“Keda Alerta”!
“Keda Alerta”!
“Loke mi ta bisa boso, mi ta bisa tur: ‘Keda alerta.’” —MARCO 13:37.
1, 2. (a) Ki les un homber a siña tocante proteha su pocesionnan? (b) For di Hesus su ilustracion tocante un ladron, kico nos ta siña tocante ser alerta?
JUAN tawata warda su cosnan di balor na cas. E tawata sconde nan bou di su cama—segun e, e luga mas sigur den cas. Sinembargo, un anochi cu e y su casa tawata na soño, un ladron a drenta e camber. Evidentemente e ladron tawata sa precis unda e tawatin cu busca. Sin ocasiona ningun zonido el a saca tur articulo di balor for di bou dje cama y tambe a cohe placa cu Juan a laga den lachi di un mesita banda di nan cama. E siguiente mainta, Juan a descubri e robo. Por lo pronto lo e no lubida e les doloroso cu el a siña: Un hende na soño no por proteha su pocesionnan.
2 Den sentido spiritual ta mescos. Nos no por proteha nos speransa y nos fe si nos pega soño. Pesei Pablo a duna e spiertamento: “No laga nos drumi manera otronan ta haci, ma laga nos ta alerta y sobrio.” (1 Tesalonicensenan 5:6) Hesus a uza e ilustracion di un ladron pa mustra nos con vital ta pa keda alerta. El a describi e susesonan cu lo a tuma luga prome cu e bini como Hues, anto caba el a spierta: “Sea alerta anto, pasobra boso no sa ki dia boso Señor ta bin. Ma sea sigur di esaki, cu si e cabes di cas tawata sa den ki ora di anochi e ladron tawata di bin, e lo a keda alerta y lo no a permiti pa kibra drenta su cas. Pa e motibo aki boso tambe sea prepara, pasobra e Yiu di hende lo bin na un ora cu boso no ta pensa.” (Mateo 24:42-44) Un ladron no ta anuncia adelanta ki ora e ta bini. E ta spera di yega ora no tin ningun hende ta sper’e. Y manera Hesus a bisa, asina tambe e fin di e sistema aki lo yega na ‘un ora cu nos no ta pensa.’
“Sea Alerta, Para Firme den Fe”
3. Con Hesus a mustra e importancia di keda alerta uzando e ilustracion di esclabonan cu ta warda nan doño bini for di un fiesta di casamento?
3 Segun e Evangelio di Lucas, Hesus a compara cristiannan cu esclabo cu ta warda nan doño bini bek for di un fiesta di casamento. Nan tin cu keda alerta pa ora e yega nan ta lanta y cla pa ricibie. Den un manera similar, Hesus a bisa: “Na un ora cu boso no ta spera e Yiu di hende ta bin.” (Lucas 12:40) Algun ruman cu a sirbi Yehova pa hopi aña por perde nan sentido di urgencia relaciona cu e tempo den cua nos ta biba. Nan por asta yega na e conclusion cu e fin por ta basta leu ainda. Pero e pensamento ei lo por kita nos atencion for di cosnan spiritual y dirigie riba metanan material, distraicionnan cu por pone nos cabisha den sentido spiritual.—Lucas 8:14; 21:34, 35.
4. Ki conviccion lo motiva nos pa keda alerta, y con Hesus a mustra esaki?
4 Nos por saca un les mas for di Hesus su ilustracion. Aunke e esclabonan no tawata sa ki ora nan doño lo a yega, aparentemente nan tawata sa si riba ki anochi lo el a yega. Lo tawata dificil pa keda lanta henter anochi si nan a pensa cu nan doño lo por a bini riba un otro anochi. Pero no, nan tawata sa riba ki anochi e tawata pa bini, y esei a duna nan un motibo mas fuerte ainda pa keda lanta. Casi mescos tambe, e profecianan di Bijbel ta revela claramente cu nos ta bibando den e tempo di fin; pero nan no ta bisa nos e dia ni e ora di e fin mes. (Mateo 24:36) E echo cu nos sa cu e fin ta yegando ta yuda nos keda alerta, pero si nos ta combenci cu e dia di Yehova ta hopi serca, nos lo tin un motivacion mucho mas fuerte ainda pa ta alerta.—Sofonias 1:14.
5. Con nos por responde na e apelacion di Pablo pa “sea alerta”?
5 Ora Pablo a skirbi e Corintionan, el a urgi nan: “Sea alerta, para firme den fe, actua manera homber, sea fuerte.” (1 Corintionan 16:13) Si, pa nos keda firme den e fe cristian, nos mester ta alerta. Con nos por keda alerta? Door di haya un conocemento mas profundo di e Palabra di Dios. (2 Timoteo 3:14, 15) Bon custumbernan di studio personal y asistencia regular na reunion ta yuda fortalece nos fe, y un aspecto importante di nos fe ta di tene e dia di Yehova na mente. Pesei ta bon pa de bes en cuando nos repasa e prueba basa riba Bijbel cu nos ta hopi serca di e fin di e sistema aki, pasobra esei lo yuda nos pa no lubida e berdadnan importante relaciona cu e benidero fin ei. * Ta bon pa tuma nota tambe di e susesonan mundial di actualidad cu ta cumpli cu profecia di Bijbel. Un ruman na Alemania a skirbi: “Ki ora cu mi wak noticia—tocante guera, temblor, violencia y contaminacion di nos planeta—e ta laga mi mira cla con serca e fin ta.”
6. Den ki manera Hesus a ilustra e tendencia di cuminsa cabisha den sentido spiritual segun cu tempo ta pasa?
6 Na Marco capitulo 13, nos ta haya un otro relato di e spiertamento cu Hesus a duna su disipelnan pa keda alerta. Segun e capitulo aki, Hesus ta compara nan situacion cu esun di un wardado di porta cu ta warda su doño bini bek for di un biahe den exterior. E wardado di porta no tawata sa ki ora su doño ta bini bek. E tawatin cu djis keda alerta. Hesus a referi na cuater diferente warda durante cua e doño lo por a yega. E di cuater warda a dura for di mas o menos tres or di marduga te ora solo sali. Durante e ultimo warda ei, e wardado di porta por a cuminsa cabisha facilmente. Aparentemente, soldanan ta considera e ora prome cu solo sali como e miho ora pa cohe un enemigo di sorpresa. Di igual manera, na e ora laat aki, ora cu den un sentido spiritual e mundo rond di nos ta morto na soño, nos por haya nos ta lucha mas cu nunca pa keda lanta. (Romanonan 13:11, 12) Pesei, den su ilustracion, Hesus a urgi bes tras bes: “Tene cuidou, keda alerta . . . Pesei, keda alerta . . . Loke mi ta bisa boso, mi ta bisa tur: ‘Keda alerta!’”—Marco 13:32-37.
7. Ki peliger real ta existi, y cu bista riba esaki, ki animacion nos ta lesa cu frecuencia den Bijbel?
7 Hopi bes durante su ministerio y despues di su resureccion, Hesus a urgi su disipelnan pa keda vigila. Por cierto, cada bes cu e Scritura ta referi na fin di e sistema di cosnan aki, nos ta haya e spiertamento pa keda lanta of pa sigui vigila. * (Lucas 12:38, 40; Revelacion 3:2; 16:14-16) Claramente, cabishamento spiritual ta un peliger masha real. Nos tur tin mester di e spiertamentonan ei!—1 Corintionan 10:12; 1 Tesalonicensenan 5:2, 6.
Tres Apostel Cu No Por A Keda Lanta
8. Con e tres apostelnan di Hesus a responde na su peticion den e hofi di Getsemani pa nan keda vigila?
8 Keda lanta ta rekeri mas cu bon intencion, manera nos ta mira for di e ehempel di Pedro, Santiago y Huan. Tawata trata aki di tres homber spiritual cu a sigui Hesus fielmente y cu tawatin un cariño profundo p’e. Toch, riba e anochi di 14 di nisan di aña 33 di nos era, nan no a keda lanta. Despues cu nan a bandona e sala ariba caminda nan a celebra e Pasco Hudiu, e tres apostelnan a compaña Hesus bai e hofi di Getsemani. Ei Hesus a bisa nan: “Mi alma ta masha tristo mes, te na morto; keda akinan y vigila hunto cu mi.” (Mateo 26:38) Tres bes Hesus a haci oracion ferviente na su Tata celestial, y tres bes el a bin bek serca su amigonan y haya nan na soño.—Mateo 26:40, 43, 45.
9. Kico probablemente a pone e apostelnan cabisha?
9 Pakico e hombernan fiel aki a desapunta Hesus e anochi ei? Cansancio fisico tawata un factor. Tawata laat, probablemente despues di meianochi, y “nan wowo tawata pisa.” (Mateo 26:43) Sinembargo, Hesus a bisa nan: “Keda vigila y haci oracion, pa boso no cai den tentacion; e spirito ta boluntario, ma e carni ta debil.”—Mateo 26:41.
10, 11. (a) Apesar di su cansancio, kico a yuda Hesus keda alerta den e hofi di Getsemani? (b) Kico nos por siña for di loke a sosode cu e tres apostelnan ora Hesus a pidi nan pa keda vigila?
10 Sin duda, Hesus tambe tawata cansa riba e anochi historico ei. Sinembargo, en bes di pega soño, el a dedica e ultimo momentonan crucial ei di libertad pa haci oracion ferviente. Un par di dia mas prome, el a urgi su siguidonan pa haci oracion, bisando: “Keda lanta, anto, na tur tempo haciendo suplica pa boso por logra scapa di tur e cosnan aki cu ta destina pa sosode, y pa para dilanti e Yiu di hende.” (Lucas 21:36, NW; Efesionan 6:18) Si nos haci caso di Hesus su conseho y sigui su ehempel excelente den e asunto di oracion, nos suplicanan sinsero na Yehova lo yuda nos keda lanta den sentido spiritual.
11 Claro cu Hesus a compronde—aunke su disipelnan si no a capta esei e tempo ei—cu pronto lo el a wordo aresta y condena na morto. Su pruebanan lo a bin culmina den un agonia riba e staca di tormento. Hesus a spierta su apostelnan di e cosnan aki, pero nan no a compronde loke e tawata bisando. Pesei nan a pega soño mientras cu e si a keda lanta ta haci oracion. (Marco 14:27-31; Lucas 22:15-18) Mescos cu tawata e caso cu e apostelnan, nos carni tambe ta debil y tin cosnan cu nos no sa ainda. Pero si nos no capta e urgencia di e tempo den cua nos ta biba, nos por pega soño den un sentido spiritual. Ta door di keda vigila so nos lo keda lanta.
Tres Cualidad Vital
12. Ki tres cualidad Pablo a conecta cu keda lanta?
12 Con nos por mantene nos sentido di urgencia? Nos a mira caba e importancia di oracion y e necesidad pa tene e dia di Yehova na mente. Ademas, Pablo ta menciona tres cualidad vital cu nos mester cultiva. E ta bisa: “Ma como cu nos ta di dia, laga nos ta sobrio [na tino], despues di a bisti e corasa di fe y amor, y como helm e speransa di salbacion.” (1 Tesalonicensenan 5:8) Laga nos considera brevemente con fe, speransa y amor ta yuda nos keda spiritualmente alerta.
13. Con fe ta yuda nos keda alerta?
13 Nos mester tin un fe firme cu Yehova ta existi y cu “e ta esun cu ta recompensa esnan cu ta busc’e.” (Hebreonan 11:6) E echo cu Hesus su profecia tocante e fin tawatin un cumplimento inicial den prome siglo ta fortalece nos fe cu lo e cumpli na un escala mayor den nos tempo. Y door di nos fe nos ta keda den espectativa di e dia di Yehova, cu e confiansa cu e “[vision profetico] lo bin sigur, e lo no tarda.”—Habacuk 2:3.
14. Si nos kier keda alerta, pakico speransa ta algo vital?
14 Nos speransa cu lo cumpli sigur ta manera “un anker di e alma” cu ta yuda nos soporta dificultad asta si nos tin cu warda pa e promesanan infalibel di Dios cumpli. (Hebreonan 6:18, 19) Margaret, un ruman mohe ungi cu tin su 90 y pico aña y cu a batisa mas cu 70 aña pasa, ta admiti: “Ora mi esposo tawata muriendo di cancer na 1963, mi a pensa cu lo tawata hopi bon si e fin a bini lihe. Pero awor mi ta realisa cu mi tawata pensando principalmente riba mi interesnan personal. E tempo ei nos no tawatin ningun idea te na ki grado e trabou lo a extende riba henter mundo. Te ainda tin hopi luga caminda e trabou a caba di cuminsa. Pesei mi ta contento cu Yehova tawatin pasenshi.” Apostel Pablo ta sigura nos: “Perseverancia [ta produci] un condicion aproba; e condicion aproba, na su turno, speransa, y e speransa no ta hiba na desilusion.”—Romanonan 5:3-5, NW.
15. Con amor lo motiva nos asta ora ta parce cu nos a warda hopi tempo caba?
15 Amor cristian ta un cualidad sobresaliente pasobra e ta e motivacion fundamental tras di tur loke nos ta haci. Nos ta sirbi Yehova pasobra nos ta stim’e, sea cual sea su orario. Amor pa prohimo ta motiva nos pa predica e bon nobo di Reino, sin importa pa cuanto tempo Dios kier pa nos haci esei y cuanto biaha E kier pa nos bolbe na e mesun casnan. Manera Pablo a skirbi, “ta keda fe, speransa, amor, e tresnan aki; ma esun di mas excelente di esakinan ta amor.” (1 Corintionan 13:13) Amor ta yuda nos persevera y keda alerta. “Tur cos [amor] ta spera, tur cos e ta soporta. Amor nunca no ta faya.”—1 Corintionan 13:7, 8.
“Tene Firme na Loke Bo Tin”
16. En bes di floha nos mannan, ki actitud nos mester cultiva?
16 Nos ta biba den un tempo memorabel ora cu susesonan mundial ta recorda nos constantemente cu nos ta den e parti final di e ultimo dianan. (2 Timoteo 3:1-5) Awor no ta e momento pa floha nos mannan sino pa ‘tene firme na loke nos tin.’ (Revelacion 3:11) Door di ser “sobrio cu e proposito di por haci oracion” y door di cultiva fe, speransa y amor, nos lo demostra di ta prepara pa ora e momento di prueba yega. (1 Pedro 4:7) Nos tin hopi di haci den e trabou di Señor. Door di ta ocupa den obranan di conducta santo nos lo ta completamente alerta.—2 Pedro 3:11.
17. (a) Pakico nos no mester laga e decepcionnan cu sa presenta desanima nos? (Wak e cuadro na pagina 21.) (b) Con nos por imita Yehova, y ki bendicion ta warda esnan cu ta haci esei?
17 Yeremias a skirbi: “SEÑOR ta mi porcion, pesei ta den dje mi ta spera. SEÑOR ta bon pa esnan cu ta warda riba dje, pa e alma cu ta busc’e. Ta bon pa warda den silencio riba e salbacion di SEÑOR.” (Lamentacionnan 3:24-26) Algun di nos no tin mucho tempo ta warda. Otronan tin hopi aña ta warda pa mira e salbacion di Yehova. Pero e tempo di espera aki ta masha cortico na comparacion cu e eternidad cu nos tin nos dilanti! (2 Corintionan 4:16-18) Y mientras nos ta spera riba e debido tempo di Yehova, nos por cultiva cualidadnan cristian esencial y yuda otro hende probecha di Yehova su pasenshi y acepta e berdad. Laga nos tur anto keda alerta. Laga nos imita Yehova y tene pasenshi, gradicido pa e speransa cu El a duna nos. Y segun cu nos ta keda fielmente alerta, laga nos tene firme na e speransa di bida eterno. Anto, e promesanan profetico aki lo cumpli sigur den nos caso: “[Yehova] lo halsa bo pa hereda e tera; ora cu e malbadonan wordo corta kita afo, abo lo mira esaki.”—Salmo 37:34.
[Nota]
^ par. 5 Kisas ta util pa repasa e seis areanan di evidencia den E Toren di Vigilancia di 15 di januari 2000, pagina 12 y 13, cu ta indica cu nos ta bibando den “e ultimo dianan.”—2 Timoteo 3:1.
^ par. 7 Papiando di e verbo Griego traduci como “keda alerta”, e lexicografo W. E. Vine ta splica cu e ta nifica literalmente ‘core cu soño’, y e ta “duna idea no di djis keda lanta, sino keda vigila cu un cierto proposito.”
Con Lo Bo Contesta?
• Con nos por fortalece nos conviccion cu e fin di e sistema di cosnan aki ta serca?
• Kico nos por siña for di e ehempel di Pedro, Santiago y Huan?
• Ki tres cualidad lo yuda nos keda spiritualmente alerta?
• Pakico esaki ta e momento pa ‘tene firme na loke nos tin’?
[Preguntanan di Estudio]
[Cuadro/Plachi na pagina 21]
“Bendiciona Ta Esun Cu Ta Sigui Spera.”—Daniel 12:12
Imagina bo cu un bewaker ta sospecha cu un ladron ta plania pa drenta horta den e luga cu e ta cuida. Ora bira scur, e bewaker ta sumamente atento pa cualkier zonido cu por indica presencia di e ladron. Pa oranan largo e ta concentra pa e mira y tende tur cos. Ta facil pa compronde cu cualkier zonido—sea un rafaga di biento den palo of un pushi cu ta tumba algo—por bira un alarma falso p’e.—Lucas 12:39, 40.
Algo similar por sosode cu esnan cu ta “sperando e revelacion di nos Señor Hesucristo.” (1 Corintionan 1:7) E apostelnan a kere cu Hesus lo a “restaura e reino pa Israel” djis despues di su resureccion. (Echonan 1:6) Añanan despues, mester a recorda e cristiannan na Tesalonica cu e presencia di Hesus tawata mas den futuro. (2 Tesalonicensenan 2:3, 8) Apesar di ‘alarma falso’ tocante e dia di Yehova, e prome siguidonan di Hesus di e tempo ei no a bandona e caminda cu ta hiba na bida.—Mateo 7:13.
Den nos tempo, decepcionnan debi cu aparentemente e fin di e sistema di cosnan aki a tarda pa bini no mester pone nos stop di vigila. Un alarma falso por engaña un bewaker, pero toch e ta haci bon di keda alerta! Esei ta su trabou. Mescos ta conta pa cristiannan.
[Plachi na pagina 18]
Bo ta combenci cu e dia di Yehova ta serca?
[Plachi na pagina 19]
E reunionnan, oracion y bon custumber di studio personal ta yuda nos keda alerta
[Plachi na pagina 22]
Mescos cu Margaret, laga nos keda alerta cu pasenshi y siendo activo