Yehova—Un Dios Cu Ta Bale la Pena Conoce

TA POSIBEL cu bo ta perdiendo algo hopi importante den bida? Esei sigur lo ta e caso si bo no sa masha di Dios. Dicon? Pasobra manera miyones di hende a bin compronde, un conocemento di e Dios di Bijbel ta trece gran beneficio den bida. E beneficionan ta cuminsa mesora y nan ta duradero.

Yehova Dios, e Autor di Bijbel, kier pa nos siña conoc’e. El a bisa mediante profeta Isaias: “Pa boso conoce mi y kere mi.” E ta asta bisa cu si nos conoc’e, esei lo ta pa nos mes bon. “Ami ta SEÑOR bo Dios, Kende ta siña bo, pa bo prospera.” Ki beneficio nos ta saca door di conoce Yehova Dios, e Haltisimo?—Isaias 43:10; 48:17; Salmo 83:18.

Un berdadero beneficio ta cu nos ta haya guia pa trata cu problemanan di tur dia, un speransa firme pa futuro y pas mental. Ademas, ora nos conoce Yehova bon esei ta motiva nos pa cultiva un actitud diferente pa cu e preguntanan di mas importante cu hende rond mundo ta confronta awe. Cua esakinan ta?

Bo Bida Tin Proposito?

Apesar di avancenan asombroso den tecnologia, ainda tin hende ta haci nan mes e mesun preguntanan basico: ‘Pakico mi ta aki? Unda mi ta bai? Kico ta e proposito di bida?’ Si un persona no haya contesta satisfactorio riba e preguntanan aki, su bida no tin berdadero proposito. Tin hopi hende cu e problema aki? Un estudio cu nan a haci na Alemania na cabamento di siglo 20 ta mustra cu mita di e personanan cu a contesta sa sinti hopi bes of de bes en cuando cu bida no tin proposito. Kisas caminda bo ta biba tambe ta asina.

Un persona cu no tin un proposito den bida, no tin nada pa e basa su metanan personal ariba. Hopi hende ta purba yena e bashi aki door di busca un carera exitoso of door di acumula rikesa. Sinembargo, e bashi ei por sigui molestia nan. E echo cu un persona no tin proposito den bida por molestia algun hende asina tanto cu nan no kier biba mas. Esei tawata e experencia di un bunita mucha mohe cu segun International Herald Tribune a lanta “den un abundancia fabuloso cu a dun’e tur sorto di derecho y privilegio.” Aunke e tawata biba den luho, e tawata sintie su so y cu su bida no tawatin proposito. El a bebe pildo pa drumi y nan a bin hay’e morto. Podise bo tambe conoce algun hende cu tawata sufri di soledad y cu a muri un morto tragico.

Sinembargo, bo a yega di tende hende bisa cu ciencia por bisa nos tur cos tocante bida? E corant semanal di Alemania, Die Woche, ta indica: “Aunke ciencia por tin rason, pa loke ta cosnan spiritual e ta deficiente. E teoria di evolucion ta yen di buraco, y ni sikiera e ciencia di fisica cu tur su variabelnan impredecibel no ta duna hende ningun clase di consuelo of siguridad.” Descubrimentonan  cientifico a contribui hopi na describi bida den su varios formanan y pa splica e procesonan y ciclonan natural cu ta conserva bida. Toch ciencia no por bisa nos pakico nos ta aki ni unda nos ta bai. Si ta riba ciencia so nos ta depende, nos preguntanan tocante e proposito di bida ta keda sin contesta. Y manera e corant Süddeutsche Zeitung a informa, esei ta pone cu tin “un necesidad extenso pa guia.”

Ken ta den miho posicion pa duna e guia ei, cu no ta e Creador? Siendo cu ta E ta esun cu originalmente a pone hende riba tera, E mester sa dicon nan ta aki. Bijbel ta splica cu Yehova a crea hende pa nan por a yena e tera y cuid’e. Den tur nan actividadnan, hende mester a refleha e cualidadnan di Dios, manera husticia, sabiduria y amor. Unabes nos ta compronde pakico Yehova a crea nos, nos sa pakico nos ta aki.—Genesis 1:26-28.

Kico Abo Por Haci?

Kico si den pasado bo no a haya contesta satisfactorio riba e siguiente preguntanan: ‘Pakico mi ta aki? Unda mi ta bai? Kico ta e proposito di bida?’ Bijbel ta anima bo pa siña conoce Yehova intimamente. De echo, Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” Tambe bo ta ser anima pa cultiva cualidadnan di Dios, specialmente amor, y pone como bo meta personal pa biba bou di su benidero Reino Mesianico. E ora ei lo bo tin un proposito den bida y un speransa maraviyoso y garantisa pa futuro. Tin hopi chens cu lo bo haya contesta riba tur e preguntanan fundamental cu a confundi bo te awor.—Huan 17:3; Eclesiastes 12:13.

Cuantu diferencia e contestanan aki por haci? Hans ta un homber cu por bisa bo esei. * Añanan pasa e tawata kere leu aya den Dios, pero su fe no tawatin ningun efecto riba su bida. E tawata gusta uza droga, anda cu mohenan inmoral, comete crimennan leve y core motorcycle. “Pero mi bida tawata bashi, mi no tawatin berdadero satisfaccion”, e ta splica. Ora Hans tawatin bint’i pico aña, el a dicidi di siña conoce Dios personalmente door di tuma su tempo pa lesa Bijbel. Unabes cu el a siña conoce Yehova intimamente y a compronde kico ta e proposito di bida, Hans a cambia su estilo di bida y a batisa como Testigo di Yehova. E ultimo dies añanan aki el a traha den e sirbishi di tempo completo. E ta bisa francamente: “E miho manera pa biba ta sirbiendo Yehova. No tin nada cu por para banda di esei. Conoce Yehova a duna mi bida proposito.”

Claro cu e proposito di bida no ta e unico cos cu ta precupa hopi hende. Segun cu e condicionnan di mundo ta bai atras, mas y mas hende ta precupa cu un otro asunto importante.

Dicon Esaki A Sosode?

Na momento di calamidad, hopi bes e victimanan ta haci nan mes e pregunta: Dicon esaki a sosode? E habilidad pa trata emocionalmente cu calamidad ta depende hopi di si e victima por haya un bon contesta pa e pregunta ei. Si no tin un contesta satisfactorio, e victima ta sigui sufri y e por bira amarga. Tuma por ehempel e experencia di Bruni.

Bruni, awor un mama di cuarent’i pico aña, ta splica: “Algun aña pasa mi baby a muri. Door cu mi tawata kere den Dios, mi a bai busca consuelo serca pasto. El a bisa mi cu Dios a tuma Susanne den shelo, y cu awor e ta un angelito einan. Henter mi mundo a cai den otro cu morto di mi yiu, y awor mi a cuminsa odia  Dios tambe pasobra t’e a kita mi yiu for di mi.” Bruni su dolor y sufrimento a dura varios aña. El a continua: “Despues, un Testigo di Yehova a mustra mi for di Bijbel cu mi no tawatin motibo pa odia Dios. No ta Yehova a tuma Susanne pa e bai shelo, ni e no a bira angel tampoco. Su malesa tawata resultado di imperfeccion humano. Susanne ta sosega den morto, sperando riba Yehova pa E resucit’e. Tambe m’a siña cu Dios a traha hende pa biba pa semper den un paradijs riba tera, y cu su boluntad lo ser realisa pronto. Unabes mi a cuminsa compronde ki clase di persona Yehova realmente ta, mi a hala mas serca dje, y mi dolor a cuminsa mengua.”—Salmo 37:29; Echonan 24:15; Romanonan 5:12.

Miyones di hende ta ser afecta door di calamidad di un of otro manera: tragedia personal, guera, hamber of desaster natural. Bruni a haya alivio unabes cu el a haya sa for di Bijbel cu Yehova no ta culpabel pa calamidad, cu nunca no tawata su intencion pa hende sufri, y cu pronto lo E pone fin na maldad. E echo so cu maldad ta aumentando ta un señal cu actualmente nos ta bibando den “e ultimo dianan” di e sistema di cosnan aki. E cambio dramatico cu lo trece algo miho cu nos tur ta anhela ta hopi serca.—2 Timoteo 3:1-5; Mateo 24:7, 8.

Siña Conoce Dios

Hans cu Bruni tawatin un idea vago di Dios. Nan a kere den dje sin cu nan tawata sa mucho cos di dje. Ora cu nan a tuma tempo pa haya un conocemento exacto di Yehova, nan esfuersonan a duna fruta. Nan a haya contestanan apropiado pa e preguntanan di mas importante pa nos tempo. Esaki a duna nan pas mental y un speransa sigur pa futuro. Miyones di sirbido di Yehova a experencia mesun cos.

Bo ta siña conoce Yehova door di cuminsa lesa y analisa Bijbel, e buki cu ta conta nos tocante dje y loke E ta rekeri di nos. Esaki ta loke algun hende den e prome siglo a haci. Lucas, historiado y docter, a informa cu e miembronan di e congregacion Hudiu na Berea, Grecia, “a ricibi e palabra [for di Pablo y Silas] cu bon boluntad y tawata scudriña e Scrituranan tur dia, pa mira si e cosnan aki tawata asina.”—Echonan 17:10, 11.

Tambe e cristiannan di prome siglo a reuni hunto den congregacion (of iglesia). (Echonan 2:41, 42, 46; 1 Corintionan 1:1, 2; Galationan 1:1, 2; 2 Tesalonicensenan 1:1) Esei ta e caso tambe awe. Congregacionnan di Testigonan di Yehova ta bini hunto pa reunionnan prepara specialmente pa yuda hende hala serca Yehova y haya goso den sirbie. Asociacion cu Testigonan local tin mas beneficio. Pocopoco un hende ta cuminsa parce e Dios cu e ta adora mas y mas. Mescos tambe, maske ta den un sentido limita, Testigonan di Yehova ta desplega cualidadnan cu Yehova ta manifesta. Pesei si nos ta reuni hunto cu e Testigonan, nos lo siña conoce Yehova mas miho ainda.—Hebreonan 10:24, 25.

Bo ta haya cu esaki ta exigi mucho esfuerso djis pa bo conoce un Persona? Un cos ta sigur, e ta rekeri esfuerso. Pero esei no ta asina tambe den caso di hopi cos cu bo kier logra den bida? Pensa riba e esfuerso cu un gran deportista ta hinca den training. Por ehempel, e ganado di medaya di oro pa ski den e Olimpiada di Francia, Jean-Claude Killy, ta conta cuanto esfuerso bo tin cu haci pa logra exito den competencianan internacional di deporte: “Bo tin cu cuminsa 10 aña prome cu e olimpiada y plania aña tras aña pensando tur dia riba dje . . . E ta un empleo di 365 dia pa aña, mentalmente y fisicamente.” Tur e tempo y esfuerso ei ta pa bo djis competi den un  careda cu por dura solamente dies minuut! Loke nos por logra door di siña conoce Yehova ta hopi mas tanto, y ta asta mas duradero.

Un Relacion Cu Ta Bira Mas y Mas Estrecho

Ken kier perde algo importante den bida? Ningun hende. Pesei, si bo ta sinti cu bo bida ta falta berdadero proposito of bo ta anhela pa un splicacion pakico tin calamidad, determina firmemente pa siña conoce Yehova, e Dios di Bijbel. Si bo siña di dje esei por haci hopi cambio den bo bida, cambionan positivo y pa semper.

Nos lo stop di siña tocante Yehova un dia? Hende cu tin decadanan ta siña tocante Yehova ainda ta keda straña di cosnan cu nan a siña di dje y di e cosnan nobo cu nan ta sigui siña di dje. Ora nos siña di cosnan asina nos ta bira felis y e ta hala nos mas serca Dios. Laga cu nos tambe por ripiti e pensamentonan di apostel Pablo, kende a skirbi: “O profundidad di e rikesanan, tanto di e sabiduria como di e conocemento di Dios! Ki inskrudiñabel su huicionan ta y insondabel su camindanan! Pasobra ta ken a conoce e mente di SEÑOR, of ta ken a bira su consehero?”—Romanonan 11:33, 34.

[Nota]

[Comentario na pagina 5]

Ainda tin hende ta haci nan mes e mesun preguntanan basico: ‘Pakico mi ta aki? Unda mi ta bai? Kico ta e proposito di bida?’

[Comentario na pagina 6]

“Unabes mi a cuminsa compronde ki clase di persona Yehova realmente ta, mi a hala mas serca dje”

[Comentario na pagina 7]

“E miho manera pa biba ta sirbiendo Yehova. No tin nada cu por para banda di esei. Conoce Yehova a duna mi bida proposito”