Pregunta di Lector

Nos mester conclui for di Revelacion 20:8 cu Satanas lo gaña un cantidad grandi di hende durante e prueba final?

Segun Revelacion 20:8, Satanas lo lansa un ultimo atake contra hende cu ta biba riba tera na fin di e reinado di mil aña di e Reino Mesianico. Papiando di Satanas, e versiculo ta bisa: “Lo [e] sali pa gaña e nacionnan cu ta keda den e cuater skinanan di tera, Gog y Magog, pa reuni nan pa guera; nan cantidad ta manera e santo canto di lama.”

Apesar di avancenan pa loke ta metodo- y instrumentonan cientifico, “santo canto di lama” ta keda un cantidad of cifra desconoci. Pues, nos por bisa cu e expresion ei ta referi na un cantidad desconoci y cu no ta determina. Pero e ta referi na un cantidad inmenso, extraordinario of asta astronomico, of e ta djis referi na un cantidad desconoci, grandi of considerabel?

Bijbel ta uza e expresion “manera santo di lama” den varios sentido. Den Genesis 41:49 por ehempel, nos ta lesa: “Asina Yosef a recohe masha hopi maishi manera santo di lama, te ora cu el a stop di midi, pasobra e maishi tawata mucho hopi pa midi.” Aki enfasis ta riba e echo cu e maishinan tawata incontabel. Asina tambe Yehova a declara: “Mescos cu e ehersitonan di shelo no por wordo conta, y santo di lama no por wordo midi, asina lo mi multiplica e desendientenan di mi sirbido David.” Mesun sigur cu e streyanan den shelo y santo di lama ta incontabel, asina sigur nos por ta cu Yehova lo cumpli cu loke El a priminti David.—Yeremias 33:22.

Hopi bes e expresion “santo canto di lama” ta referi na un cantidad of tamaño grandi y impresionante di algo. E Israelitanan na Gilgal tawata hopi precupa pasobra e ehersito di Filisteo cu a reuni na Micmash tawata “mes numeroso cu e santo cu tin canto di lama.” (1 Samuel 13:5, 6; Huesnan 7:12) Y “Dios a duna Salomon sabiduria y discernimento grandi y grandesa di curason, manera e santo cu tin canto di lama.” (1 Reinan 4:29) Aunke tur e textonan aki a papia di cantidadnan grandi, nan tawatin limite.

“Santo canto di lama” por referi tambe na un cantidad desconoci, sin indica cu e cantidad aki ta inmenso. Yehova a bisa Abraham: “Di berdad lo mi bendiciona bo grandemente, y lo mi multiplica bo desendientenan grandemente manera e streyanan di e shelonan y manera e santo cu tin canto di lama.” (Genesis 22:17) Ora Yehova a haci e mesun promesa aki na Abraham su nieto, Yacob, El a uza e expresion “stof di tera” y ora Yacob a ripitie el a bisa “santo di lama.” (Genesis 28:14; 32:12) Manera cosnan a resulta, fuera di Hesucristo, e cantidad di Abraham su “simiña” ta 144.000 persona, y Hesus a yama nan e “tou chikito.”—Lucas 12:32; Galationan 3:16, 29; Revelacion 7:4; 14:1, 3.

Kico nos ta siña for di e ehempelnan aki? E expresion “manera santo di lama” no ta referi tur bes na un cantidad astronomico y incontabel; tampoco e no ta ser uza tur bes pa describi algo cu tin tamaño inmenso of extraordinario. Hopi bes e ta referi na un cantidad desconoci, pero grandi. Pues ta rasonabel pa kere cu e multitud rebelde cu ta scohe e banda di Satanas den su ultimo atake contra Dios su pueblo lo no ta un cantidad inmenso, pero toch suficiente grandi pa forma un menasa. Sinembargo, te ainda no ta conoci cuanto precis e cantidad ei ta.