Storia di Bida

Un Nota Cu A Cambia Mi Bida

SEGUN E RELATO DI IRENE HOCHSTENBACH

Ta un cos cu a pasa riba un diamars anochi na 1972. Mi tawatin 16 aña di edad y mi a compaña mi mayornan bai un servicio religioso na Eindhoven, un stad den e provincia di Brabant, Hulanda. Mi tawata sinti mi insigur y mi a desea di por ta un otro caminda. Tawata e ora ei cu dos mucha mohe a pasa mi un nota cu a bisa: “Kerida Irene, nos tin masha gana di yuda bo.” Mi no por a imagina cuanto e nota ei lo a bin cambia mi bida. Pero prome cu mi relata kico a pasa despues, laga mi conta bo algo tocante mi background.

MI A nace riba e isla di Belitung, Indonesia. Mi ta corda algun zonido di e isla tropical ei; por ehempel e zonido suave di palma cu ta waya den biento, di un riu cu tawata core den sercania, di mucha cu na harimento ta hunga rond di nos cas, y tambe e zonido di musica na cas. Na 1960, tempo cu mi tawatin cuater aña, nos famia a muda bai Hulanda. Nos a haci e biahe largo cu barco, y e zonido cu mas mi ta corda ta esun di mi co’i hunga faborito cu mi tawatin hunto cu mi: un payaso chikito cu tawata toca un drumset. Cu shete aña, mi a bin perde mi oido pa motibo di un enfermedad, y for di e tempo ei mi no por tende nada mas. Unico cos cu a keda mi ta recuerdo.

Mi Hubentud Como Mucha Sordo

Gracias na e cuido amoroso di mi mayornan, na principio mi no a realisa completamente kico kiermen ser sordo. Como mucha, mi a pensa cu asta mi aparato di tende cu  tawata hopi grandi tawata algo pret, aunke e no a yuda mi masha si. Pa e muchanan di den bicindario por a comunica cu mi, nan tawata uza krijt pa skirbi combersacionnan largo riba acera, y ami tawata contesta nan cu boca, maske mi no por a tende mi mes stem.

Segun cu mi tawata crece, mi a bira conciente cu mi tawata diferente for di hende rond di mi. Ademas, mi a cuminsa ripara cu algun hende tawata haci cherche di mi pa motibo di mi incapasidad, mientras cu otronan no tawata kier pa mi ta den nan compania. Mi a cuminsa sinti mi isola y solitario. Pocopoco mi a bin realisa kico kiermen ser sordo, y mas mi a crece, mas miedo mi a haya di e mundo di hende cu si ta tende.

Pa mi por a bai un scol special pa hende sordo, mi mayornan a muda cu henter famia bai for di un dorp den e provincia di Limburg pa e stad di Eindhoven. Ei, mi tata a bai busca trabou, y mi ruman homber cu mi ruman mohe a bai un scol nobo pa nan. Mi ta masha gradicido pa tur e cambionan cu nan a haci pa mi causa. Na scol mi a siña adapta e volumen di mi bos y articula cu mas claridad. Y aunke e maestronan di scol no tawata uza idioma di seña, mi a siña esei for di e muchanan di mi klas.

Bibando den Mi Mes Mundo

Segun cu mi tawata crece, mi mayornan a haci hopi esfuerso pa comunica cu mi, pero tawatin hopi cos cu mi no tawata compronde. Por ehempel, mi no a compronde cu mi mayornan tawata studia Bijbel cu Testigonan di Yehova. Sinembargo, mi ta corda cu un dia henter famia a bishita un luga caminda tawatin hopi hende sinta riba stul. Nan tur tawata wak padilanti, bati man algun biaha y lanta para de bes en cuando. Pero mi no tawata sa pakico e hendenan aki tawata haci tur e cosnan aki. Hopi tempo despues, mi a bin compronde cu ta na un congreso di Testigonan di Yehova mi tawata. Tambe mi mayornan tawata hiba mi na un sala chikito den e stad di Eindhoven. Mi tawata sinti mi bon einan pasobra tur hende tawata amabel y mi famia tawata parce contento, pero ami no tawata sa ta pakico nos tawata bai semper ei. Awor mi sa cu e sala chikito ei tawata un Salon di Reino di Testigonan di Yehova.

Lamentablemente no tawatin ningun hende presente na e reunionnan aki pa traduci e programa pa mi den idioma di seña. Awor mi ta realisa cu e hendenan ei tawata kier a yuda mi pero nan no tawata sa con pa trata cu mi problema. Na e reunionnan aki, mi tawata sinti mi solitario y mi tawata pensa: ‘Mara mi tawata na scol en bes di aki.’ Pero net ora e pensamentonan ei tawata pasa door di mi mente, dos mucha mohe a skirbi algo riba pida papel y duna mi. Tawata e nota cu mi a menciona den e introduccion. Mi no por a imagina mi cu e nota aki lo a bira inicio di un amistad precioso cu lo a saca mi for di mi mundo di isolacion.

Mi A Cultiva un Amistad Precioso

Colette y Hermine, kendenan a manda e nota, tawatin algo mas cu 20 aña. Despues mi a haya sa cu nan a bini e congregacion di Testigonan di Yehova cu mi tawata bishita pa sirbi como pionero, predicadonan di tempo completo. Aunke ni Colette ni Hermine no tawata sa e idioma di seña realmente, mi a siña lesa nan lip segun cu nan tawata papia cu mi, y den e manera aki nos tawata comunica basta bon cu otro.

Mi mayornan a keda masha contento ora cu Colette y Hermine a pidi pa studia Bijbel cu  mi, pero e mucha mohenan aki a haci mucho mas cu esei. Nan a haci nan best pa traduci e reunionnan na Salon di Reino pa mi y tambe a inclui mi den nan asociacion cu otro personanan den e congregacion. Nan a practica presentacionnan di Bijbel cu mi pa uza den e trabou di predica, y tambe nan a yuda mi prepara partinan di studiante pa e Scol di Ministerio Teocratico. Djis imagina, awor asta mi tawatin e curashi pa haci un presentacion dilanti un grupo di hende cu ta tende!

Ademas, Colette y Hermine a gana mi confiansa. Nan tawatin pasenshi cu mi y tawata scucha mi. Aunke semper nos tawata hari ora mi haci mi foutnan, nunca nan a haci bofon di mi; tampoco nan no tawatin berguensa di anda hunto cu mi. Nan tawata purba compronde mi sintimentonan y nan tawata trata mi como un igual. E mucha mohenan bondadoso aki a duna mi un bunita regalo: nan amor y amistad.

Mas importante ainda, Colette y Hermine a laga mi mira cu mi tawatin cu siña conoce nos Dios, Yehova, como un amigo cu mi por confia. Nan a splica mi cu Yehova a mira mi sinta den Salon di Reino y cu El a compronde kico ta nifica ser sordo. Mi ta masha gradicido cu nos amor pa Yehova a pone nos tres bira amiga! Yehova su interes den mi a conmove mi, y mi amor p’e a pone cu mi a simbolisa mi dedicacion na dje pa medio di bautismo bou di awa na juli 1975.

Compañando un Amigo Special

Den e añanan cu a sigui, mi a sera mas y mas cu e rumannan cristian. Un ruman homber a bira mi amigo masha special y nos a casa na 1980. Djis despues mi a cuminsa traha pionero, y na 1994, ami cu mi casa Harry a wordo asigna pa sirbi como pionero special den e campo di idioma di seña Hulandes. E siguiente aña, mi a haya mi cu un tarea dificil. Mi mester a compaña mi casa, cu si ta tende, pa bishita varios congregacion como superintendente di sircuito substituto.

Mi ta haci lo siguiente: Ora nos bishita un congregacion pa prome bes, mesora mi ta acerca mas tanto ruman posibel pa introduci mi mes. Mi ta bisa nan cu mi ta sordo y mi ta pidi nan pa wak mi den mi cara y papia slow. Tambe mi ta purba duna un contesta mas pronto posibel na e reunionnan di congregacion. Y mi ta puntra si cualkier ruman ta dispuesto pa sirbi como mi traductor pa e siman durante di reunion y sirbishi di veld.

E metodo aki ta funciona asina bon cu tin biaha e rumannan ta lubida cu mi no ta  tende, anto esei ta hiba na situacionnan comico. Por ehempel, nan ta bisa mi cu ora nan mira mi cana den stad, nan ta pita mi pa cuminda mi, pero claro cu mi no ta reacciona. Tin biaha ami mes ta lubida mi limitacionnan, manera por ehempel ora mi ta purba fluister algo confidencial den horea di mi casa. Ora cu mi mir’e bloos diripiente, mi sa cu mi a “fluister” mucho duro.

Muchanan ta yuda den un forma cu bo no ta verwacht. Den un congregacion cu nos a bishita pa prome biaha, un mucha homber di nuebe aña a ripara cu algun ruman den Salon di Reino tawata manera duda pa bin papia cu mi, y el a dicidi di haci algo. El a cana bin serca mi, cohe mi man y hiba mi meimei di Salon di Reino, y bisa na bos halto: “Laga mi presenta Irene na boso—e ta sordo!” Esnan presente a bini serca mi y introduci nan mes.

Segun cu mi ta compaña mi casa den e trabou di sircuito, mi circulo di amistad ta sigui crece. Ki un contraste mi ta mira awe den mi bida compara cu e añanan cu mi tawata sinti mi exclui y isola! Desde e anochi cu Colette y Hermine a pasa mi e nota cortico aya, mi a sinti kico ta e poder di amistad y a topa personanan cu a bira masha special pa mi. Mas importante cu tur cos, mi a bin conoce Yehova, e Amigo di mas precioso. (Romanonan 8:38, 39) E nota cortico ei si a cambia mi bida!

[Plachi na pagina 24]

Mi ta corda e zonido di mi co’i hunga faborito

[Plachi na pagina 25]

Den sirbishi y hunto cu mi casa, Harry