Persecucion Religioso Pakico?

BO TA kere cu hende mester ser persigui pa motibo di nan religion? Probablemente cu no, a lo menos basta cu nan no ta interferi cu e derechonan di otro hende. Sinembargo, persecucion religioso a cuminsa for di hopi tempo pasa y e ta existi ainda. Por ehempel, durante henter siglo 20 frecuentemente hende a trapa e derechonan di hopi Testigo di Yehova na Europa y na otro partinan di mundo y tambe a maltrata nan cruelmente.

Durante e tempo ei Testigonan di Yehova a sufri persecucion brutal, premedita y prolonga bou di tur e dos regimennan totalitario principal na Europa. Kico nan experencia ta siña nos tocante persecucion religioso? Y kico nos por siña di e manera cu nan a reacciona riba sufrimento?

“No Ta Parti di Mundo”

Testigonan di Yehova ta haci esfuerso pa nan ta hendenan moralmente recto, trankil y cu ta obedece lei. Nan no ta bai contra gobierno ni busca conflicto cu nan. Tampoco nan no ta proboca persecucion djis pasobra nan lo kier ta martir. E cristiannan aki ta neutral den asuntonan politico. Esaki ta na harmonia cu e palabranan di Hesus: “[Mi sirbidonan] no ta parti di mundo, mescos cu ami no ta parti di mundo.” (Huan 17:16, NW) Mayoria gobierno ta acepta e posicion neutral di Testigonan di Yehova. Pero gobernantenan totalitario no ta respeta e rekisito di Bijbel cu ta mustra cu cristiannan no mester ta parti di mundo.

 E motibo pa esaki a ser splica durante un conferencia na Universidad di Heidelberg, Alemania, na november 2000. E tema di e conferencia tawata “Represion y Reconocemento di Nan Derechonan: Testigonan di Yehova bou di Dictadura di Socialismo Nacional y di Comunismo.” Dr. Clemens Vollnhals di e Instituto Hannah-Arendt pa Investigacion di Totalitarismo a remarca: “Regimennan totalitario no ta limita nan actividadnan na politica. Nan ta exigi sumision absoluto di cada persona.”

Cristiannan berdadero no por entrega henter nan ser na un gobierno humano, ya cu nan a hura di duna lealtad absoluto na Yehova Dios so. Testigonan cu a biba bou di dictaduranan totalitario a descubri cu tin biaha tin un conflicto entre e exigencianan di Estado y e rekisitonan di nan creencianan religioso. Kico nan a haci ora nan a confronta tal conflicto? Historia ta mustra cu Testigonan di Yehova a aplica e principio cu e disipelnan di Hesucristo a expresa: “Nos mester obedece Dios mas cu hende.”—Echonan 5:29.

Miles di Testigo a keda leal na nan creencianan religioso y tambe neutral den asuntonan politico, apesar di e persecucion di mas cruel. Con nan a logra persevera? Unda nan a saca e fortalesa pa haci esei? Laga nan mes contesta. Y laga nos wak kico tur hende, sea cu nan ta Testigo of no, por siña for di nan experencia.

[Comentario na pagina 4]

Testigonan di Yehova na Alemania a sufri persecucion brutal y prolonga bou di ambos regimen totalitario di siglo 20

[Comentario na pagina 4]

“Regimennan totalitario no ta limita nan actividadnan na politica. Nan ta exigi sumision absoluto di cada persona.”—Dr. Clemens Vollnhals

[Plachi na pagina 4]

Famia Kusserow a perde nan libertad pasobra nan no kier a compromete nan fe

[Plachi na pagina 4]

Johannes Harms a ser ehecuta den un prizon nazi pa motibo di su creencianan