“E Tres Reinan”—Ken Nan Tawata?

Hopi bes esenanan di e nacemento di Hesus ta mustra tres homber bisti cu paña largo ta yega cu nan camel na un stal caminda e baby Hesus ta drumi den un pesebre. Generalmente hende ta yama e tres bishitantenan bon bisti aki e tres reinan. Kico Bijbel ta bisa di nan?

Segun Bijbel, e supuesto reinan ei tawata hombernan “for di oriente”, y ta einan nan a haya sa di e nacemento di Hesus. (Mateo 2:​1, 2, 9) E hombernan ei mester a biaha hopi pa nan por a yega Hudea. Ora cu finalmente nan a haya Hesus, ya e no tawata un baby resien naci den un stal. En bes di esei, e hombernan a haya Maria y “e mucha” ta biba den un cas.​—Mateo 2:11.

Bijbel ta yama e personanan aki mago of “specialista den studiamento di streya” (BPK, nota na pia di pagina), y e no ta bisa cuanto nan tawata. The Oxford Companion to the Bible ta splica: “E interes cu e bishitantenan aki tawatin den e streya cu a guia nan na Bethlehem ta mustra e conexion entre magia y astrologia.” Di un manera cla Bijbel ta condena tur forma di magia y di practicanan babilonico pa purba saca informacion for di streya.​—Deuteronomio 18:​10-12; Isaias 47:13.

E informacion cu a ser transmiti na e hombernan aki no a hiba na nada bon. Mas bien, el a lanta rabia di Rei Herodes kende tawata un homber malbado y yalurs. Y esaki a pone cu Hose, Maria y Hesus mester a hui bai Egipto, y cu tur mucha homber na Bethlehem “di edad di dos aña p’abou”, a ser asesina. For di e informacion cu Herodes a haya serca e astrologonan, el a calcula cuidadosamente ki tempo Hesus a nace. (Mateo 2:⁠16) En bista di tur e problemanan cu bishita di e hombernan aki a causa, tur cos ta mustra cu e streya cu nan a mira y e mensahe tocante ‘esun cu a nace como rei di e Hudiunan’ a bini di Dios su enemigo, Satanas e Diabel, kende kier a caba cu Hesus.​—Mateo 2:​1, 2.