“Mi A Haya Tur Loke Mi Tawatin Mester”

DEPRESION, segun un raport di Organisacion Mundial di Salu, actualmente ta afecta mas cu 120 miyon hende rond mundo. Tur aña, un miyon hende ta comete suicidio y entre 10 pa 20 miyon ta purba pone fin na nan bida. Ki yudansa tin pa hende cu ta sufri di depresion? Tratamento medico kisas ta alivia e sufrimento, y apoyo emocional ta masha importante. Un cos mas cu a yuda algun hende cu tin depresion ta e informacion practico cu tin den e publicacionnan biblico di Testigonan di Yehova, manera e siguiente carta di Francia ta mustra.

“No mucho tempo pasa, mi no por a mira pakico mi mester sigui biba. Mi a resa pidi Dios laga mi muri. Tawata como si fuera mi paden tawata morto. En busca di guia, mi a resa cu fervor na Yehova. Tambe mi a dicidi di lesa e Anuario 2002 di Testigonan di Yehova y a cab’e den tres dia. Mi tin cu bisa cu el a curasha mi masha hopi mes y a fortifica mi fe.

Tambe mi a bai busca informacion den e revistanan Toren di Vigilancia y Spierta!, y mi a haya un gran sorpresa. Mi tin mas cu 15 aña ta lesa e revistanan aki regularmente, pero nunca mi no a realisa con animante y interesante e articulonan ta. Nan ta yen di amor, un cualidad cu ta masha scars den e tempo aki. Mi a haya tur loke mi tawatin mester.”

Bijbel ta bisa: “SEÑOR ta serca di e hende di curason kibra, y ta salba esnan di spirito abati.” (Salmo 34:18) Sin duda, tur hende “di curason kibra” of di “spirito abati” por haya animacion y un speransa pa futuro den Bijbel. Testigonan di Yehova ta reparti literatura basa riba Bijbel pa yuda hende cu ta den necesidad beneficia di e fuente di consuelo ei cu Dios a inspira.