No Laga e Curason di Bo Yiu pa Su Cuenta!

UN BON trahado di pochi di klei (un alfarero) por transforma un clompi di klei sin balor den un bunita obra di arte. Masha poco artesano por logra cosnan bunita y util for di algo asina insignificante. Pa miles di aña, sosiedad humano a depende di alfarero pa traha copi, tayo, weya pa cushina, pochi pa warda cos aden y vas pa pronk.

Mayornan tambe ta duna un aporte sumamente balioso na comunidad door di forma e caracter y personalidad di nan yiunan. Bijbel ta compara cada un di nos cu klei, y Dios a asigna mayornan cu e tarea importante di forma e “klei” di nan yiunan. (Job 33:6; Genesis 18:19) Mescos cu no ta facil pa crea un bunita obra di ceramica, asina tambe no ta un tarea facil pa transforma un mucha den un adulto responsabel y balansa. E transformacion ei no ta tuma luga pa casualidad.

Curason di nos yiunan ta bou di varios influencia fuerte. Desafortunadamente, algun di e influencianan aki ta destructivo. Pesei en bes di laga curason di yiu pa su cuenta, un mayor sabi lo instrui e mucha “den e caminda cu e mester cana”, cu e confiansa cu “ora cu e bira bieu e lo no aparta su mes for di dje.”—Proverbionan 22:6.

Durante e proceso largo, excitante y importante aki di cria un mucha, mayornan cristian sabi lo dedica tempo na resisti e influencianan negativo cu ta menasa curason di nan yiu. E tarea di mayornan di duna yiu “e instruccion, y e coreccion, cu ta pertenece na un criansa cristian”, compaña cu pasenshi, lo pone nan amor seriamente na prueba. (Efesionan 6:4, New English Bible) Claro cu esaki lo ta hopi mas facil si nan cuminsa tempran den bida di nan yiu.

Cuminsa for di Tempran

Alfarero gusta traha cu klei cu ta suficiente moli pa dun’e forma y toch basta firme pa wanta e forma cu nan dun’e. Despues di rafina e klei, nan ta prefera di uz’e denter di seis luna.  Asina tambe, e miho tempo pa mayornan cuminsa forma curason di nan yiu ta ora e ta mas receptivo y facil pa forma.

Expertonan di mucha ta bisa cu pa ora un mucha tin ocho luna, ya caba el a siña reconoce e zonidonan di su idioma natal, el a forma un banchi cu su mayornan, a desaroya e habilidad di distingui cosnan y a cuminsa explora e mundo rond di dje. E tempo ideal pa cuminsa forma su curason ta ora e ta chikito ainda. Bo yiu lo tin un gran bentaha si mescos cu Timoteo, e ‘conoce e scrituranan santo for di infancia’!—2 Timoteo 3:15. *

Di naturalesa baby ta imita nan mayornan. Fuera di imita zonido, expresion y gesto, nan ta siña tocante amor, bondad y compasion ora nan mira nan mayornan desplega e cualidadnan aki. Si nos kier instrui nos yiunan di acuerdo cu e leinan di Yehova, e mandamentonan di Dios mester resulta di ta den nos curason prome. Tal aprecio sinsero pa e leinan di Dios lo motiva mayornan pa papia cu nan yiunan regularmente tocante Yehova y tocante su Palabra. Bijbel ta conseha pa “papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:6, 7) Francisco cu Rosa ta splica con nan ta haci esaki cu nan dos yiu chikitonan. *

“Fuera di nos combersacionnan diario, nos ta purba papia cu cada un di nos yiunan pa por lo menos 15 minuut tur dia. Ora nos sinti cu tin un problema nos ta dedica mas tempo, y problema no ta falta. Por ehempel, nos yiu homber di cinco aña poco dia ei a bini cas for di scol y a bisa nos cu e no ta kere den Yehova. Parce cu un di e muchanan den su klas a haci bofon di dje y a bisa cu Dios no ta existi.”

E mayornan aki a realisa cu mucha mester cultiva fe den nan Creador. Ya cu mucha di naturalesa ta keda fasina cu e creacion di Dios, nos por uza esei pa cultiva nan fe. Mucha gusta mishi cu bestia, piki flor den mondi of hunga den santo canto di lama! Mayornan por yuda nan mira cu ta e Creador a traha tur e cosnan ei. (Salmo 100:3; 104:24, 25) Henter nan bida nan por keda cu e admiracion y respet cu nan ta desaroya pa Yehova su creacion. (Salmo 111:2, 10) Hunto cu e aprecio ei, e mucha por cultiva e deseo pa agrada Dios y e temor di desagrad’e. Esaki lo motiv’e pa “keda leu for di maldad.”—Proverbionan 16:6.

Aunke mayoria mucha chikito ta caweta y lihe pa siña, kisas nan no ta inclina na obedece. (Salmo 51:5) Nan sa gusta haya nan kier of tur loke nan ta desea. Mayornan mester tin firmesa y pasenshi y uza disiplina pa evita cu e actitudnan aki ta saca raiz den e mucha su caracter. (Efesionan 6:4) Phyllis cu Paul, kendenan tawatin bon resultado den lanta cinco yiu, a experencia esaki.

Phyllis ta corda: “Aunke cada yiu tawatin nan propio personalidad, cada un di nan tawata kier pa cos bai na su manera. Den esei si tur tawata mescos. Tawata dificil, pero toch cu tempo nan a siña kico e palabra ‘no’ ta nifica.” Paul, casa di Phyllis, a bisa: “Hopi bes, nos tawata duna nan e motibo pa nos decision si nan tawata suficiente grandi pa compronde  esei. Aunke semper nos a purba di ta bondadoso, nos a siña nan respeta e autoridad cu Dios a duna nos.”

Aunke un mucha su añanan di formacion por causa problema p’e, mayoria mayor ta haya cu e reto di mas grandi ta bini durante e añanan cu nan ta teenager, ora cu nan curason inmaduro ta confronta pruebanan nobo.

Con pa Yega na Curason di un Teenager

E alfarero mester traha cu e klei prome cu e seca. Pa duna su mes mas tempo, e por agrega awa pa tene e klei muha y moli. Asina tambe, mayornan mester haci hopi esfuerso pa evita cu e curason di nan yiu teenager ta bira duro. Nan herment principal ta naturalmente Bijbel, cu cua nan por ‘reprende, corigi y ekipa nan yiu pa tur bon obra.’—2 Timoteo 3:15-17.

Sinembargo, un teenager kisas no ta acepta e conseho di su mayornan mes facil cu tempo e tawata mas chikito. Teenagernan por cuminsa paga mas tino na nan pareunan, y door di esei e comunicacion franco y spontaneo cu nan mayornan ta cuminsa stanca. Segun cu e papel di mayor y yiu ta drenta un etapa nobo, ta bira tempo pa mayornan desplega mas pasenshi y habilidad. E teenager mester acepta y custumbra cu cambionan fisico y emocional. E tin cu cuminsa tuma decisionnan y pone metanan cu por afecta e resto di su bida. (2 Timoteo 2:22) Y durante henter e periodo dificil aki, e tin cu trata cu un influencia cu por tin efectonan desastroso riba su curason: presion di su pareunan.

Masha poco bes e presion ei ta bisto na un solo incidente remarcabel. Mas bien, e presion ei por lo general ta ser expresa den un serie di comentario y situacion cu ta debilita un teenager su confiansa den loke e tawata considera di ta berdad y importante. E comentarionan y situacionnan aki ta ataca loke pa hopi teenager ta un punto debil: un miedo profundo di ser rechasa door di otro hobennan. Un hoben cu ta lucha cu berguensa y ta desea di ser acepta, lo por cuminsa apoya “e cosnan cu tin den mundo” cu otro hobennan ta promove.—1 Huan 2:15-17; Romanonan 12:2.

Loke por empeora e situacion ta cu e deseonan natural di e hoben su curason imperfecto por duna mas forsa na e influencia di su pareunan. Por ehempel, lemanan manera “bo mester gosa un poco” y “haci loke abo kier” por zona masha atractivo. María ta corda kico a pasa cu ne: “Mi a scucha otro teenagernan bisa cu como hoben bo tin derecho di gosa bai gol, sin importa e consecuencianan. Como cu mi kier a haci loke mi amiganan di scol tawata  haci, mi a hera di haya mi den problema masha serio.” Como mayor bo kier yuda bo yiu teenager resisti e presion ei, pero con bo por hacie?

Cu palabra y accion, sigura bo yiu bes tras bes cu bo ta interesa den dje. Haci esfuerso pa haya sa kico e ta pensa di cierto asuntonan, y purba compronde su problemanan, problemanan cu probablemente ta hopi mas dificil cu esnan cu abo a confronta na scol. Specialmente durante e periodo aki bo yiu mester mira bo como un persona cu e por confia. (Proverbionan 20:5) Na e señalnan cu e ta duna cu su curpa of na su beis lo bo por ripara su angustia of confusion. Responde na e gritonan silencioso aki, y ‘curasha su curason.’—Colosensenan 2:2.

Claro cu ta importante pa mustra firmesa pa loke ta corecto. Hopi mayor a nota cu de bes en cuando ta como si fuera tin un bataya ken su boluntad ta mas fuerte, pero nan no por entrega ora nan decision ta bon funda. Di otro banda, haci sigur cu bo ta compronde e situacion claramente prome cu bo dicidi si mester duna disiplina amoroso of no, y con mester dun’e si ta necesario.—Proverbionan 18:13.

Prueba Asta for di den Congregacion

Un pochi di klei por parce cla, pero si no lag’e horna den forno, net e likidonan cu e mester carga por dañ’e. Bijbel ta compara prueba y dificultad cu e proceso ei di horna den forno, ya cu e pruebanan ta demostra ki sorto di hende nos ta realmente. Claro cu Bijbel ta papia specialmente di pruebanan di nos fe, pero den un sentido general, e punto aki ta conta tambe pa otro pruebanan. (Santiago 1:2-4) Pa straño cu por parce, algun di e pruebanan dificil cu hobennan ta confronta kisas ta sali for di den congregacion.

Aunke bo yiu teenager ta parce di ta den bon condicion spiritual, den su mes kisas e ta lucha cu un curason dividi. (1 Reinan 18:21) Por ehempel, Megan a hay’e cu ideanan mundano cu a bini di otro hobennan cu tawata bai Salon di Reino. El a conta:

“Mi a haya mi bou di influencia di un grupo di hoben cu a mira e bida cristian como laf y algo cu a stroba nan di gosa. Nan tawata bisa por ehempel: ‘Manera mi haci 18 aña, mi ta sali for di e berdad’, of ‘Mi ta pura pa bai pa caba.’ Nan tawata evita hobennan cu no tawata di acuerdo cu nan, y tawata yama nan ‘santo.’”

Un of dos hoben so caba por stimula un mal actitud den e restonan. Personanan den un grupo normalmente ta haci loke e mayoria ta haci. Bobedad y hungamento di tof por pone hende pasa por halto di sabiduria y decencia. Den hopi pais tawatin casonan tristo di hobennan cristian cu a haya nan mes den problema pasobra nan a bai tras di loke mayoria a haci.

 Ta claro cu teenagernan tin mester di un cierto cantidad di asociacion agradabel. Con abo como mayor por percura pa esei? Pensa seriamente riba nan recreo, y plania actividadnan cu e famia of cu un grupo di hoben y adulto. Siña conoce e amigonan di bo yiu. Invita nan pa come cu boso of pasa un anochi hunto cu nan. (Romanonan 12:13) Anima bo yiu pa haci algo sano, manera siña toca un instrumento of siña un otro idioma of un obra di man. Pa gran parti lo e por haci esaki den e ambiente safe di cas.

Edukashon Por Ta un Proteccion

E educacion di un teenager tambe por yud’e mantene recreo na su luga. Loli, kende pa 20 aña a traha den administracion di un scol grandi, a bisa: “Mi a mira masha hopi hoben Testigo na scol. E conducta di hopi di nan tawata digno di elogio, pero algun di nan si tawata dificil pa distingui for di e otro alumnonan. Esnan cu tawata bon ehempel semper tawata esnan cu a mustra interes den nan lesnan. Lo mi kier conseha mayornan pa demostra un interes activo den e progreso di nan yiunan na scol, tambe siña conoce nan maestronan, y combence nan yiunan cu ta importante pa nan haya un bon raport. Algun hoben lo sobresali, pero tur por yega na nivelnan satisfactorio y gana e respet di nan maestronan.”

E educacion ei por yuda teenagernan tambe pa progresa den sentido spiritual. Nan ta siña bon custumber di studia, disiplina mental y un sentido di responsabilidad. Nan habilidad di lesa bon y di capta e ideanan principal, sin duda lo anima nan pa ta miho studiante y maestro di e Palabra di Dios. (Nehemias 8:8) E exigencianan di nan tareanan di scol y di nan actividadnan spiritual por yuda pone recreo na su debido luga.

Un Fuente di Honor pa Boso Como Mayor y pa Yehova

Den antiguo Grecia hopi vas tawatin e firma di tanto e alfarero como di esun cu a decor’e. Asina tambe ta den famia. Por lo general tin dos persona cu ta yuda forma e muchanan. Tanto e tata como e mama ta yuda forma curason di un yiu, y figurativamente boso yiu ta carga ambos “firma.” Mescos cu un alfarero exitoso, y un decorado, boso por ta orguyoso di boso trabou di forma un hoben den un persona digno y bunita.—Proverbionan 23:24, 25.

E exito di e gran proyecto aki lo depende principalmente di te na ki grado boso a forma curason di boso yiu. Nos ta spera cu boso lo por bisa: “E lei di su Dios ta den su curason; su pianan no ta slip.” (Salmo 37:31) E condicion di un yiu su curason ta mucho importante pa boso lag’e pa su cuenta.

[Nota]