Kico Por Yuda Nos Maneha e Palabra di e Berdad na un Manera Corecto?

UN PERSONA cu ta skirbi reseña pa corant a bai wak un obra teatral. E no a gust’e masha y a skirbi despues: “Si ta co’i kens bo ta gusta, anto bo mester bai mira e obra aki.” Mas despues e promotornan di e obra a saca un propaganda cu a cita parti di e opinion di e reseñado. E cita tawata: “Bo mester bai mira e obra aki”! E propaganda a cita e palabranan di e reseñado exactamente, pero el a saca nan for di nan contexto y di e manera ei a duna un impresion completamente robes di su punto di bista.

E ehempel ei ta ilustra con importante e contexto di un declaracion por ta. Palabranan saca for di contexto por troce nan nificacion, mescos cu Satanas a troce nificacion di e Scritura ora el a purba engaña Hesus. (Mateo 4:1-11) Di otro banda, ora nos mira un declaracion den su contexto, esei ta yuda nos haya un comprondemento mas exacto di su nificacion. Pa e motibo aki, ora nos ta studia un texto di Bijbel, semper ta sabi pa wak e contexto y mira e versiculo den su marco di sircunstancia pa por compronde miho kico e escritor tawata papia di dje.

Maneha e Palabra di Dios na un Manera Corecto

Contexto ta nifica e partinan di un declaracion skirbi of papia cu ta bini sea prome of despues di un palabra of pasashi spesifico, y cu por lo general tin un influencia riba su nificacion. Contexto por ta tambe e sircunstancianan of datonan cu tin di aber cu un cierto suseso, situacion, etc. Den e ultimo sentido aki, un sinonimo pa “contexto” ta “background.” Ta masha importante pa considera e contexto di un pasashi biblico en bista di loke apostel Pablo a skirbi Timoteo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti  [“maneha”, NW] e palabra di berdad na un manera corecto.” (2 Timoteo 2:15) Pa por maneha e Palabra di Dios na un manera corecto, nos tin cu comprond’e bon y despues splic’e na un manera franco y exacto. Loke lo motiva nos pa purba haci esei ta respet pa Yehova, e Autor di Bijbel. E contexto tambe ta un yudansa importante.

E Contexto Historico di e di Dos Carta na Timoteo

Laga nos analisa por ehempel e di dos carta den Bijbel dirigi na Timoteo. * Pa cuminsa nos analisis, nos por plantia e siguiente preguntanan relaciona cu e background di e carta. Ken a skirbi e di dos carta na Timoteo? Na ki tempo? Bou di ki sircunstancia? Tambe nos por puntra: Den ki situacion e persona yama “Timoteo”, cu ta aparece den e carta cu ta carga su nomber, tawata? Pakico e tawatin mester di e informacion den e buki? Contesta riba e preguntanan aki lo duna nos hopi mas aprecio pa e carta aki y yuda nos mira con nos awe por beneficia for di dje.

E prome versiculonan di Segundo Timoteo ta indica cu ta apostel Pablo a skirbi Timoteo e carta aki. Otro versiculonan ta mustra cu ora Pablo a skirbie, e tawata encarsela pa causa di e bon nobo y cu hopi hende a bandon’e. Pablo a sinti cu su morto tawata acercando. (2 Timoteo 1:15, 16; 2:8-10; 4:6-8) Pesei lo mester tawata durante su di dos encarselacion na Roma cu el a skirbi e carta, probablemente rond di aña 65 di nos era. Poco despues di esei, aparentemente Nero a sentenci’e na morto.

Esei ta e contexto historico di Segundo Timoteo. Ta bon pa nota cu Pablo no a skirbi Timoteo pa keha di su mes problemanan. Mas bien, Pablo a spierta Timoteo di e temponan dificil cu tawata sper’e y el a anima su amigo pa evita distraicion, pa sigui ‘bira fuerte’, y pa transmiti Pablo su instruccionnan na otro hende. Esakinan, en buelta, lo ta adecuadamente capasita pa yuda mas hende ainda. (2 Timoteo 2:1-7) Ki un ehempel excelente di interes inegoista den prohimo asta den tempo dificil! Y ki un bunita conseho pa nos awe!

Pablo ta yama Timoteo un “yiu stima.” (2 Timoteo 1:2) Hopi bes e Scritura Griego Cristian ta referi na e yoncuman aki como un fiel compañero di Pablo. (Echonan 16:1-5; Romanonan 16:21; 1 Corintionan 4:17) Ora Pablo a skirbie e carta aki, ta parce cu Timoteo tawatin algo mas di 30 aña—p’e tempo ei, un hoben ainda. (1 Timoteo 4:12) Toch, ya caba e tawatin un bunita registro di fieldad, ‘sirbiendo hunto cu Pablo’ pa mas o menos 14 aña. (Filipensenan 2:19-22) Apesar cu Timoteo tawata relativamente hoben, Pablo a dun’e e encargo di conseha otro ancianonan pa “no pleita tocante di palabra” sino pa concentra riba asuntonan importante, manera fe y perseverancia. (2 Timoteo 2:14) Timoteo tawata autorisa tambe pa nombra superintendente di congregacion y sirbido ministerial. (1 Timoteo 5:22) Sinembargo, kisas e tawata falta mas confiansa pa eherce su autoridad.—2 Timoteo 1:6, 7.

E anciano jong aki a haya su mes cu algun problema serio. Por ehempel, tawatin dos persona yama Himeneo y Fileto cu tawata “trastorna fe di algun hende”, siñando cu e “resureccion a tuma luga caba.” (2 Timoteo 2:17, 18) Aparentemente, pa nan e unico resureccion tawata uno spiritual y cu ya a tuma luga caba pa e cristiannan. Kisas nan a saca e declaracion di Pablo cu cristiannan tawata morto den nan picanan pero a wordo haci bibo mediante e spirito di Dios, for di su contexto. (Efesionan 2:1-6) Pablo a spierta cu e influencia apostata ei lo aumenta. El a skirbi: “E tempo lo bin cu nan lo no soporta doctrina sano mas . . . y lo bira nan horea for di e berdad, y lo bolbe na fabula.” (2 Timoteo  4:3, 4) E spiertamento delanta ei a mustra Timoteo cu tawata urgente pa haci caso di e conseho di e apostel.

E Balor di e Carta Awe

For di e splicacion anterior, nos ta mira cu Pablo a skirbi Timoteo pa di dos biaha pa por lo menos e siguiente motibonan: (1) E tawata sa cu su fin tawata serca, y e kier a prepara Timoteo pa e tempo cu Timoteo lo no por a conta cu ne mas. (2) E kier a capasita Timoteo pa e por a proteha e congregacionnan bou di su supervision for di apostasia y otro influencianan perhudicial. (3) E kier a anima Timoteo pa keda ocupa den Yehova su sirbishi y confia den e conocemento exacto di e Scritura inspira den su lucha contra siñansa falso.

Ora nos ta compronde e contexto historico aki, Segundo Timoteo ta haya mas nificacion pa nos. Awe tambe tin apostata manera Himeneo y Fileto cu ta propaga nan ideanan personal y kier corumpi nos fe. Ademas, nos ta biba den e “temponan trabahoso” cu Pablo a profetisa di dje. E siguiente advertencia di Pablo a cumpli den hopi cristian: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:1, 12) Con nos por para firme? Mescos cu Timoteo, nos tin cu obedece e conseho di esnan cu a sirbi Yehova pa hopi aña. Y mediante studio personal, oracion y asociacion cristian, nos por sigui ‘bira fuerte’ mediante e bondad inmereci di Yehova. Ademas, cu confiansa den e poder di conocemento exacto, nos por tuma nota di e spiertamento di Pablo: “Retene e ehempel di palabranan sano.”—2 Timoteo 1:13.

“E Ehempel di Palabranan Sano”

Ta na cua “palabranan sano” Pablo a referi? E ta uza e expresion ei pa referi na e berdadero doctrina cristian. Den su prome carta na Timoteo, Pablo a splica cu “palabranan sano” ta basicamente “esnan di nos Señor Hesucristo.” (1 Timoteo 6:3) Door di imita e ehempel di palabranan sano nos lo haya un mente sano y un caracter amoroso y nos lo tin consideracion cu otro hende. Ya cu e sirbishi y siñansanan di Hesus ta na harmonia cu tur otro siñansa den henter Bijbel, e expresion “palabranan sano” por referi den un sentido mas amplio na tur siñansa di Bijbel.

E ehempel di palabranan sano tawata manera un “tesoro” cu Timoteo y tambe tur anciano cristian mester a warda. (2 Timoteo 1:13, 14) Timoteo mester a “predica e palabra, insisti cu mester proclam’e na momento oportuno y inoportuno, cu tur pasenshi cu instruccion ta exigi, combence, corigi y curasha hende.” (2 Timoteo 4:2, BPK) Ora nos realisa con ideanan apostata tawata plama den tempo di Timoteo, nos ta compronde pakico Pablo a enfatisa e urgencia di siña palabranan sano. Nos por mira tambe pakico tawata necesario pa Timoteo proteha e tou door di “combence, corigi y curasha” cu hopi pasenshi uzando bon tecnica di duna instruccion.

Na ken Timoteo mester a predica e palabra? E contexto ta indica cu como anciano, Timoteo mester a predica e palabra den e congregacion cristian. En bista di presion di parti di opositornan, Timoteo mester a mantene su balansa spiritual y declara cu curashi e palabra di Dios, y no filosofia humano, ideanan personal of speculacion inutil. Claro cu e postura aki lo por a pone esnan cu kisas tawatin  un mal inclinacion cuminsa lanta oposicion. (2 Timoteo 1:6-8; 2:1-3, 23-26; 3:14, 15) Sinembargo, door di tuma e conseho di Pablo na pecho, Timoteo lo por tawata un barera continuo pa apostasia, mescos cu Pablo tambe tawata.—Echonan 20:25-32.

E conseho di Pablo tocante predica e palabra ta conta tambe pa pafo di congregacion? Segun e contexto, si. Pablo ta pasa na bisa: “Ma abo, sea sobrio den tur cos, soporta afliccion, haci e trabou di un evangelista, cumpli cu bo ministerio.” (2 Timoteo 4:5) E trabou di evangelisa—di predica e bon nobo di salbacion na hende cu no ta creyente—ta esencial pa un cristian. (Mateo 24:14; 28:19, 20) Y mescos cu e palabra di Dios ta ser predica den e congregacion asta na “momento inoportuno”, asina tambe nos ta insisti pa predica e palabra na personanan pafo di e congregacion asta ora nos ta den sircunstancianan dificil.—1 Tesalonicensenan 1:6.

E base di henter nos trabou di predica y di siña ta e Palabra inspira di Dios. Nos tin pleno confiansa den Bijbel. Pablo a bisa Timoteo: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Hopi bes e palabranan ei ta wordo cita corectamente pa mustra cu Bijbel ta e Palabra inspira di Dios. Pero cu ki proposito Pablo a skirbi nan?

Pablo a dirigi su mes na un anciano, uno cu tawatin e responsabilidad di ‘reprende, corigi y educa den husticia’ den e congregacion. Pesei e tawata recordando Timoteo pa confia e sabiduria di e Palabra inspira, for di cua Timoteo a ser instrui for di infancia. De bes en cuando ancianonan, manera Timoteo, tin cu reprende un malechor. Ora nan ta haci esei, semper nan tin cu confia den Bijbel. Ademas, ya cu e Scritura ta inspira di Dios, tur coreccion basa riba dje en realidad ta un coreccion for di Dios. Ken cu ta rechasa coreccion basa riba Bijbel ta rechasando, no idea humano, sino conseho inspira cu ta bini for di Yehova mes.

E di dos carta dirigi na Timoteo en berdad ta rico na sabiduria di Dios! Y e ta bira mas importante ainda ora nos considera su conseho den su contexto! Den e articulo aki, nos a djis tira un bista general den e maraviyoso informacion inspira cu e carta aki ta contene, pero e ta suficiente pa demostra cuanto probecho nos por saca ora nos considera e contexto di loke nos ta lesa den Bijbel. Esei lo yuda garantisa cu nos en berdad ta ‘maneha e palabra di e berdad na un manera corecto.’

[Nota]

[Plachi na pagina 27]

Pablo kier a capasita Timoteo pa e por a proteha e congregacionnan

[Plachi na pagina 30]

Pablo a recorda Timoteo pa confia den e sabiduria di e Palabra inspira