico 27:30, 32; Numbernan 18:21, 24.

Yehova a sigura e Israelitanan cu e Lei ‘no tawata mucho dificil pa nan.’ (Deuteronomio 30:11) Tanten cu nan a warda e mandamentonan di Yehova fielmente, incluso e dunamento di diesmo, nan tawatin su promesa di cosecha abundante. Y como proteccion pa den tempo di berans, tur aña nan tawata aparta un diesmo. Normalmente nan tawata uza esei ora e nacion tawata bini hunto pa celebra nan fiestanan religioso. Di e manera ei ‘e stranhero, e werfano y e biuda por a come y keda satisfecho.’—Deuteronomio 14:28, 29; 28:1, 2, 11-14.

E Lei no a duna un castigo spesifico pa incumplimento cu e diesmo, pero cada Israelita tawatin e obligacion moral fuerte pa sostene adoracion berdadero den e forma aki. Por cierto, Yehova a acusa e Israelitanan cu a nenga di duna diesmo den tempo di Malakias di ta ‘hortando diesmo y ofrenda’ for di dje. (Malakias 3:8) Por lansa e mesun acusacion contra cristiannan cu no ta paga diesmo?

Wel, pensa riba lo siguiente. Normalmente leinan nacional no ta balido pafo di frontera di un pais. Por ehempel, e lei cu ta obliga chauffeurnan na Inglatera core na man robes no ta conta pa conductornan na Francia. Mescos tambe, e lei cu a exigi diesmo tawata parti di un pacto exclusivo entre Dios y e nacion di Israel. (Exodo 19:3-8; Salmo 147:19, 20) Ta e Israelitanan so tawata mara na e lei ei.

Ademas, aunke Dios mes no ta cambia nunca, su rekisitonan si sa cambia tin biaha. (Malakias 3:6) Bijbel ta bisa bon cla cu Hesus su morto como sacrificio na aña 33 E.C. a “cansela” of “aboli” e Lei y cu ne e ‘mandamento pa tuma e diesmonan.’—Colosensenan 2:13, 14; Efesionan 2:13-15; Hebreonan 7:5, 18.

Con Cristiannan Ta Duna

Pero di tur manera contribucion financiero tawata necesario pa sostene adoracion berdadero. Hesus a manda su disipelnan pa ‘ta testigo te na e parti mas aleha di mundo.’ (Echonan 1:8) Segun cu e cantidad di creyente a  aumenta, tawatin mester di mas maestro y superintendente cristian pa bishita y fortalece e congregacionnan. Tin biaha mester a percura pa biuda, werfano y otro personanan den necesidad. Con e cristiannan di prome siglo a cubri e gastonan envolvi?

Rond di aña 55 di nos era a haci un yamada riba e cristiannan gentil na Europa y Asia Menor pa yuda e congregacion pober na Hudea. Den apostel Pablo su cartanan na e congregacion na Corinto, e ta describi con nan a organisa e colecta “pa e santonan.” (1 Corintionan 16:1) Loke Pablo su palabranan ta revela tocante con cristiannan ta duna lo por sorprende bo.

Apostel Pablo no a presiona su compañeronan di fe pa duna. Al contrario, ta e cristiannan di Macedonia cu tawata den hopi “afliccion” y den “pobresa grandi” mester a ‘rog’e cu masha suplica pa e privilegio di por participa den e mantencion di e santonan.’—2 Corintionan 8:1-4.

Ta berdad cu Pablo a anima e Corintionan mas rico pa imita nan rumannan generoso na Macedonia. Asina mes, un obra di referencia ta remarca cu ‘no ta un ordo el a duna; mas bien, el a prefera pidi, sugeri, anima of haci un yamada riba otro. Si ta obliga e Corintionan tawata, nan dunamento lo no tawata algo spontaneo ni impulsa pa amor.’ Pablo tawata sa cu “Dios ta stima esun cu ta duna cu alegria”, no uno cu ta duna “contra su gusto of obliga.”—2 Corintionan 9:7.

Fe y conocemento abundante combina cu amor sinsero pa nan rumannan cristian lo a impulsa e Corintionan pa duna na un manera spontaneo.—2 Corintionan 8:7, 8.

“Manera El A Propone den Su Curason”

En bes di duna un montante of porsentahe spesifico, Pablo a simplemente sugeri pa “riba e prome dia di tur siman, cada un . . . aparta un suma di placa segun su entrada.” (Letter scuin ta di nos; 1 Corintionan 16:2, New International Version) Door di plania y reserva un suma riba un base regular, e Corintionan lo no a sinti nan bou di presion pa duna sin smak of bou di impulso emocional ora Pablo a yega. Pa cada cristian, e desision di cuanto pa duna tawata un asunto personal, uno cu el a “propone den su curason.”—2 Corintionan 9:5, 7.

Pa por a cosecha generosamente, e Corintionan tawatin cu sembra generosamente. Nunca Pablo a duna ni e idea cu nan mester a ‘duna te ora nan no tawata por mas.’ ‘Mi no kier pa e ta un afliccion pa boso’, Pablo a sigura nan. E contribucionnan tawata ‘aceptabel segun loke un hende tawatin, no segun loke e no tawatin.’ (2 Corintionan 8:12, 13; 9:6) Den un carta mas despues, e apostel a spierta: “Si un hende no provee pa . . . esnan di su cas, el a nenga e fe y ta piyo cu un incredulo.” (1 Timoteo 5:8) Pablo no a anima cristiannan pa duna numa sin tene cuenta cu e principio aki.

 Ta notabel cu Pablo a supervisa un colecta pa e santonan cu tawata den necesidad, pero ningun caminda den e Scritura nos no ta lesa cu Pablo ni ningun otro apostel a organisa colecta of ricibi diesmo pa financia nan propio ministerio. (Echonan 3:6) Aunke semper Pablo tawata masha gradicido pa e regalonan cu e congregacionnan tawata manda p’e, el a percura pa e no pone “un carga” riba su rumannan.—1 Tesalonicensenan 2:9; Filipensenan 4:15-18.

Dunamento Boluntario Awe

Tur cos ta mustra cu durante prome siglo e siguidonan di Cristo tawata duna boluntariamente, y no den forma di un diesmo. Sinembargo, kisas bo ta puntra bo mes si ainda esaki ta un manera eficas pa financia e predicacion di e bon nobo y pa percura pa cristiannan cu ta den necesidad.

Pensa riba lo siguiente. Na 1879 e editornan di e revista aki a declara abiertamente cu nan lo “no bai roga ni pidi ningun hende sosten financiero.” E desision ei a stroba e esfuersonan di Testigonan di Yehova pa plama e berdad di Bijbel?

Actualmente, Testigonan ta reparti Bijbel, buki cristian y otro publicacionnan den 235 pais. Den cuminsamento, pa luna nan tawata imprimi y distribui 6.000 ehemplar di E Toren di Vigilancia (un revista educacional cu ta splica Bijbel) den un solo idioma. Awendia nan ta imprimi dos biaha pa luna mas cu 24.000.000 ehemplar di e revista ei den 146 idioma. Pa organisa nan trabou mundial di educacion biblico, e Testigonan a construi of cumpra edificio pa sirbi como sucursal den 110 pais. Ademas, nan a construi miles di luga di reunion local y tambe salanan di asamblea grandi pa acomoda esnan cu ta interesa pa ricibi mas instruccion for di Bijbel.

Testigonan di Yehova ta duna prioridad na e necesidadnan spiritual di hende, pero nan no ta neglisha e necesidadnan material di nan compañeronan di creencia. Ora nan rumannan  ta sufri e efectonan di guera, temblor, secura y tormenta, nan ta e promenan pa manda remedi, cuminda, paña y otro necesidadnan. Nan ta financia esakinan cu e donacionnan cu cristiannan individual y congregacionnan ta haci.

Ademas di ta masha eficas, contribucion riba un base boluntario ta kita tambe un carga for di esnan cu tin poco recurso, manera Genival, menciona anteriormente. Afortunadamente, prome cu Genival por a bende su cas, el a haya bishita di Maria, un Testigo di Yehova cu ta predica full-time. “E combersacion ei a scapa mi famia di bastante dificultad innecesario”, Genival ta recorda.

Genival a bin mira cu e obra di Señor no ta depende di diesmo. Es mas, dunamento di diesmo no ta un rekisito biblico mas. El a haya sa cu Yehova ta bendiciona cristiannan ora nan ta duna generosamente, pero cu nan no ta obliga pa duna mas di loke nan por.

Dunamento boluntario a trece berdadero goso pa Genival. E ta expres’e asin’aki: “Mi por laga di duna 10 porshento, pero mi ta contento cu mi contribucion, y mi ta sigur cu Yehova tambe ta contento.”

[Cuadro/Plachi na pagina 6]

E Prome Tatanan di Iglesia A Siña pa Duna Diesmo?

“E riconan meimei di nos ta yuda e pobernan . . . Esnan cu ta bon para, y cu ta dispuesto, ta duna loke cada un ta haya ta bon.”—The First Apology, Hustino Martir, rond di 150 E.C.

“En berdad e Hudiunan tawata dedica e diesmo di nan bienesnan na Dios, pero esnan cu a ricibi libertad a aparta tur nan pertenencianan pa e propositonan di Señor, . . . manera e pober biuda a haci ora el a tira tur su medio di biba den e caha di contribucion di Dios.”—Against Heresies, Ireneo, rond di 180 E.C.

“Aunke nos tin nos caha di contribucion, e no ta consisti di placa pa cumpra salbacion, como si fuera religion tin su prijs. Riba un dia di luna, ken cu ta desea ta tira un donacion chikito den dje; pero solamente si e kier, y solamente si e por: pasobra e no ta obliga; tur donacion ta boluntario.”—Apology, Tertuliano, rond di 197 E.C.

“Segun cu Iglesia a crece y varios institucion a lanta, a bira necesario pa traha leinan cu lo a garantisa sosten financiero permanente y adecua pa pastonan. A adopta e pagamento di diesmo for di e Lei Bieu . . . Aparentemente e prome mencion spesifico di un lei riba e tema aki ta den e carta di e obisponan cu a bini hunto na Tours na aña 567 y den e [canon] di e Consilio di Macon na aña 585.”—The Catholic Encyclopedia.

[Reconocemento]

Moneda, ariba na man robes: Pictorial Archive (Near Eastern History) Est.

[Plachi na pagina 4, 5]

Dunamento boluntario ta trece goso

[Plachi na pagina 7]

Contribucionnan boluntario ta financia e trabou di predica, yudansa di emergencia y construccion di luga di reunion