Studio Personal Cu Ta Haci Nos Maestronan Competente

“[“Reflexiona riba”, NW] e cosnan aki; sea dedica na nan, pa bo progreso por ta bisto pa tur hende. Paga bon tino na bo mes y na bo siñansa.” —1 TIMOTEO 4:15, 16.

1. Kico nos por bisa di tempo y studio personal?

“TIN un tempo stipula pa tur cos”, Bijbel ta bisa na Eclesiastes 3:1. Esei ta conta sigur pa studio personal. Hopi hende ta haya cu ta dificil pa reflexiona riba cosnan spiritual ora no ta e momento oportuno of ora nan no tin un bon luga pa haci esei. Por ehempel, despues di un dia di trabou duro y un cena pisa, lo bo tin gana di studia, specialmente si bo ta sinta comodo den bo stul faborito dilanti television? Probablemente no. Kico ta e solucion anto? Nos tin cu scohe un ora y luga pa studia cu e meta di saca e maximo beneficio di nos esfuersonan.

2. Ki ora ta e miho momento pa nos studio personal?

² Hopi ruman ta haya cu e miho ora pa nan studia ta mainta tempran ora cu normalmente nan mente ta mas fresco. Otronan ta uza e pausa di merdia pa por studia un rato. Tuma nota den e siguiente ehempelnan na ki momento actividadnan spiritual importante a ser haci. Rei David di Israel di antiguedad a skirbi: “Laga mi tende bo misericordia den mainta,  pasobra den bo mi ta confia; siña mi e caminda cu mi mester cana, pasobra na Bo mi ta halsa mi alma.” (Salmo 143:8) Profeta Isaias tambe a mira e importancia di studia ora el a bisa: “Señor Dios a duna mi un lenga cu a wordo siña, pa mi sa con pa sostene cu palabra esun cu ta cansa. E ta spierta mi mainta tras mainta; e ta spierta mi horea pa tende manera un cu ta wordo siña.” E punto ta cu nos tin cu studia y comunica intimamente cu Yehova na e ora di dia cu nos mente ta mas cla.—Isaias 50:4, 5; Salmo 5:3; 88:13.

3. Ki condicionnan ta deseabel pa nos por tin un studio eficas?

³ Ademas, si nos kier tin un studio eficas nos no mester scohe pa sinta den e stul di mas confortabel of den un sofa. Esaki lo no yuda nos keda bij. Ora nos ta studia, nos mente mester ta cla, y mucho comodidad fisico ta causa net e efecto contrario. Tambe lo ta bon pa ora nos ta studia y medita nos tin un luga keto y caminda nos ta liber di distraicion. Nos lo no haya e miho resultadonan ora nos ta purba studia cu radio of television sendi of cu mucha cu ta kita nos atencion. Ora Hesus kier a medita, el a busca un luga trankil y aleha for di otro hende. Tambe el a bisa cu ta importante pa haya un luga solitario pa haci oracion.—Mateo 6:6; 14:13; Marco 6:30-32.

Studio Personal Cu Ta Haci Nos Competente pa Contesta

4, 5. Con asina e foyeto Rekerí ta un yudansa practico?

⁴ Studio personal ta yena nos cu satisfaccion ora nos ta uza varios yudansa pa studia Bijbel cu ta permiti nos bai mas profundo den un tema, specialmente ora nos ta haci esei pa contesta e preguntanan sinsero di hende. (1 Timoteo 1:4; 2 Timoteo 2:23) Como punto di salida, hopi persona resien interesa ta studiando e foyeto Kico Dios Ta Rekerí di Nos?, * cu awor ta disponibel den 261 idioma. E ta un publicacion masha simpel pero spesifico, basa completamente riba Bijbel. E ta yuda esun cu ta les’e compronde mesora kico ta Dios su rekisitonan pa adoracion berdadero. Sinembargo, door cu e ta un foyeto, no ta posibel pa bai den  detaye riba tur topico. Si bo studiante di Bijbel haci bo pregunta sinsero tocante un of otro topico di Bijbel cu boso ta tratando, con bo por haya mas informacion di Bijbel cu lo yuda bo contesta e preguntanan ei?

⁵ Pa esnan cu tin Watchtower Library riba CD-ROM den un idioma cu nan ta compronde, ta facil pa yega na fuentenan hopi amplio di informacion riba computer. Pero kico esnan cu no tin computer por haci? Laga nos analisa dos topico cu ta ser considera den e foyeto Rekerí pa nos mira con nos por amplia nos comprondemento y contesta preguntanan den mas detaye—specialmente ora un persona haci pregunta manera ‘Ken Dios ta’ y ‘Ki aparencia Hesus tawatin?’—Exodo 5:2; Lucas 9:18-20; 1 Pedro 3:15.

Ken Dios Ta?

6, 7. (a) Ki pregunta ta surgi relaciona cu Dios? (b) Ki detaye importante un lider religioso a laga for di su discurso?

⁶ Les 2 den e foyeto Rekerí ta contesta e pregunta vital: Ken Dios ta? Esaki ta un punto fundamental pasobra un persona no por adora e Dios berdadero si e no conoc’e of kisas ta duda cu E ta existi. (Romanonan 1:19, 20; Hebreonan 11:6) Toch, rond mundo hende ta pega na centenares di concepto encuanto ken Dios ta. (1 Corintionan 8:4-6) Cada filosofia religioso tin su propio contesta riba e pregunta tocante e identidad di Dios. Den cristiandad mayoria religion ta mira Dios como un Trinidad. Un prominente lider religioso di Merca a duna un discurso titula “Bo Conoce Dios?” Pero ni un solo biaha den su speech e no a menciona e nomber dibino, aunke el a cita for di e Scritura Hebreo varios biaha. Ta obvio cu e tawata lesa for di un traduccion di Bijbel cu ta uza “Señor” en bes di Yehova of Yawe. Uzo di e palabra “Señor” a confundi hende y laga Dios keda anonimo.

⁷ E lider religioso a pasa por halto di un punto masha vital ora el a cita Yeremias 31:33 y 34: “‘Ni prohimo ni ruman lo no siña otro mas, bisando: “Conoce SEÑOR”, [na Hebreo, “Conoce Yehova”] pasobra nan tur lo conoce mi, for di esun di mas menos te na esun di mas grandi’, SEÑOR [na Hebreo, Yehova] ta declara.” E traduccion cu el a uza a laga e nomber distintivo di Dios, Yehova, afo.—Salmo 103:1, 2. 

8. Kico ta ilustra e importancia di uza e nomber di Dios?

⁸ Salmo 8:9 di e Traduccion di Mundo Nobo ta ilustra pakico e uzo di e nomber di Yehova ta asina importante: “O Yehova nos Señor, ki mahestuoso bo nomber ta riba tera completo!” Compara esei cu: “O SEÑOR, nos Dios, esta glorioso bo nomber ta den mundo henter!” (Beibel na papiamentu koriente) Sinembargo, manera e articulo anterior a splica, nos por obtene “e conocemento di Dios” si nos laga su Palabra ilumina nos. Pero ki publicacion di studio di Bijbel lo contesta mesora nos preguntanan tocante e importancia di e nomber di Dios?—Proverbionan 2:1-6.

9. (a) Ki publicacion por yuda nos splica e importancia di uza e nomber di Dios? (b) Con hopi traductor a mustra falta di respet pa e nomber di Dios?

⁹ Nos por uza e foyeto E nomber divino cu lo permanece pa semper, cu a ser traduci den 69 idioma. * E seccion titula “E nomber di Dios—su nificacion y moda di bis’e” (pagina 6-11) ta mustra bon cla cu e Tetragramaton Hebreo (palabra Griego cu ta nifica “cuater letter”) ta aparece casi 7.000 bes den e textonan Hebreo di pasado. Pero, lidernan religioso y traductornan di hudaismo y di cristiandad a lag’e intencionalmente for di mayoria di nan traduccionnan di Bijbel. * Con nan por pretende cu nan conoce Dios y cu nan tin un relacion aceptabel cu ne si nan ta nenga di yam’e  na su nomber? Su berdadero nomber ta habri caminda pa hende compronde kico su proposito ta y ken E ta. Ademas, ki bal uza e palabranan di Hesus su oracion modelo “nos Tata cu ta den shelo, bo nomber sea santifica” si ni e nomber di Dios no ta ser uza?—Mateo 6:9; Huan 5:43; 17:6.

Ken Hesucristo Ta?

10. Con nos por haya un cuadro completo di e bida y ministerio di Hesus?

¹⁰ Les 3 den e foyeto Rekerí tin e titulo “Ken Hesucristo Ta?” Den apenas seis paragraf, e les aki ta splica brevemente ken Hesus ta, di unda el a bini y e motibo pakico el a bini na tera. Sinembargo, si bo kier haya un relato completo di su bida—cu excepcion di e Evangelionan mes—no tin nada mas miho cu e buki E homber mas importante cu hamás a biba, cu ta disponibel den 111 idioma. * E buki aki ta duna un relato cronologico completo di Hesus su bida y su siñansanan, basa riba e cuater Evangelionan. Su 133 capitulonan ta cubri e susesonan di bida y ministerio di Hesus. Si bo kier analisa cierto cosnan a fondo, wak Perspicasia, Volumen 2, bou di e cabes “Hesucristo.”

11. (a) Kico ta haci Testigonan di Yehova diferente den nan creencia tocante Hesus? (b) Cua ta algun texto di Bijbel cu ta refuta bon cla e doctrina di Trinidad, y ki publicacion ta un bon yudansa den esaki?

¹¹ E controversia den cristiandad relaciona cu Hesus ta drei rond di e pensamento cu e ta tanto “Yiu di Dios” como “Dios Yiu”—cu otro palabra, e discusion riba loke e Catisashi di Iglesia Catolico ta yama “e misterio central di e fe cristian”, esta, Trinidad. Distinto di e religionnan di cristiandad, Testigonan di Yehova ta kere cu ta Dios a crea Hesus, pero no cu Hesus mes ta Dios. Den e foyeto Bo Mester Kere den Trinidad?, cu a ser traduci den 95 idioma, nos ta haya un splicacion excelente riba e tema aki. * Entre e varios textonan cu e ta uza pa refuta e doctrina di Trinidad tin Marco 13:32 y 1 Corintionan 15:24, 28.

12. Ki otro pregunta nos tin cu contesta awor?

¹² E splicacionnan duna anteriormente relaciona cu Dios y Hesucristo ta laga nos mira con nos por haci studio personal cu e meta pa yuda esnan cu no conoce e berdad di Bijbel yega na un conocemento exacto. (Huan 17:3) Pero kico di esnan cu tin hopi aña ta asocia cu e congregacion cristian? Apesar di tur e conocemento di Bijbel cu nan a acumula, ainda nan tin cu presta atencion na nan studio personal di e Palabra di Yehova?

Pakico “Paga Bon Tino”?

13. Ki punto di bista incorecto algun ruman por tin tocante studio personal?

¹³ Algun persona cu ta miembro di e congregacion pa hopi aña por crea e custumber di djis depende riba e conocemento di Bijbel cu nan a gana den nan prome añanan como Testigo di Yehova. Ta facil pa rasona: “Mi no tin nodi tuma mi studio na serio manera esnan mas nobo. Con cu bai bin, durante añanan mi a pasa masha hopi biaha door di Bijbel y e publicacionnan cu ta splica Bijbel.” Esaki ta mescos cu bisa: “Eigenlijk, mi no tin nodi worry pa come masha aworaki, pasobra mi a yega di come masha hopi cuminda den pasado.” Nos sa cu e curpa ta rekeri alimentacion constante for di cuminda nutritivo, bon prepara, pa e por keda saludabel y activo. Esei ta conta mucho mas ainda pa nos mantene nos salu y forsa spiritual!—Hebreonan 5:12-14.

14. Pakico nos tin cu paga bon tino na nos mes?

¹⁴ Pesei, sea cu nos tin hopi tempo ta studia Bijbel of no, nos tur tin cu sigui e conseho cu Pablo a duna Timoteo, kende e tempo ei tawata un superintendente maduro y responsabel: “Paga bon tino na bo mes y na bo siñansa; persevera den e cosnan aki; pasobra haciendo esaki lo bo sigura salbacion, tanto pa bo mes como pa esnan cu ta tende bo.” (1 Timoteo 4:15, 16) Pakico nos tin cu tuma e conseho di Pablo na pecho? Corda, Pablo a mustra tambe cu nos tin un lucha contra “e trampanan di Diabel” y “contra e forsanan spiritual di  maldad den e luganan celestial.” Y apostel Pedro a spierta cu Diabel ta “buscando ken e por devora”, y e “ken” ei por ta cualkier un di nos. Si nos ta mucho complaciente cu nos mes, nos ta dun’e net e oportunidad cu e ta busca pa ataca nos.—Efesionan 6:11, 12; 1 Pedro 5:8.

15. Ki defensa spiritual nos tin, y con nos por manten’e?

¹⁵ Ki defensa nos tin anto? Apostel Pablo ta corda nos: “Tuma e armadura completo di Dios, pa boso por resisti den e dia malo, y despues di a haci tur cos, para firme.” (Efesionan 6:13) Pa e armadura spiritual ei por ta eficas, for di principio e mester ta di bon calidad y despues mester sigui manten’e den bon condicion. Pesei e ekipo completo ei cu Dios a duna nos, mester encera un conocemento actualisa di e Palabra di Dios. Esaki ta mustra riba e importancia di cana pareu cu e comprondemento di e berdad cu Yehova ta revela mediante su Palabra y e esclabo fiel y prudente. Pues, pa nos mantene nos armadura spiritual ta vital pa nos studia Bijbel y publicacionnan cu ta splica Bijbel regularmente.—Mateo 24:45-47; Efesionan 6:14, 15.

16. Kico nos por haci pa garantisa cu nos “escudo di fe” ta bon mantene?

¹⁶ Pablo ta resalta como un parti esencial di nos armadura defensivo “e escudo di fe”, cu cua nos por desvia y paga Satanas su misilnan cayente di acusacion falso y siñansa apostata. (Efesionan 6:16) Pues ta esencial pa nos aberigua con fuerte nos escudo di fe ta y ki paso nos tin cu dal pa manten’e y fortalec’e. Por ehempel, bo por puntra bo mes: ‘Con mi ta prepara pa e studio semanal di Bijbel pa medio di E Toren di Vigilancia? Mi a studia suficiente pa por “stimula otro pa stima y haci bon obra” door di duna contesta bon prepara durante reunion? Mi ta habri Bijbel y lesa e textonan menciona pero cu no ta cita? Mi ta anima otronan cu mi participacion entusiasma durante reunion?’ Nos alimento spiritual ta solido; pa nos beneficia completamente di dje nos tin cu digerie totalmente.—Hebreonan 5:14; 10:24.

17. (a) Ki veneno Satanas ta uzando pa purba caba cu nos spiritualidad? (b) Kico ta e remedi contra Satanas su veneno?

¹⁷ Satanas conoce e debilidadnan di hende imperfecto, y su trampanan ta sutil. Un di e maneranan cu e ta plama su influencia malbado ta door di laga hende haya acceso masha facil na pornografia via television, Internet, video, buki y revista. Algun cristian a permiti e veneno aki penetra den nan defensa debilita y pone nan perde privilegio di sirbishi den e congregacion of asta haya nan cu consecuencianan mas serio. (Efesionan 4:17-19) Kico ta e remedi (of antidoto) contra Satanas su veneno spiritual? Nos no mag neglisha nos studio regular di Bijbel, nos reunionnan cristian ni e armadura completo cu Dios a duna nos. Hunto nan ta duna nos e habilidad pa distingui entre bon y malo y pa odia loke Dios ta odia.—Salmo 97:10; Romanonan 12:9.

18. Con “e spada di e spirito” por yuda nos den nos lucha spiritual?

¹⁸ Si nos keda cu un bon custumber di studia Bijbel regularmente, nos lo tin no solamente e defensa solido cu nos conocemento exacto di e Palabra di Dios ta duna nos sino tambe e ofensiva eficas pa medio di “e spada  di e spirito, cu ta e Palabra di Dios.” E palabra di Dios ta “mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.” (Efesionan 6:17; Hebreonan 4:12) Si nos cuminsa haci bon uzo di e “spada” ei, ora nos haya nos cu tentacion, nos lo por mira mesora cu ta un trampa mortal di e malbado aunke e ta parce inofensivo, of asta atractivo. Nos mangasina di conocemento y comprondemento biblico lo yuda nos rechasa loke ta malo y haci loke ta excelente. Pues nos tur tin cu puntra nos mes: ‘Mi spada ta skerpi, of e ta stompi? Mi tin problema pa corda textonan di Bijbel cu por fortalece mi den e lucha?’ Laga nos mantene nos bon custumbernan di studia Bijbel y di e manera ei resisti Diabel.—Efesionan 4:22-24.

19. Ki beneficionan nos por ricibi si nos ta dedica nos mes na studia Bijbel?

¹⁹ Pablo a skirbi: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia, pa e hende di Dios por ta perfecto, ekipa pa tur bon obra.” Si nos tuma na pecho loke Pablo a bisa Timoteo, nos tambe por bira spiritualmente fuerte y haci nos ministerio mas eficas. Ancianonan spiritual y sirbidonan ministerial por yuda e congregacion mas tanto, y nos tur por permanece solido den fe.—2 Timoteo 3:16, 17; Mateo 7:24-27.

[Nota]

Bo Ta Corda?

• Ki sircunstancianan ta contribui na un bon studio personal?

• Ki eror hopi traduccion di Bijbel ta haci relaciona cu e nomber di Dios?

• Ki texto di Bijbel lo bo uza pa refuta e siñansa di Trinidad?

• Kico nos tin cu haci pa proteha nos mes contra e trampanan di Satanas, asta si nos ta un cristian pa hopi aña?

[Preguntanan di Estudio]

[Plachi na pagina 19]

Pa bo por tin un bon studio personal, bo mester tin un luga adecua sin distraicion rond di bo

[Plachi na pagina 23]

Bo “spada” ta skerpi of e ta stompi?