“Keda den Mi Palabra”

“Si boso keda den mi palabra, boso ta berdaderamente disipelnan di mi.”—HUAN 8:31.

1. (a) Kico Hesus a laga atras na mundo ora el a regresa shelo? (b) Cua ta preguntanan cu nos lo considera?

ORA Hesucristo, e Fundador di cristianismo, a regresa shelo, e no a laga atras na mundo bukinan cu el a skirbi ni monumentonan cu el a traha ni rikesa cu el a acumula. Pero si el a laga disipel y tambe rekisitonan spesifico pa hende por ta su disipel. De echo, den e Evangelio di Huan nos ta haya cu Hesus a menciona tres rekisito importante cu ken cu kier bira su siguido tin cu cumpli cu ne. Kico e rekisitonan aki ta? Kico nos por haci pa cumpli cu nan? Y con nos por haci sigur cu nos personalmente ta cualifica como disipel di Cristo awe? *

2. Kico ta un rekisito importante pa hende por ta un disipel di Cristo, segun e Evangelio di Huan?

² Mas o menos seis luna prome cu su morto, Hesus a bai Herusalem y a predica na e multitud di hende cu a reuni einan pa celebra e Fiesta di Cabaña cu tawata dura un siman. Como resultado di su predicacion, na mita di e fiesta “hopi di e multitud a kere den dje.” Hesus a sigui predica, di manera cu riba e ultimo dia di e fiesta, atrobe “hopi hende a kere den dje.” (Huan 7:10, 14, 31, 37; 8:30) Na e ocasion ei Hesus a dirigi su atencion na e creyentenan nobo y a declara un rekisito importante pa hende por ta su disipel. Apostel Huan a skirbi loke el a bisa: “Si boso keda den mi palabra, boso ta berdaderamente disipelnan di mi.”—Huan 8:31.

3. Ki cualidad un hende mester pa e ‘keda den Hesus su palabra’?

³ Bisando esei Hesus no tawata kiermen cu e creyentenan nobo falta fe. Mas bien, el a indica cu nan tawatin e oportunidad di bira su disipelnan berdadero basta nan keda den su palabra, basta nan mustra perseverancia. Nan a acepta su palabra caba, pero awor nan tawatin cu sigui den dje. (Huan 4:34; Hebreonan 3:14) Hesus realmente a mira perseverancia como un cualidad asina importante pa su siguidonan cu asta den e ultimo combersacion cu e tawatin cu su apostelnan (registra den e Evangelio di Huan) el a roga dos biaha: “Sigui mi.” (Huan 21:19, 22) Y esei ta netamente loke hopi cristian di prome a haci. (2 Huan 4) Kico a yuda nan persevera?

4. Kico a yuda e cristiannan di prome persevera?

⁴ Apostel Huan, un fiel disipel di Cristo durante casi shete decada, a señala un factor importante. El a elogia cristiannan fiel bisando: “Boso ta fuerte, y e palabra di Dios ta permanece den boso, y boso a vence e malbado.” E disipelnan ei di Cristo a persevera, esta, permanece den e palabra di Dios, pasobra e palabra di Dios a permanece den nan. Nan tawatin profundo aprecio p’e. (1 Huan 2:14, 24) Awe ta mescos, pa nos por “persevera te na fin” nos tin cu haci sigur cu e palabra di Dios ta permanece den nos. (Mateo 24:13) Con nos por haci esei? Hesus a conta un comparacion, of parabola, cu ta duna e contesta.

Hende “Ta Tende e Palabra”

5. (a) Cua ta e diferente tiponan di tera cu Hesus a menciona den un di su comparacionnan? (b) Kico e simiña y e tera den Hesus su comparacion ta representa?

⁵ Hesus a conta un comparacion di un sembrado cu a sembra simiña, y e ta para skirbi den e Evangelionan di Mateo, Marco y Lucas. (Mateo 13:1-9, 18-23; Marco 4:1-9, 14-20; Lucas 8:4-8, 11-15) Segun cu bo ta lesa e relatonan,  lo bo ripara cu e rasgo principal di e comparacion ta cu e mesun clase di simiña ta cai den varios tipo di tera y ta produci resultadonan distinto. E prome tipo di tera ta duro, e di dos no ta mucho hundo y e di tres ta yen di mata di sumpiña. E di cuater tipo di tera, distinto for di e tres otronan, ta “bon tera.” Segun e splicacion cu Hesus mes a duna, e simiña ta e mensahe di Reino cu ta ser haya den e Palabra di Dios, y e tera ta representa hende cu diferente condicion di curason. Aunke e hendenan cu e varios tipo di tera ta representa tin algun cos en comun, esnan cu e bon tera ta representa tin un caracteristica cu ta distingui nan for di e otronan.

6. (a) Kico ta haci e di cuater tipo di tera den Hesus su comparacion distinto for di e tres otronan, y kico esaki ta nifica? (b) Kico ta esencial pa nos por persevera como disipel di Cristo?

⁶ E relato na Lucas 8:12-15 ta mustra cu den tur cuater caso, e hendenan a “tende e palabra.” Sinembargo, esnan cu tin “un curason honesto y bon” ta bai mas leu cu “tende e palabra.” Nan ta “retene esaki, y ta duna fruta cu perseverancia.” Como cu e bon tera ta moli y hundo, e ta permiti e raiznan di e simiña bai abou y hancra firmemente, y como resultado e simiña ta crece y produci fruta. (Lucas 8:8) Di igual manera, hende di bon curason ta compronde e palabra di Dios, ta apreci’e y ta ocupa nan mes cu ne. (Romanonan 10:10; 2 Timoteo 2:7) E palabra di Dios ta keda den nan. Y esei ta pone cu nan ta duna fruta cu perseverancia. Pues anto, pa nos por persevera como disipel di Cristo ta esencial pa nos tin un aprecio profundo y sinsero pa e Palabra di Dios. (1 Timoteo 4:15) Pero con nos por desaroya tal aprecio sinsero pa e Palabra di Dios?

Condicion di Curason y Meditacion Profundo

7. Kico ta estrechamente conecta cu un bon curason?

⁷ Ripara cu kico Bijbel ta conecta un bon curason bes tras bes. “Curason di e husto ta studia bon [of, “medita”, NW] con pa contesta.” (Proverbionan 15:28) “Laga e palabranan di mi boca y e meditacion di mi curason ta aceptabel den bo bista, o SEÑOR.” (Salmo 19:14) “E meditacion di mi curason lo ta comprondemento.”—Salmo 49:3.

8. (a) Ora nos ta lesa Bijbel, kico nos mester haci y kico nos mester evita? (b) Cua ta e beneficionan cu nos ta haya door di medita, compaña cu oracion, riba e Palabra di Dios? (Inclui e cuadro “Firmemente ‘Estableci den e Berdad.’”)

⁸ Mescos cu e escritornan biblico aki, nos tambe tin cu medita cu aprecio y oracion riba Dios su Palabra y su actividad. Ora nos ta lesa Bijbel of publicacionnan basa riba Bijbel, nos no mester ta manera turistanan ansha cu ta pura di un bunita paisahe pa otro, sacando masha hopi potret pero sin realmente disfruta di e paisahe. Mas bien, ora nos ta studia Bijbel nos lo tuma tempo pa, na moda di papia, nos para un rato y disfruta di e paisahe. * Segun cu nos ta reflexiona trankilamente riba loke nos a lesa, e palabra di Dios ta influencia nos curason. E ta touch nos sintimentonan y ta forma nos manera di pensa. Tambe e ta impulsa nos pa comparti nos pensamentonan intimo cu Dios  den oracion. Como resultado, nos debocion na Yehova ta bira mas fuerte, y nos amor pa Dios ta motiva nos pa keda sigui Hesus asta bou di circunstancianan dificil. (Mateo 10:22) Ta bisto anto cu ta importante pa nos medita riba loke Dios ta bisa si nos kier keda fiel te na fin.—Lucas 21:19.

9. Con nos por haci sigur cu nos curason ta keda habri pa ricibi e palabra di Dios?

⁹ Un cos mas cu e comparacion di Hesus ta mustra ta cu tin obstaculo cu ta stroba e simiña (e palabra di Dios) di crece. Pesei pa nos por keda disipelnan fiel, nos lo tin cu (1) reconoce e obstaculonan cu e mal condicion di e tera menciona den e comparacion ta representa y (2) dal paso pa elimina nan of evita nan. Di e manera ei nos lo haci sigur cu nos curason ta keda habri pa ricibi e simiña di Reino y ta sigui duna fruta.

“Canto di Caminda” Ta Referi na Esnan Precupa

10. Describi e prome tipo di tera den Hesus su comparacion y splica kico e ta nifica.

¹⁰ E prome tipo di tera cu e simiña ta cai riba dje ta esun “canto di caminda”, unda e simiña ta “wordo trapa.” (Lucas 8:5) Tera canto di un caminda cu ta hiba na un cunucu di maishi ta bira duro door cu constantemente hende ta cana riba dje. (Marco 2:23) Asina tambe hende cu ta permiti e actividadnan agita di mundo exigi demasiado di nan tempo y energia, lo por haya cu nan ta asina precupa cu otro cos cu nan no por cultiva un aprecio sinsero pa e palabra di Dios. Nan ta tend’e, pero nan no ta medita riba dje. Di manera cu nan curason ta keda sin reacciona na un manera positivo. Prome cu nan cultiva amor pa e palabra, “Diabel  ta bin y ta kita e palabra for di nan curason pa nan no kere y wordo salba.” (Lucas 8:12) Nos por preveni esaki?

11. Con nos por evita cu nos curason ta bira manera tera duro?

¹¹ Tin hopi cos cu nos por haci pa evita cu nos curason ta bira manera tera improductivo canto di caminda. Tera duro cu wordo trapa por bira moli y productivo si ploeg e y si desvia e trafico cu ta pasa riba dje. Asina tambe, door di traha tempo pa studia y medita riba e Palabra di Dios nos curason por bira manera bon tera cu ta duna fruta. E clave ta pa no bira demasiado precupa cu e cosnan di bida diario. (Lucas 12:13-15) Mas bien, haci sigur cu nos tin tempo pa reflexiona riba e “cosnan mas importante” den bida.—Filipensenan 1:9-11, NW.

“Yen di Piedra” Ta Referi na Esnan Cu Tin Miedo

12. Kico ta e berdadero motibo pakico e mata ta seca den e di dos tipo di tera menciona den e comparacion di Hesus?

¹² Ora e simiña cai riba e di dos tipo di tera, e no ta djis keda riba dje manera den e prome caso. E ta saca raiz y crece. Pero ora solo sali, e cayente di solo ta kima e mata y e ta seca. Sinembargo, ripara e detaye importante aki. E berdadero motibo pakico e mata ta seca no ta e cayente. Pasobra e mata cu crece den bon tera tambe ta haya solo, pero toch e no ta seca, al contrario, e ta bona. Kico ta haci e diferencia? Hesus ta splica cu e mata ta seca “pasobra no tawatin tera hundo” y “pa falta di awa.” (Mateo 13:5, 6; Lucas 8:6) Ora tin hopi piedra bou di un capa di tera, esei ta stroba e simiña di manda su raiz suficiente hundo pa e haya awa y stabilidad. E mata ta seca pasobra e tera no ta hundo.

13. Ki clase di personanan ta manera tera cu no ta mucho hundo, y kico ta e berdadero motibo pa e manera cu nan ta reacciona?

¹³ E parti aki di e comparacion ta referi na personanan cu “ta ricibi e palabra cu goso” y cu yen di entusiasmo ta sigui Hesus “pa un tempo.” (Lucas 8:13) Ora nan haya nan confronta cu e cayente di “afliccion of persecucion”, nan ta haya asina tanto miedo cu nan ta perde nan goso y fortalesa, y ta stop di sigui Cristo. (Mateo 13:21) Sinembargo, e motibo mas profundo di nan miedo no ta e oposicion. Pasobra con cu bai bin, miyones di disipel di Cristo ta soporta varios forma di afliccion y toch nan ta keda fiel. (2 Corintionan 2:4; 7:5) E berdadero motibo pakico algun ta haya miedo y cai for di e berdad ta e echo cu nan curason tin manera hopi piedra den dje cu ta stroba nan di medita suficiente profundo riba cosnan positivo y spiritual. Como consecuencia, e aprecio cu nan desaroya pa Yehova y pa su palabra ta mucho superficial, y mucho suak pa resisti oposicion. Con un hende por evita un resultado asina?

14. Ki pasonan un persona mester dal pa evita cu su curason ta bira manera tera cu no ta mucho hundo?

¹⁴ Un persona tin cu haci sigur cu no tin obstaculo cu parce piedra den su curason; obstaculonan manera amargura duro hancra, egoismo cu no ta bisto of sintimentonan duro paresido na esnan ei pero cu ta scondi. Si tin un obstaculo asina caba den su curason, e poder cu e palabra di Dios tin por elimin’e. (Yeremias 23:29; Efesionan 4:22; Hebreonan 4:12) Despues, meditacion compaña cu oracion lo percura pa ‘e palabra wordo planta’ profundo den e persona su curason. (Santiago 1:21) Esaki lo dun’e e fortalesa necesario pa vence periodonan di desanimacion y dun’e e curashi pa keda fiel apesar di prueba.

 “Meimei di Mata di Sumpiña” Ta Referi na Esnan Cu Tin un Curason Dividi

15. (a) Dicon e di tres tipo di tera cu Hesus a menciona ta merece nos atencion special? (b) Kico ta sosode cu tempo cu e di tres tipo di tera, y con bini?

¹⁵ E di tres tipo di tera, esun cu mata di sumpiña, merece nos atencion special pasobra den algun aspecto e ta casi mescos cu e bon tera. Manera e bon tera, e tera cu sumpiña ta laga e simiña saca raiz y crece. Na principio no tin diferencia den e crecemento di e mata nobo den e dos tipo di teranan aki. Pero cu tempo ta desaroya un situacion cu despues ta hoga e mata. Distinto for di e bon tera, e tera aki ta yen di mata di sumpiña. Segun cu e mata chikito ta sali for di e tera, e ta hay’e ta competi cu e ‘matanan di sumpiña cu ta crece hunto cu ne.’ Pa un tempo ambos mata ta competi pa haya nutricion, lus y espacio, pero al final e matanan di sumpiña ta tapa e mata y ta “hog’e.”—Lucas 8:7.

16. (a) Ki clase di persona ta parce e tera yen di mata di sumpiña? (b) Segun e tres relatonan di Evangelio, kico e sumpiñanan ta representa?—Wak e nota na pia di e pagina aki.

¹⁶ Ki clase di persona ta parce e tera yen di mata di sumpiña? Hesus a splica: “Esakinan ta esnan cu a tende, y segun cu nan ta sigui nan caminda nan ta wordo hoga door di precupacionnan, rikesa y placernan di bida, y nan fruta no ta madura.” (Lucas 8:14) Mescos cu e sembrado su simiña y e matanan di sumpiña ta crece pareu den e tera, asina algun persona ta purba di sigui e palabra di Dios y na mesun tempo busca e “placernan di bida.” E berdad di e palabra di Dios ta ser sembra den nan curason, pero e tin cu competi cu otro actividadnan cu ta lucha pa haya nan atencion. Nan curason simbolico ta dividi. (Lucas 9:57-62) Esaki ta stroba nan di dedica suficiente tempo na medita profundamente riba e palabra di Dios compaña cu oracion. Nan no ta logra absorba e palabra di Dios completamente y pesei nan no tin e profundo aprecio cu ta necesario pa por persevera. Pocopoco nan actividadnan cu no ta spiritual ta surpasa nan interesnan spiritual te na e grado cu nan ta “wordo hoga.” * Ki un final tristo pa esnan cu no ta stima Yehova di henter nan curason!—Mateo 6:24; 22:37.

17. Ki decisionnan nos tin cu tuma den bida pa evita cu e matanan simbolico di sumpiña, menciona den Hesus su comparacion, ta hoga nos?

¹⁷ Door di duna asuntonan spiritual prioridad riba cosnan material, nos ta evita cu e dolornan y placernan di mundo ta hoga nos. (Mateo 6:31-33; Lucas 21:34-36) Nunca nos no mester neglisha nos lesamento di Bijbel ni keda sin medita riba loke nos ta lesa. Nos lo haya mas tempo pa consentra y medita cu oracion si nos simplifica nos bida mas tanto posibel. (1 Timoteo 6:6-8) Sirbidonan di Dios cu a haci esei ta mira con Yehova ta bendiciona nan. Ta como si fuera nan a ranca e matanan di sumpiña for di e tera pa asina duna mas nutricion, lus y espacio na e mata cu ta duna fruta. Sandra di 26 aña a bisa: “Ora mi medita riba  mi bendicionnan den e berdad, mi ta realisa cu mundo no por ofrece nada cu por ser compara cu nan!”—Salmo 84:11.

18. Con nos por keda den e palabra di Dios y persevera como cristian?

¹⁸ Pues ta bisto anto cu nos tur, hoben y bieu, lo keda den e palabra di Dios y persevera como disipel di Cristo tanten cu e palabra di Dios keda den nos. Pesei laga nos haci sigur pa e tera di nos curason simbolico nunca no bira duro, perde profundidad of yena cu mata di sumpiña. Mas bien e mester keda moli y hundo. Di e manera ei nos lo por absorba e palabra di Dios completamente y “duna fruta cu perseverancia.”—Lucas 8:15.

[Nota]

Kico Bo Ta Contesta?

• Dicon nos tin cu ‘keda den e palabra di Hesus’?

• Con nos por laga e palabra di Dios keda den nos curason?

• E cuater diferente tipo di tera cu Hesus a menciona ta representa ki clase di persona?

• Con abo por haya tempo pa medita riba e palabra di Dios?

[Preguntanan di Estudio]

[Cuadro/Plachi na pagina 10]

FIRMEMENTE “ESTABLECI DEN E BERDAD”

HOPI ruman cu ta disipel di Cristo pa hopi tempo, ta duna prueba aña den aña afo cu nan ta firmemente “estableci den e berdad.” (2 Pedro 1:12) Kico ta yuda nan persevera? Pensa riba e siguiente comentarionan cu algun a duna.

“E ultimo cos cu mi ta haci tur dia ta lesa un parti di Bijbel y haci oracion. Caba mi ta pensa riba loke mi a lesa.”—Jean, batisa na 1939.

“Ora mi medita riba e echo cu Yehova, un persona asina eleva, ta stima nos profundamente, mi ta sinti mi safe y mi ta haya e fortalesa pa keda fiel.”—Patricia, batisa na 1946.

“Mi a logra sigui sirbi Yehova door di pega na bon custumbernan di studia Bijbel y door di keda ocupa cu ‘e cosnan profundo di Dios.’”—1 Corintionan 2:10; Anna, batisa na 1939.

“Mi ta lesa Bijbel y nos publicacionnan basa riba Bijbel cu e meta di samina mi curason y motibonan.”—Zelda, batisa na 1943.

“Mi momentonan mas felis ta ora mi por bai cana y papia cu Yehova den oracion y djis lag’e sa kico realmente mi ta sinti.”—Ralph, batisa na 1947.

“Mi ta cuminsa mi dia cu un consideracion di e texto di dia y despues ta lesa un parti di Bijbel. Esaki ta duna mi algo nobo pa medita riba dje durante dia.”—Marie, batisa na 1935.

“Loke ta stimula mi masha ta ora mi analisa un di e bukinan di Bijbel versiculo pa versiculo.”—Daniel, batisa na 1946.

Ki ora abo ta tuma tempo pa medita, compaña cu oracion, riba e palabra di Dios?—Daniel 6:10b; Marco 1:35; Echonan 10:9.

[Plachi na pagina 13]

Door di duna prioridad na asuntonan spiritual, nos por “duna fruta cu perseverancia”