“Proclamadonan Celoso di e Reino” Ta Reuni cu Goso

CRISISNAN moral, economico y politico ta sagudiendo mundo. Sinembargo, meimei di tur e intrankilidad aki, Testigonan di Yehova a reuni pacificamente durante tres dia pa e Congresonan di Districto “Proclamadonan Celoso di e Reino.” Cuminsando na mei 2002, e reunionnan aki a ser teni rond mundo.

E congresonan aki realmente tawata ocasionnan gososo. Laga nos haci un repaso breve di e programa edificante basa riba Bijbel.

E Prome Dia Ta Resalta e Celo di Hesus

E tema di e prome dia di congreso tawata “Imita e Celo di Nos Señor Hesus.” (Huan 2:17) E discurso “Alegra Cu Nos A Bini Hunto Como Proclamado di Reino” a invita esnan presente cordialmente pa nan disfruta di e goso cu semper ta caracterisa e congresonan di e pueblo di Dios. (Deuteronomio 16:15) Despues di e discurso aki a sigui un serie di entrevista cu predicadonan celoso di e bon nobo.

E discurso “Deleita Bo Mes den Yehova” a trata Salmo 37:1-11, versiculo pa versiculo. Nos a haya animacion pa no “cunsumi” pa motibo di e aparente exito di hende malbado. Aunke e malbadonan por ta gaña riba nos, cu tempo Yehova lo saca na cla ken realmente ta su pueblo fiel. E discurso “Sea Gradicido” a mustra con nos por mustra gratitud na Dios. Tur cristian tin cu ofrece “sacrificio di alabansa” na Yehova. (Hebreonan 13:15) Claro cu e cantidad di tempo cu nos ta dedica den sirbishi di Yehova ta depende di nos aprecio p’e y nos sircunstancianan.

E discurso clave tawata titula “Celo Ta Stimula Proclamadonan di Reino.” E discurso a señala Hesucristo como nos miho ehempel di celo. Despues cu e Reino celestial a ser estableci na 1914, cristiannan berdadero mester tawatin celo pa anuncia e bon nobo ei. E orado a referi na e congreso di aña 1922 cu a tuma luga na Cedar Point, Ohio, Merca, y a recorda nos di e yamada historico: “Anuncia e Rei y Su Reino”! Cu tempo e celo di Dios su sirbidonan fiel a motiva nan pa declara e berdadnan maraviyoso di e Reino na tur nacion.

E discurso “No Tene Miedo—Yehova Ta cu Nos”, cu a ser presenta parti atardi riba e prome dia, a mustra cu Satanas ta mik specialmente riba e pueblo di Dios. Sinembargo, maske ki oposicion nos haya nos cu ne, nos ta haya e curashi pa enfrenta tur prueba y tentacion sin miedo door di medita riba e hopi ehempelnan di fe di tempo biblico y di tempo moderno.—Isaias 41:10.

Despues tawatin e simposio di tres parti riba e tema “E Profecia di Mikeas Ta Fortifica Nos pa Cana den e Nomber di Yehova.” E prome orado a compara e decadencia moral, apostasia religioso y materialismo di tempo di Mikeas cu  nos tempo. El a bisa: “Nos speransa pa futuro lo ta garantisa si nos cultiva un curason obediente, anto haci sigur cu nos conducta ta santo y cu nos bida ta yen di acto di debocion na Dios. Ademas, nunca nos no mester lubida cu e dia di Yehova ta bini sigur.”—2 Pedro 3:11, 12.

E di dos orado di e simposio a menciona cu Mikeas a condena e lidernan Hudiu. Nan a abusa di hende pober y indefenso. Pero tambe Mikeas a predeci cu adoracion berdadero lo triunfa. (Mikeas 4:1-5) Cu forsa di e spirito santo di Yehova, nos ta dicidido pa proclama e mensahe di speransa aki cu ta refresca hende. Pero kico si nos ta sinti cu malesa of otro obstaculonan ta stroba nos? E di tres orado a bisa: “Loke Yehova ta spera di nos ta rasonabel y na nos alcanse.” Despues el a analisa varios aspecto di Mikeas 6:8, cu ta bisa: “Kico SEÑOR ta exigi di bo, si no ta pa haci husticia, pa stima misericordia, y pa cana humildemente cu bo Dios?”

Door cu e decadencia moral di mundo por afecta cristiannan tambe, nos tur a beneficia di e discurso titula “Keda Moralmente Puro Door di Proteha Bo Curason.” Por ehempel, nos por tin un matrimonio felis si nos keda puro moralmente. Como cristiannan, nunca nos no mester ni pensa di comete inmoralidad sexual.—1 Corintionan 6:18.

E discurso “Warda Bo di Engaño” a mustra cu ta sabi di nos parti pa trata informacionnan incorecto, mita berdad y mentiranan flagrante cu apostatanan ta plama, como si fuera nan ta veneno. (Colosensenan 2:8) Asina tambe, nos no tin cu gaña nos mes door di pensa cu nos lo por satisface nos deseonan pecaminoso sin sufri consecuencianan amargo.

E ultimo discurso di e prome dia tawata titula “Adora e Unico Dios Berdadero.” Segun cu e mundo ta birando mas trabahoso cu nunca, ta ki un gran animacion pa sa cu pronto Yehova lo trece su hustu mundo nobo! Ken lo biba den dje? Solamente e hendenan cu ta adora Yehova. Pa yuda nos mes,  nos yiunan y nos studiantenan di Bijbel alcansa e meta aki, e orado a presenta e buki nobo pa studia Bijbel: Adora e Unico Dios Berdadero. Nos a keda masha encanta cu ne!

E di Dos Dia A Enfatisa Celo pa Loke Ta Bon

E di dos dia di congreso tawatin como tema “Sea Celoso pa Loke Ta Bon.” (1 Pedro 3:13) E prome orado a considera e texto di Bijbel pa e dia ei. El a enfatisa e echo cu un consideracion serio y regular di e texto di dia ta aumenta nos celo.

Despues a sigui e simposio “Proclamadonan di Reino Cu Ta Glorifica Nan Ministerio.” E prome parti a enfatisa e necesidad pa maneha e Palabra di Dios na e manera corecto. (2 Timoteo 2:15) Nos uzo eficas di Bijbel ta habri caminda pa e “eherce poder” den bida di hende. (Hebreonan 4:12, NW) Nos mester dirigi nan atencion na Bijbel y rasona riba dje na un manera combencente. E segundo parti di e simposio a urgi nos pa rebishita hende interesa bes tras bes. (1 Corintionan 3:6) Preparacion y curashi ta necesario pa nos no tarda pa rebishita tur persona cu a mustra interes. E di tres parti a recomenda pa nos mira tur persona cu nos topa como un posibel disipel. Tambe e parti a mustra cu ofrece studio di Bijbel na e prome bishita por hiba na e goso di yuda hende bira disipel.

E siguiente discurso tawatin e tema “Pakico ‘Haci Oracion sin Stop.’” Bijbel ta anima cristiannan pa busca e guia di Dios den tur aspecto di bida. Nos tin cu programa  tempo pa haci oracion personal. Ademas, nos tin cu persevera den oracion pasobra podise Yehova ta laga nos sigui haci oracion pa un tempo prome cu su contesta bira bisto.—Santiago 4:8.

E discurso “Combersacion Spiritual Ta Edifica” a urgi nos pa uza nos don di papia pa e beneficia nos mes y otro hende. (Filipensenan 4:8) Parehanan casa y nan yiunan mester papia tur dia riba cosnan spiritual. Pa logra esei, famianan mester haci esfuerso pa come maske ta un cuminda hunto tur dia, ya cu esaki lo duna nan e oportunidad pa combersa riba cosnan edificante.

E ultimo parti riba e programa di mainta tawata e discurso conmovedor “Con Dedicacion y Bautismo Ta Hiba na Salbacion.” E candidatonan pa bautismo a gana conocemento, eherce fe, repenti, stop di haci loke ta malo y a dedica nan mes na Dios. E orado a menciona cu despues cu nan batisa, e candidatonan tin cu sigui crece spiritualmente y mantene nan celo y bon conducta.—Filipensenan 2:15, 16.

E atardi ei e discurso “Sea Modesto, Mantene Bo Wowo Simpel”, a enfatisa dos punto principal. Ser modesto ta nifica mantene un punto di bista realistico di nos limitacionnan y di nos posicion dilanti Dios. Modestia ta yuda nos mantene nos wowo “simpel”, es decir, enfoca riba e Reino di Dios y no riba cosnan material. Si nos haci esei nos no tin nodi ansha, pasobra Yehova lo percura pa nos necesidadnan.—Mateo 6:22-24, 33, 34; NW.

E siguiente orado a mustra cu nos mester “Confia Yehova Completamente den Tempo di Angustia.” Con nos por enfrenta cosnan manera debilidad personal y problemanan financiero of cu salu, cu exito? Laga nos pidi Yehova sabiduria practico, y tambe pidi yudansa di otro hende. En bes cai den panico of desesperacion, nos mester fortifica nos confiansa den Dios door di lesa su Palabra.—Romanonan 8:35-39.

E ultimo simposio di e congreso tawatin e tema “Varios Prueba Ta Test e Calidad di Nos Fe.” E prome parti a recorda nos cu tur cristian berdadero ta haya nan cu persecucion. E persecucion ta sirbi como testimonio, e ta fortalece nos fe y ta duna nos un oportunidad pa demostra nos lealtad na Dios. Aunke nos no ta pone nos bida innecesariamente na peliger, nunca nos lo no purba evita persecucion na un manera cu no ta cuadra cu Bijbel.—1 Pedro 3:16.

E di dos orado di e simposio aki a trata preguntanan relaciona cu neutralidad. Aunke  cristiannan di prome no tawata pasifista, nan a reconoce cu na prome luga nan mester ta leal na Dios. Di igual manera, awe Testigonan di Yehova ta tene firmemente na e principio: “Boso no ta [parti] di mundo.” (Huan 15:19) Door cu nos por haya nos un ora pa otro cu prueba cu ta test nos neutralidad, famianan mester programa tempo pa repasa e guia cu Bijbel ta duna riba e topico aki. Manera e di tres discurso den e simposio aki a indica, Satanas su meta no ta necesariamente pa mata nos, sino pa pone presion riba nos pa bira infiel. Door di wanta fielmente ora nos haya nos cu mofa, presion pa comete inmoralidad, dolor emocional y malesa, nos ta trece alabansa na Yehova.

E invitacion cariñoso “Hala Serca Yehova” tawata e titulo di e ultimo discurso pa e dia ei. Un comprondemento di Yehova su atributonan cardinal ta atrae nos na dje. E ta uza su poder sin limite pa proteha su pueblo, specialmente den sentido spiritual. Su husticia no ta cruel, sino mas bien ta motiv’e pa haci bida eterno disponibel pa tur hende husto. Dios su sabiduria ta bisto den e manera cu El a uza hende imperfecto pa skirbi Bijbel. Loke mas ta atrae hende ta su amor cu a motiv’e pa haci areglo pa humanidad por haya salbacion mediante Hesucristo. (Huan 3:16) Na final e orado a presenta e buki nobo y conmovedor Hala Serca Yehova.

E di Tres Dia Ta Enfoca Riba Celo pa Bon Obra

E tema di e di tres dia di congreso tawata “Un Pueblo cu Celo den Hacimento di Bon Obra.” (Tito 2:14) E programa di mainta a cuminsa cu un consideracion di e texto di dia den seno di famia. Despues a bini e discurso  “Bo Confiansa Ta den Yehova?” E confiansa di e nacionnan ta mal dirigi pasobra nan ta depende riba nan propio sabiduria y forsa. Sinembargo na contraste cu nan, Yehova su sirbidonan si—apesar di calamidad—ta depende riba Yehova yen di goso y curashi.—Salmo 46:1-3, 7-11.

E parti titula “Hobennan—Traha pa Futuro Hunto cu Yehova Su Organisacion”, a trata e pregunta: Con un hoben realmente por saca lo miho for di bida? Nan no por logra esaki door di core tras di placa, posicion y prestigio. Nos Creador ta urgi hobennan amorosamente pa corda riba dje mientras nan ta jong ainda. E orado a entrevista algun ruman cu durante nan hubentud a haci esfuerso pa alcansa metanan den e sirbishi cristian, y nos por a sinti nan goso. E tratado nobo cu nos a ricibi, Hoben—Kico Lo Bo Haci cu Bo Bida?, ta masha util! El a ser prepara pa yuda hobennan Testigo pone e fundeshi pa un futuro eterno den Yehova su organisacion.

Despues a sigui e drama biblico cu a capta atencion, “Para Firme den Tempo Trabahoso.” El a duna un relato breve di Yeremias su carera for di su hubentud te na e destruccion di Herusalem, algo cu el a profetisa di dje celosamente. Yeremias a pensa cu e no tawata cualifica pa e asignacion aki, pero el a cumpli cu ne apesar di oposicion, y Yehova a scap’e.—Yeremias 1:8, 18, 19.

Despues di e drama a sigui e discurso “Sea Manera Yeremias: Proclama e Palabra di Dios sin Miedo.” Awendia, hopi bes proclamadonan di e Reino ta e blanco di mentira y propaganda malicioso. (Salmo 109:1-3) Sinembargo, mescos cu Yeremias, nos por trata cu desanimacion door di haya goso den e Palabra di Dios. Y nos tin confiansa cu esnan cu ta lucha contra nos lo no vence.

E discurso publico titula “E Esena di e Mundo Aki Ta Cambiando”, sigur tawata oportuno. Nos era ta un era marca pa cambionan drastico. Bijbel a predeci cu e condicionnan ei, y tambe e grito pa “pas y siguridad”, lo hiba na Dios su dia di huicio inspirador di temor. (1 Tesalonicensenan 5:3) E dia ei lo trece cambionan maraviyoso: fin di tur guera, crimen, violencia y asta malesa. Pues, en bes di confia den e sistema di cosnan aki, esaki ta e tempo pa sigui hiba un bida deboto na Dios y mantene un conducta puro.

Despues di un resumen di e les di Toren di Vigilancia di e siman ei, a sigui e ultimo discurso di e congreso, titula “Abunda den Bon Obra Como Proclamadonan Celoso di e Reino.” E orado a trece dilanti con e programa a stimula nos spiritualmente y anima nos pa depende riba Yehova. Na conclusion el a urgi nos pa nos ser proclamadonan puro, amoroso y celoso di e Reino di Dios.—1 Pedro 2:12.

Cu un animo manera di e sirbidonan di Yehova den e tempo di Nehemias, nos siguramente a regresa cas gosando di e bendicionnan spiritual cu nos a ricibi na e Congreso di Districto “Proclamadonan Celoso di e Reino.” (Nehemias 8:12) E congreso stimulante aki no a yena bo cu goso y determinacion pa sigui padilanti como un proclamado celoso di e Reino?

[Cuadro/Plachi na pagina 23]

Un Yudansa Nobo pa Studia!

Na final di e prome dia di congreso, esnan presente a keda encanta cu presentacion di e buki nobo Adora e Unico Dios Berdadero. E buki aki a ser prepara pa studia cu esnan cu a caba e buki Conocimentu cu Ta Hiba na Bida Eterno, y sin duda lo e fortalece fe di personanan cu ta “corectamente dispuesto pa bida eterno.”—Echonan 13:48, NW.

[Reconocemento]

Potret riba kaft di e buki: U.S. Navy photo

[Cuadro/Plachi na pagina 24]

Yudansa pa Hala Mas Serca Dios

E ultimo orado riba e di dos dia di congreso a anuncia publicacion di e buki nobo Hala Serca Yehova. E tin cuater seccion principal, un pa cada atributo cardinal di Yehova: poder, husticia, sabiduria y amor. Cada seccion di e buki tin un capitulo cu ta mustra con Hesucristo a demostra Dios su cualidadnan den un manera bibo y practico, como un ehempel pa nos. E proposito principal di e buki nobo aki ta pa yuda nos y nos studiantenan di Bijbel cultiva un relacion mas intimo y fuerte cu Yehova Dios.

[Cuadro/Plachi na pagina 26]

Guia Spiritual pa Hobennan

Loke a sobresali riba e di tres dia di congreso tawata presentacion di un tratado special titula Hoben—Kico Lo Bo Haci cu Bo Bida? A prepara e tratado aki specialmente pa yuda hobennan Testigo tuma decisionnan corecto relaciona cu nan futuro. E tratado ta duna conseho biblico riba con pa edifica un carera eterno den e sirbishi di Yehova.