Garantia y Satisfaccion di Trabou Dificil pa Haya

SEGUN e Declaracion Universal di Derechonan Humano emiti pa Nacionnan Uni, tur hende tin “derecho di traha.” Sinembargo, no ta tur biaha e derecho aki ta garantisa. Un trabou cu bo ta sigur di dje ta depende di hopi factor cu ta varia di e condicion general di economia local te cu e condicion di mercado mundial. Apesar di esei, ora hende perde trabou of ta core riesgo di perde trabou, hopi bes nan ta rebela, tene manifestacion y welga. Casi tur pais ta haya nan cu e situacion aki. Segun un escritor, asta e palabra “trabou ta—manera semper e tawata—un palabra cu ta lanta emocionnan fuerte.”

Tin hopi motibo pakico trabou ta importante pa nos. Ademas di duna nos entrada, e ta contribui na nos bienestar mental y emocional. Trabou ta satisface e deseo cu hende tin di ser un miembro productivo den comunidad y di tin un proposito den bida. Tambe e ta duna nos un grado di respet propio. Pesei bo por haya cu maske un persona por tin bosh’i placa cu e por percura pa su necesidadnan of cu e por baha cu pension, toch e ta prefera di sigui traha. Si, trabou ta asina importante cu ora no tin suficiente trabou pa tur hende, esaki por crea problemanan social grandi.

Di otro banda, bo ta haya hende cu tin trabou pero cu ta haya nan cu asina hopi presion na trabou cu nan ta perde tur satisfaccion den esaki. Por ehempel, door cu tin hopi competencia riba mercado, un cantidad creciente di compania ta reduci nan personal pa asina baha gasto. Podise esaki ta bai exigi mas di e trahadonan cu a keda, pasobra awor nan tin mas trabou pa haci.

Tecnologia moderno cu supuestamente mester a haci bida mas facil y trabou mas eficiente, kisas en realidad, a causa mas tension na trabou. Por ehempel, computer, mashin di fax y Internet ta duna hende e chens di bai cas cu trabou despues cu nan caba di traha. Door di esei casi bo no ta mira e diferencia mas entre cas y trabou. Un trahado a bisa cu e tawata sinti cu su pager di trabou y telefon cellular tawata manera un cadena invisibel cu tawata mar’e na su doño di trabou.

Hopi hende di edad tin miedo cu den e economia y ambiente di trabou cu ta cambiando rapidamente aki, otronan lo por cuminsa mira nan como hende inutil prome cu nan tempo. Relaciona cu esaki, ex Representante di Derechonan Humano, Chris  Sidoti, a declara: “Ta existi e pensamento general cu si bo no tin menos cu 40 aña di edad, bo no por traha cu computer ni cu tecnologia moderno.” Pesei awendia bo ta haya cu hopi bon trahado cu antes tawata ser considera como personanan productivo, ta ser mira como mucho bieu pa yuda cu algo. Esei ta hopi lamentabel!

Nada straño cu normanan y etica di trabou y lealtad na compania a haya un sla duro den ultimo añanan. Segun e revista Frances, Libération: “Si companianan ta benta nan hendenan un banda asina cu bolsa di balor djis hik, lealtad na compania ta pasa pa historia. Claro cu bo tin cu traha duro, pero bo tin cu hacie pa bo mes y no pa compania.”

Apesar di e problemanan creciente aki, trabou ta sigui ser un necesidad basico di hende. En bista cu nos tempo ta cambiando rapidamente, con nos por cultiva un punto di bista balansa tocante trabou, y na mes tempo sinti nos sigur di nos trabou y satisfecho cu ne?

[Plachi na pagina 3]

Tecnologia moderno kisas ta causa mas tension na trabou