Pakico Celebra e Cena di Señor?

“Mi a ricibi di Señor loke mi a entrega na boso tambe.” —1 CORINTIONAN 11:23.

1, 2. Kico Hesus a haci riba e anochi di Pasco Hudiu di aña 33 di nos era?

YEHOVA su Yiu unigenito tawata presente. Tambe tawatin 11 homber cu ‘a keda na su lado den su pruebanan.’ (Lucas 22:28) Tawata un diahuebs anochi, 31 di maart di aña 33 di nos era, y luna yen muy probablemente a dorna e shelo riba Herusalem. Hesucristo y su apostelnan a caba di celebra e Pasco Hudiu. Hesus a manda e traido Hudas Iscariot bai, pero e otronan si mester a keda un rato mas. Pakico? Pasobra Hesus tawata a punto di haci algo masha importante. Di kico nos ta papiando?

² Mateo, un di e escritornan di Evangelio, tambe tawat’ei. Pakico no lag’e conta nos? El a skirbi: “Hesus a cohe pan, y despues di a bendicion’e, el a kibr’e y a duna su disipelnan y a bisa: ‘Tuma, come; esaki ta mi curpa.’ Y despues cu el a cohe un copa y a duna gradicimento, el a duna nan esei, bisando: ‘Boso tur bebe for di dje; pasobra esaki ta mi sanger di e aliansa, cu ta wordo drama pa hopi pa pordon di pica.’” (Mateo 26:26-28) Ta un biaha so e cena aki mester a tuma luga? Kico el a nifica? E ta nifica algo pa nos awe?

‘Sigui Haci Esaki’

3. Dicon loke Hesus a haci riba e anochi di 14 di nisan di aña 33 tawata importante?

³ Loke Hesucristo a haci riba e anochi di 14 di nisan di aña 33 no tawata djis un incidente pasahero den su bida. Apostel Pablo a referi na dje ora el a skirbi e cristiannan ungi na Corinto, caminda ainda nan tawata sigui cu e celebracion pa mas cu 20 aña caba. Aunke Pablo no tawata hunto cu Hesus cu e 11 apostelnan na aña 33, sin duda algun di e apostelnan a cont’e loke a pasa na e ocasion ei. Ademas, tur cos ta indica cu Pablo a haya confirmacion di algun aspecto di e suseso ei pa medio di un revelacion dibino. Pablo a bisa: “Mi a ricibi di Señor loke  mi a entrega na boso tambe, cu Señor Hesus, riba e anochi cu el a wordo traiciona, a cohe pan; y ora cu el a caba di duna gradicimento, el a kibr’e, y a bisa: ‘Esaki ta mi curpa cu ta wordo kibra pa boso; [“sigui”, NW] haci esaki na mi recuerdo.’ Di e mesun manera el a cohe e copa tambe, despues di a caba di cena, bisando: ‘E copa aki ta e aliansa nobo den mi sanger; haci esaki, cada bes cu boso beb’e, na mi recuerdo.’”—1 Corintionan 11:23-25.

4. Pakico cristiannan mester celebra e Cena di Señor?

⁴ Lucas, otro escritor di Evangelio, ta confirma loke Hesus a manda: “Haci esaki na mi recuerdo.” (Lucas 22:19) Otro versionnan di Bijbel a traduci e palabranan aki como: “Hacie pa boso corda riba mi” (Beibel na papiamentu koriente) y “Haci esaki na memoria di mi.” (Today’s English Version) De echo, hopi biaha nos ta referi na e celebracion aki como e Conmemoracion (of Memorial) di e morto di Cristo. Tambe Pablo ta yam’e e Cena di Señor. (1 Corintionan 11:20) Pues nos ta mira cu Bijbel ta manda cristiannan celebra e Cena di Señor. Awor dicon Hesus a institui e celebracion aki?

Pakico El A Ser Institui

5, 6. (a) Kico ta un di e motibonan pakico Hesus a institui e Conmemoracion? (b) Duna un motibo mas pakico e Cena di Señor a ser institui.

⁵ Un di e motibonan pakico Hesus a institui e Conmemoracion aki tawatin di aber cu loke el a logra cu su morto. Cu su morto el a mustra cu ta su Tata celestial so tin derecho di ta Soberano. Di e manera ei Cristo a demostra cu Satanas e Diabel, kende a lansa e acusacion falso cu hende ta sirbi Dios solamente pa motibonan egoista, ta un mentiroso. (Job 2:1-5) E echo cu Hesus a muri fiel a duna prueba cu e pretencion aki ta falso y asina el a haci Yehova su curason contento.—Proverbionan 27:11.

⁶ Un otro motibo pakico Hesus a institui e Cena di Señor tawata pa recorda nos cu pa medio di su morto como un hende perfecto sin pica, Hesus a “duna su bida como prijs di rescate pa hopi.” (Mateo 20:28) Ora e prome homber a peca contra Dios, el a perde su bida humano perfecto y a benta henter su futuro afo. Sinembargo, Hesus a bisa: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Si, “pago di pica ta morto, ma e don di gracia di Dios ta bida eterno den Cristo Hesus, nos Señor.” (Romanonan 6:23) E celebracion di e Cena di Señor ta recorda nos di e gran amor cu tanto Yehova como su Yiu a demostra en conexion cu e morto di Hesus como sacrificio. Nos mester ta masha gradicido pa e amor ei!

Ki Dia Mester Celebr’e?

7. Den ki sentido cristiannan ungi ta tuma di e emblemanan di Conmemoracion “cada bes”?

⁷ Pablo a bisa relaciona cu e Cena di Señor: “Cada bes cu boso come e pan aki y bebe e copa aki, boso ta proclama e morto di Señor te ora cu e bin.” (1 Corintionan 11:26) Cada cristian ungi lo a tuma di e emblemanan (e pan y biña) di Conmemoracion te na nan morto. Di e manera ei, den bista di Yehova Dios y di mundo, bes tras bes nan ta proclama nan fe den Dios su areglo di e sacrificio di rescate di Hesus.

8. Pa cuanto tempo e grupo di cristian ungi mester a celebra e Cena di Señor?

⁸ Pa cuanto tempo e grupo di cristian ungi lo a celebra e Conmemoracion di e morto di Cristo? “Te ora cu e bin”, Pablo a bisa, indicando claramente cu e celebracionnan aki lo a sigui te ora Hesus bini pa ricibi su siguidonan ungi den shelo mediante un resureccion durante su “presencia.” (1 Tesalonicensenan 4:14-17, NW) Esaki ta na harmonia cu loke Hesus a bisa e 11 apostelnan leal na dje: “Ora mi bai y prepara un luga pa boso, lo mi bin atrobe y ricibi boso serca mi, pa caminda ami ta, boso tambe por ta.”—Huan 14:3.

9. Kico e palabranan di Hesus cu ta para skirbi na Marco 14:25 ta nifica?

⁹ Ora Hesus a institui e Memorial, el a referi na e copa di biña y a bisa su apostelnan fiel:  “Lo mi no bebe mas di e fruta di e mata di wendruif, te na e dia ei cu mi beb’e nobo den e reino di Dios.” (Marco 14:25) Claro cu Hesus lo no bebe biña mes den shelo. Obviamente, e tawatin na mente loke biña sa representa: goso. (Salmo 104:15; Eclesiastes 10:19) E experencia gososo di por ta hunto den e Reino ta algo cu tanto Hesus como su siguidonan a anhela cu gran espectativa.—Romanonan 8:23; 2 Corintionan 5:2.

10. Cu ki frecuencia mester celebra e conmemoracion?

¹⁰ Cristiannan mester conmemora Hesus su morto tur luna, tur siman of asta tur dia? No. Hesus a institui e Cena di Señor y a ser mata riba e Pasco Hudiu. Riba e dia ei Hudiunan tawata ‘conmemora’ nan liberacion for di sclabitud na Egipto na aña 1513 prome cu nos era. (Exodo 12:14) Nan tawata celebra e Pasco Hudiu solamente un biaha pa aña, dia 14 di e luna nisan segun kalender Hudiu. (Exodo 12:1-6; Levitico 23:5) Esaki ta indica cu mescos cu e Pasco Hudiu, ta un biaha pa aña so mester conmemora e morto di Hesus, y no tur luna, tur siman of tur dia.

11, 12. Kico historia ta revela tocante celebracion di e Conmemoracion na principio di nos era?

¹¹ Ta na su luga anto pa celebra e Conmemoracion tur aña riba 14 di nisan. Un enciclopedia ta bisa: “Nan tawata yama e cristiannan di Asia Menor cuartodecimonan [e di diescuaternan] pa motibo di nan custumber di celebra e pascha [Cena di Señor] semper riba 14 di nisan . . . E dia por cai riba diabierna of cualkier otro dia di siman.”—The New Schaff-Herzog Encyclopedia of Religious Knowledge, Volumen IV, pagina 44.

¹² Comentando riba e custumber ei di siglo 2 di nos era, historiado J. L. von Mosheim ta bisa cu e cuartodecimonan tawata celebra e Conmemoracion riba 14 di nisan pasobra “pa nan, e ehempel di Cristo tawatin e autoridad di un lei.” Un otro historiado ta declara: “E custumber di e iglesianan cuartodecimo di Asia tawata mescos cu esun di e iglesia di Herusalem. Den siglo 2, riba nan dia di Pascha, 14 di nisan, e iglesianan aki tawata conmemora e liberacion cu e morto di Cristo a efectua.”—Studia Patristica, Volumen V, 1962, pagina 8.

Nificacion di e Pan

13. Ki tipo di pan Hesus a uza ora el a institui e Cena di Señor?

¹³ Ora Hesus a institui e Conmemoracion, “el a cohe pan, y despues di a bendicion’e, el a kibr’e y a duna [e apostelnan].” (Marco 14:22) E pan cu tawatin na e ocasion ei tawata e mesun pan cu nan a caba di uza pa e Pasco Hudiu. (Exodo 13:6-10) E tawata plat y bros como cu nan a trah’e sin zuurdeeg (yeast), y pesei Hesus mester a kibr’e pa partie. Na e ocasion cu Hesus a haci milager y multiplica pan pa miles di hende, tambe tawata trata di un pan manera buscuchi pasobra el a kibr’e pa por a repartie. (Mateo 14:19; 15:36) Esei ta mustra anto cu e acto di kibra e pan di Conmemoracion aparentemente no tawata un rito religioso.

14. (a) Pakico ta apropiado cu e pan di Conmemoracion ta sin zuurdeeg? (b) Ki clase di pan por cumpra of prepara na cas pa uza na e Cena di Señor?

¹⁴ Relaciona cu e pan cu Hesus a uza ora el a institui e Conmemoracion, el a bisa: “Esaki ta mi curpa cu ta wordo kibra pa boso.” (1 Corintionan 11:24; Marco 14:22) E echo cu e pan no tawatin zuurdeeg tawata masha apropiado. Dicon? Pasobra zuurdeeg por nifica malicia, maldad of pica. (1 Corintionan 5:6-8) E pan a representa e curpa humano perfecto y sin pica di Hesus, cu tawata adecua pa ser ofreci como un sacrificio di rescate. (Hebreonan 7:26; 10:5-10) Testigonan di Yehova ta tene esaki na mente y ta sigui e ehempel cu Hesus a pone door di uza pan sin zuurdeeg na nan celebracionnan di Memorial. Den algun caso, nan ta uza matzo, un buscuchi Hudiu cu no tin ningun ingrediente adicional manera siboyo of webo. Of, na cas mes nan por traha pan sin zuurdeeg cu un tiki hariña di grano integral (caminda ta posibel, por uza hariña di trigo) mescla cu poco awa. Mester pasa rol riba e mansa hacie plat y  horn’e riba un plancha hunta cu poco azeta te ora e pan seca y bira bros.

Nificacion di e Biña

15. Kico tawatin den e copa ora Cristo a institui e Conmemoracion di su morto?

¹⁵ Despues cu Hesus a pasa e pan sin zuurdeeg, el a tuma un copa, “duna gradicimento, [i] a duna [su apostelnan]; y nan tur a bebe for di dje.” Hesus a splica: “Esaki ta mi sanger di e aliansa, cu ta wordo drama pa hopi.” (Marco 14:23, 24) Kico tawatin den e copa? Biña, y no juice di wendruif cu no a fermenta. Ora e Scritura ta referi na biña, e no kiermen e juice di wendruif. Por ehempel, ta biña cu fermenta ta rementa “saco-di-cuero bieu”, manera Hesus a bisa, y no juice di wendruif. Y Cristo su enemigonan a acus’e cu e ta “un burache.” Si e biña tawata djis un juice di wendruif, e acusacion ei lo no tawatin sentido. (Mateo 9:17; 11:19) Nan a bebe biña durante e celebracion di e Pasco Hudiu, y Cristo a uz’e ora el a institui e Conmemoracion di su morto.

16, 17. Ki clase di biña ta adecua pa celebracion di e Conmemoracion y pakico?

¹⁶ Ta biña cora so ta un simbolo adecua di loke e contenido di e copa a representa, esta, Hesus su sanger drama. E mes a bisa: “Esaki ta mi sanger di e aliansa, cu ta wordo drama pa hopi.” Y apostel Pedro a skirbi cristiannan ungi: “[Boso sa cu] boso no a wordo redimi cu cosnan cu ta perece, manera plata of oro, for di boso manera vano di biba cu boso a hereda di boso antepasadonan, ma cu sanger precioso, como di un Lamchi sin defecto y sin mancha, e sanger di Cristo.”—1 Pedro 1:18, 19.

¹⁷ Sin duda Hesus a uza biña cora di wendruif ora el a institui e Conmemoracion. Sinembargo, algun biña cora djawe ta inaceptabel pasobra esnan cu ta traha nan a haci nan mas sterki door di agrega alcohol of brandy. Of tambe nan sa agrega yerba of specerij na nan. E sanger di Hesus tawata completamente suficiente. No tawatin nodi agrega nada na dje. Pesei biña manera sherry of vermouth no ta adecua. E copa di Conmemoracion mester contene biña cora sin sucu y sin nada otro pa hacie sterki. Por uza biña cora traha na cas y tambe biña manera burgundy cora y claret.

18. Pakico Hesus no a haci un milager y cambia e pan cu e biña di Conmemoracion?

¹⁸ Ora Hesus a institui e cena aki, e no a haci un milager, cambiando e emblemanan den su carni y sanger literal. Comemento di carni y bebemento di sanger lo ta canibalismo, un violacion di e lei di Dios. (Genesis 9:3, 4; Levitico 17:10) Riba e anochi ei ainda Hesus tawatin su curpa completo y tur su sanger. Ta e traimerdia di e siguiente dia (cu segun e kalender Hudiu ainda tawata 14 di nisan) su curpa a ser ofreci como sacrificio perfecto, y su sanger a ser drama. Pesei e pan y e biña di Conmemoracion ta un simbolo. Nan a representa e carni y sanger di Cristo. *

E Conmemoracion—Un Cena di Comunion

19. Pakico lo por uza mas cu un scalchi y kelki durante e celebracion di e Cena di Señor?

¹⁹ Ora Hesus a institui e Conmemoracion, el  a invita su fiel apostelnan pa bebe for di e mesun copa. E Evangelio di Mateo ta bisa: “[Hesus] a cohe un copa y a duna gradicimento, el a duna nan esei, bisando: ‘Boso tur bebe for di dje.’” (Mateo 26:27) No tawata problema pa nan a uza “un copa” so en bes di varios, pasobra na e ocasion ei tawatin solamente 11 participante sinta aparentemente na un solo mesa y pesei lo por a pasa e copa facilmente di un pa otro. E aña aki, miyones di hende lo reuni pa e Cena di Señor den mas cu 94.000 congregacion di Testigonan di Yehova rond mundo. Cu asina tanto reunion pa e celebracion aki riba e mesun anochi, ta imposibel pa uza un copa so pa tur hende. Den congregacionnan grandi e principio ta keda mescos y ta uza varios copa pa representa Hesus su sanger drama di manera cu por pasa nan den auditorio den un tempo rasonabel. Mescos tambe, por uza mas cu un scalchi pa pasa e pan. Bijbel no ta duna ningun indicacion cu e copa of kelki mes mester cuadra cu cierto diseño. Pero tanto e kelki como e scalchi mester refleha e dignidad di e ocasion. Ta sabi pa no yena e kelkinan mucho. Asina ta evita cu nan ta basha ora di pasa e biña.

20, 21. Pakico nos por bisa cu e Conmemoracion ta un cena di comunion?

²⁰ Aunke por uza mas cu un scalchi di pan y mas cu un kelki di biña, e Conmemoracion ta un cena di comunion. Den Israel di pasado, un hende por a percura un cena di comunion door di trece un animal na e santuario di Dios caminda el a ser mata. Parti di e animal tawata ser kima riba e altar, un parti a bai pa e sacerdote encarga cu e ofrenda y un otro parti a bai pa e yiunan di Aron cu tawata sacerdote. Esun cu a haci e ofrenda y tambe su famia a participa den e cena. (Levitico 3:1-16; 7:28-36) * E Conmemoracion tambe ta un cena di comunion pasobra tur persona envolvi ta comparti cu otro.

²¹ Yehova ta participa den e cena di comunion aki como e Autor di e areglo. Hesus ta e sacrificio, y cristiannan ungi ta tuma di e emblemanan como coparticipante. E echo cu nan ta come na e mesa di Yehova ta nifica cu nan ta na pas cu ne. Na harmonia cu esei, Pablo a skirbi: “E copa di bendicion cu nos ta bendiciona, no ta un comunion e ta den e sanger di Cristo? E pan cu nos ta kibra, no ta un comunion e ta den e curpa di Cristo? Pasobra nos, siendo hopi, ta un pan y un curpa; pasobra nos tur ta tuma parti na esun pan ei.”—1 Corintionan 10:16, 17.

22. Ki pregunta tocante e Conmemoracion nos tin cu contesta ainda?

²² E Cena di Señor ta e unico celebracion religioso cu Testigonan di Yehova ta tene tur aña. Esaki ta apropiado pasobra Hesus a manda su siguidonan: “Haci esaki na mi recuerdo.” Na Memorial, nos ta conmemora e morto di Hesus, un morto cu a proba cu ta Yehova so tin derecho di ta Soberano. Manera nos a mira, na e cena di comunion aki, e pan ta nifica e curpa humano cu Cristo a sacrifica y e biña ta nifica e sanger cu el a drama. Pero ta masha poco persona ta tuma di loke e pan y e biña a simbolisa. Dicon? E Conmemoracion ta nifica algo pa e miyones di otro hendenan cu no ta tuma di e emblemanan? Si, kico e Cena di Señor mester nifica pa bo?

[Nota]

Con Bo Ta Contesta?

• Pakico Hesus a institui e Cena di Señor?

• Cu ki frecuencia mester celebra e Conmemoracion?

• Kico e pan sin zuurdeeg cu ta ser uza durante e Conmemoracion ta nifica?

• Kico e biña cu ta ser uza durante e Conmemoracion ta representa?

[Preguntanan di Estudio]

[Plachi na pagina 15]

Hesus a institui e Cena di Señor