Na Mesa di Capitan
Na Mesa di Capitan
HENDE interesante, bon cuminda y combersacion ameno ta haci un cuminda na mesa di capitan riba barco un delicia. Pero un combersacion na mesa di capitan Robert G. Smith di White Star Line, un compania di crusero, a tira lus riba un bankete spiritual.—Isaias 25:6.
Na 1894, cu 24 aña di edad, Robert a tuma timon di e barco di bela Kinclune of Dundee pa haci su prome biahe rond mundo. Despues el a bira capitan riba e barconan di White Star manera Cedric, Cevic y Runic. * Un dia cu nan tawata crusa Oceano Atlantico for di New York pa Liverpool, Inglatera, riba un di e barconan aki, Robert tawata anfitrion di Charles Taze Russell na mesa di capitan. E combersacion cu Russell tawatin cu Robert a lanta e ultimo aki su interes den e mensahe di Bijbel, y pa yud’e siña mas, el a acepta gustosamente e bukinan di Studio den e Scritura for di Russell.
Russell a keda den contacto cu Robert via carta, y door di esei Robert a haya mas interes den e mensahe di Bijbel. E tawata conta su casa tur loke e tawata siña. No mucho tempo despues nan tur dos a bira Studiantenan di Bijbel activo, manera nan tawata yama Testigonan di Yehova e tempo ei. Despues Robert a haya e privilegio di duna discurso biblico. Na Brisbane, Australia, por ehempel, el a papia riba “E Balsamo di Galad” y a mustra con e Palabra di Dios ta contene un mensahe cu ta un “remedi contra tur calamidad riba tera.” Ora el a bai Inglatera bek, su esposa y yiunan chikito a yud’e presenta e “Foto-Drama di Creacion.” E obra aki tawata un presentacion di slides combina cu naracion di Russell.
Robert a pasa na su yiunan e herencia di e berdad di Reino cu el a ricibi. Awe, cinco generacion despues, 18 miembro di e famia ei ta predicando e bon nobo activamente, gradicido pa e cuminda cu a ser sirbi na mesa di capitan.
Mediante nan publicacionnan y nan obra di educacion biblico, Testigonan di Yehova ta yudando hende rond mundo siña e mensahe di Bijbel cu a fasina capitan Smith. Abo tambe por haya sa kico a resulta di ta asina interesante na mesa di capitan.
[Nota]
^ par. 3 Titanic, un otro barco di e mesun compania, tawatin E. J. Smith como capitan. (E no tawata famia di Robert.) E biahe inaugural di e barco aki a bin caba den un desaster.
[Plachi na pagina 8]
Robert G. Smith
[Plachi na pagina 8]
Charles T. Russell