“Hala Serca Dios y e Lo Hala Serca Boso”

Antes y Awor e Palabra di Dios den Accion

SI BO a topa Tony tempo cu e tawata un teenager, lo bo a haya bo cu un mucha homber grosero y agresivo cu sa frecuenta algun di e luganan di mala fama na Sydney, Australia. Entre su amigonan tawatin algun cu ta miembro di gang. Hopi bes nan tawata envolvi den ladronicia, pelea di gang y tiroteo den caya.

Tony a cuminsa huma fo’i tempo e tawatin nuebe aña. Cu 14 aña, e tawata uza marihuana regularmente y tawata hiba un bida inmoral. Cu 16 aña ya e tawata un adicto na heroina, y esaki a pon’e cuminsa uza cocaina, LSD—“de echo, tur loke cu por a manda mi high”, Tony a splica. Despues el a bin den contacto cu dos grupo di criminal notorio. Ambos tawata relaciona cu droga. No a dura mucho cu Tony a bira conoci como un di e bendedonan di droga mas confiabel na costa oost di Australia.

Tony su adiccion na heroina y marihuana tawata cost’e entre 160 pa 320 dollar pa dia. Pero e adiccion tawata costa su famia mucho mas cu esei. Tony a bisa: “Na varios ocasion criminalnan a saca revolver y cuchiu pa ami cu mi casa en busca di e droga y placa cash cu nos tawatin na cas.” Despues cu Tony a bai sera tres bes, el a sinti su mes impulsa pa examina den ki rumbo su bida tawata bai.

Aunke Tony tawata bai misa, e no a sinti su mes atrai na un Dios cu como castigo supuestamente a kima pecadonan den fierno pa semper. Pero ora dos Testigo di Yehova a bishita Tony y splic’e cu Dios no ta haci esei, el a keda sorprendi. Y Tony a keda contento cu en berdad e por a drecha su bida y ricibi bendicion di Dios. E palabranan di Hesucristo di cu “tur cos ta posibel serca Dios”, a conmove Tony. (Marco 10:27) Loke a echt touch su curason tawata e palabranan alentador aki: “Hala serca Dios y E lo hala serca boso.”—Santiago 4:8.

Awor Tony mester a enfrenta e reto di pone su bida na harmonia cu normanan di Bijbel. E ta bisa: “Prome cos cu mi a stop di haci ta huma, algo cu nunca prome mi no a logra, aunke mi a purba hopi biaha. Cu poder di Yehova, mi por a laga heroina y marihuana para despues cu mi tawata den gara di droga pa 15 aña. Nunca mi a pensa cu lo tawata posibel pa kibra cu e bicio aki.”

En bes di teme un Dios cu ta tormenta hende pa eternidad den fierno—un doctrina cu bo no ta haya ningun caminda den Bijbel—Tony y su casa a bin acepta e speransa di biba pa semper den un paradijs riba tera. (Salmo 37:10, 11; Proverbionan 2:21) “A tuma mi basta tempo y hopi esfuerso pa mi por a pone mi bida na harmonia cu e normanan di Dios”, Tony ta admiti, “pero cu e bendicion di Yehova mi a logra.”

 Si, e exdrogadicto aki a bira un cristian. E cu su esposa a dedica miles di ora den e obra di educacion biblico, dunando boluntariamente di nan tempo y recursonan material. Tambe nan ta lantando dos yiu cu tin un respet profundo pa Dios. E cambio radical aki a bira posibel mediante e poder iresistibel di e Palabra di Dios, Bijbel. Si, manera apostel Pablo a bisa, “e palabra di Dios ta bibo y activo.”—Hebreonan 4:12.

Apesar di e ehempelnan positivo aki, algun hende ta lansa e acusacion infunda cu e obra di educacion biblico di Testigonan di Yehova ta destrui famia y caba cu balornan sano di hubentud. E caso di Tony sigur ta refuta e pensamento ei.

Mescos cu Tony, tin hopi hende cu a ripara cu nan por vence adiccionnan mortal. Con? Door di pone fe den Dios y confia den dje y den su Palabra, y tambe mediante e apoyo di compañeronan cristian amoroso. Tony ta conclui felismente: “Mi a mira con e principionan di Bijbel a proteha mi yiunan. Siñansanan di Bijbel a salba mi matrimonio. Ademas, mi biciñanan ta drumi mas trankil pasobra mi no ta un menasa mas pa nan.”

[Comentario na pagina 9]

‘Cu poder di Yehova, mi a logra stop di uza droga despues cu mi tawatin 15 aña den su gara’

[Cuadro na pagina 9]

Principionan di Bijbel den Accion

Varios principio di Bijbel a yuda hopi drogadicto bandona e bicio destructivo aki. At’aki algun di e principionan ei:

“Laga nos purifica nos mes di tur impuresa di carni y spirito, y asina perfecciona nos santidad den e temor di Dios.” (2 Corintionan 7:1) Uzo di droga ta bai contra e lei di Dios.

“E temor di SEÑOR ta e principio di sabiduria, y e conocemento di Esun Santo ta comprondemento.” (Proverbionan 9:10) Un respet profundo pa Yehova, basa riba conocemento exacto di dje y di su camindanan, a yuda hopi hende libra nan mes for di e influencia di droga.

“Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y E lo dirigi bo bereanan.” (Proverbionan 3:5, 6) Hende por kibra cu custumbernan destructivo door di confia cu henter nan curason den Dios y depende completamente riba dje.