Storia di Bida

Buscando Prome e Reino: Un Bida Sigur y Felis

SEGUN E RELATO DI JETHA SUNAL

Despues di desayuno nos a tende e anuncio aki na radio: “Testigonan di Yehova ta ilegal, y nan obra a ser prohibi.”

TAWATA aña 1950, y nos tawata cuater mucha mohe di binti pico aña sirbiendo como misionero di Testigonan di Yehova na Republica Dominicana. Nos a yega e aña anterior.

Sirbishi di misionero no tawata semper mi meta den bida. Ta berdad cu na mucha mi tawata bai misa. Pero mi tata a stop di bai misa durante Prome Guera Mundial. Anto e dia cu mi a confirma den Iglesia Episcopal na 1933, obispo a lesa solamente un versiculo for di Bijbel y despues a cuminsa papia tocante politica. Mama a rabia asina tanto cu nunca mas el a bai misa.

Nos Bida Ta Cambia

Mi mayornan William Karl y Mary Adams a haya cinco yiu. E yiu hombernan tawata Don, Joel y Karl. Mi ruman mohe Joy tawata e yiu mas chikito y ami tawata e mayo. Mi mester tawatin mas o menos 13 aña ora cu un dia despues di scol, mi a haya Mama ta lesa un foyeto chikito publica door di Testigonan di Yehova. Su titulo tawata E Reino, e Speransa pa Mundo. “Esaki ta e berdad”, mi mama a bisa mi.

Mama a papia cu nos tur tocante e cosnan cu e tawata siña for di Bijbel. Cu echo y palabra, el a yuda nos compronde e importancia di e conseho di Hesus: “Busca prome e reino di Dios y Su husticia.”—Mateo 6:33.

No ta tur biaha mi kier a scucha. Un biaha mi di: “Mama, stop di predica mi sino mi no ta seca tayo mas pa bo.” Pero cu tacto el a sigui papia cu nos. Regularmente e tawata bai cu nos tur na e studio di Bijbel cu a ser teni na cas  di Clara Ryan, kende tawata biba pega cu nos cas na Elmhurst, Illinois, Merca.

Clara tawata duna les di piano tambe. Un biaha pa aña e tawata laga su alumnonan duna un presentacion publico, y e tawata uza e oportunidad ei pa papia tocante e Reino di Dios y di e speransa di resureccion. Como cu mi tawata interesa den muzik—mi tawata tuma les di violin for di tempo cu mi tin shete aña—mi a scucha loke Clara a bisa.

No a tarda hopi cu ami cu mi rumannan a cuminsa asisti hunto cu Mama na e reunionnan di congregacion den parti west di Chicago. Esei tawata un careda largo cu bus y tram, pero esei a siña nos for di jong kico kiermen busca prome e Reino. Na 1938, tres aña despues cu Mama a batisa, mi a bai cu ne na un congreso di Testigonan di Yehova na Chicago. Chicago tawata un di e 50 stadnan cu a sigui e mesun programa via radiotelefon. Loke mi a tende a touch mi curason.

Sinembargo, mi amor pa muzik tambe tawata trek mi curason. Na 1938 mi a caba scol secundario, y Tata a haci areglo pa mi bai studia na e Conservatorio Mericano di Muzik na Chicago. Asina ta cu, durante e siguiente dos añanan mi a siña muzik, mi a toca den dos orkesta y mi tawata pensa pa sigui un carera den muzik.

Mi maestro di violin, Herbert Butler, a bandona Europa pa e bin biba na Merca. Pesei mi a dun’e e foyeto chikito Refugiadonan, * pensando cu kisas lo e les’e. Anto berdad el a les’e, y despues di mi les e siguiente siman, e di: “Jetha, bo ta toca bon, y si bo sigui cu bo lesnan, lo bo por haya un trabou den un orkesta di radio of como maestra di muzik. Pero mi kier sa cu bo curason ta den esaki (e tawata mishi pensativamente cu e foyeto). Dicon bo no ta haci esaki e carera di bo bida?”

Mi a pensa seriamente riba esei. En bes di sigui bai scol, mi a acepta Mama su invitacion pa bai e congreso di Testigonan di Yehova na Detroit, Michigan, na juli 1940. Nos a keda den tent den e campamento temporal cu nan a traha pa trailer y tent. Claro cu mi violin no por a keda atras, y mi a toca den e orkesta di congreso. Pero na e campamento mi a topa  hopi pionero (predicadonan di tempo completo). Nan tur tawata masha felis. Mi a dicidi di batisa y yena un solicitud pa sirbishi di pionero. Mi a resa pidi Yehova yuda mi sigui den sirbishi di tempo completo pa e resto di mi bida.

Mi a cuminsa traha pionero den mi pueblo natal. Despues mi a sirbi na Chicago. Na 1943, mi a muda bai Kentucky. E zomer ei, djis prome cu e congreso di districto, mi a ricibi un invitacion pa asisti na e di dos klas di Scol di Galad. Einan lo mi a ricibi training pa e trabou di misionero. E klas lo a cuminsa na september 1943.

Durante congreso e zomer ei, mi a keda serca un Testigo cu a bisa mi cu mi por tuma loke mi kier for di e pañanan di su yiu mohe. Su yiu mohe a drenta servicio militar, y el a bisa su mama pa duna hende tur su cosnan. Pa mi, e percuracionnan aki tawata un cumplimento di loke Hesus a priminti: “Ma busca prome e reino di Dios y Su husticia, y tur e cosnan aki lo wordo añadi na boso.” (Mateo 6:33) E cinco lunanan na Galad a pasa masha lihe, y ora mi a caba e scol dia 31 di januari 1944, mi tawata ansioso pa drenta e sirbishi di misionero.

Nan Tambe A Scohe Sirbishi di Tempo Completo

Mama a drenta den sirbishi di pionero na 1942. E tempo ei mi otro rumannan ainda tawata bai scol. Hopi bes Mama tawata topa cu nan despues di scol y bai cu nan den sirbishi di veld. Tambe el a siña nan yuda cu trabou di cas. Hopi bes e mes tawata keda anochi te laat lanta pa strica y haci otro trabou necesario ya asina e por a sali den sirbishi den dia.

Na januari 1943, mientras cu mi tawata traha pionero na Kentucky, mi ruman homber Don tambe a cuminsa traha pionero. Esaki a decepciona mi tata, pasobra el a spera cu tur su yiunan lo a caba universidad mescos cu ne y mi mama. Despues cu Don tawatin casi dos aña ta traha pionero, el a haya invitacion pa sigui cu su sirbishi di tempo completo como parti di e personal di e sede mundial di Testigonan di Yehova na Brooklyn, New York.

Joel a cuminsa traha pionero na juni 1943, mientras e tawata biba na cas ainda. E tempo ei el a purba combence Tata pa bai un congreso, pero e no a logra. Sinembargo, despues cu Joel a purba cuminsa maske ta un studio di Bijbel den e teritorio pero sin exito, Tata a bai di acuerdo pa Joel studia cu ne den e buki “E Berdad Lo Haci Boso Liber.” Tata tawata contesta e preguntanan facilmente, pero el a insisti pa Joel mustr’e den Bijbel e loke e buki tawata bisa. Esaki a yuda combence Joel mas di e berdad.

Joel a spera cu e Hunta di Servicio Militar Obligatorio cu a duna Don despensacion como minister religioso lo a haci mescos cu ne. Pero ora e hunta a mira con jong Joel su cara tawata, nan a nenga di clasific’e como minister religioso y a manda un notificacion p’e pa presenta pa servicio militar. Ora el a nenga di presenta, nan a saca un orden di aresto contra dje. Despues cu FBI a localis’e, el a pasa tres dia den prizon di Cook County.

Tata a uza nos cas como borg pa e por a haya libertad bou di fiansa. Despues di esei, el a haci mescos pa otro Testigonan jong cu a enfrenta e mesun situacion. E inhusticia di e asunto a pone mi tata rabia masha, y el a bai Washington, D.C., hunto cu Joel pa wak si ta posibel apela e caso. Finalmente, Joel a haya su clasificacion como minister religioso, y nan a cansela e caso. Mi tata a skirbi mi caminda mi tawata sirbi como misionero: “Mi kier sa cu nos  tin cu duna Yehova merito pa e victoria aki!” Pa fin di augustus 1946, Joel tambe a haya invitacion pa sirbi como un miembro di e sede mundial na Brooklyn.

Karl a traha pionero varios biaha durante facansi di scol prome cu el a caba scol secundario na principio di 1947 y a cuminsa cu e sirbishi di pionero regular. E tempo ei Tata su salu no tawata bon, pesei Karl a keda yud’e cu su negoshi pa un tempo prome cu el a bai traha pionero na un otro luga. Na final di 1947, Karl tambe a cuminsa sirbi hunto cu Don y Joel na e sede na Brooklyn como miembro di e famia di Betel.

Ora Joy a caba scol secundario, e tambe a cuminsa traha pionero. Anto na 1951 el a join su ruman hombernan na Betel. El a traha den limpiesa y tambe den e Departamento di Abonament. Na 1955 el a casa cu Roger Morgan, un otro miembro di e famia di Betel. Un shete aña despues nan a bandona Betel ya cu nan kier a forma un famia. Cu tempo nan a lanta dos yiu, cu tambe ta sirbi Yehova.

Ora cu tur yiu tawata den sirbishi di tempo completo, Mama a duna Tata e animacion cu e tawatin mester, y asina Tata tambe a dedica su bida na Yehova y a batisa na 1952. Pa 15 aña largo, te na su morto, el a demostra di ta masha ingenioso den busca maneranan pa comparti e berdad di Reino cu otro hende, maske malesa tawata strob’e.

Despues cu pa un periodo cortico Mama a stop di traha pionero debi na Tata su malesa, el a sigui cu e trabou te na su morto. Nunca e no a core auto ni bais. E tawata un persona cortico, y a cana bai tur caminda, hopi bes leu den cunucu, pa conduci studio di Bijbel.

Den e Trabou di Misionero

Despues cu nos a caba Scol di Galad, un grupo di nos a traha pionero pa un aña nort di New York City te ora cu nos a bin cla cu nos papelnan pa biaha. Finalmente, na 1945 nos a sali bai nos asignacion, Cuba, caminda pocopoco nos a ahusta na un bida nobo. E hendenan a reacciona bon riba nos predicacion, y pronto nos tur tawata conduci hopi studio di Bijbel. Nos a sirbi einan pa varios aña. Despues nos asignacion a cambia pa Republica Dominicana. Un dia mi a topa un señora cu a roga mi pa bai bishita un cliente di dje, un señora Frances cu yama Suzanne Enfroy, cu kier a siña compronde Bijbel.

Suzanne tawata Hudiu, y ora Hitler a invadi Francia, su casa a manda e cu nan dos yiunan na un otro pais. Suzanne a cuminsa comparti loke e tawata siña mesora cu otro hende. Prome el a papia cu e señora cu a pidi mi bishit’e, despues cu Blanche, un amiga di Francia. Ambos señora a haci progreso te batisa.

Suzanne a puntra mi: “Kico mi por haci pa yuda mi yiunan?” Su yiu homber tawata studia  pa docter y esun mohe tawata siña ballet y a spera di balia un dia na e teatro Radio City Music Hall na New York. Suzanne a regala nan abonament riba E Toren di Vigilancia y Spierta! Como resultado, Suzanne su yiu homber, casa di e yiu y e ruman mohe morocho di e casa, tur a bira Testigo. Suzanne su casa, Louis, tawata spanta pa e interes cu su esposa tawatin den Testigonan di Yehova ya cu gobierno di Republica Dominicana pa e tempo ei a prohibi nos trabou. Pero despues cu henter e famia a muda bai Merca, e tambe a bira Testigo cu tempo.

Bou di Prohibicion Pero Sirbiendo Keto Bai

Aunke e trabou di predica di Testigonan di Yehova a ser prohibi na Republica Dominicana djis despues cu nos a ser asigna einan na 1949, nos tawata dicidido pa obedece Dios como Gobernante mas cu hende. (Echonan 5:29) Nos a sigui busca e Reino di Dios prome door di laga hende conoce e bon noticia tocante dje, manera Hesus a instrui su siguidonan pa haci. (Mateo 24:14) Sinembargo, nos a siña con pa ta “cauteloso manera colebra y inocente manera paloma”, segun cu nos a haci nos trabou di predica. (Mateo 10:16) Por ehempel, mi violin a resulta di ta un gran yudansa. Mi tawata bai cu ne ora mi ta conduci studio di Bijbel. Mi studiantenan no a bira tocado di violin, pero si varios famia a bira sirbido di Yehova!

Despues cu nan a prohibi e trabou di predica, nos cuater mucha muhe—ami, Mary Aniol, Sophia Soviak y Edith Morgan—a muda di e cas di misionero na San Francisco de Macorís bai esun situa den sucursal na e capital, Santo Domingo. Pero tur luna mi tawata bai nos asignacion original pa duna les di muzik. Door di esei mi por a transporta den mi tas di violin alimento spiritual pa nos rumannan cristian y bini bek cu e raport di nan actividad di predica.

Ora cu e rumannan di San Francisco de Macorís a ser encarsela na Santiago pa motibo di nan neutralidad cristian, nan famianan a pidi mi hiba placa pa nan y, si ta posibel Bijbel, y tambe bini bek cu noticia pa nan famia. Ora cu e bewakernan na e prizon di Santiago a mira mi cu mi tas di violin, nan a puntra mi kico mi ta bai haci cu ne. Mi a contesta nan: “Pa entretene nan.”

Entre e canticanan cu mi a toca tawatin uno cu un Testigo a skirbi tempo e tawata den un campo di consentracion Nazi. Awor e cantica ei ta number 29 den e buki di cantica di Testigonan di Yehova. Mi a toc’e pa asina nos rumannan encarsela por a siña cant’e.

Mi a haya sa tambe cu nan a transferi hopi di e Testigonan pa un boerderij cu a pertenece na Trujillo, e cabes di gobierno. Nan di cu mi cu e tawata situa pega cu e ruta di bus. Pesei rond di merdia, mi a baha for di bus y puntra  con pa yega einan. E doño di un tienda chikito a mustra mi un careda di sero y a bisa cu e luga ta tras di nan. El a ofrece mi su cabai y un mucha homber pa hiba mi einan, basta mi laga mi violin como borg.

Ora nos a pasa e seronan, nos mester a crusa un riu, ami cu e mucha sinta riba e cabai segun cu e cabai a landa pa crusa e riu. Einan nos a mira un trupa di lora, cu nan plumanan berde y blou ta briya den solo. Esta un bista bunita! Mi a resa: “Danki Yehova, cu bo a traha nan asina bunita.” Porfin, banda di cuat’or di atardi, nos a yega na e boerderij. E solda encarga, bondadosamente a laga mi papia cu e rumannan, y el a laga mi duna nan e cosnan cu mi a trece pa nan, asta un Bijbel chikito.

Ora nos tawata bai bek, mi a resa henter caminda, pasobra awor tawata scur. Nos a yega bek na e tienda papa muha di awasero. Como cu e ultimo bus a bai caba, mi a pidi e doño di e tienda pa para un truck cu tawata pasa. Pero tawata safe pa mi bai cu e dos hombernan den e truck? Un di nan a puntra mi: “Bo conoce Sophie? E tawata studia cu mi ruman mohe.” Mi a dicidi cu esaki tawata Yehova su contesta riba mi oracion! Nan a hiba mi sano y salvo Santo Domingo.

Na 1953, mi tawata entre e grupo di Republica Dominicana cu a asisti na e congreso internacional di Testigonan di Yehova na Yankee Stadium na New York. Henter mi famia tawat’ei, incluso mi tata. Despues di un informe tocante con e trabou di predica ta progresando na Republica Dominicana, ami cu Mary Aniol, mi compañera misionero, tawatin un demostracion chikito riba programa cu a mustra con nos ta predica bou di prohibicion.

Gosonan Special di e Trabou Biahero

E zomer ei mi a topa Rudolph Sunal, cu a bira mi casa e siguiente aña. Su famia a bira Testigo na Allegheny, Pennsylvania, djis despues di Prome Guera Mundial. Despues di tawata encarsela pa su posicion cristian di neutralidad durante Segundo Guera Mundial, el a bai Betel na Brooklyn, New York. Poco despues cu nos a casa el a haya e invitacion pa bishita e congregacionnan como un superintendente biahero. Pa e siguiente 18 añanan mi a compañ’e den e trabou di sircuito.

Nos sirbishi a hiba nos entre otro na Pennsylvania, West Virginia, New Hampshire y Massachusetts. Por lo general nos tawata keda na cas di nos rumannan cristian. Tawata un goso special pa siña conoce nan bon y sirbi Yehova hunto cu nan. E amor y hospitalidad cu nan a mustra nos semper tawata caloroso y sinsero. Despues cu Joel a casa cu mi excompañera misionero Mary Aniol, nan a sirbi tres aña den e trabou biahero, bishitando congregacionnan na Pennsylvania y Michigan. Despues di esei, na 1958, Joel a bolbe haya invitacion pa bira un miembro di e famia di Betel, e biaha aki hunto cu Mary.

 Karl tawatin mas o menos shete aña na Betel ora nan a asign’e pa un par di luna na e trabou di sircuito pa e haya mas experencia. Despues di esei el a bira instructor na e Scol di Galad. Na 1963 el a casa cu Bobbie, kende a sirbi fielmente na Betel te na su morto na october 2002.

Durante e hopi añanan cu e tawata na Betel, Don a biaha tempo tempo pa otro paisnan pa sirbi esnan cu ta traha na oficinanan di sucursal y den e trabou di misionero. Su asignacion a hib’e na Oriente, Africa, Europa y varios parti di e continente di America. Hopi bes Don su casa fiel, Dolores, sa bai hunto cu ne.

Nos Circunstancianan Ta Cambia

Despues di tawata malo pa hopi tempo, mi tata a muri, pero prome cu esei el a bisa mi cu e ta masha contento cu nos a scohe pa sirbi Yehova Dios. E di cu nos a ricibi hopi mas tanto bendicion cu nos lo a haya si nos a busca un educacion di universidad manera e tawatin pensa pa nos. Despues cu mi a yuda Mama paketa pa bai biba na un luga mas serca di mi ruman mohe Joy, ami cu mi casa a acepta varios asignacion di pionero den e parti di Merca cu yama New England, ya asina nos por ta serca di mi casa su mama, cu e tempo ei tawatin mester di nos yudansa. Despues cu su mama a muri, mi mama a biba 13 aña hunto cu nos. Anto dia 18 di januari 1987, el a termina su asignacion riba tera na edad di 93 aña.

Hopi biaha ora amigonan tawata elogi’e cu el a cria tur su yiunan pa stima y sirbi Yehova, Mama tawata contesta modestamente: “Simplemente mi a haya bon ‘tera’ pa traha cu ne.” (Mateo 13:23) Ta un berdadero bendicion cu nos tawatin mayornan temeroso di Dios cu a pone un bon ehempel di celo y humildad pa nos.

Ainda e Reino Ta na Prome Luga

Nos a sigui pone e Reino di Dios na prome luga den nos bida y a purba aplica Hesus su conseho pa compartie cu otro hende. (Lucas 6:38; 14:12-14) Yehova na su turno a percura generosamente pa nos necesidadnan. Nos tawatin un bida sigur y felis.

Ami cu Rudy no a perde nos amor pa muzik. Nos ta pasa masha dushi ora cu otro rumannan cu tambe ta stima muzik ta bishita nos cas pa pasa un anochi ameno y pa toca nos instrumentonan hunto. Pero muzik no ta mi carera. E ta un placer adicional den mi bida. Awor ami cu mi casa ta disfruta di mira e fruta di nos sirbishi di pionero, e hendenan cu nos a yuda den transcurso di añanan.

Apesar cu actualmente nos ta sufri di kebranto di salu, mi por bisa cu nos bida tawata masha felis y sigur durante e mas cu 60 añanan aki di sirbishi di tempo completo. Tur mainta ora mi lanta, mi ta gradici Yehova cu el a contesta e oracion cu mi a haci ora cu mi a drenta e sirbishi di tempo completo asina hopi aña pasa, y mi ta pensa: ‘Bon, con mi por busca e Reino prome awe?’

[Nota]

[Plachi na pagina 24]

Nos famia na 1948 (di robes pa drechi): Joy, Don, Mama, Joel, Karl, ami y Tata

[Plachi na pagina 25]

Mama a pone un ehempel di celo den sirbishi

[Plachi na pagina 26]

Karl, Don Joel, Joy y ami awe, mas cu 50 aña despues

[Plachi na pagina 27]

Di robes pa drechi: Ami, Mary Aniol, Sophia Soviak y Edith Morgan como misionero na Republica Dominicana

[Plachi na pagina 28]

Ami cu Mary (banda robes) na Yankee Stadium, 1953

[Plachi na pagina 29]

Hunto cu mi casa tempo cu e tawata den e trabou di sircuito