Pregunta di Lector

Pakico Bijbel ta bisa cu un persona mester grita na momento cu e ta core peliger di ser viola sexualmente?

Ken cu no a yega di pasa personalmente den e experencia teribel di un violacion sexual nunca por echt compronde con esaki por ruina bida di un hende. E experencia ta asina horibel pa e victima cu e por keda traumatisa pa resto di su bida. * Un mucha mohe cristian cu un par di aña pasa a ser viola, ta conta: “No tin palabra pa describi e panico teribel cu mi a sinti e anochi ei, ni e trauma cu mi tawatin cu vence despues di esei.” Ta di compronde anto cu hopi hende ta prefera pa ni sikiera pensa riba e tema spantoso aki. Sinembargo, e peliger di violacion sexual ta un realidad den e mundo malbado aki.

Bijbel ta papia francamente di algun caso di violacion y intento di violacion cu a tuma luga den pasado. (Genesis 19:4-11; 34:1-7; 2 Samuel 13:1-14) Pero tambe e ta ofrece conseho riba kico bo mester haci ora bo ta core peliger di ser viola. Bo por haya loke e Lei di Moises a bisa riba e asunto aki na Deuteronomio 22:23-27. Esaki ta trata dos situacion. Den e prome caso, un homber a haya un mucha mohe den un stad y a drumi cu ne. Pero e mucha mohe no a grita of sclama pa yudansa. Pesei a consider’e culpabel, “pasobra e no a grita pa yudansa den e stad.” Si el a grita, hende den cercania lo por a sali na su defensa. Den e di dos caso, un homber a haya un mosa den cunucu y a “viol’e.” E mucha mohe  a defende su curpa y “a grita, ma no tawatin ningun hende pa salb’e.” Diferente for di e mucha mohe den e prome caso, tur cos a mustra cu e mucha mohe aki no a entrega su mes facilmente na e violado. El a resisti fuertemente, y a grita pa yudansa, pero el a ser domina. E echo cu el a grita a duna prueba cu el a ser viola contra su boluntad; e no tawata culpabel di malecho.

Aunke cristiannan awe no ta bou dje Lei di Moises, e principionan menciona eiden ta sirbi como un guia pa nan. E relato anterior ta enfatisa e importancia di resisti y grita pa yudansa. Te awe, ora un hende ta core peliger di ser viola, ta sabi pa e grita. Un experto riba prevencion di crimen a declara: “Ora un hende mohe ser ataca, ainda su miho defensa ta su stem.” Grito di un hende mohe por alerta otro personanan cu por core bin yud’e e ora ei. Tambe e grito por spanta un violado y pon’e bai. Un mucha mohe cristian cu a hera di wordo viola a bisa: “Mi a grita cu tur mi forsa, y e homber a hala atras. Ora el a bini riba mi atrobe, mi a grita y core. Den pasado hopi bes mi a yega di pensa: ‘Con gritamento por yuda mi ora mi cai den man di un burdugu cu tin un solo cos den su mente?’ Pero mi a siña cu esei ta duna resultado!”

Asta den e caso lamentabel caminda un hende mohe ser domina y viola, su lucha y gritonan pa yudansa no ta pornada. Al contrario, esei ta demostra cu el a haci tur loke ta posibel pa resisti e violado. (Deuteronomio 22:26) Apesar cu el a pasa den e experencia teribel aki, ainda e por tin un consenshi limpi. E ta keda cu su dignidad, y e por ta sigur cu e ta limpi den bista di Dios. E experencia horibel kisas ta lag’e cu heridanan emocional, pero e echo cu e sa cu el a haci tur loke tawata posibel pa resisti e atake lo yud’e recupera pocopoco pero sigur.

Den nos afan pa compronde e aplicacion di Deuteronomio 22:23-27, nos tin cu realisa cu e relato cortico aki no ta trata cu tur posibel situacion. Por ehempel, e no ta comenta riba e situacion caminda e mohe ataca no por grita door cu e ta muda, inconciente of paralisa door di miedo; ni ora e haya su mes stroba door cu un man of tape ta tapa su boca. Sinembargo, siendo cu Yehova por evalua tur factor, incluso e motibonan, e por trata cu comprondemento y husticia den e casonan ei, pasobra “tur su camindanan ta husto.” (Deuteronomio 32:4) E ta bon na haltura di kico realmente a tuma luga y di e esfuersonan di parti di e victima pa resisti e violado. Pesei, un victima cu no por a grita pero cu si a haci tur loke tawata posibel bou dje circunstancianan ei, por laga e asunto den man di Yehova.—Salmo 55:22; 1 Pedro 5:7.

Pero toch algun mohe cristian cu a ser ataca y viola ta sufri sin fin pasobra nan ta sinti nan mes culpabel. Ora nan reflexiona riba loke a sosode, nan ta sinti cu nan mester a haci mas pa preveni e incidente. Sinembargo, en bes di culpa nan mes, e victimanan ei por resa na Yehova, pidie yuda nan y confia den su gran misericordia.—Exodo 34:6; Salmo 86:5.

Pesei, hende mohe cristian cu actualmente ta luchando cu heridanan emocional debi cu nan a ser viola, por tin e confiansa cu Yehova ta compronde perfectamente e sintimentonan penoso cu nan ta luchando cu ne. E Palabra di Dios ta sigura nan: “SEÑOR ta serca di e hende di curason kibra, y ta salba esnan di spirito abati.” (Salmo 34:18) Tambe nan por haya mas yudansa pa lucha cu nan trauma ora nan acepta e palabranan sinsero di comprension y e sosten bondadoso di nan rumannan den e congregacion cristian. (Job 29:12; 1 Tesalonicensenan 5:14) Ademas, si e victimanan mes haci esfuerso pa consentra riba pensamentonan edificante, esei lo yuda nan sinti “e pas di Dios, cu ta surpasa tur comprondemento.”—Filipensenan 4:6-9.

[Nota]