Nan A Triunfa Riba Persecucion

FRIEDA JESS a nace na Dinamarca na 1911. Despues e cu su mayornan a muda bai Husum den nort di Alemania. Añanan despues el a haya un trabou na Magdeburg, y na 1930 el a batisa como un Studiante di Bijbel, manera Testigonan di Yehova tawata conoci e tempo ei. Hitler a subi na poder na 1933, y pa Frieda e suseso aki tawata e comienso di 23 aña di maltrato na man di no un, sino dos gobierno totalitario.

Na maart 1933 gobierno Aleman a proclama un eleccion general. Dr. Detlef Garbe, hefe di e museo Conmemorativo di Campo di Consentracion Neuengamme serca di Hamburg, a splica: “E socialistanan nacional kier a obliga un gran mayoria pa apoya nan cansiyer y führer [lider], Adolf Hitler.” Testigonan di Yehova a sigui Hesus su spiertamento pa keda neutral den asuntonan politico y ‘no ser parti di mundo’, pesei nan no a vota. Cu ki resultado? E obra di e Testigonan a ser prohibi.—Huan 17:16.

Frieda a sigui cu su actividadnan cristian secretamente, y asta a yuda imprimi e revista Toren di Vigilancia. El a bisa: “Algun di e revistanan a drenta di contrabanda den campo di consentracion pa nos rumannan den fe.” Gestapo a aresta Frieda na 1940 y a interog’e, despues el a ser encarsela pa varios luna su so den un cel. Con el a logra persevera? El a bisa: “Oracion tawata mi refugio. Mi tawata cuminsa haci oracion for di mainta tempran y a haci oracion varios biaha pa dia. Oracion a duna mi fortalesa y a yuda mi pa mi no precupa di mas.”—Filipensenan 4:6, 7.

Frieda a sali liber, pero na 1944 Gestapo a bolbe arest’e. E biaha aki nan a sentenci’e na shete aña den prizon Waldheim. Frieda a sigui conta: “E wardadonan di preso a pone mi limpia e bañonan hunto cu otro hende mohe. Door cu hopi bes mi tawata hunto cu un preso di Checoslovakia, mi a papia hopi cu ne tocante Yehova y tocante mi creencianan religioso. E combersacionnan ei a tene mi fuerte den fe.”

Liber Pero No pa Hopi Tempo

Prizon Waldheim a ser libera door di tropanan Sovietico na mei 1945, y Frieda a sali liber y por a bolbe na Magdeburg y na su sirbishi publico, pero no pa hopi tempo. E Testigonan a bolbe bira e blanco di trato inhusto, e biaha aki na man di autoridadnan den e Zona di Ocupacion Sovietico. Gerald Hacke di e Instituto Hannah-Arendt pa Investigacion di Totalitarismo a skirbi: “Testigonan di Yehova tawata un di e poco  gruponan social cu a ser persigui casi continuamente na man di ambos dictadura den teritorio Aleman.”

Pakico nan a bolbe sufri di descriminacion religioso? Atrobe e cuestion principal tawata neutralidad cristian. Na 1948, Alemania Oriental a tene un referendum, un votamento direct door di pueblo, y manera Hacke a splica, “e causa fundamental [di e persecucion di Testigonan di Yehova] tawata cu nan no a participa den e referendum.” Na augustus 1950, gobierno a prohibi e obra di Testigonan di Yehova na Alemania Oriental. Centenares di Testigo a ser aresta, entre nan Frieda.

Frieda tawata atrobe den corte y a ser sentencia na seis aña di prizon. El a bisa: “E biaha aki mi tawata hunto cu rumannan den fe, y e asociacion tawata un gran yudansa.” Despues cu el a sali liber na 1956, el a muda bai Alemania Occidental. Frieda, di 90 aña, ta biba awor na Husum y ainda e ta sirbi e Dios berdadero, Yehova.

Frieda a sufri 23 aña di persecucion bou di dos dictadura. El a bisa: “E nazinan a purba caba cu mi fisicamente; e comunistanan a purba kibra mi moral. Unda mi a saca e fortalesa pa persevera? Bon custumber di studia Bijbel tempo cu mi tawatin libertad, oracion constante tempo mi tawata sera mi so, asociacion cu rumannan den fe ki ora cu tawata posibel, y tur chens cu mi a haya mi a comparti mi creencianan cu otro hende.”

Fasismo na Hungria

Un otro pais caminda Testigonan di Yehova a soporta hopi aña di descriminacion religioso tawata Hungria. Algun Testigo a haya nan cu persecucion na man di no dos, sino tres regimen totalitario. Un ehempel ta Ádám Szinger. Ádám a nace na Paks, Hungria, na 1922 y a lanta como protestant. Na 1937 algun Studiante di Bijbel a bishita Ádám su cas, y umbes el a mustra interes den nan mensahe. Loke el a siña for di Bijbel a combenc’e cu e siñansanan di su iglesia no tawata biblico. Pesei el a bandona Iglesia Protestant y a join e Studiantenan di Bijbel den nan sirbishi publico.

E influencia di fasismo tawata crece na Hungria. Na diferente ocasion, ora polis a mira Ádám ta predica di cas pa cas, nan a bai warda cu ne pa interog’e. E presion riba e Testigonan a bira mas fuerte, y na 1939 nan actividadnan a ser prohibi. Na 1942 nan a aresta Ádám, hib’e prizon y batie mal bati. Teniendo 19 aña di edad, kico a yud’e soporta e sufrimento y e lunanan den prizon? Ádám a bisa: “Tempo mi tawata na cas ainda, mi a studia Bijbel cuidadosamente y a haya un comprondemento solido di e propositonan di Yehova.” Ta despues cu Ádám a sali for di prizon el a batisa porfin como un Testigo di Yehova. Y esei a tuma luga den scuridad di anochi na augustus 1942 den un riu serca di su cas.

Prizon na Hungria, y Campo di Trabou Forsa na Serbia

Mientrastanto, durante segundo guera mundial, Hungria a join cu Alemania contra Union Sovietico, y den herfst di 1942, nan a manda yama Ádám pa servicio militar. E ta conta: “Mi a declara cu mi no por a sirbi como militar debi na loke mi a siña for di Bijbel. Mi a splica nan mi posicion neutral.” Nan a sentenci’e na 11 aña di prizon. Pero Ádám no a keda pa hopi tempo na Hungria.

Na 1943 autoridadnan a recohe alrededor di 160 Testigo di Yehova, pone nan riba barco y transporta nan via Riu Danube pa Serbia. Ádám tawata entre nan. Na Serbia e presonan aki tawata awor bou di control di e Tercer Reino di Hitler. Nan a hiba nan na e campo di trabou forsa na Bor y a obliga nan traha den un mina di coper. Mas o menos un aña despues, nan a ser transporta bek pa Hungria, caminda tropanan Sovietico a libra Ádám den lente di 1945.

Hungria bou di Control Comunista

Pero libertad no a dura. Pa fin di decada di 1940, autoridadnan comunista na Hungria a restringi e actividadnan di Testigonan di Yehova, mescos cu e regimen fasista a haci prome cu guera. Na 1952, Ádám, cu awor tawatin 29 aña y tawata casa, cu dos yiu, a ser aresta y acusa  atrobe ora el a nenga di drenta servicio militar. Ádám a splica corte: “Esaki no ta e prome biaha cu mi a nenga di drenta servicio militar. Durante guera, nan a sera mi y deporta mi pa Serbia pa e mesun motibo. Mi ta nenga di drenta servicio militar pa motibo di mi consenshi. Mi ta un Testigo di Yehova, y mi ta keda neutral den asuntonan politico.” Ádám su sentencia tawata ocho aña di prizon, y despues a ser reduci na cuater aña.

Ádám a sigui hay’e cu descriminacion religioso te meimei di decada di 1970, mas cu 35 aña despues cu Studiantenan di Bijbel a bishita cas di su mayornan pa prome bes. Durante henter e tempo ei, el a ser sentencia na 23 aña di prizon door di seis corte, y a ser encarsela den por lo menos dies prizon y campo. El a wanta persecucion continuo bou di tres regimen: fasismo na Hungria prome cu segundo guera mundial, socialismo nacional Aleman na Serbia y comunismo na Hungria durante guera friu.

Ádám ta biba ainda den su stad natal Paks, sirbiendo Dios lealmente. Ta cierto habilidad extraordinario e tawatin cu e por a soporta e dificultadnan ei na un manera asina triunfante? No. El a splica:

“Studia Bijbel, haci oracion y asocia cu rumannan den fe tawata vital. Pero lo mi kier a enfatisa dos otro cos. Prome, Yehova ta e Fuente di fortalesa. Un relacion intimo cu ne tawata mi salbabida. Y di dos, mi a keda corda riba Romanonan capitulo 12, cu ta bisa: ‘No venga boso mes.’ Pesei nunca mi no a carga rencor. Varios biaha mi a haya chens di tuma represaya contra esnan cu a persigui mi, pero nunca mi no a hacie. Nos no mester uza e fortalesa cu Yehova ta duna nos pa paga malo cu malo.”

Fin di Tur Persecucion

Awor Frieda y Ádám por adora Yehova sin problema. Pero kico nan experencia ta revela tocante persecucion religioso? Cu tal persecucion no tin exito, por lo menos no contra cristiannan berdadero. Aunke ora autoridadnan tawata persigui Testigonan di Yehova nan a gasta hopi recurso y a causa sufrimento cruel, e persecucion no a logra su meta. Awe, Testigonan di Yehova ta prospera na Europa caminda un tempo e dos gran dictaduranan tawata domina.

Con e Testigonan a reacciona riba persecucion? Manera e relatonan di Frieda y Ádám ta mustra, nan a aplica e conseho biblico: “No laga malo vence bo, ma mas bien vence malo cu bon.” (Romanonan 12:21) Di berdad bon por vence malo? Si, ora cu e ta compaña pa un fe firme den Dios. E victoria di Testigonan di Yehova riba persecucion na Europa tawata un victoria di Dios su spirito. E tawata un demostracion di e poder pa haci bon cu ta resulta di e fe cu spirito santo ta produci den cristiannan humilde. (Galationan 5:22, 23, NW) Den e mundo violento djawe esei ta un les cu tur hende mester tuma na pecho seriamente.

[Plachi na pagina 5]

Frieda Jess (awor Thiele) tempo cu el a ser aresta, y awor

[Plachi na pagina 7]

Ádám Szinger tempo e tawata den prizon, y awor