Informe Di Proclamadonan Di Reino

Nan Ta “Tendiendo” e Mensahe di Reino na Brazil

PA POR predica e bon nobo di Reino den e comunidad di hende sordo, hopi Testigo di Yehova na Brazil a acepta e reto di siña e idioma di seña Brasileño. Nan esfuersonan ta dunando tremendo resultado, manera e siguiente experencianan ta ilustra.

Eva, * un señora sordo na São Paulo, a cuminsa siña idioma di seña despues cu e y su tres yiunan a bai biba hunto cu un homber sordo. Na un centro comercial, Eva cu su amigo a topa un grupo di Testigo sordo y a ser invita na un reunion na Salon di Reino. Nan a acepta e invitacion, pensando cu esei lo tawata un reunion social.

Door cu Eva no tawata conoce e idioma di seña dje bon ei, e no a compronde masha di loke nan a bisa na e reunion. Despues di esei, un par di Testigo a invit’e pasa na nan cas pa un pasaboca. Uzando e plachinan den e foyeto Disfruta di bida riba tera pa semper!, nan a splic’e cu Dios a priminti cu pronto lo tin un paradijs riba tera. Eva a gusta loke el a siña y a cuminsa asisti na reunion regularmente.

Pronto despues di esei, Eva a bai laga su amigo pa e por a biba segun e normanan di Bijbel. Apesar di oposicion masha fuerte di parti di su famia, el a sigui progresa spiritualmente y a batisa na 1995. Seis luna despues, Eva a bira un pionero, of un proclamado di Reino di tempo completo. Te cu awor el a yuda cuater hende sordo dedica nan bida na Yehova y batisa.

Carlos a nace sordo. For di su infancia el a cai den droga, inmoralidad y ladronicia. Despues cu miembronan di un gang rival a menas’e, el a hui bai São Paulo y a keda serca João pa un tempo. João, mescos cu Carlos, tawata sordo y a hiba un bida inmoral.

Un par di aña despues, Carlos a siña e mensahe di Reino, loke a motiv’e pa e drecha su bida y legalisa su matrimonio. Despues cu Carlos a cumpli cu e rekisitonan biblico, el a batisa como simbolo di su dedicacion na Yehova. Mientrastanto, sin cu Carlos tawata sa, João tambe a bin conoce e bon nobo, y e tambe a haci cambionan grandi den su bida. Ora João a siña cu Yehova no ta aproba uzo di imagen, el a deshaci di henter su coleccion di “santo.” Despues cu el a bandona su estilo di bida anterior, e tambe a batisa.

Carlos cu João a keda masha contento mes ora nan a topa otro na un Salon di Reino y a mira e cambionan cu nan cada un a haci! Awor tur dos ta cabes di famia responsabel y ta sirbi como proclamado di Reino yen di entusiasmo.

Actualmente tin 30 congregacion y 154 grupo di idioma di seña na Brazil. Hunto nan tin mas cu 2.500 publicado, di cua rond di 1.500 ta sordo. Na e Congreso di Districto 2001 “Siñadonan di e Palabra di Dios” pa hende sordo, mas cu 3.000 persona a asisti y 36 a batisa. Cu e bendicion di Yehova, ta di spera cu hopi mas hende sordo lo acepta e mensahe di e Reino.

[Nota]