“Bo Tin Rason, Bida Ta Dushi!”

LO BO kier sa kico ta e berdadero nificacion di bida? Magdalena, un Testigo di Yehova di diesocho aña cu ta biba na Szczecin, Polonia, a yuda Katarzyna, un mucha mohe di su scol secundario haya sa esei. Katarzyna semper a bisa cu e ta un ateista pero ora Magdalena a papia cu ne tocante Bijbel, el a mustra interes sinsero.

Aunke Katarzyna tawata gusta loke Magdalena tawata splic’e di Bijbel, no ta tur cos e por a acepta. Un biaha cu Katarzyna tawata papia cu Magdalena tocante berdadero amigo, Katarzyna a bis’e: “Abo tin Bijbel; bo conoce ki principionan bo tin cu sigui y unda bo por haya amigo. Pero kico di esnan cu por lo menos pa aworaki no por acepta e principionan ei?”

Tur cos a bin cambia na momento cu Katarzyna a haci un biahe pa Londen, Inglatera. Ayanan el a bishita e sucursal di Testigonan di Yehova y a keda impresiona pa e bondad cu nan a mustra na dje. Gestonan simpel manera ora otronan tawata habri porta p’e y mustra berdadero interes den dje ora e tawata papia, a conmov’e.

Ora e aña escolar nobo a cuminsa na september 2001, Katarzyna a dicidi di acepta un studio regular di Bijbel. Mas y mas el a bin mira e balor di principionan biblico y el a cuminsa aplica nan den su bida di tur dia. Resientemente el a confia Magdalena: “Mi ta sinti como si fuera mi ta cuminsando un bida nobo.” Tambe el a manda un mensahe cortico p’e via telefon cellular: “Masha danki pa nos studio awe! Bo tin rason, bida ta dushi! Ta algo maraviyoso pa sa ken nos tin cu gradici pa esei.”