Con Hesus A Nace, y Pakico?

“IMPOSIBEL!” Esei ta loke hopi hende cu no ta cristian ta bisa ora nan tende e relato di e nacemento di Hesus. Nan ta haya cu for di e punto di bista cientifico ta imposibel cu un mucha mohe birgen por a sali na estado y duna lus na un yiu, sin cu tawatin un tata humano. Kico abo ta kere?

Na 1984, The Times di Londen a publica un carta cu a rasona riba e tema aki di e siguiente manera: “No ta logico pa uza ciencia como argumento pa bisa cu milager no por sosode. Si un hende ta kere cu milager no por sosode, esei ta su fe, mescos cu un otro hende si tin fe cu nan por sosode.” E carta tawata firma door di 14 profesor di ciencia na universidadnan Britanico. Nan a bisa: “Cu goso nos ta acepta e nacemento for di un birgen, e milagernan den Evangelio y e resureccion di Cristo como susesonan real di historia.”

Sinembargo, ta di compronde cu un hende por keda babuca ora e tende pa prome bes e relato di cu Hesus a nace for di un birgen. Asta e mama di Hesus mes a keda babuca ora e angel di Dios a bis’e: “Mira, lo bo consebi den bo matris y duna lus na un yiu homber, y lo bo yam’e Hesus.” Maria a puntr’e: “Con esaki por ta, siendo cu mi ta un birgen?” E ora ei e angel a splica cu Dios lo haci e milager ei pa medio di Su spirito santo. Despues e angel a bis’e: “Pa Dios nada lo no ta imposibel.” (Lucas 1:31, 34-37) Sin duda, Esun cu a crea e proceso asombroso cu ta permiti hende haya yiu mester por a laga Maria sali na estado y duna lus na Hesus, maske e tawata un birgen decente. Si Dios a crea universo y tur su leinan exacto, E por a laga un eicel den ovario di Maria produci un Yiu humano perfecto tambe.

Dicon E Tawata Necesario

Hose, un homber deboto, tawata comprometi cu Maria tempo cu el a sali na estado. Den un soño un angel di Dios a splica Hose pa ki motibo maraviyoso su comprometida birgen tawata na estado. E angel a bisa: “No tene miedo di tuma Maria como bo esposa; pasobra loke a wordo consebi den dje ta di spirito santo. Y e lo haya un yiu homber; y lo bo dun’e e nomber Hesus, pasobra ta e ta esun cu lo salba su pueblo di nan picanan.” (Mateo 1:20, 21) Na Hebreo e nomber Hesus ta nifica “Yehova Ta Salbacion.” Esei ta corda nos  cu nos tur tin mester di salbacion for di pica y morto, y tambe cu Yehova a percura tal salbacion pa medio di Hesus.

Debi cu Adam, e prome homber, a haci pica, tur su yiunan a nace imperfecto, cu tendencia di kibra leinan di Dios. (Romanonan 5:12) Con Adam su yiunan lo por a scapa for di pica y logra haya perfeccion? Lo mester a paga e pica ei cu un otro bida humano perfecto, uno cu tawatin mes tanto balor cu e bida di Adam, pa asina cumpli cu loke husticia a exigi. Ta pesei Dios a pone Hesus nace milagrosamente como hende perfecto, y ta pesei Hesus a laga su enemigonan mat’e. (Huan 10:17, 18; 1 Timoteo 2:5, 6) Despues cu Hesus a resusita y subi na shelo, cu confiansa e por a bisa: “Mi tawata morto, y mira, mi ta bibo pa semper, y mi tin e yabinan di morto y di Hades [graf di humanidad].”—Revelacion 1:18.

Hesus ta uza e yabinan simbolico di morto y Hades pa habri caminda pa hende pecado por recobra loke Adam a perde. Hesus a splica: “Ami ta e resureccion y e bida; esun cu kere den mi lo biba, maske e muri, y tur esnan cu ta biba y ta kere den mi lo no muri nunca.” (Huan 11:25, 26) Esta un bunita promesa! Y sinembargo, tin un motibo asta mas grandi pakico Hesus a nace.

E Motibo Principal

No ta ora Maria a sali na estado Hesus a cuminsa existi. El a bisa bon cla: “Mi a baha for di shelo.” (Huan 6:38) Hesus a biba den shelo cu su Tata celestial for di comienso di creacion. De echo, Bijbel ta yam’e “e principio di e creacion di Dios.” (Revelacion 3:14) For di shelo Hesus a mira con un angel malbado a rebeldia y haci e prome dos sernan humano bai contra Dios su mando. Esei ta loke a duna Hesus e motibo mas importante pa desea di nace como un Yiu humano perfecto di Dios. Kico e motibo ei tawata?

Hesus kier a proba cu su Tata celestial tin derecho di goberna universo. Door di keda fiel for di ora cu el a nace te ora cu el a muri riba tera, Hesus a duna prueba cu e tawata dispuesto di coopera obedientemente cu e manera cu Yehova ta goberna Su criaturanan. Prome cu Hesus a muri na man di enemigonan di Dios, el a splica bon cla dicon e tawata dispuesto di duna su bida como sacrificio. El a bisa cu ta pa mundo por sa cu el a stima e Tata. (Huan 14:31) Si Adam cu Eva, e prome dos hendenan, a desaroya un amor asina, nan lo mester por a keda fiel, pasobra nan prueba tawata mucho mas leve.—Genesis 2:15-17.

Ademas, e echo cu Hesus a keda fiel a saca na cla cu Satanas ta un gañado. Satanas a lanta calumnia contra Dios y hende door di bisa dilanti  e angelnan den shelo: “Tur loke un hende tin e lo duna pa su bida.” (Job 2:1, 4) Satanas a acusa tur hende falsamente, bisando cu nan tur lo desobedece Dios pa scapa nan bida.

E cuestionnan aki a lanta duda tocante si Dios ta goberna na un manera husto, y si pues e tin derecho di goberna. Hesus tawata dispuesto di nace como hende y keda fiel te na morto, pa resolve e cuestionnan.

Pues, e motibo principal cu Hesus a nace na mundo tawata, manera e mes a bisa, “pa duna testimonio di e berdad.” (Huan 18:37) El a haci esei door di mustra cu palabra y cu echo cu e gobernacion di Dios ta completamente hustu, y cu esnan cu obedec’e ta haya felicidad duradero. Tambe Hesus a splica cu el a bini na mundo pa duna su bida como “prijs di rescate pa hopi.” (Marco 10:45) El a habri caminda pa hende pecado por logra haya perfeccion y biba pa semper. Pa hende por compronde e asuntonan vital aki, nan mester sa con y pakico Hesus a nace. Pesei mester a skirbi e historia di su nacemento un caminda. Ademas, algun suseso cu tin di aber cu e nacemento di Hesus ta contene otro lesnan importante. E siguiente articulo lo mustra esei.

[Plachi na pagina 4]

Con Adam su yiunan por a scapa for di pica?