Abo Realmente Tin Fe den e Evangelio?

“E reino di Dios ta serca. Repenti y kere e evangelio.”—MARCO 1:15.

1, 2. Con lo bo splica Marco 1:14 y 15?

TAWATA aña 30 di nos era. Hesucristo a cuminsa su gran sirbishi den Galilea. E tawata predica “e evangelio di Dios”, y su siguiente declaracion a emociona hopi Galileo: “E tempo ta cumpli, y e reino di Dios ta serca. Repenti y kere e evangelio [“tene fe den e bon nobo”, NW].”—Marco 1:14, 15.

² A yega “e tempo” pa Hesus cuminsa su sirbishi y pa hende tuma un decision cu lo a duna nan e aprobacion di Dios. (Lucas 12:54-56) ‘E reino di Dios a yega serca’ pasobra Hesus tawata presente como e Rei nombra. Su trabou di predica a impulsa hende di curason recto pa repenti. Pero con nan a demostra cu nan a kere e evangelio? Y con nos awe por demostra e mesun fe ei?

3. Mediante ki pasonan hopi persona a mustra cu nan tin fe den e bon nobo?

³ Mescos cu Hesus, apostel Pedro tambe a anima e hendenan pa nan repenti. Dirigiendo su mes na e Hudiunan den Herusalem na Pentecoste di aña 33, Pedro a bisa: “Repenti, y laga cada un di boso wordo batisa den e nomber di Hesucristo pa pordon di boso picanan; y boso lo ricibi e don di spirito santo.” Miles di hende a repenti, nan a batisa y a bira disipel di Hesus. (Echonan 2:38, 41; 4:4) Na aña 36, personanan cu no tawata Hudiu y cu a repenti a dal e mesun pasonan. (Echonan 10:1-48) Den nos tempo, fe den e bon nobo ta motiva miles di hende pa repenti di nan picanan, haci un dedicacion na Dios, y batisa. Nan a acepta e bon noticia di salbacion y ta demostra fe den e sacrificio di rescate di Hesus. Ademas, nan ta practica husticia y ta apoya e Reino di Dios activamente.

4. Kico ta fe?

⁴ Pero kico ta fe? Apostel Pablo a skirbi: “Fe ta e siguransa di cosnan cu hende ta spera, e conviccion di cosnan cu hende no ta mira.” (Hebreonan 11:1) Nos fe ta garantisa nos cu tur loke Dios priminti den su Palabra ta asina sigur cu ta manera nan a cumpli caba. Ta como si fuera nos tin un acta notarial cu ta proba cu nos ta doño di cierto propiedad. Tambe fe ta “e conviccion” [na e idioma original literalmente “evidencia combencente”], of prueba di cosnan cu nos no ta mira. E cuadronan mental cu nos a forma y un curason gradicido ta combence nos cu cosnan asina ta real, aunke nos no a mira nan.—2 Corintionan 5:7; Efesionan 1:18.

Nos Mester Tin Fe!

5. Pakico fe ta asina importante?

⁵ Nos a nace cu un necesidad spiritual, pero fe si nos no a nace cu ne. De echo, “no ta tur [hende] tin fe.” (2 Tesalonicensenan 3:2) Sinembargo, cristiannan si mester tin fe pa nan por hereda e promesanan di Dios. (Hebreonan 6:12) Despues cu Pablo a cita hopi ehempel di fe, el a skirbi: “Como cu nos tin un nubia asina grandi di testigonan ta rondona nos, laga nos  tambe pone un banda tur strobacion, y e pica cu ta mara nos asina facil, y cu perseverancia laga nos core e careda cu ta poni nos dilanti, fihando nos wowo riba Hesus, e autor y cumplido di fe.” (Hebreonan 12:1, 2) Kico ta “e pica cu ta mara nos asina facil”? Esei ta falta di fe. E por nifica asta perde e fe cu un tempo bo tawatin. Pa mantene nos fe fuerte, nos tin cu ‘fiha nos wowo riba Hesus’ y sigui su ehempel. Tambe nos tin cu rechasa inmoralidad, lucha contra e obranan di carni, evita materialismo, filosofia mundano y custumbernan cu Bijbel no ta aproba. (Galationan 5:19-21; Colosensenan 2:8; 1 Timoteo 6:9, 10; Hudas 3, 4) Ademas, nos mester tin fe cu Dios ta cu nos y cu e conseho den su Palabra ta duna bon resultado.

6, 7. Pakico ta na su luga pa nos resa pidi pa nos haya mas fe?

⁶ Fe no ta algo cu nos por produci di nos mes boluntad. Fe ta parti di e fruta di Dios su spirito santo, of forsa activo. (Galationan 5:22, 23) Pues kico nos mester haci si nos ta sinti cu nos tin cu fortalece nos fe? Hesus a bisa: “Si boso . . . sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” (Lucas 11:13) Si, laga nos resa pidi pa e spirito santo, pasobra e por produci den nos e fe necesario pa haci e boluntad di Dios asta ora nos ta bou di e sircunstancianan di mas dificil.—Efesionan 3:20.

⁷ Ta na su luga pa nos resa pidi pa mas fe. Ora Hesus tawata a punto di saca un demoño for di un hobensito, e tata di e mucha homber a roga Hesus: “Mi tin fe! Yuda mi unda mi ta falta fe!” (Marco 9:24, NW) Hesus su disipelnan a bisa: “Aumenta nos fe.” (Lucas 17:5) Pesei, laga nos pidi Dios duna nos fe, cu e siguransa cu lo E contesta e oracionnan ei.—1 Huan 5:14.

Fe den e Palabra di Dios Ta Vital

8. Con fe den e Palabra di Dios por yuda nos?

⁸ Djis prome cu Hesus a entrega su bida como sacrificio, el a bisa su siguidonan: “No laga boso curason bira intrankil; kere den Dios, kere tambe den mi.” (Huan 14:1) Como cristian, nos tin fe den Dios y den su Yiu. Pero kico di fe den e Palabra di Dios? E Palabra di Dios por eherce un influencia poderoso den nos bida cu lo beneficia nos, basta nos studi’e y aplic’e cu e confiansa cu e ta duna e miho conseho y direccion disponibel pa nos.—Hebreonan 4:12.

9, 10. Con lo bo splica loke Santiago 1:5-8 ta bisa tocante fe?

⁹ Nos bida como hende imperfecto ta yen yen di problema. Sinembargo, fe den e Palabra di Dios di berdad por yuda nos. (Job 14:1) Por ehempel, supone cu nos no sa con pa enfrenta un cierto prueba. E Palabra di Dios ta duna nos e conseho aki: “Si cualkier di boso falta sabiduria, lag’e pidi Dios, kende ta duna na tur hende generosamente y sin reproche, y esaki lo wordo duna na dje. Ma lag’e pidi den fe sin ningun duda, pasobra esun cu duda ta manera un ola di lama cu ta wordo lastra y tira door di biento. Pasobra no laga e hende ei spera cu e lo ricibi algo di Señor, siendo un hende di curason dobel, inconstante den tur su camindanan.”—Santiago 1:5-8.

¹⁰ Yehova Dios lo no scual nos pa motibo cu nos ta falta sabiduria y ta pidi esei den oracion. En bes di esei, lo E yuda nos haya un punto di bista corecto di nos pruebanan. Kisas otro rumannan ta hala nos atencion riba cierto textonan biblico probechoso, of nos por topa eseinan ora nos ta studia Bijbel. Of Yehova su spirito santo por guia nos den otro maneranan tambe. Nos Tata celestial lo duna nos e sabiduria pa enfrenta prueba si nos sigui “pidi den fe sin ningun duda.” Si nos ta manera ola di lama cu ta wordo lastra y tira door di biento, nos lo no por spera di ricibi nada for di Dios. Pakico no? Pasobra esaki lo nifica cu nos ta indeciso (curason dobel) y instabil den oracion of den otro cos—si, asta den nos fe den Dios. Pesei nos mester tin un fe firme den e Palabra di Dios y den e guia cu E ta percura. Laga nos considera  algun ehempel cu ta mustra con esaki ta yuda nos y dirigi nos.

Fe y Nos Necesidadnan Basico

11. Ki siguransa fe den e Palabra di Dios ta duna nos relaciona cu nos necesidadnan diario?

¹¹ Kico si nos ta pober of ta sufriendo awor di falta di cuminda y di un dak na drechi? Fe den e Palabra di Dios ta duna nos e siguransa cu Yehova lo percura pa nos necesidadnan diario y cu tempo lo E duna tur esnan cu ta stim’e loke nan mester na abundancia. (Salmo 72:16; Lucas 11:2, 3) Kisas nos lo sinti nos anima ora nos reflexiona riba e manera cu Yehova a percura cuminda pa su profeta Elias tempo cu tawatin un scarsedad di cuminda. Mas despues, Dios a percura milagrosamente pa un suministro di hariña y azeta pa asina un hende mohe cu su yiu y Elias por a keda na bida. (1 Reinan 17:2-16) Mescos tambe Yehova a percura pa profeta Yeremias durante e tempo cu Babilonia a sitia Herusalem. (Yeremias 37:21) Aunke Yeremias y Elias no tawatin masha cos di come, Yehova a percura pa nan. E ta haci mescos pa esnan cu ta eherce fe den dje awe.—Mateo 6:11, 25-34.

12. Con fe por yuda nos gana nos pan di cada dia?

¹² Fe combina cu aplicacion di principio di Bijbel lo no haci nos rico den sentido material, pero si lo e yuda nos gana nos pan di cada dia. Por ehempel, Bijbel ta conseha nos pa ta hende honrado, capas y diligente. (Proverbionan 22:29; Eclesiastes 5:18, 19; Efesionan 4:28) Hamas nos mester balota e bon reputacion cu nos mester tin como trahado. Asta na luganan caminda trabou cu ta paga bon ta scars, trahadonan honrado, habil y diligente ta haya miho oportunidadnan cu otro hende. Aunke kisas e trahadonan ei tin poco den sentido material, por lo general nan tin nan necesidadnan basico y e satisfaccion di come cuminda cu nan mes a traha p’e.—2 Tesalonicensenan 3:11, 12.

Fe Ta Yuda Nos Soporta Tristesa

13, 14. Con fe ta yuda nos soporta tristesa?

¹³ E Palabra di Dios ta mustra na un manera realista cu ta natural pa sinti bo tristo ora un ser keri fayece. E fiel patriarca Abraham a yora e morto di su esposa stima, Sara. (Genesis 23:2) Ora David a tende cu su yiu Absalon a muri, esei a dal e hopi duro. (2 Samuel 18:33) Asta e homber perfecto Hesus a yora e morto di su amigo Lazaro. (Huan 11:35, 36) Ora un ser keri muri, e tristesa por bira casi insoportabel, pero fe den e promesanan cu tin den e Palabra di Dios por yuda nos soporta tal tristesa.

 ¹⁴ Pablo a bisa: ‘Mi tin speransa den Dios cu lo tin un resureccion di tanto e hustonan como e malbadonan.’ (Echonan 24:15) Nos mester tin fe den e areglo di Dios pa trece multitud di hende bek na bida. (Huan 5:28, 29) Entre esakinan lo tin Abraham y Sara, Isaak y Rebeca, Yacob y Lea—tur cu awor ta drumi den morto sperando riba un resureccion den e mundo nobo di Dios. (Genesis 49:29-32) Lo tin hopi alegria ora nos sernan keri ser lanta for di e soño di morto pa biba aki riba tera. (Revelacion 20:11-15) Mientrastanto, fe lo no kita tur tristesa, pero si lo e mantene nos serca di Dios kende ta yuda nos soporta esaki.—Salmo 121:1-3; 2 Corintionan 1:3.

Fe Ta Fortalece Esnan Deprimi

15, 16. (a) Pakico nos por bisa cu depresion no ta algo nobo entre esnan cu tin fe? (b) Kico nos por haci pa combati depresion?

¹⁵ E Palabra di Dios ta mustra tambe cu asta esnan cu tin fe por sufri di depresion. Durante su prueba teribel, Job a kere cu Dios a bandon’e. (Job 29:2-5) E estado desola di Herusalem y su murayanan tawatin Nehemias kibra. (Nehemias 2:1-3) Pedro a sinti su mes asina malo despues di a nenga Hesus cu el a “yora amargamente.” (Lucas 22:62) Y Pablo a anima su compañeronan di creencia den e congregacion na Tesalonica pa “curasha esnan cu ta falta animo.” (1 Tesalonicensenan 5:14) Pesei, no ta algo straño cu hende cu tin fe tambe ta sufri di depresion. Kico nos por haci anto pa combati depresion?

¹⁶ Kisas nos ta sinti nos deprimi pa motibo cu nos ta enfrenta varios problema serio. En bes di mira nan tur hunto como un problema masha grandi, nos lo por trata di resolve nan un pa un door di aplica principionan di Bijbel. Esaki lo por yuda alivia nos depresion. Un programa balansa di actividad y suficiente sosiego tambe lo por ta bon. Un cos ta sigur: Fe den Dios y den su Palabra ta contribui na nos bienestar spiritual pa motibo cu e ta fortalece nos conviccion di cu Dios en berdad ta interesa den nos.

17. Con bini nos sa cu Yehova ta interesa den nos?

¹⁷ Pedro ta duna nos e garantia alentador aki: “Humiya boso mes . . . bou di e man poderoso di Dios, pa E por halsa boso na e tempo apropiado, tirando tur boso precupacion riba dje, pasobra E ta percura pa boso.” (1 Pedro 5:6, 7) E salmista a canta: “SEÑOR ta sostene tur cu cai, y ta lanta tur cu ta abati.” (Salmo 145:14) Nos mester kere den e garantia aki, pasobra nos por haya nan den e Palabra di Dios. Aunke e depresion por persisti, e echo cu nos sa cu nos por tira tur nos ansiedad riba nos amoroso Tata celestial ta fortalece nos fe.

Fe y Otro Prueba

18, 19. Con fe ta yuda nos soporta malesa y consola nos rumannan enfermo?

¹⁸ Kisas nos por haya nos cu un prueba grandi di nos fe ora nos mes of un ser keri ta sufri di malesa serio. Aunke Bijbel no ta bisa  cu cristiannan manera Epafrodito, Timoteo y Trofimo a cura milagrosamente, sin duda Yehova a yuda nan persevera. (Filipensenan 2:25-30; 1 Timoteo 5:23; 2 Timoteo 4:20) Ademas, relaciona cu “esun cu ta corda riba e pobernan”, e salmista a canta: “Yehova mes lo sosten’e riba un cama di enfermedad; sigur lo bo cambia tur su cama durante su enfermedad.” (Salmo 41:1-3, NW) Con e palabranan di e salmista por yuda nos consola nos rumannan cu ta enfermo?

¹⁹ Un manera pa duna yudansa spiritual ta door di haci oracion hunto cu esnan enfermo y tambe pa nan. Aunke nos no ta pidi curacion milagroso awe, si nos por pidi Dios duna nan fortalesa mental pa wanta nan sufrimento y e fortalesa spiritual necesario pa soporta e periodonan di debilidad ei. Yehova lo sostene nan, y nan fe lo bira mas fuerte segun cu nan ta anticipa e tempo ora cu “ningun habitante lo no bisa: ‘Mi ta malo.’” (Isaias 33:24) Ki un consuelo pa sa cu mediante Hesucristo resusita y pa medio di e Reino di Dios, humanidad obediente lo ricibi alivio permanente for di pica, malesa y morto! Pa e grandioso perspectiva aki nos tin cu gradici Yehova, ‘kende lo cura tur nos malesanan.’—Salmo 103:1-3; Revelacion 21:1-5.

20. Pakico nos por bisa cu fe por yuda nos soporta “e dianan malo” cu ta bini cu biehes?

²⁰ Tambe fe por yuda nos soporta “e dianan malo” cu ta bini cu biehes, ora cu e curpa ta cuminsa perde forsa. (Eclesiastes 12:1-7) Pues e rumannan di edad entre nos por haci oracion mescos cu e salmista di edad avansa a canta: “Bo ta mi speransa; o Señor DIOS . . . No benta mi afo den tempo di biehes; no bandona mi ora mi forsa ta faya.” (Salmo 71:5, 9) E salmista a sinti cu e tawatin mester di e sosten di Yehova, mescos cu nos rumannan cristian cu a dedica hopi aña den sirbishi di Dios, pero cu awor a bira bieu, ta sinti. Pa motibo di nan fe, nan por ta sigur cu nan por conta cu e apoyo infalibel di e brasanan eterno di Yehova.—Deuteronomio 33:27.

Mantene Fe den e Palabra di Dios

21, 22. Si nos tin fe, ki influencia esei tin riba nos relacion cu Dios?

²¹ Fe den e bon nobo y den henter e Palabra di Dios ta yuda nos hala mas y mas serca di Yehova. (Santiago 4:8) Ta berdad cu E ta nos Señor Soberano, pero tambe E ta nos Creador y Tata. (Isaias 64:8; Mateo 6:9; Echonan 4:24) “Abo ta mi Tata, mi Dios, y e Baranca di mi salbacion”, e salmista a canta. (Salmo 89:26) Si nos eherce fe den Yehova y den su Palabra inspira, nos tambe por mir’e como ‘e Baranca di nos salbacion.’ Ki un privilegio alentador!

²² Yehova ta e Tata di cristiannan engendra pa spirito y di nan compañeronan cu tin speransa di biba riba tera. (Romanonan 8:15) Y fe den nos Tata celestial nunca ta hiba na desilusion. David a bisa: “Maske mi tata y mi mama bandona mi, SEÑOR lo recohe mi.” (Salmo 27:10) Ademas, nos tin e garantia aki: “SEÑOR lo no bandona su pueblo pa motibo di su gran nomber.”—1 Samuel 12:22.

23. Kico nos mester tin pa nos disfruta di un relacion duradero cu Yehova?

²³ Claro cu pa disfruta di un relacion duradero cu Yehova, nos mester tin fe den e evangelio y acepta e Scritura pa loke berdaderamente e ta, esta, e Palabra di Dios. (1 Tesalonicensenan 2:13) Nos mester tin un fe absoluto den Yehova y laga su Palabra ilumina nos caminda. (Salmo 119:105; Proverbionan 3:5, 6) Nos fe lo  crece segun cu nos ta haci oracion na dje cu confiansa den su compasion, misericordia y apoyo.

24. Ki pensamento alentador Romanonan 14:8 ta presenta?

²⁴ Fe a impulsa nos pa haci un dedicacion na Dios pa tur eternidad. Cu un fe fuerte, asta si nos muri, nos ta keda su sirbidonan dedica cu un speransa di resureccion. Si, “sea cu nos biba of cu nos muri, ta di Señor nos ta.” (Romanonan 14:8) Laga nos mantene e pensamento alentador ei den nos curason segun cu nos ta confia den e Palabra di Dios y sigui tene fe den e evangelio.

Con Lo Bo Contesta?

• Kico ta fe, y pakico nos mester tin e cualidad aki?

• Pakico ta vital pa nos tin fe den e evangelio y den henter e Palabra di Dios?

• Con fe ta yuda nos enfrenta varios prueba?

• Kico lo yuda nos mantene fe?

[Preguntanan di Estudio]

[Plachi na pagina 12]

Yehova a sostene Yeremias y Elias pa motibo di nan fe

[Plachi na pagina 13]

Job, Pedro y Nehemias tawatin un fe fuerte

[Plachi na pagina 15]

Pa disfruta di un relacion duradero cu Yehova, nos mester tin fe den e evangelio