‘Un Bon Hende Ta Haya Dios Su Aprobacion’

YEHOVA DIOS ta e fuente di tur bida. (Salmo 36:9) Si, pa medio di “dje nos ta biba y ta move y ta existi.” (Echonan 17:28) Y nos curason no ta yena di gratitud ora nos pensa riba e manera cu E ta recompensa esnan cu tin un relacion intimo cu ne? Figura bo, “e don di gracia di Dios ta bida eterno.” (Romanonan 6:23) Ta masha vital anto pa nos busca Yehova su aprobacion!

E salmista ta sigura nos cu ‘Dios ta duna fabor [of, aprobacion].’ (Salmo 84:11, Beibel na papiamentu koriente) Pero na ken E ta dun’e? Awendia hopi bes hende ta faborece otro persona pa motibo di nan educacion, rikesa, colo di cuero, antecedente etnico y otro cosnan por estilo. Ken Dios ta faborece of duna su aprobacion? Rei Salomon di Israel di antiguedad ta contesta: “Un bon hende lo ricibi gracia serca SEÑOR, ma un hende cu plania maldad E lo condena.”—Proverbionan 12:2.

Ta obvio cu Yehova ta gusta bon hende, uno cu tin birtud. E birtudnan di un bon hende ta entre otro, disiplina, imparcialidad, humildad, compasion y prudencia. Su pensamentonan ta husto, su palabranan ta anima otronan y su obranan ta husto y beneficioso. E prome parti di capitulo 12 di e buki biblico di Proverbionan ta mustra nos ki influencia bondad mester tin den nos bida di tur dia y tambe e ta resalta e beneficionan cu nos por logra door di manifesta e cualidad aki. Un consideracion di e versiculonan ei lo yuda nos pa ‘ta sabi y haci bon.’ (Salmo 36:3) Si nos aplica e conseho sabi di Proverbionan, esaki lo yuda nos gana Dios su aprobacion.

Disiplina Ta Vital

Salomon ta declara: “Esun cu ta stima disiplina ta stima conocemento, ma esun cu ta odia reprendemento ta bobo [“no por rasona”, NW].” (Proverbionan 12:1) Door cu un bon hende ta ansioso pa mehora, e ta ansioso pa haya disiplina. E ta cla pa aplica conseho cu e ta ricibi na reunionnan cristian of den combersacion personal. E palabranan di Bijbel y e publicacionnan basa riba Bijbel ta manera punta di hero cu ta pui e y push’e den e caminda corecto. E ta busca conocemento y ta uz’e pa corigi su pasonan. Si, un persona cu ta stima disiplina ta stima conocemento tambe.

Disiplina, specialmente disiplina propio, ta un cualidad masha esencial pa berdadero adoradonan. Podise nos ta desea di tin un conocemento mas profundo di e Palabra di Dios. Nos por desea di ta mas eficas den e sirbishi cristian y di ser miho maestronan di e Palabra di Dios. (Mateo 24:14; 28:19, 20) Sinembargo, pa nos por cumpli cu e deseonan ei, nos mester disiplina nos mes. Den otro areanan di bida tambe nos mester tin disiplina. Por ehempel, awendia tin masha hopi material cu ta diseña pa stimula mal deseo. Acaso nos no tin mester di dominio propio pa nos por controla nos bista pa e no concentra riba cosnan incorecto? Fuera di esei, debi cu “e intencion di curason di hende ta malo for di su hubentud”, por sosode cu un pensamento inmoral ta bini for di e  parti mas scondi di e mente. (Genesis 8:21) Nos mester disiplina nos mes pa no keda pensa riba e idea ei.

Di otro banda, e persona cu ta odia reprendemento no ta stima disiplina ni conocemento. E ta sigui e tendencia humano y pecaminoso di resisti reprendemento, y ta degrada su mes na nivel di un bestia cu no por rasona y cu no tin normanan moral. Nos tin cu resisti e inclinacion ei firmemente.

‘Raiz Cu Nunca Lo No Wordo Movi’

Claro cu un bon hende no por ta inhusto. Pues, pa gana Dios su aprobacion nos mester ta hende husto tambe. Rei David a canta: “Abo, o SEÑOR, ta bendiciona e hende husto; manera cu un escudo bo ta rondon’e cu fabor.” (Salmo 5:12) Mustrando e contraste entre e persona husto y esun malbado, Salomon a bisa: “Un hende lo no wordo estableci pa medio di maldad, ma raiz di e husto nunca lo no wordo movi.”—Proverbionan 12:3.

Por parce cu e malbado ta prospera. Wak kico a pasa cu e salmista Asaf. El a bisa: “Pa loke t’ami, mi pia a hera di trompica; parumpinga mi pasonan a slip.” Dicon? Asaf a contesta: “Pasobra mi tawata envidioso di e arogantenan, ora mi a mira e prosperidad di e malbadonan.” (Salmo 73:2, 3) Pero ora el a drenta e santuario di e tempel di Dios, el a realisa cu Yehova a pone nan den luganan cu ta slip. (Salmo 73:17, 18) Cualkier aparente exito cu e malbadonan ta logra ta pa un rato. Pues, pakico envidia nan?

Na contraste cu e malbado, e persona cu tin Yehova su aprobacion ta stabil. Comparando nan cu e raiznan fuerte di un palo, Salomon a bisa: “Raiz di e husto nunca lo no wordo movi.” (Proverbionan 12:3) Tin palonan grandi, manera e palo di secoya di California, di cua bo no ta mira nan raiz. E raiznan aki por cubri un area masha grandi mes y nan ta hancra e palo di un manera asina solido cu asta ora tin un inundacion of biento fuerte e ta keda stabil. Un palo grandi asina por resisti asta un temblor fuerte.

Mescos cu e raiznan di palonan asina ta plama extensamente den e suela nutritivo di e tera, asina nos mente y curason tambe mester coba extensamente den e Palabra di Dios y saca su awa cu ta duna bida. Di e manera ei nos fe ta bira fuertemente hancra y nos speransa ta bira sigur y firme. (Hebreonan 6:19) Nos lo no ser “hiba door di tur biento di doctrina [falso].” (Efesionan 4:14) Claro cu nos lo sinti e efecto di pruebanan cu ta manera tormenta y kisas asta nos por tembla ora nos haya nos cu contratiempo. Pero nos ‘raiz bon hancra nunca lo no wordo movi.’

“Un Mohe Birtuoso Ta e Corona di Su Esposo”

Hopi hende conoce e dicho cu ta bisa: “Tras di tur homber exitoso tin un bon mohe.” Mustrando e importancia di un esposa cu ta apoya su casa, Salomon ta bisa: “Un mohe birtuoso ta e corona di su esposo, ma e mohe cu ta causa berguensa ta manera putrimento den su wesonan.” (Proverbionan 12:4) E palabra traduci como “birtuoso” ta encera hopi rasgo di bondad. E birtudnan di un bon esposa, describi ampliamente den Proverbionan capitulo 31, ta entre otro, diligencia, fieldad y sabiduria. Un esposa cu tin e birtudnan aki ta un corona pa su esposo pasobra su bon conducta ta trece honor pa su esposo y ta pone cu otronan ta haya mas aprecio pa su esposo. Nunca e esposa no tin e ambicion pa hiba delantera ni pa competi cu su casa pa e haya reconocemento. Mas bien e ta un ayudante cu ta complementa su esposo.

Con un esposa lo por causa berguensa, y cu ki resultado? Un conducta bergonsoso por varia di pleito te adulterio. (Proverbionan 7:10-23; 19:13) Si un esposa comete e actonan ei, e unico cos cu e ta logra ta ruina su esposo. Segun un buki di referencia, e mohe ta manera “putrimento den su wesonan” den e sentido cu “e mohe ta ruina e esposo, manera un malesa cu ta debilita hende su wesonan.” Un otro obra di referencia ta declara: “Un expresion moderno pa esei lo ta ‘cancer’—un malesa traicionero  cu tiki tiki ta caba cu un persona su vitalidad.” Ta bon pa esposanan cristian haci esfuerso pa gana Dios su aprobacion door di medita riba e bon cualidadnan di un esposa birtuoso.

Pensamento, Accion y Consecuencia

Pensamento ta hiba na accion y accion ta hiba na consecuencia. A continuacion Salomon ta mustra con pensamento ta hiba na accion, y den esaki el a compara hende husto cu hende malbado. E ta declara: “E pensamentonan di e hustonan ta corecto, ma e consehonan di e malbadonan ta engañoso. E palabranan di e malbadonan ta sconde warda pa drama sanger, ma boca di e hustonan lo libra nan.” —Proverbionan 12:5, 6.

Den caso di bon hende asta nan pensamentonan ta moralmente sano y dirigi riba loke ta imparcial y husto. Hende husto tin bon intencion pasobra ta amor pa Dios y pa nan prohimo ta motiva nan. Di otro banda, egoismo ta e motivacion di hende malbado. Consecuentemente, nan plannan—nan metodo pa alcansa nan metanan—ta engañoso. Nan accionnan ta traicionero. Nan no ta duda pa pone un trampa pa un persona inocente, kisas den corte cu acusacionnan falso. Nan palabranan ta “sconde warda pa drama sanger” pasobra nan kier haci daño na nan victimanan inocente. Door cu hende recto sa di e plannan malbado y tin tambe e sabiduria necesario pa ta cauteloso, nan por evita e peliger aki. Nan por asta spierta hende cu no ta conciente di esaki y libra nan for di e plannan fraudulento di hende malbado.

Kico lo pasa cu e husto y cu e malbado? Salomon ta contesta: “E malbadonan ta wordo trastorna y no t’ei mas, ma cas di e hustonan lo permanece.” (Proverbionan 12:7) Segun un obra di referencia, “cas ta referi na e famia y tur cos cu ta di gran balor pa e persona y cu ta pone cu e persona aki por biba bon.” E por asta referi na desendientenan di e persona husto. En todo caso, loke e proverbio ta trece padilanti ta cla: Hende husto lo para firme apesar di contratiempo.

Cos Lo Ta Miho pa Hende Humilde

Poniendo enfasis riba e balor di bon huicio, e rei di Israel ta declara: “Un hende lo wordo elogia segun su sabiduria [literalmente na Hebreo, “pa su boca discreto”] ma un hende di curason perverso lo wordo desprecia.” (Proverbionan 12:8) Un persona cu bon huicio no ta papia pa loco. E ta pensa prome cu e papia y e tin un bon relacion cu otro hende pasobra su “boca discreto” ta pone cu e ta scohe su palabranan cuidadosamente. Ora un persona cu bon huicio hay’e confronta cu preguntanan bobo of speculativo, e por “midi su palabranan.” (Proverbionan 17:27) Hende ta elogia un persona asina y e ta agradabel den Yehova su bista. Tin un gran diferencia entre e y un persona cu tin ideanan perverso cu ta origina di un “curason perverso”!

Si, un homber discreto ta ser elogia, pero e siguiente proverbio ta siña nos e balor di humildad. E ta bisa: “Miho ta esun cu ta wordo menosprecia, y toch tin un sirbido, cu esun cu ta haci su mes grandi, y tin falta di pan.” (Proverbionan 12:9) Ta parce cu Salomon kier mustra cu ta miho pa bo ta un persona humilde cu poco rikesa y cu kisas tin solamente un sirbiente, cu gasta e loke bo mester pa bo necesidadnan di bida den un esfuerso pa mantene un posicion halto den sosiedad. Esaki ta realmente un bon conseho pa nos: Biba segun bo forsa!

Bida di Agricultura Ta Duna Les di Bondad

Uzando e bida di agricultura como un ilustracion, Salomon ta siña nos dos les di bondad. “Un hende husto ta cuida bida di su bestia, ma compasion di e malbadonan ta cruel.” (Proverbionan 12:10) Un persona husto ta trata su bestianan di crio cu bondad. E sa kico nan tin mester y ta interesa den nan bienestar. Podise un persona malbado ta bisa cu e ta interesa den bestia, pero e no ta precupa su cabes cu nan necesidadnan. Su motivacionnan ta egoista y e manera cu e ta trata su bestianan ta  basa riba e ganashi cu e por saca for di nan. Loke e persona ei lo por ta considera un cuido adecua pa bestia, en realidad, kisas ta un trato cruel.

E principio di trato bondadoso pa bestia ta conta pa bestia di cas tambe. Ta masha cruel di nos parti si nos ta busca bestia di cas, y despues ta laga nan sufri sin ta na nodi door di neglisha nan of maltrata nan! Den caso cu un animal ta sufri hopi debi na un malesa of lesion serio, lo ta bondadoso di nos parti pa pone un fin na su bida.

Referiendo na un otro aspecto di agricultura, esta, ploegmento di e tera, Salomon ta bisa: “Esun cu cultiva su tera lo tin pan na cantidad.” Si, trabou diligente y cu tin un proposito ta duna beneficio. “Ma esun cu core tras di banidad tin falta di comprondemento.” (Proverbionan 12:11) Door di falta di sano huicio un persona cu falta comprondemento ta sigui tras di negoshinan inutil, riscante y sin balor. E lesnan den e dos versiculonan aki ta cla: Sea misericordioso y diligente.

E Persona Husto Ta Prospera

“E malbado ta desea e botin di hende malbado”, segun e rei sabi. (Proverbionan 12:12a) Den ki manera e malbado ta haci esei? Aparentemente door di desea e botin cu nan a gana via medionan malicioso.

Kico nos por bisa di e bon hende? E persona ei stima disiplina y ta firmemente hancra den e fe. E ta un persona recto y husto, discreto, humilde, diligente y cu compasion. Y Salomon ta declara: “Ma raiz di e hustonan ta duna fruta”, of “ta prospera.” (Proverbionan 12:12b; New International Version) Segun An American Translation: “E raiz di e persona husto lo permanece pa semper.” Un persona asina ta bon hancra y safe. Si, ‘un bon hende ta haya Dios su aprobacion.’ Pesei, laga nos ‘confia den Yehova y haci loke ta bon.’—Salmo 37:3.

[Plachi na pagina 31]

Mescos cu un palo salu, e fe di un persona husto ta firmemente hancra