Pregunta di Lector

Kico Pablo tawata kiermen ora el a bisa: “Cada bes cu boso come e pan aki y bebe e copa aki”?

Referiendo na e institucion di e Conmemoracion, of Memorial, di e morto di Hesus, Pablo a skirbi: “Cada bes cu boso come e pan aki y bebe e copa aki, boso ta proclama e morto di Señor te ora cu e bin.” (1 Corintionan 11:25, 26) Algun hende ta haya cu aki e palabra “cada bes” ta indica cu mester conmemora e morto di Cristo cu frecuencia, den e sentido di hopi bes. Pesei, nan ta conmemor’e mas cu un bes pa aña. Pero ta esei ta loke Pablo tawata kiermen?

Ya ta casi 2.000 aña cu Hesus a institui e Conmemoracion di su morto. Pesei, asta si ta celebra e Conmemoracion un bes pa aña so, desde aña 33 di nos era te cu awe a yega di celebr’e hopi biaha. Sinembargo, den e contexto di 1 Corintionan 11:25 y 26, Pablo tawata papia no di cuanto bes, sino di e manera cu mester celebra e Conmemoracion. Na Griego original, Pablo no a uza e palabra pol·lá·kis, cu ta nifica “hopi bes” of “frecuentemente.” Mas bien, el a uza e palabra ho·sá·kis, cu ta nifica “cada bes”, un expresion cu ta nifica “ki ora cu”, “cada bes cu.” Di manera cu loke Pablo a bisa ta: ‘Cada bes cu boso haci esaki, boso ta sigui proclama e morto di Señor.’ *

Cu ki frecuencia anto mester conmemora e morto di Hesus? Ta corecto pa hacie solamente un biaha pa aña. Ta trata aki di un berdadero conmemoracion, y por lo general hende sa conmemora fechanan un bes pa aña. Ademas, Hesus a muri riba e dia di Pasco Hudiu cu nan tawata celebra un biaha pa aña. Pa e motibo aki Pablo a referi na Hesus como “Cristo, nos Pasco”, ya cu Hesus su morto como sacrificio a habri e caminda pa Israel spiritual haya bida, mescos cu e prome sacrificio di Pasco den Egipto a conserva e bida di e primogenitonan di Israel natural y a habri caminda pa e nacion wordo libra for di sclabitud. (1 Corintionan 5:7; Galationan 6:16) E conexion aki cu e Pasco Hudiu anual ta otro evidencia cu mester conmemora e morto di Hesus solamente un biaha pa aña.

Ademas, Pablo a relaciona e morto di Hesus cu un otro fiesta Hudiu anual, e Dia di Expiacion. Na Hebreonan 9:25 y 26, nos ta lesa: “Tampoco [Hesus] no tawatin mester di ofrece su mes hopi biaha, manera e sumo sacerdote ta drenta den e luga santo aña aden aña afo [riba Dia di Expiacion] cu sanger cu no ta di su mes. . . . Ma awor un biaha so na cumplimento di e siglonan el a wordo manifesta pa kita pica pa medio di e sacrificio di su mes.” Door cu e sacrificio di Hesus a remplasa e sacrificio di e Dia anual di Expiacion, ta na su luga pa conmemora su morto riba un base anual. Bijbel no ta duna ningun motibo pa celebra e conmemoracion cu mas frecuencia.

Na harmonia cu esaki, historiado John Laurence von Mosheim ta bisa cu e cristiannan di siglo 2 na Asia Menor tawatin e custumber di conmemora e morto di Hesus “riba e di diescuater dia di e prome luna Hudiu [nisan].” Ta te despues di hopi tempo cristiandad a cuminsa cu e custumber di celebr’e mas cu un bes pa aña.

[Nota]