Conmemoracion di Testigonan di Yehova Cu A Ser Ehecuta

DIA 7 di maart 2002, nan a desvela un placa conmemorativo den e pueblo Körmend, na e parti west di Hungria. E placa aki ta conmemora e morto di tres Testigo di Yehova cu e Nazinan a mata na aña 1945.

A pega e placa na muraya di loke awe ta sede di departamento di bombero na Hunyadi Road. Ta aki e ehecucionnan publico a tuma luga. E placa a ser dedica na memoria di ‘cristiannan cu na maart 1945 a ser ehecuta pa motibo cu nan a nenga di bai contra nan consenshi. Nan ta e Testigonan di Yehova, Antal Hőnisch (1911-1945), Bertalan Szabó (1921-1945), János Zsondor (1923-1945). Aña 2002.’

E ehecucionnan a tuma luga djis dos luna prome cu Segundo Guera Mundial a termina. Dicon nan a mata e cristiannan aki? E corant Hungaro Vas Népe ta splica: “Despues cu Hitler a haya poder na Alemania, no ta e Hudiunan so tawata victima di persecucion y tortura, campo di consentracion y morto ora nan a nenga di bai contra nan conviccion religioso, sino e fiel Testigonan di Yehova tambe. . . . Na maart 1945, tawata reina un teror completo den e parti west di Hungria. . . . Parcialmente esaki tawata debi na e deportacion y asesinato di Testigonan di Yehova.”

E programa relaciona cu desvelo di e placa a consisti di dos parti. E prome parti a tuma luga den e teatro di Palacio Batthyány, caminda como orado tawatin entre otro, Profesor Szabolcs Szita, hefe di e Centro di Documentacion di Holocausto na Budapest, László Donáth, miembro di e Comite di Parlamento pa Derechonan Humano, Gruponan Minoritario y Asuntonan Religioso, y Kálmán Komjáthy, un testigo cu a presencia e ehecucionnan y cu awor ta historiado di e pueblo. E mas cu 500 personanan cu tawata presente a crusa bai na e otro banda di e stad pa nan presencia e di dos parti di e programa, durante cua e alcalde di Körmend, József Honfi, a desvela e placa.

Den su carta di despedida, Ján Žondor (János Zsondor) a urgi su rumannan cristian pa nan no sinti nan tristo. El a skirbi: “Ainda mi ta corda e palabranan di Huan na Revelacion 2:10, cu ta bisa: ‘Sea fiel te na morto.’ . . . Bisa mi famia, amigo- y rumannan pa nan no sinti nan tristo, pasobra mi ta muri pa e berdad y no como un criminal.”

[Plachi na pagina 32]

Bertalan Szabó

[Plachi na pagina 32]

Antal Hőnisch

[Plachi na pagina 32]

Ján Žondor