Mustra “Amor un pa Otro”
Mustra “Amor un pa Otro”
“Na esaki tur hende lo sa cu boso ta mi disipel, si boso tin amor un pa otro.” —HUAN 13:35.
1. Cua cualidad Hesus a enfatisa djis prome cu su morto?
“MUCHA chikitonan.” (Huan 13:33) Cu e expresion tierno ei Hesus a dirigi su mes na su apostelnan e anochi prome cu su morto. Ningun otro caminda den e relatonan di Evangelio nos no ta haya cu el a yega di uza e expresion yen di compasion aki ora e tawata papia cu nan. Sinembargo, riba e anochi special ei el a sintie conmovi pa uza e palabra di cariño aki pa transmiti e amor profundo cu el a sinti pa su siguidonan. De echo e anochi ei, Hesus a papia un 30 biaha di amor. Dicon el a duna asina tanto enfasis na e cualidad aki?
2. Dicon ta asina importante pa cristiannan mustra amor?
2 Hesus a splica dicon amor ta asina importante. El a bisa: “Na esaki tur hende lo sa cu boso ta mi disipel, si boso tin amor un pa otro.” (Huan 13:35; 15:12, 17) Un siguido di Cristo mester mustra amor di ruman. Cristiannan berdadero ta ser identifica na e amor tierno y caloroso cu nan ta mustra na otro, y no na un manera spesifico di bisti ni na un of otro custumber straño. E articulo anterior a menciona na principio cu tin tres rekisito principal pa por ta un disipel di Cristo. Y e clase di amor extraordinario aki ta e di dos rekisito. Kico lo yuda nos sigui cumpli cu e rekisito aki?
“Sobresali Mas y Mas”
3. Ki conseho tocante amor apostel Pablo a duna?
3 Mescos cu tawata e caso entre e siguidonan di Cristo den prome siglo, e amor extraordinario aki ta visibel awe entre e berdadero disipelnan di Cristo. Apostel Pablo a skirbi e cristiannan di prome siglo: “Awor tocante di e amor di ruman no tin mester di skirbi boso, pasobra ta Dios ta siña boso stima otro; pasobra di berdad boso ta haci esaki cu tur e rumannan.” Pero toch Pablo a agrega: “Sobresali mas y mas.” (1 Tesalonicensenan 3:12; 4:9, 10) Nos tambe tin cu tuma Pablo su conseho na pecho y haci esfuerso pa “sobresali mas y mas” den nos amor pa otro.
4. Segun Pablo y Hesus, na ken nos mester mustra consideracion special?
4 Den e mesun carta inspira ei, Pablo a anima su rumannan den fe pa “curasha esnan cu ta falta animo” y “yuda e debilnan.” (1 Tesalonicensenan 5:14) Na un otro ocasion el a recorda e cristiannan cu esnan “cu ta fuerte mester soporta e debilidadnan di esnan cu ta sin forsa.” (Romanonan 15:1) Hesus tambe a duna instruccion pa yuda esnan cu ta debil. Despues cu Hesus a predeci cu Pedro lo bandon’e riba e anochi di su aresto, el a bisa Pedro: “Unabes cu bo a comberti, fortalece bo rumannan.” Dicon? Pasobra nan tambe lo a bandona Hesus y pues lo tawatin mester di yudansa. (Lucas 22:32; Huan 21:15-17) Kiermen anto cu e Palabra di Dios ta manda nos mustra amor na esnan cu ta debil den sentido spiritual y cu kisas no ta asocia mas cu e congregacion cristian. (Hebreonan 12:12) Dicon nos mester haci esei? Dos comparacion bibo cu Hesus a duna ta percura e contesta.
Un Carne Perdi y un Moneda Perdi
5, 6. (a) Cua dos comparacion cortico Hesus a conta? (b) Kico e comparacionnan aki ta revela di Yehova?
5 Pa siña su oyentenan con Yehova ta mira esnan cu a dual, Hesus a duna dos comparacion cortico. Uno tawata di un wardado di carne. Hesus a bisa: “Cual di boso cu tin shen carne y a perde un di nan no ta laga e nobentinuebenan den sabana, y ta bai busca esun perdi, te ora cu e hay’e? Y ora cu e hay’e, yen di goso e ta pon’e riba su scouder. Y ora cu e yega cas e ta yama su amigonan y su biciñanan hunto, y ta bisa nan: ‘Regociha hunto cu mi, pasobra mi a haya mi carne cu a perde!’ Mi ta bisa boso cu asina tambe lo tin mas goso den shelo pa un pecado cu repenti, cu pa nobentinuebe hende husto cu no tin mester di repentimento.”—Lucas 15:4-7.
6 E di dos comparacion tawata di un mohe. Hesus a bisa: “Cual mohe cu tin dies moneda di plata, si e perde un di nan, no ta sende un lampi y ta bari cas busca cuidadosamente te ora cu e hay’e? Y ora cu e hay’e e ta yama su amiganan y su biciñanan hunto, bisando: ‘Regociha hunto cu mi, pasobra mi a haya e moneda cu mi a perde!’ Asina tambe mi ta bisa boso, tin goso den presencia di e angelnan di Dios pa un pecado cu repenti.”—Lucas 15:8-10.
7. Cua ta e dos lesnan cu nos ta saca for di e comparacion di e carne perdi y esun di e moneda perdi?
7 Kico nos por siña for di e comparacionnan cortico aki? Nan ta mustra nos (1) ki sintimento nos mester tin pa esnan cu a bira debil y (2) kico nos tin cu haci pa yuda nan. Laga nos analisa e puntonan aki.
Perdi Pero Balioso
8. (a) Con e wardado y e mohe a reacciona riba nan perdida? (b) Kico nan reaccion ta bisa nos di nan opinion di e obheto perdi?
8 Den ambos comparacion algo a perde, pero ripara e reaccion di e doñonan. E wardado no a bisa: ‘Kico ta un carne? Ata m’a resta 99? Esun carne ei no ta haci falta.’ E mohe no a bisa: ‘Pakico mi ta precupa pa un moneda? Mi ta contento cu ainda mi tin nuebe.’ Al contrario, e wardado a bai busca su carne perdi como si fuera e tawata e unico carne cu e tin. Anto e mohe a sinti e perdida di su moneda como si fuera e no tawatin mas moneda. Den ambos caso e doño a keda considera e obheto perdi como algo balioso. Kico esaki ta ilustra?
9. Kico e precupacion cu e wardado y e mohe a demostra ta ilustra?
9 Tuma nota di Hesus su conclusion den ambos caso: “Asina tambe lo tin mas goso den shelo pa un pecado cu repenti”, y “asina tambe mi ta bisa boso, tin goso den presencia di e angelnan di Dios pa un pecado cu repenti.” Pues anto, e precupacion di e wardado y di e mohe ta refleha na un escala chikito loke Yehova y su criaturanan celestial ta sinti. Mescos cu loke e wardado y e mohe a perde a keda balioso den nan bista, asina tambe esnan cu drif bai y stop di asocia cu e pueblo di Dios ta keda balioso den bista di Yehova. (Yeremias 31:3) E personanan ei kisas ta spiritualmente debil, ma no necesariamente nan ta rebelde. Apesar di nan condicion debil, podise te na cierto grado ainda nan ta cumpli cu e rekisitonan di Yehova. (Salmo 119:176; Echonan 15:29) Pesei mescos cu den pasado, Yehova ta tarda pa “tira nan for di su presencia.”—2 Reinan 13:23.
10, 11. (a) Con nos mester considera esnan cu a drif bai for di e congregacion? (b) Segun e dos comparacionnan di Hesus, con nos por expresa nos interes y precupacion pa nan?
10 Mescos cu Yehova y Hesus, nos tambe ta profundamente interesa den esnan cu ta debil y cu no ta asocia cu e congregacion cristian. (Ezekiel 34:16; Lucas 19:10) Nos ta considera un persona cu ta debil den sentido spiritual como un carne perdi, y no un caso perdi. Nos no ta rasona: ‘Pakico worry pa un hende debil? E no ta haci falta den e congregacion.’ Al contrario, mescos cu Yehova, nos ta considera esnan cu a drif bai pero cu kier bolbe bek, como balioso.
11 Pero con nos por expresa nos interes y precupacion? E dos comparacionnan di Hesus ta indica cu nos por haci esei (1) dor di tuma iniciativa, (2) dor di actua cu suavidad y (3) dor di ta determina y practico. Laga nos analisa e aspectonan aki un pa un.
Tuma Iniciativa
12. Kico e palabranan “bai busca esun perdi” ta conta nos di e actitud di e wardado?
12 Den e prome comparacion, Hesus ta bisa cu e wardado ta “bai busca esun perdi.” E wardado ta tuma e iniciativa y ta haci un esfuerso conciente pa haya e carne perdi. Contratiempo, peliger y distancia no ta strob’e. Al contrario, e wardado ta persisti “te ora cu e hay’e.”—Lucas 15:4.
13. Con hombernan fiel di pasado a reacciona riba e necesidad di esnan debil, y con nos por imita e ehempelnan ei di Bijbel?
13 Asina tambe, pa por yuda un persona cu tin mester di animacion hopi bes ta esun mas fuerte tin cu tuma e iniciativa. Hombernan fiel di pasado a compronde esaki. Por ehempel, ora Yonatan yiu di Rei Saul a ripara cu su amigo intimo David tawatin mester di animacion, Yonatan “a lanta y a bai serca David na Hores, y a curash’e den Dios.” (1 Samuel 23:15, 16) Siglonan despues, ora Gobernado Nehemias a ripara cu algun di su rumannan Hudiu a bira debil, e tambe a “lanta” mesora y a curasha nan pa ‘corda riba Yehova.’ (Nehemias 4:14) Nos awe tambe lo kier “lanta”—es decir tuma e iniciativa—pa fortalece esnan cu ta debil. Pero ta ken den congregacion mester haci esei?
14. Ken den e congregacion cristian mester ofrece pa yuda esnan cu ta debil?
14 Specialmente ancianonan cristian tin e responsabilidad di “curasha esnan agota, y fortalece esnan debil” y “bisa esnan cu nan curason ta yen di ansha: ‘Tene curashi, no tene miedo.’” (Isaias 35:3, 4; 1 Pedro 5:1, 2) Pero ripara cu e conseho di Pablo pa “curasha esnan cu ta falta animo” y “yuda e debilnan”, no a ser duna na ancianonan so. Mas bien Pablo su palabranan tawata dirigi na henter e “iglesia di e Tesalonicensenan.” (1 Tesalonicensenan 1:1; 5:14) Pues, tur cristian tin e tarea di ofrece yudansa na esnan cu ta debil. Mescos cu e wardado den e comparacion, tur cristian mester sinti su mes impulsa pa “bai busca esun perdi.” Claro cu e manera mas eficas pa haci esaki ta den cooperacion cu e ancianonan. Abo lo por haci algo pa yuda un persona debil den bo congregacion?
Sea Suave
15. Pakico e wardado lo a carga e carne hiba bek?
15 Kico e wardado ta haci ora cu finalmente e haya e carne perdi? “E ta pon’e riba su scouder.” (Lucas 15:5) Ki un detaye conmovedor y revelador! Kisas e carne a dual durante varios dia y anochi den teritorio desconoci, podise asta leon a core su tras. (Job 38:39, 40) E carne indudablemente tawata suak debi na falta di cuminda. Simplemente e ta mucho suak pa riba su mes e supera e obstaculonan cu lo e topa riba caminda pa cas. Pesei e wardado ta sak abou, his’e suavemente, y carg’e hiba bek na e tou pasando riba tur obstaculo. Con nos por imita e cuido cu e wardado a demostra?
16. Pakico nos mester demostra e ternura cu e wardado a mustra pa e carne cu a dual?
16 Un persona cu a stop di asocia cu e congregacion kisas ta agota den sentido spiritual. Mescos cu e carne cu a dual for di e wardado, un persona asina kisas a cana dual sin rumbo den e mundo hostil aki. Sin e proteccion di e tou—e congregacion cristian—e ta hay’e mas cu nunca cu e atakenan di Diabel, kende “ta cana rond manera un leon cu ta gruña, buscando ken e por devora.” (1 Pedro 5:8) Ademas, e ta suak debi na falta di alimento spiritual. Pesei riba su mes probablemente lo e ta mucho suak pa surpasa e obstaculonan cu lo e topa den su caminda pa bini bek na e congregacion. Pa e motibo ei nos tin cu sak abou, na moda di papia, y suavemente hisa e persona debil ei y carg’e hiba bek. (Galationan 6:2) Con nos por haci esei?
17. Con nos por imita apostel Pablo ora nos bishita un persona cu ta debil?
17 Apostel Pablo a bisa: “Ken ta sinti su mes suak sin cu ami tambe ta sinti suak hunto cu ne?” (2 Corintionan 11:29, BPK; 1 Corintionan 9:22) Pablo a sinti pa otro hende, incluso pa esnan debil. Nos tambe kier pone nos mes den sapato di esnan cu ta debil. Ora nos ta bishita un cristian spiritualmente debil, sigur’e cu e ta balioso den bista di Yehova y cu su rumannan Testigo ta sinti su falta masha hopi. (1 Tesalonicensenan 2:17) Lag’e sa cu nan ta cla pa dun’e sosten y cu nan ta dispuesto pa ser p’e “un ruman [cu] ta naci pa tempo di adversidad.” (Proverbionan 17:17; Salmo 34:18) Nos palabranan sinsero lo por anim’e pocopoco te cu e por bolbe bek na e tou. Kico nos tin cu haci e ora ei? E comparacion di e mohe cu a perde e moneda ta duna nos algun guia.
Sea Determina y Practico
18. (a) Dicon e mohe den e comparacion no ta sinti su mes sin speransa? (b) Ki esfuersonan sinsero e mohe ta haci, y cu ki resultado?
18 E mohe cu a perde e moneda tawata sa cu e situacion ta dificil pero no sin speransa. Si e moneda lo a cai den un cunucu grandi yen di mata of den un dam hundo yen di lodo, probablemente lo el a pensa cu ta imposibel pa hay’e. Sinembargo, door cu e tawata sa cu e moneda mester ta un caminda den cas, un caminda cu e por hay’e, el a cuminsa un buskeda determina y a fondo. (Lucas 15:8) Prome cos cu e ta haci ta sende un lampi pa ilumina su cas. Despues e ta bari e flur cu basora, cu e speransa di tende e zonido di e moneda. Por ultimo e ta busca cuidadosamente den tur skina y nachi te ora cu e lus di e lampi cai riba e moneda di plata. E mohe su determinacion a ser recompensa!
19. Ki lesnan pa yuda esnan debil nos ta saca for di loke e mohe den e comparacion di e moneda perdi a haci?
19 Manera e detaye aki di e comparacion ta recorda nos, nos obligacion biblico pa yuda un cristian debil no ta fuera di nos alcanse. Na mesun tempo nos ta realisa cu e ta rekeri esfuerso. Asta apostel Pablo a bisa e ancianonan di Efeso: “Door di traha duro asina boso mester yuda e debilnan.” (Echonan 20:35a) Corda cu e mohe no ta haya e moneda door di djis wak rond den su cas aribariba, aki aya of de bes en cuando. No. E ta logra pasobra e ta busca sistematicamente “te ora cu e hay’e.” Asina tambe, ora nos ta purba recupera un persona spiritualmente debil, nos metodo pa haci esei mester ta determina, practico y cu un proposito. Kico nos por haci?
20. Kico nos por haci pa yuda esnan debil?
20 Con nos por yuda un persona debil cultiva fe y aprecio? Podise un studio di Bijbel den un publicacion cristian apropiado ta net loke e tin mester. Si, un studio biblico cu un persona debil ta duna nos chens pa yud’e den un manera consistente y a fondo. Probablemente e superintendente di sirbishi ta e miho persona pa determina ken lo por duna e yudansa necesario. Lo e por sugeri cua ta e temanan cu nos por studia y cua publicacion lo ta mas practico. Mescos cu e mohe den e comparacion ta uza hermentnan util pa cumpli cu su tarea, nos awe tambe tin hermentnan pa yuda nos duna un man na esnan cu ta debil y asina cumpli cu e responsabilidad cu Dios a duna nos. Dos herment of publicacion nobo cu nos tin lo ta specialmente util pa esaki. Ta e buki Adora e Unico Dios Berdadero y e buki Hala Serca Yehova. *
21. Con tur persona envolvi ta ser bendiciona ora yuda esnan cu ta debil?
21 E yudansa cu e debilnan ta haya ta trece bendicion pa tur persona envolvi. Esun cu ta ser yuda tin e felicidad di bolbe asocia cu amigonan berdadero. Nos ta experencia e goso di curason cu bo ta haya solamente door di duna. (Lucas 15:6, 9; Echonan 20:35b) E congregacion den su totalidad ta bira mas cariñoso segun cu cada miembro ta demostra un interes amoroso den otro hende. Y mas cu tur cos, nos Wardadonan amoroso, Yehova y Hesus, ta ser honra door cu nan sirbidonan riba tera ta refleha Nan deseo pa yuda esnan debil. (Salmo 72:12-14; Mateo 11:28-30; 1 Corintionan 11:1; Efesionan 5:1) Pesei nos tin masha bon motibo pa sigui mustra “amor un pa otro”!
[Nota]
^ par. 20 Publica door di Testigonan di Yehova.
Bo Por Splica?
• Dicon ta importante pa cada un di nos demostra amor?
• Dicon nos tin cu mustra amor na esnan cu ta debil?
• Ki lesnan nos ta siña for di e comparacion di e carne perdi y for di esun di e moneda perdi?
• Ki pasonan practico nos por dal pa yuda un persona cu ta debil?
[Preguntanan di Estudio]
[Plachi na pagina 16, 17]
Ora di yuda esnan cu ta debil, nos ta tuma e iniciativa y ta suave, y determina
[Plachi na pagina 16, 17]
Yuda esnan cu ta debil ta trece bendicion pa tur persona envolvi