Maldad A Triunfa?

E IDEA di un bataya universal entre e forsanan di bon y malo a lanta masha hopi speculacion serca escritornan y filosofonan atrabes di siglonan. Sinembargo, tin un buki cu ta contene e historia exacto di e bataya entre Dios y Diabel. E buki ei ta Bijbel, y e ta tira lus riba e cuestionnan envolvi den e conflicto aki y ta yuda nos saca afo ken realmente a gana.

Djis despues di e creacion di e prome homber y mohe, un criatura spiritual invisibel, Satanas e Diabel, a reta e gobernacion di Dios. Con? Door di insinua na un manera sutil cu Dios a keda sin duna su creacion algo bon y cu hende lo tin un miho bida si nan ta independiente di dje.—Genesis 3:1-5; Revelacion 12:9.

Mas despues, den e dianan di e patriarca Job, Satanas a lanta un otro cuestion. Buscando manera pa kibra Job su integridad, Satanas a bisa: “Cuero pa cuero! Si, tur loke un hende tin e lo duna pa su bida.” (Job 2:4) Aki Satanas a generalisa loke el a pretende. Door di uza e expresion general “hende” en bes di e nomber Job, el a pone e integridad di tur ser humano na duda. Den un sentido, el a bisa: ‘Hende lo haci tur cos pa scapa nan bida. Duna mi un chens, y lo mi pone tur hende hala for di Dios.’

Pa dicidi ken ta sali victorioso den e bataya entre Dios y Diabel, mester contesta dos pregunta: Hende por goberna su mes cu exito? Diabel a logra hala tur hende for di e Dios berdadero?

Hende Por Goberna Su Mes cu Exito?

Pa miles di aña, hende a experimenta cu varios tipo di gobernacion. Den pasado nan a purba cu tur forma di gobierno, manera monarkia, aristocracia, democracia, autocracia, fasismo y comunismo. E solo echo cu tawatin un necesidad constante pa experimenta no ta un prueba cu nan ta inadecua?

“Casi sin sa, e pueblo Romano a haya su mes envolvi den un inmenso experimento riba tereno di gobernacion”, H. G. Wells ta skirbi den A History of the World (Un Historia di Mundo), publica na 1922. E ta continua: “Ta cada bes e tawata cambia; nunca el a yega na un situacion fiho. Den un sentido e experimento a fracasa. Den un otro sentido e experimento no a termina, y awe ainda Europa y America ta purba resolve e problemanan complica di politica mundial, manera e pueblo Romano a haya su mes confronta cu ne pa prome bes.”

Te den siglo 20 ainda hende a sigui experimenta cu tur sorto di gobierno. Den e ultimo añanan di e siglo ei gobernacion democratico a haya mas aceptacion cu nunca prome. Teoreticamente, democracia ta pretende cu e ta inclui tur hende den asuntonan cu ta toca gobernacion. Pero democracia a demostra cu hende por goberna cu exito sin Dios? Jawaharlal Nehru, ex prome minister di India, a bisa cu democracia ta bon, pero el a agrega: “Mi ta bisa asina pasobra otro sistemanan ta piyo.” Expresidente Frances Valéry Giscard d’Estaing a bisa: “Nos ta testigo di un crisis di e sistema democratico den cua pueblo ta scohe su representantenan.”

Mas cu 2.400 aña pasa caba e filosofo Griego Plato a detecta un debilidad den e sistema democratico. Segun e buki A History of Political Theory (Un Historia di Teoria Politico),  Plato a ataca “e ignorancia y incompetencia di politiconan, locual ta e desgracia special di democracia.” Hopi politico djawe ta lamenta cu ta dificil pa haya hende competente pa sirbi den gobernacion. “Loke ta molestia e hendenan ta cu gobernantenan ta parce incapas di resolve e problemanan grandi cu nan ta enfrenta”, segun The Wall Street Journal. E corant a agrega: “Ora nan bai busca guia, nan ta keda tur desgusta pasobra nan ta haya nan cu lidernan indeciso y corupto.”

Pensa awor riba e gobernacion di Rei Salomon di Israel di pasado. Yehova Dios a duna Salomon un sabiduria excepcional. (1 Reinan 4:29-34) Con a bai cu e nacion di Israel durante Salomon su reinado di 40 aña? Bijbel ta bisa cu “Huda y Israel tawata mes numeroso cu e santo cu tin na abundancia canto di lama; nan tawata come, bebe y regociha.” E relato ta sigui: “Huda y Israel tawata biba den siguridad, cada homber bou di su mata di wendruif y bou di su palo di figo, for di Dan te na Beerseba, tur e dianan di Salomon.” (1 Reinan 4:20, 25) Cu un rei sabi gobernando riba nan como e representante visibel di e Gobernante Supremo invisibel, Yehova Dios, e nacion a gosa di un stabilidad, prosperidad y goso sin precedente.

Ki un contraste scerpi entre e gobernacion di hende y esun di Dios! Ken por risca bisa honestamente cu Satanas a triunfa den e cuestion di gobernacion? Ningun hende, pasobra profeta Yeremias a declara corectamente: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

Satanas Por Hala Tur Hende for di Dios?

Satanas a logra hala tur hende for di Dios manera el a pretende cu e por haci? Den Bijbel, na Hebreonan capitulo 11, apostel Pablo ta menciona un cantidad di homber y mohe fiel di e era prome cu Cristo. Despues e ta declara: “Lo mi no tin basta tempo pa mi conta di Gideon, Barak, Samson, Jefta, di David, Samuel y e profetanan.” (Hebreonan 11:32) Pablo ta referi na e sirbidonan leal di Dios aki simplemente como un ‘nubia grandi di testigo.’ (Hebreonan 12:1) E palabra Griego traduci aki como “nubia” no ta nifica un nubia separa, cu un forma y tamaño bon defini, sino un enorme masa di nubia sin forma. Esaki ta un bon descripcion pasobra e fiel sirbidonan di Dios den pasado tawata asina tanto cu nan ta manera un enorme masa di nubia. Si, atrabes di siglonan, masha hopi hende a eherce nan boluntad liber y a scohe pa ta leal na Yehova Dios.—Hosue 24:15.

 Kico nos ta mira den nos tempo? E cantidad di Testigonan di Yehova rond mundo a aumenta na mas cu seis miyon persona apesar di e persecucion y oposicion teribel cu nan a pasa aden durante siglo 20. Mas o menos nuebe miyon persona mas ta asocia cu nan, y hopi di esakinan ta bezig ta dal pasonan decisivo pa drenta den un relacion personal y intimo cu Dios.

E miho contesta riba Satanas su pretencion di cu e por hala hende for di Yehova a bini di e Yiu di Dios mes, Hesucristo. Ni sikiera e dolor agonisante na un staca di tormento a kibra su integridad. Halando su ultimo rosea, Hesus a sclama: “Tata, den bo mannan mi ta entrega mi spirito.”—Lucas 23:46.

Satanas ta uza tur loke ta den su poder—for di tentacion te na oposicion abierto y direct—pa trata di domina hende. Uzando “e deseo di carni y e deseo di wowo y e orguyo di bida” pa tenta hende, e ta busca manera pa sea hala nan—of mantene nan aleha—for di Yehova. (1 Huan 2:16) Tambe Satanas a “ciega mente di esnan cu no ta kere, pa nan no mira e lus di e evangelio di e gloria di Cristo.” (2 Corintionan 4:4) Y Satanas no ta duda pa uza menasa y pa probecha di miedo di hende pa logra su meta.—Echonan 5:40.

Sinembargo, Diabel no por vence esnan cu ta na banda di Dios. Esakinan a yega na conoce Yehova Dios y ‘stim’e cu henter nan curason, cu henter nan alma y cu henter nan mente.’ (Mateo 22:37) Si, e lealtad firme di Hesucristo y di hopi otro persona ta contribui na un derota aplastante pa Satanas e Diabel.

Kico Lo Tin den Futuro?

Experimento humano den asunto di gobernacion lo sigui pa tempo indefini? Profeta Daniel a profetisa: “Den e dianan di e reinan ei e Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.” (Daniel 2:44) E Reino cu e Dios di shelo lo establece ta un gobernacion celestial den man di Hesucristo. Ta e mesun Reino cu Hesus a siña su siguidonan pidi p’e den oracion. (Mateo 6:9, 10) E Reino ei lo destrui tur gobierno humano den “e [benidero] guera di e gran dia di Dios Todopoderoso” y lo afecta mundo completo.—Revelacion 16:14, 16.

Kico ta warda Satanas? Bijbel ta describi e futuro suseso aki: “[Un angel di Yehova] a gara e dragon, e colebra di antiguedad, kende ta Diabel y Satanas, y a mar’e pa mil aña, y a tir’e den e abismo, y a sera y seya esaki over di dje, pa e no gaña e nacionnan mas, te ora cu e mil añanan a keda cumpli.” (Revelacion 20:1-3) Ta te despues cu Satanas ser tira den abismo caminda lo e no ta activo mas, e Reinado di Mil Aña di Hesucristo lo cuminsa.

Ki un luga agradabel e tera aki lo bira e ora ei! Maldad y esnan cu ta caus’e lo disparce. Bijbel ta priminti: “Hacidonan di maldad lo wordo corta kita afo . . . Ma e humildenan lo hereda e tera, y lo deleita nan mes den pas abundante.” (Salmo 37:9-11) Nada—niun ser humano ni animal—lo por stroba nan pas. (Isaias 11:6-9) Asta e miyones di hendenan cu den nan ignorancia, y sin cu nan tawatin oportunidad pa conoce Yehova, a tuma parti pa Diabel den pasado, lo haya un resureccion y chens di ricibi educacion di Dios.—Echonan 24:15.

Na fin di e Reinado di Mil Aña, tera lo a ser comberti den un Paradijs, y e hendenan riba dje lo a alcansa perfeccion humano. E ora ei Satanas lo ser gelos pa “un tempo cortico”, despues di cua lo e ser destrui pa semper hunto cu tur opositor di e gobernacion di Dios.—Revelacion 20:3, 7-10.

 Pa Ken Lo Bo Tuma Parti?

Durante siglo 20 Satanas a causa ruina riba tera. Pero esei no ta nifica cu el a triunfa. Mas bien e condicionnan cu ta reina riba tera ta forma un señal cu nos ta den e ultimo dianan di e mundo malbado aki. (Mateo 24:3-14; Revelacion 6:1-8) No ta e intensidad di maldad riba tera ni e opinion di mayoria ta determina ken ta esun cu a triunfa. E factornan determinante ta, ken su manera di goberna ta miho y si un hende a sirbi Dios pa motibo di amor. Den ambos cuestion, Yehova ta esun victorioso.

Si e tempo cu a pasa ya a proba cu Satanas no tin rason, pakico Dios ta permiti maldad continua? Yehova tin pasenshi pasobra e “no kier pa ningun hende bai perdi, ma pa tur bin na repentimento.” (2 Pedro 3:9) E boluntad di Dios ta “pa tur hende wordo salba y yega na conocemento di e berdad.” (1 Timoteo 2:4) Nos ta anima bo pa bo uza e tempo cu a resta pa studia Bijbel y siña ‘conoce e unico Dios berdadero, y Hesucristo, kende el a manda.’ (Huan 17:3) Gustosamente Testigonan di Yehova lo yuda bo gana e conocemento ei pa asina bo tambe por join e miyones di hendenan cu ta para firme na e banda victorioso.

[Plachi na pagina 5]

Door di warda nan integridad, Testigonan di Yehova a contribui na e derota di Satanas

[Plachi na pagina 7]

Hopi ta esnan cu ta leal na e banda di Yehova