Awor Mas Cu Nunca, Keda Alerta!

“No laga nos drumi manera otronan ta haci, ma laga nos ta alerta y sobrio.”—1 TESALONICENSENAN 5:6.

1, 2. (a) Ki sorto di stad Pompei y Herculano tawata? (b) Ki spiertamento hopi habitante di Pompei y Herculano a ignora, y cu ki resultado?

DEN e prome siglo di nos era, Pompei y Herculano tawata dos stad Romano prospero situa casi na pia di Sero Vesuvio. Pa Romanonan bon para esakinan tawata sitionan popular pa pasa facansi. Nan teaternan tawatin capasidad pa mas cu mil hende, y na Pompei tawatin un anfiteater cu por a carga casi henter e poblacion di e stad. Arkeologonan di Pompei a topa cu 118 bar. Den algun di esakinan nan tawata hunga placa y otronan tawata sirbi como centro di prostitucion. Inmoralidad y materialismo tawata reina tur caminda manera e pinturanan riba muraya y otro artefactonan descubri ta indica.

² Dia 24 di augustus di aña 79 di nos era, Sero Vesuvio a bira activo. Cientificonan cu ta studia volcan ta kere cu e prome explosion, cu a scupi particula di lava y shinishi riba e dos stadnan, probablemente no a stroba e habitantenan di scapa. Y aparentemente hopi hende en berdad a scapa. Sinembargo, otronan cu a balota e peliger of a djis ignora e señalnan di spiertamento a opta pa keda. Anto, rond di meianochi, un avalancha di gas, lava y baranca sumamente cayente a basha drenta Herculano y caba cu tur e habitantenan cu a keda den e stad. Tempran e siguiente mainta, un avalancha similar a mata tur hende na Pompei. Un berdadero tragedia, y tur esei, pa motibo cu nan no a haci caso di e señalnan di spiertamento!

Fin di e Sistema di Cosnan Hudiu

3. Den ki sentido e destruccion di Herusalem y esun di Pompei y Herculano ta similar?

³ Na comparacion cu e final teribel di Pompei y Herculano, e destruccion di Herusalem nuebe aña mas prome tawata mucho mas catastrofico, aunke esei a bini na man di hende. Segun informe, e baricada rond di Herusalem tawata “un di e sitiamentonan mas teribel den henter historia”, cu a hiba na morto di mas cu un miyon Hudiu. Sinembargo, mescos cu e desaster na Pompei y Herculano, e destruccion di Herusalem no a tuma luga sin spiertamento.

4. Ki señal profetico Hesus a duna pa spierta su siguidonan cu e fin di un sistema di cosnan tawata serca, y con esaki a cumpli inicialmente den prome siglo?

⁴ Hesucristo a predeci e destruccion di e stad, y el a profetisa di cosnan cu lo a tuma luga prome cu esei sosode—situacionnan angustioso manera guera, scarsedad di cuminda, temblor y maldad. Tambe lo a presenta profeta falso, pero e evangelio, esta, e bon nobo di e Reino di Dios lo a ser predica rond mundo. (Mateo 24:4-7, 11-14) Aunke e palabranan ei di Hesus ta cumpliendo mas extenso awe, for di e tempo ei nan a cumpli na un escala menor. Por ehempel, historia ta haci referencia na un hamber severo na Hudea. (Echonan 11:28) Historiado Hudiu Yosefo ta papia di un temblor den e area di Herusalem djis prome cu e stad a ser destrui. Segun cu e fin di Herusalem tawata yegando serca, tawatin un lantamento tras di otro, lucha interno entre partidonan politico Hudiu, y masacre den varios stad cu  tawatin un poblacion mixto di Hudiu cu hende no Hudiu. No obstante, e bon nobo di Reino tawata ser proclama “den henter creacion bou di shelo.”—Colosensenan 1:23.

5, 6. (a) Ki palabra profetico di Hesus a cumpli na aña 66? (b) Pakico asina tanto hende a muri ora Herusalem a cai finalmente na aña 70?

⁵ Finalmente, na aña 66, e Hudiunan a rebela contra Roma. Ora Cestio Galo a guia un ehersito pa sitia Herusalem, e siguidonan di Hesus a corda loke Hesus a bisa: “Ora boso mira Herusalem rondona door di ehersitonan, reconoce anto cu su desolacion ta serca. E ora ei laga esnan cu ta na Hudea hui bai na e seronan, y laga esnan cu ta meimei di e stad sali bai, y no laga esnan cu ta den cunucu bai den stad.” (Lucas 21:20, 21) A yega ora pa bandona e stad—pero con? Inesperadamente, Galo a retira su trupanan, habriendo caminda pa e cristiannan den Herusalem y Hudea obedece e palabranan di Hesus y hui bai na e seronan.—Mateo 24:15, 16.

⁶ Cuater aña despues, rond di e tempo di Pasco Hudiu, e trupanan Romano a bolbe, pero e biaha aki bou di general Tito, kende tawata dicidido pa pone fin na e rebelion Hudiu. Su ehersito a rondona Herusalem y “lanta un baluarte.” Cu esei a bira imposibel pa scapa for di e stad. (Lucas 19:43, 44) Apesar di e menasa di guera, Hudiunan for di tur parti di e Imperio Romano a basha bai Herusalem pa celebra Pasco Hudiu. Awor nan a keda atrapa. Segun Yosefo, mayoria di e victimanan di e sitiamento Romano a consisti di e bishitantenan desafortuna aki. * Ora Herusalem a cai finalmente, rond di 1 di cada 7 Hudiu den e Imperio Romano a muri. E destruccion di Herusalem y su tempel a nifica fin di e estado Hudiu y di su sistema religioso basa riba e Lei di Moises. *—Marco 13:1, 2.

7. Con bini e cristiannan fiel a sobrevivi e destruccion di Herusalem?

⁷ Na aña 70, e Hudiunan cristian lo por a perde nan bida of wordo esclabisa hunto cu tur otro hende cu tawata na Herusalem. Sinembargo, segun pruebanan historico, nan a haci caso di e spiertamento cu Hesus a duna 37 aña mas prome. Nan a bandona e stad y no a bolbe bek.

Spiertamento Oportuno di e Apostelnan

8. Ki necesidad Pedro a mira, y ki palabranan di Hesus lo e tawatin na mente?

⁸ Awe un destruccion di hopi mas alcanse ta acercando, uno cu lo pone fin na henter e sistema di cosnan aki. Seis aña prome cu e destruccion di Herusalem, apostel Pedro a duna un conseho urgente y oportuno cu ta aplica specialmente na cristiannan di nos tempo: Keda alerta! Pedro a mira cu tawata necesario  pa cristiannan stimula nan “mente” pa nan no ignora “e mandamento di e Señor”, Hesucristo. (2 Pedro 3:1, 2) Ora Pedro a urgi cristiannan pa ta alerta, probablemente e tawatin na mente loke el a tende Hesus bisa Su apostelnan un par di dia prome cu Su morto: “Tene cuidou, keda alerta, pasobra boso no sa ki ora e tempo ta yega.”—Marco 13:33.

9. (a) Ki actitud peligroso algun hende por desaroya? (b) Pakico un actitud di duda ta masha peligroso?

⁹ Awe, algun hende ta puntra cu bofon: “Unda e promesa di su binida ta?” (2 Pedro 3:3, 4) Evidentemente, e personanan aki ta haya cu nada no a cambia realmente y cu tur cos a sigui mescos for di dia mundo a ser crea. E actitud ei di duda ta peligroso. Duda por suak nos sentido di urgencia y pone nos cuminsa antoha un bida di placer. (Lucas 21:34) Ademas, manera Pedro ta señala, e bofonadonan ei ta lubida e Dilubio di dia di Noe cu a destrui un sistema di cosnan mundial. E tempo ei si tur cos a cambia!—Genesis 6:13, 17; 2 Pedro 3:5, 6.

10. Cu ki palabranan Pedro ta anima esnan cu lo por perde pasenshi?

¹⁰ Pedro ta yuda su lectornan cultiva pasenshi door di recorda nan pakico hopi biaha Dios no ta actua mesora. Na prome luga, Pedro ta bisa: “Pa Señor un dia ta mescos cu mil aña, y mil aña mescos cu un dia.” (2 Pedro 3:8) Door cu Yehova ta biba pa semper, E por tene cuenta cu tur factor y scohe e momento mas oportuno pa E actua. Despues, Pedro ta mustra cu Yehova kier pa hende di tur parti repenti. E pasenshi di Dios ta nifica salbacion pa hopi hende cu lo a muri si El a actua mucho lihe. (1 Timoteo 2:3, 4; 2 Pedro 3:9) Sinembargo, e pasenshi di Yehova no ta nifica cu lo E no actua nunca. Pedro ta bisa cu “e dia di Señor lo bin manera un ladron.”—2 Pedro 3:10.

11. Kico lo yuda nos keda spiritualmente alerta, y den ki sentido esaki lo ‘pura’ e dia di Yehova?

¹¹ E comparacion di Pedro ta interesante. Bo  no por sorprende un ladron facilmente, pero un vigilante cu ta keda lanta henter anochi tin mas chens di descubri un ladron cu uno cu ta cabisha de bes en cuando. Con un vigilante por keda alerta? E tin mas chens di keda alerta ora e ta cana bai bini cu ora e ta sinta henter anochi. Mescos tambe, kedando activo den sentido spiritual lo yuda nos como cristian pa keda alerta. Pesei Pedro ta urgi nos pa keda ocupa den “conducta santo y deboto.” (2 Pedro 3:11) E actividad ei lo yuda nos ‘pura e binida di e dia di Dios.’ (2 Pedro 3:12) No cu nos por cambia e orario di Yehova, pasobra su dia lo bini na e ora cu E a fiha. Pero e tempo cu lo transcuri for di awor padilanti te cu e dia ei lo parce di pasa hopi mas lihe si nos ta ocupa den su sirbishi.—1 Corintionan 15:58.

12. Con cada un di nos por beneficia di e pasenshi di Yehova?

¹² Pesei, nos ta anima ken cu ta haya cu e dia di Yehova ta tardando pa haci caso di e conseho di Pedro: spera cu pasenshi riba e dia señala di Yehova. De echo, nos por uza e tempo adicional cu e pasenshi di Dios ta permiti na un manera sabi. Por ehempel, nos por sigui cultiva cualidadnan cristian importante y tambe comparti e bon nobo cu hopi hende mas cu di otro manera nos lo no por a alcansa. Si nos keda alerta, Yehova lo haya nos “den pas, sin mancha y sin culpa” na fin di e sistema di cosnan aki. (2 Pedro 3:14, 15) Ki un bendicion esei lo ta!

13. Ki palabranan di Pablo cu el a skirbi e cristiannan Tesalonicense ta masha apropiado awe?

¹³ Den Pablo su prome carta na e cristiannan Tesalonicense, e tambe ta papia di e necesidad pa keda alerta. E ta conseha: “No laga nos drumi manera otronan ta haci, ma laga nos ta alerta y sobrio.” (1 Tesalonicensenan 5:2, 6) Awe esei ta masha esencial, specialmente cu e destruccion di henter un sistema di cosnan mundial yegando mas serca! Adoradonan di Yehova ta biba den un mundo cu a perde casi tur interes den cosnan spiritual, y esaki por afecta nan. Pesei, Pablo ta conseha: “Laga nos ta sobrio [“keda bon na tino”, Beibel na papiamentu koriente], despues di a bisti e corasa di fe y amor, y como helm e speransa di salbacion.” (1 Tesalonicensenan 5:8) Un estudio regular di e Palabra di Dios y asociacion regular cu nos rumannan na reunion lo yuda nos sigui e conseho di Pablo y mantene nos sentido di urgencia.—Mateo 16:1-3.

Miyones Ta Keda Lanta

14. Ki datonan ta indica cu awe hopi hende ta sigui e conseho di Pedro pa keda alerta?

¹⁴ Tin hopi hende awe cu ta haci caso di e animacion inspira pa keda alerta? Si. Durante e aña di sirbishi 2002, un maximo di 6.304.645 publicado—un aumento di 3,1 porshento compara cu 2001—a duna prueba di ta spiritualmente alerta door cu nan a dedica 1.202.381.302 ora na papia cu otro hende tocante e Reino di Dios. Pa e personanan aki, e actividad ei no tawata djis un asunto casual. Henter nan bida a drei rond di esei. Eduardo cu Noemi di El Salvador ta un ehempel di e actitud cu hopi di nan tin.

15. Ki experencia di El Salvador ta mustra cu hopi hende ta alerta den sentido spiritual?

¹⁵ Algun aña pasa, Eduardo cu Noemi a tuma nota di e palabranan di Pablo: “E esena di e mundo aki ta cambiando.” (1 Corintionan 7:31, NW) Nan a simplifica nan bida y a drenta e sirbishi di pionero di tempo completo. Den transcurso di añanan, nan a ricibi hopi bendicion y asta a traha den e trabou di sircuito y di districto. Apesar cu nan a enfrenta problemanan serio, Eduardo y Noemi ta combenci cu nan a tuma e desision corecto ora nan a sacrifica comodidad material na fabor di sirbishi di tempo completo. Hopi di e 29.269 publicadonan—entre nan 2.454 pionero—na El Salvador a demostra e mesun spirito di sacrificio propio, loke ta un di e motibonan pakico e pais ei tawatin un aumento di 2 porshento den e cantidad di publicadonan aña pasa.

16. Ki actitud un yoncuman di Côte d’Ivoire a manifesta?

 ¹⁶ Na Côte d’Ivoire, un yoncuman cristian cu a skirbi e sucursal a demostra e mesun actitud: “Mi ta un sirbido ministerial. Pero mi no por bisa e rumannan pa traha pionero si ami mes no ta poniendo un bon ehempel. Pesei mi a laga un trabou cu tawata paga mi bon y awor mi ta traha riba mi mes, loke ta duna mi mas tempo pa sali den sirbishi.” E yoncuman aki a bira un di e 983 pioneronan cu ta sirbiendo na Côte d’Ivoire, cu a raporta 6.701 publicado aña pasa, un aumento di 5 porshento.

17. Con un hoben Testigo na Belgica a mustra cu e no a laga prehuicio intimid’e?

¹⁷ Intolerancia, prehuicio y descriminacion ta sigui causa problema pa e 24.961 publicadonan di Reino na Belgica. Apesar di esei nan ta celoso y no ta laga hende intimida nan. Ora un Testigo di 16 aña a tende otronan pinta Testigonan di Yehova como un secta durante un les na scol tocante etica, el a pidi permit pa e duna e otro banda di medaya. Cu e video Testigonan di Jehova—E Organisacion Tras dje Nomber y e foyeto Testigonan di Jehova—Ken Nan Ta?, e por a splica ken realmente e Testigonan ta. E informacion a haya bon acohida, y e siguiente siman e studiantenan a haya un proefwerk basa completamente riba e religion cristian di Testigonan di Yehova.

18. Ki prueba tin cu problema economico no a stroba publicadonan na Argentina y Mozambique di sirbi Yehova?

¹⁸ Mayoria cristian tin cu enfrenta problema serio durante e ultimo dianan aki. Pero toch nan ta trata pa no laga esei distrai nan. Apesar di e problemanan economico bon conoci cu Argentina a pasa aden, nan a raporta un maximo nobo di 126.709 Testigo aña pasa. Ainda tin hopi pobresa na Mozambique. No obstante, 37.563 publicado a participa den e trabou di duna testimonio, loke ta un aumento di 4 porshento. Bida ta dificil pa hopi hende na Albania; asina mes e pais a raporta un aumento excelente di 12 porshento, alcansando un maximo di 2.708 publicado. Ta bisto anto cu situacion dificil no ta stroba Yehova su spirito ora su sirbidonan pone interesnan di Reino na prome luga.—Mateo 6:33.

19. (a) Kico ta duna prueba cu ainda tin hopi hende semehante na carne cu tin hamber pa e berdad di Bijbel? (b) Kico ta algun otro detaye di e raport anual cu ta demostra cu sirbidonan di Yehova ta keda spiritualmente alerta? (Wak e tabel na paginanan 12 pa 15.)

¹⁹ E promedio mensual di 5.309.289 studio di Bijbel raporta aña pasa rond mundo ta mustra cu ainda tin hopi hende semehante na carne cu tin hamber pa e berdad di Bijbel. Di e maximo nobo di 15.597.746 persona cu a asisti na Memorial, ainda e mayoria no ta sirbiendo Yehova activamente. Nos ta desea pa nan por sigui crece den conocemento y amor, tanto di Yehova como di e hermandad. Ta emocionante pa mira con keto bai e “multitud grandi” di ‘otro carne’ ta productivo segun cu nan ta sirbi e Creador “di dia y anochi den su tempel” hunto cu nan rumannan ungi.—Revelacion 7:9, 15; Huan 10:16.

Siña for di Lot

20. Kico nos ta siña for di e ehempel di Lot y su esposa?

²⁰ Naturalmente asta fiel sirbido di Dios por perde nan sentido di urgencia temporalmente. Pensa riba Abraham su subrino Lot. El a  haya sa for di dos angel cu a bishit’e cu Dios tawata bai destrui Sodoma y Gomora. E noticia no por a bini como un sorpresa pa Lot, kende tawata bastante “tormenta pa e bida inmoral di e hendenan sin escrupulo ei.” (2 Pedro 2:7, BPK) Toch, ora e dos angelnan a bini pa sac’e for di Sodoma, el a “tarda.” Casi e angelnan tawatin cu lastra e cu su famia saca for di e stad. Mas despues e esposa di Lot a ignora e spiertamento di e angelnan di no wak patras, y su actitud desobediente a cost’e su bida. (Genesis 19:14-17, 26) “Corda riba Lot su esposa”, Hesus a spierta.—Lucas 17:32.

21. Pakico ta vital pa awor mas cu nunca nos ta alerta?

²¹ E catastrofe na Pompei y Herculano y e susesonan rondo di e destruccion di Herusalem, y tambe e ehempelnan di e Dilubio di dia di Noe y di Lot, tur ta ilustra e importancia di tuma spiertamento na serio. Como sirbido di Yehova, nos ta reconoce e señal di e tempo di fin. (Mateo 24:3) Nos a separa nos mes for di religion falso. (Revelacion 18:4) Mescos cu e cristiannan di prome siglo, nos tin cu ‘pura e binida di e dia di Dios.’ (2 Pedro 3:12) Si, awor mas cu nunca, nos mester ta alerta! Ki medidanan nos por tuma, y ki cualidadnan nos por desaroya pa por keda lanta y alerta? E siguiente articulo lo trata e puntonan ei.

[Nota]

Con Lo Bo Contesta?

• Ki desaroyo a permiti e cristiannan Hudiu scapa e destruccion di Herusalem?

• Con e conseho den e cartanan di apostel Pedro y Pablo ta yuda nos keda alerta?

• Ken awe ta duna prueba di ta completamente alerta?

• Ki les nos ta saca for di e relato di Lot y su esposa?

[Preguntanan di Estudio]

[Tabel na pagina 12-15]

RAPORT DI AÑA DI SIRBISHI 2002 DI TESTIGONAN DI JEHOVA MUNDIALMENTE

 (Wak volumen)

[Plachi na pagina 9]

Na aña 66 di nos era, e comunidad cristian na Herusalem a haci caso di e spiertamento di Hesus

[Plachi na pagina 10]

Kedando activo ta yuda cristiannan keda alerta