Consuelo pa Hende Cu Ta Sufri

DEN transcurso di siglonan, e pregunta di pakico Dios ta permiti hende sufri tawata dificil pa hopi filosofo y teologo contesta. Algun a bisa cu siendo cu Dios ta Todopoderoso, na final di cuenta ta E ta responsabel pa sufrimento. E escritor di E Sermonnan di Clemente, un obra apocrifo di siglo 2, a bisa cu Dios ta goberna mundo cu su dos mannan. Cu su “man robes” (Diabel) e ta causa dolor y sufrimento, y cu su “man drechi” (Hesus) e ta salba y bendiciona.

Otro filosofo y teologo ta reconoce cu no ta Dios ta causa sufrimento, pero toch nan no por acepta cu E ta laga hende sufri. Pesei nan ta prefera di nenga cu ta existi sufrimento. “Maldad ta djis un ilusion, y e no tin base real”, Mary Baker Eddy a skirbi. “Si hende lo a compronde cu pica, enfermedad y morto ta nifica nada, esakinan lo a disparce.”—Ciencia y Salu, cu e Clave di e Scritura.

Como resultado di e susesonan tragico di historia, specialmente for di prome guera mundial te den nos tempo, hopi hende a yega na e conclusion cu Dios ta simplemente incapas pa preveni sufrimento. “Ami ta kere cu e Holocausto a core cu e idea cu Dios ta todopoderoso”, e erudito Hudiu David Wolf Silverman a skirbi. El a agrega: “Pa por tin un manera pa compronde Dios, . . . Su bondad mester ta compatibel cu existencia di maldad, y esaki ta asina solamente si E no ta todopoderoso.”

Sinembargo, e declaracionnan ei cu di un manera of otro Dios ta complice di e sufrimento cu ta existi, cu E no por prevenie, of cu sufrimento ta djis e producto di nos imaginacion, no ta ofrece mucho consuelo pa hende cu ta sufri. Y piyo ainda, e opinionnan ei ta contradeci completamente e idea di un Dios husto, dinamico y amoroso cu Bijbel ta describi. (Job 34:10, 12; Yeremias 32:17; 1 Huan 4:8) Kico Bijbel ta bisa anto tocante e motibo pakico Dios a permiti sufrimento?

Con Sufrimento A Cuminsa?

Dios no a crea hende pa nan sufri. Al contrario, El a duna e prome pareha humano, Adam cu Eva, un mente y curpa perfecto. Tambe El a prepara un hofi placentero pa sirbi como nan hogar, y a duna nan un trabou agradabel y importante. (Genesis 1:27, 28, 31; 2:8) Pero pa nan felicidad por tawata duradero nan lo mester a reconoce e gobernacion di Dios y su derecho di dicidi loke ta bon y malo. Un cierto palo cu tawata yama e “palo di conocemento di bon y malo” a representa e derecho ei di Dios. (Genesis 2:17) Door di obedece e mandamento pa no come for di e palo ei, Adam cu Eva lo a demostra nan sumision na Dios. *

Lamentablemente, Adam cu Eva no a obedece Dios. Un criatura spiritual rebelde, mas despues identifica como Satanas e Diabel, a combence Eva cu no a cumbinie obedece Dios. Supuestamente Dios a strob’e di haya algo masha deseabel: independencia,  e derecho di scohe pa su mes loke tawata bon y malo. Satanas a pretende cu si Eva lo a come di e palo, ‘su wowo lo a habri y lo el a bira manera Dios, conociendo bon y malo.’ (Genesis 3:1-6; Revelacion 12:9) Seduci pa e posibilidad di bira independiente, Eva a tuma di e fruta prohibi, y poco despues Adam a haci mescos.

E mesun dia ei, Adam cu Eva a cuminsa experencia e resultadonan di nan rebelion. Door cu nan a rechasa gobernacion dibino, nan a perde e proteccion y e bendicionnan cu sumision na Dios a duna nan. Dios a saca nan for di Paradijs y a bisa Adam: “Maldiciona e tera ta pa bo motibo; cu trabou duro lo bo come di dje tur e dianan di bo bida. Cu sodo di bo frenta lo bo come pan, te ora bo bolbe na tera.” (Genesis 3:17, 19) Adam cu Eva a bin bira malo, sufri dolor, bira bieu y muri. Sufrimento a bira parti di bida humano.—Genesis 5:29.

Solucion pa e Cuestion

Kisas un hende ta puntra: ‘Dios no por a simplemente pasa por halto di Adam cu Eva su pica?’ No, pasobra esei lo por a caba cu tur respet pa su autoridad, loke talbes lo a instiga mas rebelion y resulta den asta mas sufrimento. (Eclesiastes 8:11) Ademas, si Dios lo a pordona tal desobediencia, esei lo a hacie complice di e malecho. E escritor biblico Moises ta recorda nos: “[Dios] su obra ta perfecto, pasobra tur su camindanan ta husto; un Dios di fieldad y sin inhusticia, husto y recto E ta.” (Deuteronomio 32:4) Pa Dios a pega na su propio norma di husticia, E tawatin cu laga Adam cu Eva sufri e consecuencianan di nan desobediencia.

Pakico Dios no a destrui e prome pareha humano hunto cu Satanas, e instigado invisibel di nan rebelion, mesora? E tawatin e poder pa haci esei. Adam cu Eva lo no a haya yiu cu lo a nace cu un herencia di sufrimento y morto. Sinembargo, tal demostracion di poder dibino lo no a proba cu Dios tawatin derecho di tin autoridad riba su criaturanan inteligente. Ademas, si Adam cu Eva a muri sin haya yiu, esei lo a nifica cu e proposito di Dios pa yena tera cu nan desendientenan perfecto lo a fracasa. (Genesis 1:28) Y “Dios no ta manera hende . . . Kico cu E priminti, E ta haci; loke E papia, ta cumpli.”—Numbernan 23:19, Today’s English Version.

Den su sabiduria perfecto, Yehova Dios a dicidi di permiti e rebelion sigui pa un tempo limita. E rebeldenan lo a haya oportunidad amplio pa mira pa nan mes e resultado di nan independencia for di Dios. Historia lo a demostra fuera di tur duda cu hende tin mester di e guia dibino y cu Dios su mando ta superior riba esun di hende of di Satanas. Na mesun tempo, Dios a dal e pasonan pa garantisa cu su proposito original pa tera lo a cumpli. El a priminti cu un “simiña” of desendencia lo a bini pa ‘herida cabes di Satanas’, eliminando di unabes pa semper su rebelion y su efectonan dañino.—Genesis 3:15.

Hesucristo tawata e Simiña priminti ei. Na 1 Huan 3:8, nos ta lesa cu “e Yiu di Dios a parese . . . pa e destrui e obranan di Diabel.” El a haci esaki door di sacrifica su bida humano perfecto y paga e prijs di rescate pa libra e yiunan di Adam for di pica hereda y morto. (Huan 1:29; 1 Timoteo 2:5, 6) Esnan cu di berdad ta eherce fe den e sacrificio di Hesus lo haya alivio permanente di sufrimento. (Huan 3:16; Revelacion 7:17) Na ki tempo esaki lo sosode?

 Fin di Sufrimento

Ora hende a rechasa e autoridad di Dios, esei a causa masha hopi sufrimento. Ta na su luga anto pa Dios haci uzo di un manifestacion special di su autoridad pa pone fin na sufrimento humano y cumpli cu su proposito original pa nos tera. Hesus a menciona e areglo dibino aki ora el a siña su siguidonan pidi: “Nos Tata cu ta den shelo, . . . cu bo reino bini. Cu bo boluntad sosode na tera mescos cu den shelo.”—Mateo 6:9, 10.

E tempo cu Dios a permiti hende experimenta cu tur tipo di gobierno ta serca di yega su fin. Cumpliendo cu profecia di Bijbel, Dios a establece su Reino den shelo na 1914 cu Hesucristo como Rei. * Dentro di poco, lo E destrui y pone fin na tur gobierno humano.—Daniel 2:44.

Durante Hesus su ministerio cortico riba tera, el a duna un bista adelanta di e bendicionnan cu restauracion di gobernacion dibino lo trece pa humanidad. E Evangelionan ta demostra cu Hesus a mustra compasion na esnan pober y descrimina den sosiedad humano. El a cura hende enfermo, alimenta esnan cu tawatin hamber y resusita morto. Asta e forsanan di naturalesa a obedece su bos. (Mateo 11:5; Marco 4:37-39; Lucas 9:11-16) Imagina kico Hesus lo logra ora e utilisa e efecto purificado di su sacrificio di rescate pa beneficia henter humanidad obediente! Bijbel ta priminti cu pa medio di e gobernacion di Cristo, Dios ‘lo seca tur lagrima kita for di wowo di humanidad; y lo no tin morto mas; lo no tin lamento mas, ni yoramento, ni dolor; e prome cosnan a pasa.’—Revelacion 21:4.

Consuelo pa Hende Cu Ta Sufri

Ta un berdadero animacion pa sa cu nos Dios amoroso y todopoderoso, Yehova, ta interesa den nos y cu pronto lo E trece alivio pa humanidad! Por lo general, un pashent hopi malo ta dispuesto pa acepta un tratamento cu lo cur’e asta si e tratamento ta hopi doloroso. Mescos tambe, si nos sa cu Dios su manera di atende cosnan lo trece bendicion eterno, e conocemento ei por sostene nos apesar di e dificultadnan cu nos ta enfrenta temporalmente.

Ricardo, menciona den e articulo anterior, ta uno cu a siña saca consuelo for di e promesanan di Bijbel. “Despues cu mi casa a fayece, mi a sinti un deseo fuerte pa isola mi mes”, e ta corda, “pero mesora mi a realisa cu esei lo no trece mi casa bek y solamente lo haci mi estado emocional piyo.” En bes di isola su mes, Ricardo a sigui cu su custumber di bai reunion cristian y comparti e mensahe di Bijbel cu otro hende. El a bisa: “Segun cu mi tawata sinti e apoyo amoroso di Yehova y ripara con E tawata contesta mi oracionnan asta den cosnan cu a parce insignificante, mi a hala mas serca di dje. Ta e echo cu mi tawata conciente cu Dios stima mi a yuda mi wanta e prueba di mas pisa den mi bida.” E ta admiti:  “Ainda mi ta sinti masha falta di mi casa, pero awor mi ta kere firmemente cu nada cu Yehova permiti pasa cu nos por causa nos daño permanente.”

Abo tambe mescos cu Ricardo y miyones di otro hende ta anhela e tempo ora cu e sufrimento actual di humanidad “lo no wordo recorda mas ni bin na memoria”? (Isaias 65:17) Bo por ta sigur cu bo tambe por ricibi e bendicionnan di e Reino di Dios si bo sigui e conseho di Bijbel: “Busca SEÑOR, mientras cu E por wordo haya; yam’e, mientras cu E ta serca.”—Isaias 55:6.

Pa yuda bo haci esaki, pone lesamento y studiamento di e Palabra di Dios na prome luga den bo bida. Siña conoce Dios y esun cu El a manda, Hesucristo. Haci esfuerso pa biba na harmonia cu e normanan di Dios y asina mustra cu bo ta dispuesto pa somete bo na su soberania. Un bida asina lo haci bo mas felis awor apesar di e pruebanan cu lo bo tin cu enfrenta. Y den futuro, lo E permiti bo disfruta di bida den un mundo liber di sufrimento.—Huan 17:3.

[Nota]

[Cuadro na pagina 6]

KICO TA YUDA NOS WANTA SUFRIMENTO?

‘Tira tur boso precupacion riba Dios.’ (1 Pedro 5:7) Ta masha natural pa nos sinti nos confundi, rabia y bandona ora nos ta wanta sufrimento of mira un persona cu nos ta stima sufri. Pero bo por ta sigur cu Yehova ta compronde nos sintimentonan. (Exodo 3:7; Isaias 63:9) Mescos cu hombernan fiel di pasado, nos por desahoga nos mes serca dje y expresa nos duda- y ansiedadnan. (Exodo 5:22; Job 10:1-3; Yeremias 14:19; Habacuk 1:13) Kisas E no ta bai kita nos pruebanan milagrosamente for di nos, pero como contesta riba nos oracionnan sinsero, E por duna nos e sabiduria y fortalesa necesario pa wanta y trata cu nan.—Santiago 1:5, 6.

“No keda sorprendi pa motibo di e prueba doloroso cu boso ta sufriendo, como si fuera ta algo straño ta pasa cu boso.” (1 Pedro 4:12, New International Version) Aki Pedro ta papiando di persecucion, pero su palabranan ta conta tambe pa cualkier sufrimento cu un creyente por ta wantando. Hende ta pasa miseria, ta sufri di enfermedad y ta pena pa morto di sernan keri. Bijbel ta bisa cu “tempo y suseso imprevisto” ta bini riba tur hende. (Eclesiastes 9:11, NW) Cosnan asina ta parti di e bida actual. Unabes nos realisa esei nos lo sa kico pa haci ora nos ta sufri of ora nos haya nos cu un desgracia. (1 Pedro 5:9) Riba tur cos, recordando e siguiente garantia lo ta un fuente special di consuelo pa nos: “E wowonan di SEÑOR ta riba e hustonan, y su horeanan ta atento pa scucha nan sclamacion.”—Salmo 34:15; Proverbionan 15:3; 1 Pedro 3:12.

‘Regociha den speransa.’ (Romanonan 12:12) En bes di lamenta con felis nos tawata un tempo, nos por medita riba e promesa di Dios pa caba cu tur sufrimento. (Eclesiastes 7:10) E speransa bon funda aki lo proteha nos mescos cu un helm ta proteha cabes di hende. Speransa ta suavisa e efectonan desagradabel di golpi di bida y ta evita cu esakinan ta bira fatal pa nos salu mental, emocional of spiritual.—1 Tesalonicensenan 5:8.

[Plachi na pagina 5]

Adam cu Eva a rechasa e gobernacion di Dios

[Plachi na pagina 7]

Dios ta priminti un mundo liber di sufrimento