Loke Hosue A Corda

“MOISES, mi sirbido, a muri”, Yehova a bisa, “p’esei, lant’ariba awor, crusa e Yordan aki, abo y henter e pueblo aki, bai na e tera cu mi ta duna nan.” (Hosue 1:2) Hosue si a hay’e cu un tarea pisa! E tawata asistent di Moises pa casi 40 aña. Awor el a haya e encargo pa remplasa su maestro y hiba e yiunan di Israel, cu hopi bes tawata bastante problematico, e Tera Priminti.

Ora Hosue tawata pensa riba loke tawata ward’e, casi sigur e pruebanan cu el a enfrenta y vence caba a pasa un tras di otro den su mente. Loke Hosue a corda sin duda tawata un yudansa masha balioso p’e na e tempo ei. Esei por ta un bon yudansa pa cristiannan djawe tambe.

Di Esclabo pa Comandante

Hosue lo mester a corda riba e hopi añanan di sclabitud. (Exodo 1:13, 14; 2:23) Bijbel no ta duna hopi detaye di loke Hosue a pasa aden durante e periodo ei. Nos por imagina nos si con lo el a siña organisa cosnan bon durante su sirbishi na Egipto y con lo el a yuda e Hebreonan y e “multitud di tur clase di hende” hui for di e tera ei.—Exodo 12:38.

Hosue tawata pertenece na un famia di e tribu di Efrain. Su welo Elisama tawata hefe di tribu y aparentemente a guia 108.100 homber arma di un di e tres divisionnan di Israel su tribunan. (Numbernan 1:4, 10, 16; 2:18-24; 1 Cronicanan 7:20, 26, 27) Pero, ora e Amalekitanan a ataca Israel djis despues cu Israel a sali for di Egipto, Moises a haci un apelacion riba Hosue pa organisa e defensa. (Exodo 17:8, 9a) Pakico net Hosue y no, por  ehempel, su welo of tata? Posiblemente “como hefe di e tribu importante di Efrain, y conoci como un homber cu tawata sa con pa organisa asuntonan, y cu e pueblo tawata confia cabalmente, Moises a haya ta bon pa scohe [Hosue] como e lider mas capas pa selecta y organisa e soldanan.”

Sea cual sea e motibo, ora Moises a scohe Hosue, el a haci exactamente manera Moises a mand’e. Aunke Israel no tawatin ningun experencia den guera, Hosue tawata combenci cu Dios lo a yud’e. Pesei ora Moises a bis’e, “mañan lo mi bai para riba cabes di e sero cu e bara di Dios den mi man”, esei tawata suficiente p’e. Hosue lo mester a corda con Yehova a caba di destrui e mayor potencia militar di e tempo ei. E siguiente dia, ora Moises a hisa su mannan y tene nan na halto te ora solo a baha, ningun enemigo por a para contra Israel, y e Amalekitanan a ser derota. Despues Yehova a manda Moises skirbi den un buki y ‘percura pa Hosue tende’ e decreto dibino: “Ami lo kita e recuerdo di Amalek completamente for di bou di shelo.” (Exodo 17:9b-14) Si, no tawatin nada cu por a stroba Yehova di ehecuta e sentencia ei.

Como Asistent di Moises

E experencia cu Amalek lo mester a pone cu e relacion entre Hosue y Moises a bira mas estrecho ainda. Pa rond di 40 aña Hosue tawatin e honor di ta e asistent, of “sirbido”, personal di Moises “for di su hubentud” te na morto di Moises.—Numbernan 11:28.

E sirbishi ei a nifica privilegio special pero tambe responsabilidad. Por ehempel, ora Moises, Aron, e yiunan di Aron y 70 di e ancianonan di Israel a subi Sero Sinai y a mira un vision di e gloria di Yehova, probablemente Hosue tawata entre nan. Como asistent, el a compaña Moises bai mas halto riba e sero y aparentemente a keda na un distancia ora Moises a drenta e nubia cu a simbolisa e presencia di Yehova. Un echo remarcabel ta cu aparentemente Hosue a keda 40 dia y 40 anochi riba e sero. Fielmente el a warda su maestro bini bek, pasobra ora Moises a baha cu e tablanan di e Testimonio, Hosue tawata ei pa top’e.—Exodo 24:1, 2, 9-18; 32:15-17.

Despues di e incidente caminda Israel a adora e bishe di oro, Hosue a sigui asisti Moises na e tent di reunion pafo di e campamento. Ei Yehova a papia cara cara cu Moises. Pero ora Moises a bolbe na e campamento, Hosue “no tawata kier a kita for di e tent.” Talbes e mester a keda para einan pa stroba e Israelitanan di drenta e tent den  nan estado impuro. Hosue a tuma e responsabilidad ei hopi na serio!—Exodo 33:7, 11.

E echo cu Hosue a cana cu Moises—kende, segun historiado Yosefo, tawata 35 aña mas grandi cu ne—lo mester a fortalece su fe inmensamente. Nan relacion a yega di ser yama “e contacto entre madures cu hubentud, entre maestro cu alumno.” Door di esei Hosue a bira un “homber firme y confiabel.” Nos no tin profeta manera Moises den nos seno awe, pero den congregacion di Testigonan di Yehova tin ancianonan cu debi na nan experencia y condicion spiritual ta representa un berdadero fuente di forsa y animacion. Bo ta aprecia nan? Y bo ta beneficia di nan presencia?

Un Spion na Canan

Hosue a pasa den un experencia crucial djis despues cu Israel a ricibi e Lei. El a ser scohi pa representa su tribu pa bai spiona e Tera Priminti. E historia ta bon conoci. Tur e 12 spionnan tawata di acuerdo cu en berdad e tera a produci “lechi y miel na abundancia”, net manera Yehova a priminti. Sinembargo, dies di nan no tawatin fe; nan tawatin miedo cu Israel lo no por a core cu e habitantenan di e tera. Ta Hosue cu Caleb so a urgi e pueblo pa nan no rebela pa motibo di miedo, pasobra Yehova lo ta cu nan sigur. Riba esei, henter e asamblea a protesta y papia di bati nan dos cu piedra. Si no ta pasobra Yehova a interveni cu un manifestacion di su gloria, kisas nan lo a yega asina leu tambe. Pa motibo di nan falta di fe, Dios a decreta cu ningun persona di 20 aña bai ariba registra den Israel lo a biba pa drenta Canan. Di esakinan, ta solamente Hosue, Caleb y e Levitanan a sobrevivi.—Numbernan 13:1-16, 25-29; 14:6-10, 26-30.

No ta henter e pueblo a mira Yehova su obranan poderoso na Egipto? Kico anto a pone cu Hosue tawatin fe cu Dios lo a yuda nan mientras cu e mayoria a duda? Hosue lo a corda claramente tur loke Yehova a priminti y haci, y el a medita riba e cosnan aki. Añanan despues e por a bisa cu ‘ni un palabra di tur e bon palabranan cu SEÑOR a papia cu Israel a faya; tur a cumpli.’ (Hosue 23:14) Pues Hosue tawatin fe cu tur e promesanan cu Yehova a haci relaciona cu futuro lo a cumpli sigur. (Hebreonan 11:6) Cada ken mester puntra nan mes anto: ‘Kico di ami? E esfuerso cu mi a dedica na studia y medita riba e promesanan di Yehova a combence mi cu nan ta confiabel? Mi ta kere cu Dios por proteha mi hunto cu su pueblo durante e benidero tribulacion grandi?’

Hosue no solamente a eherce fe, pero tambe el a desplega curashi pa haci loke ta corecto. E cu Caleb a para nan so, y henter e asamblea tawata papia di piedra nan. Con abo lo a sinti bo? Intimida? Hosue si no. E cu Caleb a bisa firmemente loke nan tawata kere. Lealtad na Yehova lo por rekeri cu un dia nos tin cu haci mescos.

Tambe e relato di e spionnan ta mustra nos cu e nomber di Hosue a ser cambia. Su nomber original tawata Hosea, cu ta nifica “Salbacion.” Moises a agrega e silaba cu ta para pa e nomber di Dios y a yam’e Yehosue, of Hosue: “Yehova Ta Salbacion.” E Septuaginta ta traduci su nomber como “Hesus.” (Numbernan 13:8, 16) Hosue a cumpli cu e nificacion di e gran nomber aki y a declara cu curashi cu Yehova ta salbacion. No ta asina asina Moises a cambia e nomber di Hosue. Cu esei Moises a demostra cuanto balor el a duna e personalidad di Hosue. Ademas, e nomber nobo a cuadra cu e papel special cu Hosue lo a hunga den guia un generacion nobo pa drenta e Tera Priminti.

Segun cu e tatanan tawata muri un tras di otro, e Israelitanan a dual den desierto durante 40 aña di hopi cansancio. Nos no sa nada di Hosue durante e periodo ei. Sinembargo, Hosue lo mester a siña bastante cos. Probablemente e tawata testigo di e huicio di Dios contra e rebeldenan Core, Datan y Abiram y nan siguidonan, y tambe contra esnan cu a  participa den e adoracion degrada di Baal di Peor. Ora Hosue a haya sa cu Moises tampoco lo no a drenta e tera di promesa door cu e no a santifica Yehova en conexion cu e awanan di Meriba, esei sin duda lo a hacie hopi tristo.—Numbernan 16:1-50; 20:9-13; 25:1-9.

Nombra Como Susesor di Moises

Ora Moises tawata serca di muri, el a pidi Dios nombra su susesor pa Israel no bira manera “carne cu no tin wardador.” Kico Yehova a contest’e? E mester a nombra Hosue, “un homber cu tin e spirito den dje” dilanti henter e asamblea. Nan mester a scucha na dje. Bon recomendacion, no ta berdad? Yehova a mira Hosue su fe y capasidad. El a confia e liderato di Israel den e mannan mas cualifica. (Numbernan 27:15-20) Pero Moises tawata sa cu Hosue lo a hay’e cu un reto enorme. Pesei Moises a papia masha cu su susesor pa e ta “fuerte y tene curashi”, pasobra Yehova lo a sigui cu ne.—Deuteronomio 31:7, 8.

Dios mes a ripiti e mesun animacion aki na Hosue y a agrega: “Percura di haci conforme henter e lei cu mi sirbido Moises a ordena bo; no bira for di dje ni na man drechi ni na man robes, pa bo por tin exito unda cu bo bai. E buki di lei aki lo no aparta for di bo boca, ma bo mester medita den dje di dia y anochi, pa bo percura di haci conforme tur loke ta para skirbi den dje; pasobra e ora ei lo bo haci bo caminda prospera, y e ora ei lo bo tin exito. No ta ami a ordena bo? Sea fuerte y tene curashi! No tembla ni desmaya, pasobra SEÑOR bo Dios ta cu bo unda cu bo bai.”—Hosue 1:7-9.

Cu e palabranan di Yehova bon graba den su mente y cu e experencia cu el a acumula caba, Hosue por a duda? E conkista di e tera tawata garantisa. Claro cu lo a surgi dificultadnan. E prome mes cu Hosue a topa tawata uno hopi serio: crusa Riu Yordan net ora tawatin marea halto. Pero ta Yehova mes a mand’e: ‘Lant’ariba, crusa e Yordan aki.’ Pues, kico por tawata e problema?—Hosue 1:2.

Susesonan un tras di otro den e bida di Hosue—e manera cu nan a conkista Yerico, con pocopoco pero sigur nan a domina nan enemigonan y reparti e tera entre nan—ta mustra cu nunca el a lubida e promesanan di Dios. Ora Hosue tawata yegando na fin di su bida, tempo cu Yehova a duna Israel descanso di nan enemigonan, el a reuni e pueblo pa repasa e manera cu Dios a trata cu nan. Hosue a haci un yamada serio riba e pueblo pa nan sirbi Yehova di henter curason. Como resultado, Israel a renoba su pacto solem cu Yehova. Y, sin duda, inspira pa e ehempel di nan Lider, nan a sigui “sirbi SEÑOR tur e dianan di Hosue.”—Hosue 24:16, 31.

Hosue a pone un ehempel excelente pa nos. Awe cristiannan ta confronta hopi prueba di fe. Pa nos mantene Yehova su aprobacion y finalmente hereda su promesanan, ta vital pa nos enfrenta nan cu exito. Door cu Hosue tawatin un fe fuerte e por tawatin exito. Ta cierto cu nos no a mira e obranan poderoso di Dios cu Hosue si a presencia, pero pa ken cu ta duda, e buki cu tin e nomber di Hosue ta duna testimonio di un persona cu a mira personalmente con confiabel e palabra di Yehova ta. Si nos lesa e Palabra di Dios tur dia y percura di aplic’e den nos bida, mescos cu Hosue, nos tambe por haya sabiduria y exito.

E conducta di otro cristiannan sa ofende bo tin biaha? Pensa riba e awante di Hosue durante e 40 añanan cu el a hay’e ta dual den desierto cu su paisanonan sin fe, aunke no tawata su falta. Abo ta haya ta dificil pa para tras di loke bo ta kere? Corda loke Hosue cu Caleb a haci. Pa nan fe y obediencia, nan a ricibi un recompensa sublime. Si, en berdad Hosue tawatin fe cu Yehova lo a cumpli cu tur su promesanan. Nos tambe kier tin e fe ei.—Hosue 23:14.

[Plachi na pagina 10]

Hosue y Caleb tawatin confiansa den e poder di Yehova

[Plachi na pagina 10]

E echo cu Hosue a cana cu Moises a fortalece su fe

[Plachi na pagina 10]

E liderato di Hosue a inspira e pueblo pa pega na Yehova