Kico e Cena di Señor Ta Nifica pa Bo?

“Ken cu come e pan aki of bebe e copa di Señor na un manera indigno lo ta culpabel di e curpa y sanger di Señor.”—1 CORINTIONAN 11:27.

1. Kico ta e evenemento mas importante plania pa aña 2003, y di unda el a origina?

E EVENEMENTO mas importante plania pa aña 2003 lo tuma luga dia 16 di april despues cu solo baha. E dia ei Testigonan di Yehova lo bini hunto pa conmemora e morto di Hesucristo. Manera e articulo anterior a mustra, Hesus a institui e celebracion aki, yama tambe e Cena di Señor, despues cu e y su apostelnan a celebra e Pasco Hudiu riba 14 di nisan di aña 33. E emblemanan di e Conmemoracion, esta e pan sin zuurdeeg y biña cora, ta simbolisa e curpa sin pica di Cristo y su sanger drama—e unico sacrificio cu por rescata humanidad for di pica hereda y morto.—Romanonan 5:12; 6:23.

2. Ki spiertamento 1 Corintionan 11:27 ta contene?

² Esnan cu ta tuma for di e emblemanan di e Conmemoracion mester haci esei na un manera digno. Apostel Pablo a splica e punto ei claramente ora el a skirbi e cristiannan na Corinto di antiguedad, caminda nan no tawata celebra e Cena di Señor na un manera corecto. (1 Corintionan 11:20-22) Pablo a skirbi: “Ken cu come e pan aki of bebe e copa di Señor na un manera indigno lo ta culpabel di e curpa y sanger di Señor.” (1 Corintionan 11:27) Kico e palabranan ei ta nifica?

Algun Tawata Celebr’e na un Manera Indigno

3. Con hopi cristian Corintio tawata comporta nan mes ora di celebra e Cena di Señor?

³ Hopi cristian di Corinto a tuma di e pan y e biña di Conmemoracion na un manera indigno. Tawatin desunion den nan, y por lo menos pa un tempo, algun a trece nan cena y com’e sea prome of durante e reunion, hopi bes comiendo y bebiendo di mas. Nan no tawata ni mentalmente ni spiritualmente alerta. Esaki a haci nan “culpabel di e curpa y sanger di Señor.” Esnan cu no a come prome na cas tawatin hamber y no a presta atencion. Si, hopi a tuma di e pan y e  biña na un manera sin respet y sin para keto na e seriedad di e ocasion. Nada straño cu nan a trece condenacion riba nan mes!—1 Corintionan 11:27-34.

4, 5. Pakico ta esencial pa esnan cu tin custumber di tuma di e emblemanan di Conmemoracion examina nan mes?

⁴ Tur aña, segun cu nos ta acercando e fecha di Conmemoracion, ta esencial pa cada ken cu tin custumber di tuma di e pan y e biña examina su mes. Pa un persona por participa den e cena di comunion aki na un manera apropiado, e mester ta den bon condicion spiritual. Ken cu ta falta respet, of mustra asta menosprecio pa e sacrificio di Hesus lo ta den peliger di ‘wordo corta kita for di Dios su pueblo’, mescos cu e Israelita cu a participa den un cena di comunion sin cu e tawata den un condicion puro.—Levitico 7:20; Hebreonan 10:28-31.

⁵ Pablo a compara e Conmemoracion cu un cena di comunion den Israel di pasado. El a bisa cu esnan cu ta tuma di e cena ta participa hunto den Cristo, anto el a agrega: “Boso no por bebe e copa di Señor y e copa di demoñonan; boso no por tuma parti na e mesa di Señor y na e mesa di demoñonan.” (1 Corintionan 10:16-21) Si un persona cu tin custumber di tuma di e emblemanan di  Conmemoracion comete un pica serio, e mester confesa esaki na Yehova y tambe busca yudansa spiritual di e ancianonan di e congregacion. (Proverbionan 28:13; Santiago 5:13-16) Si e ta berdaderamente repenti y ta produci fruta cu ta cuadra cu repentimento, lo e no ta participando na un manera indigno.—Lucas 3:8.

Asisti Como Observadonan Respetuoso

6. Pa ken Dios a reserva e privilegio di tuma di e Cena di Señor?

⁶ Esnan cu aworaki ta haciendo bon na e resto di e 144.000 rumannan di Cristo mester tuma di e Cena di Señor? (Mateo 25:31-40; Revelacion 14:1) No. Dios a reserva e privilegio ei pa personanan cu el a ungi cu spirito santo pa ta “coheredero cu Cristo.” (Romanonan 8:14-18; 1 Huan 2:20) Kico anto ta e posicion di esnan cu ta spera di biba pa semper den un paradijs mundial bou di gobernacion di e Reino? (Lucas 23:43; Revelacion 21:3, 4) Siendo cu nan no ta coheredero cu Hesus cu tin un speransa celestial, nan ta asisti na e Memorial como observadonan respetuoso.—Romanonan 6:3-5.

7. Pakico e cristiannan di prome siglo tawata sa cu nan mester a tuma di e pan y e biña di Conmemoracion?

⁷ Cristiannan berdadero den e prome siglo tawata ungi cu spirito santo. Hopi di nan tawata posee un of mas don milagroso di spirito, manera papia den lenga. Pesei lo no tawata dificil pa e personanan ei sa cu nan tawata ungi cu spirito y cu nan mester a tuma di e pan y e biña di Conmemoracion. Sinembargo, den nos tempo, por determina esaki a base di por ehempel e siguiente palabranan inspira: “Tur esnan cu ta wordo guia door di e spirito di Dios, esakinan ta yiunan di Dios. Pasobra boso no a ricibi un spirito cu ta haci boso esclabo di temor atrobe, ma boso a ricibi e spirito di adopcion como yiunan, pa medio di cual nos ta sclama: ‘Abba, Tata!’”—Romanonan 8:14, 15.

8. Ken “e trigo” y e “yerba shimaron” menciona den Mateo capitulo 13 ta representa?

⁸ Den transcurso di siglonan, e unginan berdadero a crece manera “trigo” den un tereno yen di “yerba shimaron”, of cristian falso. (Mateo 13:24-30, 36-43) For di e decada di 1870, e “trigo” a bira mas y mas bisto, y algun aña despues e cristiannan ungi cu tawata superintendente a haya e siguiente instruccion: “Ancianonan . . . mester splica esnan cu ta bini hunto [p’e Conmemoracion] e condicionnan aki: (1) nan mester tin fe den e sanger [di Cristo]; y (2) nan mester ta consagra na Señor y na su sirbishi te na morto. Despues nan mester invita tur persona cu tin e disposicion ei y cu ta consagra pa nan tambe tuma parti den e conmemoracion di e morto di Señor.”—Studio den e Scritura, Serie VI, E Creacion Nobo, pagina 473. *

Buscando e “Otro Carnenan”

9. Con e identidad di e “multitud grandi” a ser clarifica na 1935, y ki efecto esaki tawatin riba algun cu tawata tuma di e emblemanan di Conmemoracion?

⁹ Cu tempo, e organisacion di Yehova a cuminsa fiha atencion riba otronan ademas di e siguidonan ungi di Cristo. Un desaroyo notabel den e asunto aki a tuma luga meimei di e decada di 1930. Prome cu e tempo ei, e pueblo di Dios tawata mira e “multitud grandi” di Revelacion 7:9 como un clase spiritual secundario cu lo asocia hunto cu e 144.000 unginan resusita den shelo—manera bruidsmeisje of compañera di e bruid di Cristo. (Salmo 45:14, 15; Revelacion 7:4; 21:2, 9) Pero dia 31 di mei 1935, den un discurso duna na un congreso di Testigonan di Yehova na Washington, D.C., Merca, e orado a splica for di Bijbel cu e “multitud grandi” ta referi na e “otro carnenan” cu ta biba durante e tempo di fin. (Huan 10:16) Despues di e congreso ei, algun ruman cu antes tawata tuma di e emblemanan di Conmemoracion a stop di haci esei pasobra nan a realisa cu nan speransa tawata pa biba riba tera, no den shelo.

10. Con lo bo describi e speransa y e responsabilidadnan di e “otro carnenan” di e tempo actual?

¹⁰ Specialmente desde 1935 a cuminsa busca  esnan cu lo a bira e “otro carnenan”, personanan cu tin fe den e rescate, cu ta dedica nan mes na Dios y cu ta apoya e “tou chikito” di unginan den nan actividad di predica e Reino. (Lucas 12:32) E otro carnenan aki ta spera di biba riba tera pa semper, pero den tur otro sentido, nan ta mescos cu e resto di heredero di Reino di e tempo actual. Mescos cu e habitantenan stranhero den Israel di pasado cu a adora Yehova y a somete nan mes na e Lei, e otro carnenan djawe ta acepta responsabilidadnan cristian, manera e obra di predica e bon nobo hunto cu e miembronan di Israel spiritual. (Galationan 6:16) Pero, mescos cu ningun habitante stranhero no por a bira rei ni sacerdote di Israel, asina tambe ningun di e otro carnenan aki como tal por goberna den e Reino celestial of sirbi como sacerdote.—Deuteronomio 17:15.

11. Dicon e fecha di un persona su bautismo por influencia e speransa cu e ta carga?

¹¹ Pa e decada di 1930 anto, tawata bisto cu, por lo general, e clase celestial tawata completo. Awor pa mas cu 70 aña caba, ta buscando e otro carnenan, kendenan ta spera di biba riba tera. Si resulta cu un ungi bira infiel, muy probablemente un persona cu a sirbi Dios fielmente pa hopi tempo como un di e otro carnenan lo ser yama pa yena e bashi cu a ser crea den e 144.000.

Pakico Algun Ta Kere Eroneamente Cu Nan Lo Bai Shelo

12. Bou di ki circunstancia un persona mester stop di tuma di e pan y e biña di Conmemoracion y pakico?

¹² Cristiannan ungi ta shen porshento sigur cu nan tin e yamada celestial. Pero kico di algun persona cu no tin e yamada aki y cu ta tumando di e pan y e biña di Conmemoracion? Awor cu nan ta conciente cu nunca nan no tawatin e speransa di bai shelo, sigur nan consenshi lo motiva nan pa stop di tuma parti. Dios lo no keda contento cu esun cu ta representa su mes como un persona yama pa bira rei y sacerdote celestial sabiendo mucho bon cu e no a ricibi e yamada ei. (Romanonan 9:16; Revelacion 20:6) Yehova a ehecuta e Levita Core pasobra arogancia a pon’e cudisha e sacerdocio di Aron. (Exodo 28:1; Numbernan 16:4-11, 31-35) Si cualkier cristian realisa cu den su ignorancia el a tuma di e pan y e biña di Conmemoracion, e mester stop di tuma y humildemente pidi Yehova pordon’e.—Salmo 19:13.

13, 14. Pakico algun persona lo por kiboca nan mes y asumi cu nan a haya e yamada celestial?

¹³ Pakico algun persona kisas ta kere eroneamente cu nan tin e yamada celestial? Kisas e morto di nan casa of cualkier otro tragedia por pone nan perde interes den bida riba tera. Of kisas nan tin deseo di carga e mesun speransa cu un amigo stima cu ta afirma cu e ta un cristian ungi. Claro cu Dios no a encarga ningun hende pa busca otronan pa e privilegio aki. Y e no ta ungi heredero di Reino door di laga nan tende stem cu ta duna mensahe pa confirma cu esei a tuma luga.

¹⁴ E idea religioso falso cu tur bon hende ta bai shelo por pone algun persona pensa cu nan a haya e yamada pa bai shelo. Pesei, nos tin cu wak bon pa un punto di bista robes cu nos por tawatin den pasado of otro factornan no influencia nos. Por ehempel, algun di nos lo por puntra nos mes: ‘Mi ta uza remedi cu ta afecta mi emocionnan? Mi ta inclina na bira demasiado emocional y door di esei saca conclusionnan robes?’

15, 16. Pakico algun persona por conclui eroneamente cu nan ta ungi?

¹⁵ Kisas algun por puntra nan mes: ‘Mi kier ta un hende importante? Mi tin masha gana di haya autoridad awor of como futuro coheredero hunto cu Cristo?’ Ora Dios a reuni herederonan di Reino den prome siglo, no ta tur tawatin posicionnan di responsabilidad den e congregacion. Y personanan cu tin e yamada celestial no ta busca prominencia ni cana broma cu nan ta ungi. Nan ta desplega e humildad cu bo ta spera di esnan cu tin “e mente di Cristo.”—1 Corintionan 2:16.

¹⁶ Kisas algun persona a conclui cu nan tin e yamada celestial pasobra nan tin bastante conocemento di Bijbel. Pero e echo cu un persona ta  ungi cu spirito no ta dun’e un comprondemento extraordinario, pasobra Pablo mester a instrui y conseha cierto unginan. (1 Corintionan 3:1-3; Hebreonan 5:11-14) Dios tin su areglo pa duna alimento spiritual na henter su pueblo. (Mateo 24:45-47) Pues ningun hende mester pensa cu e echo cu e ta un cristian ungi ta dun’e un sabiduria superior cu esnan cu tin speransa di biba riba tera. No ta pasobra un persona ta hopi habil den contesta pregunta tocante Bijbel, duna testimonio of discurso biblico, e ta ungi cu spirito. Algun cristian cu tin speransa di biba riba tera tambe ta bon den e aspectonan aki.

17. Di kico y di ken ungimento cu spirito ta depende?

¹⁷ Si un ruman den fe kier sa algo tocante e yamada celestial, un anciano of otro cristian maduro por splic’e e asunto. Sinembargo, ningun hende por tuma e decision aki pa otro. Un persona cu berdaderamente tin e yamada aki no tin nodi puntra otronan si e tin tal speransa. E unginan “a nace di nobo, no di simiña cu ta coruptibel sino incoruptibel, esta, pa medio di e palabra di Dios cu ta biba y ta permanece pa semper.” (1 Pedro 1:23) Pa medio di su spirito y Palabra, Dios ta planta e “simiña” cu ta haci e persona “un criatura nobo” cu un speransa celestial. (2 Corintionan 5:17) Y ta Yehova ta esun cu ta scoh’e. E ungimento “no ta depende di e hende cu kier ni di e hende cu ta core, sino di Dios.” (Romanonan 9:16) Pesei con un persona por ta sigur cu e tin e yamada celestial?

Pakico Nan Ta Sigur

18. Con e spirito di Dios ta duna testimonio cu e spirito di cristiannan ungi?

¹⁸ E testimonio di e spirito di Dios ta combence cristiannan ungi cu nan tin speransa pa bai biba den shelo. Pablo a skirbi: “Boso a ricibi e spirito di adopcion como yiunan, pa medio di cual nos ta sclama: ‘Abba, Tata!’ E spirito mes ta duna testimonio hunto cu nos spirito cu nos ta yiu di Dios, y si nos ta yiu, nos ta heredero tambe, heredero di Dios y coheredero cu Cristo, si di berdad nos ta sufri hunto cu ne, pa nos wordo glorifica tambe hunto cu ne.” (Romanonan 8:15-17) E spirito santo ta influencia e spirito, of e inclinacion mental fuerte, di cristiannan ungi di tal manera cu den e profundidad di nan ser nan ta sinti nan impulsa pa aplica na nan mes loke e Scritura ta bisa tocante yiu spiritual di Yehova. (1 Huan 3:2) E spirito di Dios ta duna nan e sintimento cu nan ta yiu  di Dios y esei ta lanta den nan un speransa unico. (Galationan 4:6, 7) En berdad bida eterno riba tera como hende perfecto rondona pa famia y amigo lo ta algo magnifico, pero no ta esei ta e speransa cu Dios a duna nan. Pa medio di su spirito, Dios a produci den nan un speransa asina fuerte pa bai shelo cu nan ta dispuesto pa sacrifica tur conexion y speransa di keda riba tera.—2 Corintionan 5:1-5, 8; 2 Pedro 1:13, 14.

19. Ki papel e pacto nobo ta hunga den bida di un cristian ungi?

¹⁹ Cristiannan ungi ta sigur di nan speransa celestial, sigur cu nan a wordo inclui den e pacto nobo. Hesus a menciona esei ora el a institui e Conmemoracion. El a bisa: “E copa aki, cu a wordo drama pa boso, ta e aliansa nobo den mi sanger.” (Lucas 22:20) Esnan cu ta participa den e aliansa of pacto nobo ta Dios y cristiannan ungi. (Yeremias 31:31-34; Hebreonan 12:22-24) Hesus ta e mediado di e pacto nobo aki cu a drenta na vigor pa medio di su sanger drama. No solamente for di e Hudiunan sino tambe for di e nacionnan Yehova a forma un pueblo pa su nomber y a haci nan parti di e simiña of “desendiente” di Abraham. (Galationan 3:26-29; Echonan 15:14) E “aliansa eterno” aki ta permiti tur Israelita spiritual haya un resureccion pa bida inmortal den shelo.—Hebreonan 13:20.

20. Den ki pacto cu Cristo e unginan a ser inclui?

²⁰ E unginan ta sigur di nan speransa. Nan a ser inclui den un pacto adicional, e pacto di Reino. Relaciona cu nan participacion hunto cu Cristo, Hesus a bisa: “Boso ta esnan cu a permanece cu mi henter ora durante mi pruebanan; y mi ta sera un pacto cu boso, mescos cu mi Tata a sera un pacto cu mi, pa un reino.” (Lucas 22:28-30, NW) E pacto aki entre Cristo y su reinan socio ta keda na vigor pa semper.—Revelacion 22:5.

Temporada di Conmemoracion—Un Tempo di Bendicion

21. Con nos por saca gran beneficio for di e temporada di Memorial?

²¹ Den temporada di Memorial nos ta ricibi hopi bendicion. Nos por beneficia di e programa di lesa Bijbel pa e periodo aki. Tambe e ta un tempo specialmente apropiado pa haci oracion, pa medita riba Hesus su bida riba tera y su morto, y pa participa den e obra di predica e Reino. (Salmo 77:12; Filipensenan 4:6, 7) E celebracion mes ta recorda nos di e amor cu tanto Dios como Cristo a mustra en conexion cu e sacrificio di rescate di Hesus. (Mateo 20:28; Huan 3:16) E areglo aki ta duna nos speransa y consuelo y mester fortalece nos determinacion pa sigui cana den e caminda di Cristo. (Exodo 34:6; Hebreonan 12:3) Tambe e Conmemoracion mester fortalece nos pa cumpli cu nos dedicacion como sirbido di Dios y pa ta siguidonan leal di su Yiu stima.

22. Kico ta e regalo di mas grandi cu Dios a duna humanidad, y cua ta un di e maneranan cu nos por mustra aprecio p’e?

²² Yehova si a duna nos bon regalo! (Santiago 1:17) Nos tin e guia di su Palabra, e yudansa di su spirito, y e speransa di bida eterno. E regalo di mas grandi di Dios ta Hesus su sacrificio pa e picanan di cristiannan ungi y pa tur otro persona cu ta eherce fe. (1 Huan 2:1, 2) Pues cuanto e morto di Hesus ta nifica pa bo? Abo lo ta entre esnan cu ta mustra gratitud p’e door di ta presente despues cu solo baha dia 16 di april 2003, pa celebra e Cena di Señor?

[Nota]

Kico Bo Ta Contesta?

• Ken mester tuma di e emblemanan di Conmemoracion?

• Pakico e “otro carnenan” ta asisti na e Cena di Señor solamente como observadonan respetuoso?

• Con cristiannan ungi por sa cu nan mester tuma di e pan y e biña na e Conmemoracion di e morto di Cristo?

• E temporada di e Conmemoracion ta un tempo apropiado pa haci kico?

[Preguntanan di Estudio]

[Grafiek/Plachi na pagina 18]

(Pa texto na fomato completo, wak publicacion)

Asistencia na Memorial

NA MION

15,597,746

15

14

13,147,201

13

12

11

10

 9

 8

 7

 6

 5

4,925,643

 4

 3

 2

 1

878,303

63,146

1935 1955 1975 1995 2002

[Plachi na pagina 18]

Abo lo ta presente pa e Cena di Señor e aña aki?

[Plachi na pagina 21]

E temporada di Memorial ta un tempo apropiado pa aumenta nos lesamento di Bijbel y nos participacion den e obra di predica e Reino