Un Siglo Domina pa Satanas?

“TENIENDO cuenta cu e aspectonan di mas piyo, esaki tawata e siglo di Satanas. Den ningun otro era hende a yega di demostra un tendencia y apetit asina fuerte pa mata miyones di otro hende pa motibo di rasa, religion of clase social.”

E di 50 aniversario di e liberacion di victimanan inocente sera den e camponan di exterminacion Nazi a proboca e comentario anterior den un editorial den e corant The New York Times di 26 di januari 1995. E Holocausto—un di e genocidionan mas conoci den historia—a caba cu rond di seis miyon Hudiu. Casi tres miyon ciudadano Polaco cu no tawata Hudiu a muri den loke a ser yama e “Holocausto Lubida.”

“Segun calculo, durante e periodo di 1900 pa 1989, guera a mata 86 miyon hende”, Jonathan Glover ta informa den su buki Humanity—A Moral History of the Twentieth Century (Humanidad—Un Historia Moral di Siglo Binti). E ta agrega: “E escala riba cua mortonan a cai den siglo binti ta increibel, dificil pa imagina. Siendo cu rond di dos tercera parti (58 miyon) a ser mata den dos guera mundial, no tin mucho sentido pa saca un promedio di e cantidad di mortonan cu a cai. Pero si a reparti e mortonan aki na un manera uniforme over di e periodo ei, guera lo a mata rond di 2.500 hende pa dia. Esei ta mas cu 100 pa ora, nonstop, pa nobenta aña largo.”

Consecuentemente, siglo 20 a ser yama un di e siglonan mas sangriento cu humanidad a yega di conoce. Den su buki Hope Against Hope (Speransa Contra Speransa), Nadezhda Mandelstam ta skirbi: “Nos a mira e triunfo di maldad despues cu e balornan di humanismo a ser rebaha te na suela y trapa.” Acaso maldad a vence den e lucha di bon contra malo?

[Reconocemento di plachi na pagina 3]

U.S. Department of Energy photograph