E Miho Tempo pa Ta na Bida

ORA bo haya bo confronta cu situacionnan fastioso, bo sa anhela e “dushi tempo di antes”? Si esei ta e caso, pensa riba e palabranan aki di e Rei sabi Salomon: “No bisa: ‘Pakico e dianan di antes tawata miho cu esakinan?’ Pasobra no ta for di sabiduria bo ta puntra esaki.”—Eclesiastes 7:10.

Dicon Salomon a duna e conseho aki? Pasobra e tawata sa cu si un persona tin un punto di bista realistico di pasado, esei lo yud’e trata e situacionnan desagradabel di presente cu exito. Hende cu ta anhela “e dushi tempo di antes” kisas ta lubida cu e dianan ei tambe tawatin nan problema- y dificultadnan y cu bida nunca no tawata realmente ideal. Kisas algun cos den pasado tawata miho, pero probablemente otro cosnan no. Manera Salomon a remarca, no ta sabi pa sigui soña cu pasado, ya cu ta bisto cu nos no por drai holoshi bek.

Pero tin algo malo den anhela pasado? Si, specialmente ora esei ta stroba nos di ser flexibel y adapta nos mes na e tempo actual. Tambe e por stroba nos di aprecia e tempo cu nos ta biba aden y e speransa cu nos por tin pa futuro.

En realidad, apesar di e problemanan mundial cu dia tras dia ta aumentando, awor ta e miho tempo pa ta na bida. Dicon? Pasobra nos ta yegando e tempo cu Dios lo cumpli cu su proposito pa nos tera y trece e bendicionnan mediante e gobernacion di pas di su Reino. Bijbel ta priminti: “E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.” (Revelacion 21:4) E ora ei, debi na e condicionnan cu lo ta hopi mas miho, ningun hende lo tin motibo pa anhela “e dushi tempo di antes.”