Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Con nos “habilidad di pensa” por proteha nos? (Proverbionan 1:4)

E por spierta nos contra peligernan spiritual y motiva nos pa plania e manera corecto pa actua pa asina evita tentacionnan sexual na trabou. E ta yuda nos reconoce cu nos compañeronan cristian ta imperfecto, y esaki por motiva nos pa evita di reacciona mucho pura ora un hende proboca nos. Tambe e por yuda nos evita presion pa hiba un estilo di bida materialista cu lo por desvia nos spiritualmente.—15/8, pagina 21-4.

• Con un persona por ta un bendicion como biciña?

Dos cos cu ta haci bo un bon biciña ta cu bo mester gusta duna y ricibi cu gratitud. Un bon biciña ta di gran balor den tempo di desaster. Testigonan di Yehova ta haci esfuerso pa ser bon biciña door di spierta otro hende di e suseso cu lo tuma luga pronto, esta, loke Dios ta bai haci pa caba cu maldad.—1/9, pagina 4-7.

• Segun Bijbel, ken ta e berdadero santonan, y con nan lo yuda humanidad?

Tur e cristiannan di prome tawata berdadero santonan cu a ser santifica door di Yehova, y no door di hende of un organisacion. (Romanonan 1:7) Una bes cu e santonan ser resusita pa biba den shelo, hunto cu Cristo nan lo bendiciona hende fiel riba tera. (Efesionan 1:18-21)—15/9, pagina 5-7.

• Ki balor algun conocemento tocante e eventonan atletico di Grecia di antes lo por tin pa cristiannan?

Loke apostel Pedro y Pablo a skirbi ta contene ilustracionnan basa riba e weganan antiguo of ta haci referencia na nan. (1 Corintionan 9:26; 1 Timoteo 4:7; 2 Timoteo 2:5; 1 Pedro 5:10) Pa un atleta di antes, tawata masha importante pa e tin un bon entrenado, pa e eherce dominio propio y pa su esfuersonan ta bon dirigi. Esaki ta conta tambe den caso di esfuersonan spiritual di cristiannan awe.—1/10, pagina 28-31.

• Kico ta e dificultadnan y recompensanan di lanta yiu den estranheria?

Hopi mucha ta siña un idioma nobo mas lihe cu nan mayornan, kendenan lo por tin dificultad pa compronde e manera cu nan yiunan ta pensa y reacciona. Y kisas no ta facil pa e muchanan compronde siñansanan biblico den idioma di nan mayornan. Sinembargo, lasonan familiar por bira mas fuerte si mayornan siña nan idioma na nan yiunan, kendenan di e forma ei lo por papia dos idioma y sinti nan parti di dos cultura.​—15/10, pagina 22-6.

• Dicon ta importante pa siña pidi despensa?

Hopi bes un palabra di despensa sinsero ta un manera pa drecha un relacion cu a daña. Bijbel ta duna ehempelnan cu ta mustra e poder cu un despensa por tin. (1 Samuel 25:​2-35; Echonan 23:​1-5) Hopi bes ora dos hende tin un desacuerdo cu otro, ta tur dos tin un tiki falta. Pesei, tur dos lo tin cu admiti nan falta y pidi despensa.—1/11, pagina 4-7.

• Dicon wega di placa ta malo, asta ora ta trata di sumanan chikito?

Wega di placa por stimula egoismo, un spirito competitivo y golosidad. Y esakinan ta cosnan cu Bijbel ta condena. (1 Corintionan 6:9, 10) Hopi hende cu ta adicto na wega di placa a cuminsa pusta pa montantenan chikito na un edad jong.​—1/11, pagina 31.

• Pakico tawata necesario pa traduci Bijbel na Griego, siendo cu hopi buki di Bijbel tawata skirbi na Griego? Y ki resultado e traduccion aki tawatin?

Tin gran diferencia entre e Griego moderno y esun di e traduccion di e Scritura Hebreo y di Scritura Griego Cristian den Septuaginta. Den e ultimo siglonan aki hende a haci hopi esfuerso pa traduci algun parti of henter Bijbel na Griego cu hende comun ta papia. Awendia tin rond di 30 traduccion completo of parcial di Bijbel cu un persona comun di abla Griego por lesa. Y un berdadero hoya entre nan ta e version Traduccion di Mundo Nobo di e Santo Scritura, publica na 1997.​—15/11, pagina 26-9.

• Dicon cristiannan no tin nodo di duna diesmo?

Segun e Lei cu Dios a duna Israel di antes, diesmo tawata un medio pa sostene e tribu di Levi y percura pa hende den necesidad. (Levitico 27:30; Deuteronomio 14:​28, 29) E morto sacrificial di Hesus a aboli e Lei y su rekisito di diesmo. (Efesionan 2:​13-15) Den e congregacionnan di prome tawatin e custumber cu cada cristian ta duna segun su medionan y di acuerdo cu loke el a dicidi den su curason. (2 Corintionan 9:​5, 7)​—1/12, pagina 4-6.

• Loke Revelacion 20:8 ta bisa ta nifica cu Satanas lo gaña un gran cantidad di hende?

E texto ta bisa cu esnan gaña door di Satanas lo ta “manera e santo canto di lama.” Hopi bes ora Bijbel ta uza e expresion ei e ta nifica un cantidad desconoci; no necesariamente hopi. Abraham su simiña cu lo mester tawata “manera e santo cu tin canto di lama”, a resulta di ta un cantidad di 144.000 persona fuera di Hesucristo. (Genesis 22:17; Revelacion 14:​1-4)​—1/12, pagina 29.